1. Ebɛnadze nye sunsum afamu paradise no, na ebɛnadze na ɔsɛ dɛ yesi hɛn bo dɛ yɛbɛyɛ?

 PARADISE bi wɔ asaase yi do ndɛ; nyimpa ahyɛ mu ma na hɔn enyi aber robɔ ndwuma pa ho mbɔdzen ma ɔnnyɛ agor. Nyimpa ɔpepem pii a wɔwɔ mu no wɔ asomdwee mapa. Hɔn a wɔwɔ dɛm paradise yi mu no esi hɔn bo dɛ worimmfi mu da. Afei so, wɔpɛ dɛ nkorɔfo pii bɛka hɔnho wɔ dɛm bea soronko yi. Ebɛn paradise na yɛreka ho asɛm yi? Ɔyɛ sunsum afamu paradise! a

2. Ebɛnadze na ɔma sunsum afamu paradise no yɛ nwanwa?

² Enyitan na etsirmɔdzensɛm ahyɛ Satan no wiadze bɔn yi mu ma, na iyi ma no mu yɛ hu. Naaso, dza ɔyɛ nwanwa nye dɛ Jehovah aka n’asomfo abɔ mu na koryɛ na asomdwee wɔ hɔn ntamu. (1 John 5:19; Nyi. 12:12) Hɛn Nyankopɔn a ɔdɔ hɛn no hu ndzɛmba a odzi hɛn ewu wɔ dɛm wiadze bɔn yi mu, na ɔbɔ hɛn ho ban ma yɛkɔ do dze enyigye som no. Nyankopɔn n’Asɛm no ka dɛm sunsum afamu paradise yi ho asɛm dɛ ɔyɛ “guandɔbea” nye “ture a woegugu mu nsu.” (Isa. 4:6; 58:11) Ɔwɔ mu dɛ yɛtse ewiei mber a no mu yɛ dzen mu dze, naaso osiandɛ Jehovah ehyira hɔn a wɔwɔ sunsum afamu paradise yi mu ntsi, wɔwɔ enyigye na hɔnho tɔ hɔn.—Isa. 54:14; 2 Tim. 3:1.

3. Ebɛn kwan do na nkɔnhyɛ a ɔwɔ Isaiah tsir 65 no nyaa ne mbamu wɔ tsetse mber mu?

³ Jehovah nam nkɔnhyɛnyi Isaiah do kaa biribi faa mbrɛ asetsena bɛyɛ ama hɔn a wɔbɛtsena sunsum afamu paradise no mu no ho. Ibohu dɛm asɛm yi wɔ Isaiah tsir 65. Asɛm a ɔkae no dzii kan nyaa ne mbamu wɔ afe 537 A.H.B. Dɛm aber no, Jehovah gyee Jewfo a nna woenu hɔnho no fii Babylon nkowaasom mu, na wɔsanee  kɔr hɔn kurow mu. Jehovah hyiraa no nkorɔfo no, na ɔboaa hɔn ma wosiesiee Jerusalem kurow a nna wɔayɛ amamfo no ma ɔsanee sii ne dadaw mu. Afei so, wɔsanee sii asɔrfi no, na ɔbɛyɛɛ bea tsitsir a nna Israelfo no botum asan asom Jehovah nokwar mu bio.—Isa. 51:11; Zech. 8:3.

4. Ebɛn kwan do na nkɔnhyɛ a ɔwɔ Isaiah tsir 65 no enya ne mbamu wɔ hɛn aber yi do?

⁴ Nkɔm a Isaiah hyɛe no hyɛɛ ase dɛ orinya ne mbamu a otsia ebien wɔ 1919 H.B. Dɛm aber no, Jehovah n’asomfo twee hɔnho fii Babylon Kɛse no ho. Ɔno ekyir no, sunsum afamu paradise no hyɛɛ ase, na no mu tserɛɛw nkakrankakra kɔr wiadze nyina. Ahendzi adawurbɔfo a wɔbɔ hɔnho mbɔdzen dze nsi kaa asɛmpa no na wɔtsetseew nsafo ahorow, na wɔyeer hɔnho dɛ wɔbɛda suban pa edzi. Afei so, mbanyin na mbaa a mber bi nna hɔn enyi gye ewudzisɛm ho na wɔyɛ hɔn adze tse dɛ mbowa no ‘hyɛɛ suban fofor a wɔabɔ no Nyankopɔn ne pɛ do’ no. (Eph. 4:24) Nokwasɛm nye dɛ, nhyira ahorow a Isaiah kaa ho asɛm no, no mu fa kɛsenara bɛba mu wɔ wiadze fofor no mu. Naaso ndɛ mpo yenya nhyira pii wɔ sunsum afamu paradise no mu. Hom mma yɛnhwɛ nhyira a yenya wɔ sunsum afamu paradise no mu no bi nye siantsir a ɔnnsɛ dɛ yefi mu da no.

NHYIRA A HƆN A WƆWƆ SUNSUM AFAMU PARADISE NO MU NO NYA

5. Dɛ mbrɛ bɔhyɛ a ɔwɔ Isaiah 65:13 no ma yehu no, ebɛn nhyira na yenya wɔ sunsum afamu paradise no mu?

⁵ Yenya ndzɛmba pa a ɔboa hɛn ma yɛnye Jehovah ntamu yɛ papa, na hɛnho tɔ hɛn. Isaiah no nkɔnhyɛ no ma yehu nsonsonee a ɔda hɔn a wɔwɔ sunsum afamu paradise no mu nye hɔn a wonnyi mu no ntamu. (Kenkan Isaiah 65:13.) Dza Jehovah n’asomfo hia ama woeetum asom no no, ɔdze ma hɔn ma obu do. Jehovah ama hɛn no sunsum krɔnkrɔn, n’Asɛm no, nye Bible ho nwoma ahorow mbrɛ ɔbɛyɛ a yebotum ‘edzidzi, yɛanom, na hɛn enyi agye.’ (Fa toto Nyikyerɛ 22:17 ho.) Naaso hɔn a wonnyi sunsum afamu paradise no mu no dze, ‘ɔkɔm na nsukɔm dze hɔn, na hɔn enyi wu’ osiandɛ wonnyi biribiara a ɔboa hɔn ma wɔfa Jehovah nyɛnko.—Amos 8:11.

6. Ndzɛmba a Jehovah dze ma hɛn ama hɛn gyedzi ayɛ dzen no, Joel 2:​21-24 ka ho asɛm dɛn, na yebesi dɛn enya do mfaso?

⁶ Nkɔnhyɛnyi Joel so kaa ndzɛmba bi a no ho hia tse dɛ ewifua, nsa nye ngo ho asɛm dze kyerɛɛ dɛ Jehovah fi n’akoma mu dze ndzɛmba a n’asomfo hia ama yeetum atsena nkwa mu no ma hɛn. Ɔsan so ma hɛn Bible mu nkyerɛkyerɛ a ɔhyɛ hɛn gyedzi dzen. (Joel 2:​21-24) Ɔnam Bible, Bible ho nwoma, hɛn wɛbsaet, asafo nhyiamu, ɔmansin na ɔmantɔw ehyiadzi do yɛ dɛm. Sɛ yɛdze dɛm ndzɛmba yi dzi dwuma yie da biara a, ɔbɛma hɛn gyedzi ayɛ dzen na yɛnye Jehovah ntamu ayɛ papa.

7. Ebɛn ndzɛmba na ɔma yenya “akoma mu enyigye”? (Isaiah 65:14)

⁷ Hɛn enyi gye na hɛn akoma tɔ hɛn yamu. Nyankopɔn n’asomfo botum dze enyigye ‘atow ndwom’ osiandɛ hɔn enyi sɔ ndzɛmba a Jehovah yɛ ma hɔn no. (Kenkan Isaiah 65:14.) Nokwasɛm a ɔhyɛ hɛn gyedzi dzen nye bɔhyɛ ahorow a ɔwɔ Nyankopɔn n’Asɛm mu a ɔkyekye hɛn werɛ, nye hɛn enyidado a osi pi a Christ no werdam afɔrbɔ no ama yeenya no ma yenya “akoma mu enyigye.” Sɛ yɛnye hɛn nuanom Christianfo bɔ dɛm ndzɛmba yi ho nkɔmbɔ a, ɔma hɛn enyi gye paa!—Ndw. 34:8; 133:​1-3.

8. Ebɛn su etsitsir ebien na ɔda edzi wɔ sunsum afamu paradise no mu?

⁸ Ɔdɔ na koryɛ a ɔwɔ Jehovah n’asomfo mu no yɛ su etsitsir ebien a ɔda edzi wɔ sunsum afamu paradise no mu. Dɛm su a ɔka hɛn bɔ mu yi ma yehu mbrɛ asetsena bɛyɛ wɔ wiadze fofor no mu no enyi do kakra. Osiandɛ dɛm aber no, ɔdɔ na koryɛ a ɔbɛtsena Jehovah n’asomfo ntamu no bɛkyɛn dza yehu no ndɛ no mpo. (Col. 3:14) Akyerɛbaa bi kaa dza ohunii faa Jehovah n’asomfo  ho ber a odzi kan a ohyiaa hɔn no. Ɔkaa dɛ: “Nna minnyim dza ɔsɛ dɛ meyɛ ama m’enyi agye. Nna enyigye nnyi m’ebusua mu mpo. Ber a odzi kan a mihyiaa Adasefo no, dɛm aber no na metsee ɔdɔ ase ankasa, osiandɛ muhun dɛ wɔdodɔ hɔnho paa.” Obiara a ɔpɛ dɛ onya enyigye nye akomatɔyamu ankasa no, ɔsɛ dɛ ɔba hɛn sunsum afamu paradise no mu. Ɔmmfa ho adwen a wiadze no wɔ wɔ Jehovah n’asomfo ho no, yɛwɔ dzin pa wɔ Jehovah n’enyim na hɛn nuanom so gye hɛn to mu.—Isa. 65:15.

9. Ebɛn asɛm na Isaiah 65:​16, 17 ka fa ndzɛmba a ɔma yehu amandze na yedzi awerɛhow no ho?

⁹ Hɛnho dwe hɛn na yɛmmbɔ hu. Isaiah 65:14 ka hɔn a wɔmmpɛ dɛ wɔba sunsum afamu paradise no mu no ho asɛm dɛ, ‘wɔkeka mu wɔ akoma mu awerɛhow ntsi na wosu tseatsea mu wɔ sunsum n’ahomtsew ntsi.’ Naaso ndzɛmba a ɔma Nyankopɔn n’asomfo hu amandze na wodzi awerɛhow no so ɛ? Ber bi bɛba a dɛm ndzɛmba no, ‘yɛrennkaa bio na obohuntsa efi Nyankopɔn n’enyi do.’ (Kenkan Isaiah 65:​16, 17.) Jehovah beyi ndzɛmba a ɔma yehu amandze no nyinara efi hɔ, na nkakrankakra yɛrennkaa yaw a amandzehu dze bae no bio.

10. Ebɛnadze ntsi na w’enyi sɔ hokwan a ewɔ dɛ enye wo nuanom Christianfo hyia mu som no? (Hwɛ mfonyin no so.)

¹⁰ Ndɛ mpo, sɛ yɛkɔ hɛn Christianfo nhyiamu ase a, hɛnho dwe hɛn, osiandɛ ɔboa hɛn ma yɛmmfa hɛn adwen nnsi ndzɛmba a ɔhyɛ hɛn do wɔ dɛm wiadze bɔn yi mu no do. Sɛ yɛda sunsum no aba no mu bi tse dɛ ɔdɔ, enyigye, asomdwee, ayamuyie nye ɔdwe edzi wɔ sunsum afamu paradise no mu a, yɛboa ma hɛn nuanom ho dwe hɔn. (Gal. 5:​22, 23) Ɔyɛ hokwan kɛse paa dɛ yɛwɔ Nyankopɔn n’ahyehyɛdze no mu! Sɛ Nyankopɔn no bɔhyɛ a ɔfa “ɔsor fofor na asaase fofor” ho no ba mu a, hɔn a wɔkɔ do tsena sunsum afamu paradise no mu no bohu.

11. Dɛ mbrɛ Isaiah 65:​18, 19 ma yehu no, ɔsɛ dɛ sunsum afamu paradise a Jehovah dze ama hɛn no ka hɛn ma yɛyɛ dɛn?

¹¹ Ɔyɛ hɛn dɛw na hɛn enyi sɔ. Isaiah sanee kaa siantsir a ɔsɛ dɛ ‘yenya ahomka na yedzi ehurusi’ wɔ sunsum afamu paradise no mu ho asɛm. Jehovah ankasa na ɔama yenya dɛm sunsum afamu paradise yi. (Kenkan Isaiah 65:​18, 19.) Ahyehyɛdze ahorow a wɔwɔ wiadze yi mu no mma nkorɔfo nnhu Nyankopɔn ho nokwasɛm. Dɛm ntsi ɔnnyɛ nwanwa dɛ Jehovah nam hɛn do roboa nkorɔfo ma wɔaatwe hɔnho efi dɛm ahyehyɛdze ahorow yi ho na wɔaaba hɛn sunsum afamu paradise a no mu yɛ enyigye yi mu! Nhyira ahorow a yenya osiandɛ yɛwɔ nokwar no mu no ma hɛn enyi gye, na okenyan hɛn ma yɛka ho asɛm kyerɛ nkorɔfo.—Jer. 31:12.

12. Bɔhyɛ a wɔaka ho asɛm wɔ Isaiah 65:​20-24 no ma etse nka dɛn, na ebɛnadze ntsi a?

 ¹² Afei so, hɛn a yɛwɔ sunsum afamu paradise no mu no wɔ enyidado. Dɛm enyidado no da hɛn akoma do na yedzi ho ehurusi. Ndzɛmba a yɛdze hɛn enyi bohu nye dza yebotum ayɛ wɔ Nyankopɔn no wiadze fofor no mu dze, wɔnnka! Bible no ahyɛ bɔ dɛ: “Abɔtoaba a ne nda suar anaa akɔdaa a onnwiee ne nda dzi remmba hɔ.” ‘Yebesisi adan, na yɛatsenatsena mu, na yɛatsɛw wenyin nture, na yeedzi no mu aba.’ ‘Yɛnnkɛberɛ kwa’ osiandɛ Jehovah behyira hɛn. Jehovah ahyɛ hɛn bɔ dɛ ɔbɔbɔ hɛn ho ban na ɔama hɛn asetsena a akomatɔyamu wɔ mu. ‘Ɔbɛba dɛ ansaana wɔbɛfrɛ no’ nna onyim obiara n’ehiadze, na ‘ɔbɛma atseasefo nyina enya dza wɔpɛ.’—Isa. 65:​20-24; Ndw. 145:16.

13. Hɔn a wɔbɔsom Jehovah no, ebɛn nsesa na Isaiah 65:25 ka dɛ wɔyɛ?

¹³ Yɛwɔ asomdwee na bambɔ. Nyimpa pii a mber bi nna wɔyɛ hɔn adze tse dɛ mbowa no, Nyankopɔn dze no sunsum no aboa hɔn ma woetum ayɛ nsesa akɛse wɔ hɔn asetsena mu. (Kenkan Isaiah 65:25.) Wɔayer hɔnho asesa suban bɔn a nna wɔwɔ no. (Rom. 12:2; Eph. 4:​22-24) Nokwasɛm nye dɛ, Nyankopɔn n’asomfo nyina bɔn da ho ara wɔ hɔnho, ntsi ɔnyɛ dɛn ara a wɔbɔkɔ do edzi mfom. Naaso Jehovah aka ‘nyimpa ahorow nyina’ abɔ mu ayɛ hɔn kor, dɛm ntsi wɔdodɔ hɔnho na wɔtse asomdwee mu. (Titus 2:11) Dɛm anwanwadze yi dze, adze nyina do Tumfo Nyankopɔn no nkotsee na obotum ayɛ!

14. Ebɛn kwan do na asɛm a ɔwɔ Isaiah 65:25 no aba mu wɔ onua bi n’asetsena mu?

¹⁴ Ɔyɛ nokwar dɛ nkorɔfo botum asesa hɔn suban ma wɔaayɛ yie anaa? Ɔwodze ma yɛnhwɛ dɛm suahu yi. Aber a aberantsɛ bi dzii mfe 20 no, osian abrabɔ bɔn na nsɛmbɔndzi ntsi nna oedzi efiadze akɔnaaba mpɛn pii. Ndzɛmba a ɔyɛe ma wɔkyeer no no, bi nye dɛ nna owia kaar, obu nkorɔfo hɔn abow kowia adze na odzi nsɛmbɔn akɛse so. Ntokwaa so dze, nna ɔfa no kwa. Naaso aber a odzi kan a ɔtsee nokwasɛm a ɔwɔ Bible no mu na ɔhyɛɛ ase kɔr Jehovah Adasefo hɔn asafo nhyiamu no, ɔbɛgyee dzii dɛ oehu biribi a ɔsom bo wɔ asetsena mu. Ɔno nye dɛ ɔbɔsom Jehovah wɔ sunsum afamu paradise no mu. Aber a wonumaa no ekyir no, nna ɔtaa dwendwen mbrɛ asɛm a ɔwɔ Isaiah 65:25 no si fa noho no ho. Afei dze, nna gyata asesa abɛyɛ dɛ eguambaa, kyerɛ dɛ, obi nna a odzi akakabensɛm no asesa abɛyɛ obi a ɔpɛ asomdwee.

15. Ebɛnadze ntsi na yɛpɛ dɛ nkorɔfo bɛka hɛnho wɔ sunsum afamu paradise no mu, na yebesi dɛn ayɛ dɛm?

¹⁵ Nsɛm a ɔhyɛ Isaiah 65:13 ase nye: ‘Mbrɛ Ewuradze Tumfo Jehovah se nye yi.’ Afei so, nyiyimu 25 no dze ba ewiei dɛ, ‘Jehovah na ɔse.’ Dza Jehovah ka nyina ba mu aber biara. (Isa. 55:​10, 11) Yɛrekasa yi, yɛtse sunsum afamu paradise no mu dada. Mbrɛ Jehovah esi aboaboa nkorɔfo ano wɔ wiadze nyina ma wɔrosom no no yɛ nwanwa dɛ. Osiandɛ yɛka Jehovah n’asomfo ho ntsi, asomdwee mapa wɔ hɛn ntamu, na hɛnho tɔ hɛn wɔ wiadze a basabasayɛ ebu do wɔ mu yi mu. (Ndw. 72:7) Osian iyi ntsi, yɛpɛ dɛ yɛboa nyimpa pii ma wɔbɛka hɛn wiadze nyina enuayɛkuw no ho. Sɛ yebotum ayɛ iyi a, ɔsɛ dɛ yɛdze hɛn adwen si esuafoyɛ edwuma no do.—Matt. 28:​19, 20.

MBRƐ YEBESI ATWE NKORƆFO ABA SUNSUM AFAMU PARADISE NO MU

16. Nkorɔfo si dɛn ba sunsum afamu paradise no mu?

¹⁶ Hɛn mu biara wɔ biribi a obotum ayɛ ama nkorɔfo enyi agye ho dɛ wɔbɛba sunsum afamu paradise no mu. Sɛ yebotum ayɛ dɛm a, ɔsɛ dɛ yesuasua Jehovah. Ɔnnhyɛ nkorɔfo dɛ wɔmmbra n’ahyehyɛdze no mu. Mbom, ‘ɔtwe’ hɔn bɔkɔɔ ba ne nkyɛn. (John 6:44; Jer. 31:3) Sɛ nyimpa a wɔwɔ akoma pa no sua Jehovah no dɔ nye no suban ahorow a ɔyɛ fɛw ho adze a, hɔnankasa fi hɔn pɛ mu twe bɛn no. Hɛn so, yebesi dɛn dze hɛn suban pa nye hɛn ndzeyɛɛ atwe nkorɔfo aba sunsum afamu paradise no mu?

17. Yebesi dɛn atwe nkorɔfo aba sunsum afamu paradise no mu?

 ¹⁷ Adze kor a obotum atwe nkorɔfo aba sunsum afamu paradise no mu nye dɛ, yɛbɛda ɔdɔ nye ayamuyie edzi akyerɛ hɛn nuanom Christianfo. Hɔn a yɛto nsa frɛ hɔn ma wɔba hɛn asafo nhyiamu ase no, yɛpɛ dɛ wɔtse nka tse dɛ hɔn a nna wɔnnyɛ agyedzifo a ɔbɛyɛ dɛ wɔnye Corinth asafo no kɔsomee no. Dza wohunii no maa wɔkaa dɛ: “Nyankopɔn wɔ hom mu ampa.” (1 Cor. 14:​24, 25; Zech. 8:23) Dɛm ntsi, ɔsɛ dɛ yɛkɔ do dze Bible mu afotu a ɔka dɛ “hom ntsena asomdwee mu” no yɛ edwuma.—1 Thess. 5:13.

18. Ebɛnadze na obotum atwe nkorɔfo aba Jehovah n’ahyehyɛdze no mu?

¹⁸ Aber nyina, ɔsɛ dɛ yɛbɔ mbɔdzen dɛ yebohu hɛn nuanom dɛ mbrɛ Jehovah hu hɔn no. Adze a obotum aboa hɛn ma yaayɛ dɛm nye dɛ yɛdze hɛn adwen besi suban pa a wɔwɔ no do na ɔnnyɛ hɔn mberɛwyɛ. Siantsir nye dɛ, dɛm mberɛwyɛ no nyina befi hɔ daakye. Ntsi sɛ menntse-moho-ase soɛr wɔ hɛn ntamu a, ɔsɛ dɛ yefi ɔdɔ mu siesie hɛn ntamu na ‘yɛda ayamuyie nye ayamuhyehye edzi kyerɛ hɛnho nkorkor, na yɛdze kyekyɛ hɛnho.’ (Eph. 4:32) Sɛ yɛyɛ dɛm a, nkorɔfo a wɔpɛ dɛ yɛnye hɔn dzi no dɛm kwan no do no enyi bɛgye ho dɛ wɔbɛba sunsum afamu paradise no mu. b

KƆ DO TSENA SUNSUM AFAMU PARADISE NO MU

19. (a) Dɛ mbrɛ adakaba a wɔato dzin “ Wofii Mu Na Wɔsanee Bae” ma yehu no, ebɛn asɛm na binom a wɔasan aba sunsum afamu paradise no mu no aka? (b) Ebɛnadze na ɔsɛ dɛ yesi hɛn bo dɛ yɛbɛyɛ? (Hwɛ mfonyin no so.)

¹⁹ Sunsum afamu paradise no som bo ma hɛn paa! Seseiara, hɛn sunsum afamu paradise no  ayɛ fɛw kyɛn ber biara a abɛsen kɔ, na nyimpa a wɔrosom Jehovah wɔ mu no so dɔɔ so kyɛn ber biara a etwa mu. Hom mma yɛnkɔ do nkyerɛ dɛ hɛn enyi sɔ sunsum afamu paradise a Jehovah dze ama hɛn no. Ɔsɛ dɛ obiara a ɔmmpɛ dɛ ɔbɔ hu, mbom ɔpɛ dɛ noho dwe no, n’akoma tɔ ne yamu, na onya bambɔ no ba sunsum afamu paradise no mu, na ɔnnsɛ dɛ ofi mu da! Naaso, ɔsɛ dɛ yɛhwɛ hɛnho yie, osiandɛ Satan awe ataa do dɛ ɔbɛdaadaa hɛn ma yeefi sunsum afamu paradise no mu. (1 Pet. 5:8; Nyi. 12:9) Ɔnnsɛ dɛ yɛma no kwan koraa. Hɛn sunsum afamu paradise no yɛ fɛw, no mu tsew, na asomdwee so wɔ mu. Ntsi hom mma yɛnyɛ dza yebotum biara mfa mbɔ ho ban.