DZA M’AWOFO YƐE DZE BOAA HƐN

Afe 1957 mu no, m’awofo tui fii Italy kɛtsenaa kurow bi a wɔfrɛ no Kindersley a ɔwɔ Saskatchewan, Canada. Wotui kɔr hɔ no, wɔannkyɛr biara na wohun nokwar no, na hɛn ebusua no dze Jehovah no som dzii kan wɔ hɛn asetsena mu. Mekaa dɛ meyɛ abofra no, nna menye m’ebusuafo kyɛr wɔ asɛnka mu paa. Ntsi ɔtɔ da a, meka dze dzi agor dɛ mehyɛɛ “akwampaa boafo” edwuma no ase no, nna medzi mfe awɔtwe!

Nna m’awofo nnyi bi, naaso wɔboaa hɛn ma yehun dɛ ohia paa dɛ yɛdze ndzɛmba ahorow bi a yɛwɔ no bɔ afɔr ama yeetum asom Jehovah. Dɛ mfatoho no, wɔ 1963 mu no, m’awofo tontɔɔn hɔn ndzɛmba ahorow bi mbrɛ ɔbɛyɛ a wobenya sika dze akɔ amanaman ntamu ehyiadzi a nna wɔbɛyɛ no wɔ Pasadena a ɔwɔ California, United States no bi. Afe 1972 so, yetui fii beebi a nna yɛtse no twaa kwan bɛyɛ kilomita 1,000 (anaa bɛyɛ akwansin 620) kɛtsenaa kurow bi a wɔfrɛ no Trail a ɔwɔ British Columbia, Canada. Siantsir a yɛkɛtsenaa hɔ nye dɛ, nna yɛpɛ dɛ yɛkɛka asɛmpa no kyerɛ hɔn a wɔka Italy kasa wɔ hɔ no. Me papa nyaa aprapra na nsiesie edwuma bi wɔ store bi mu. Onyaa hokwan a nkyɛ ɔdze benya sika pii, naaso ɔammfa ne tsir anngye, osiandɛ nna ɔpɛ dɛ ɔdze Jehovah no som dzi kan wɔ n’asetsena mu.

M’enyi sɔ dza m’awofo yɛe dze boaa menye mo nuanom baasa no paa. Ntsetsee a wɔdze maa me no boaa me ma m’ase tsimii wɔ Jehovah no som mu, na wɔboaa me ma musuaa biribi, na mo werɛ mmfirii araa dze besi ndɛ. Ɔno nye dɛ: Sɛ medze Jehovah n’Ahendzi no dzi kan wɔ m’asetsena mu a, Jehovah bɔhwɛ me.—Matt. 6:33.

MEHYƐƐ BER NYINA SOM EDWUMA NO ASE

Afe 1980 mu no, mowaar akyerɛbaa hoɔfɛwfo bi a wɔfrɛ no Debbie; nna noara so dɔ Jehovah paa. Nna yɛpɛ dɛ yɛyɛ ber nyina som edwuma no bi, ntsi yɛwaree abosoom ebiasa ekyir no, Debbie hyɛɛ akwampaa edwuma no ase. Yɛwaree afe kor ekyir no, yetui kɔr asafo kakraba bi a nna wohia adawurbɔfo pii mu, na mara so mehyɛɛ akwampaa edwuma no ase.

Odur beebi no, hɛn abaw mu bui na yɛyɛɛ hɛn adwen dɛ yebefi hɔ. Naaso, yedzii kan kaa ho asɛm kyerɛɛ hɛn ɔmansin do hwɛfo no. Ɔmaa yehun dɛ ɔdɔ hɛn, na ɔkaa no pen kyerɛɛ hɛn dɛ: “Homara so  hom ka ho bi na hom abaw mu ebu no. Hom dze hom adwen si ndzɛmba a ɔnnkɔ yie no do dodow. Hom nhwehwɛ ndzɛmba papa a etwa homho ehyia no na hom mfa hom adwen nsi ɔno mbom do.” Nna afotu a yehia no dɛm aber no ara nye no. (Ndw. 141:5) Ntsi ntsɛmpanara na yɛdze afotu no yɛɛ edwuma, na ampaara ampaara so, wɔannkyɛr biara na yebohun dɛ nna ndzɛmba pa pii etwa hɛnho ehyia. Bi nye dɛ, nna enuanom pii a wɔwɔ hɛn asafo no mu no pɛ dɛ wɔyɛ pii wɔ Jehovah no som mu; nna mbofra nye enuanom binom a hɔn ahokafo nnyi asafo no mu mpo ka ho. Yenyaa esuadze tsitsir bi fii asɛm a ɔtoo hɛn yi mu. Yebohun dɛ wɔ tsebea biara mu no, ɔsɛ dɛ yɛdze hɛn adwen si ndzɛmba pa a ɔwɔ mu no do, na yenya abotar tweɔn kesi dɛ Jehovah nankasa bedzi ɔhaw biara ho dwuma wɔ ne ber a ɔsɛ mu. (Mic. 7:7) Iyi maa hɛn enyi sanee gyee bio, na ndzɛmba so kɔr yie.

Enuanom baanan a wɔkyerɛɛ hɛn adze wɔ akwampaafo skuul a odzi kan a yɛkɔree no, nna hɔn mu biara enya hokwan akɔsom wɔ aman afofor do pɛn. Sɛ wɔdze mfonyin ahorow a wotwitwae wɔ mbea a wɔkɔsomee no bi rekyerɛ hɛn a, nna wɔka ɔhaw a wohyiae nye nhyira ahorow a woenya no bi so kyerɛ hɛn. Iyi maa hɛn enyi bɛgyee asɛmpatserɛw edwuma no ho. Dɛm ntsi yɛdze sii hɛn enyi do dɛ yɛbɛyɛ dɛm edwuma no bi.

Afe 1984 mu no, aber a nna yegu do reper dɛ yebodu botae a yɛdze esi hɛn enyi do no ho no, yetui kɛtsenaa Quebec; wɔka French kasa wɔ hɔ. Na ofi British Columbia rokɔ hɔ yɛ bɔbor kilomita 4,000 (anaa akwansin 2,485) kwan. Yɛkɔr hɔ no, nna ɔsɛ dɛ yesua amambra nye kasa fofor koraa. Ɔhaw fofor so a yehyiae nye dɛ, nna hɛn sikasɛm nnkɔ yie koraa. Odur beebi mpo, nna okuafo bi n’ahaban mu na yɛkɛtase santom na yɛbɔnoa dzi. Ntsi Debbie suaa mbrɛ obesi dze santom ayɛ edziban asorɔtow pii! Ɔhaw ahorow a yehyiae no nyina ekyir no, yemiaa hɛn enyi dze enyigye gyinaa ano. Afei so, yehun dɛ Jehovah rohwɛ hɛn.—Ndw. 64:10.

Da kor bi, yɛwɔ hɔ araa na yenyaa kɔɔl bi, nna hɛn enyi nnda koraa. Nna wɔroto nsa afrɛ hɛn dɛ yɛnkɔsom wɔ Canada Bethel. Nna yeedzi kan ahyehyɛ Gilead Skuul fɔɔm no bi dada, ntsi aber a wɔfrɛɛ hɛn dɛ yɛmbra Bethel no, nna ɔyɛ hɛn dɛw dze, naaso wɔ hɛn mu paa dze, sɛ yenyaa Gilead a, nkyɛ yɛpɛ. Naaso yɛgyee too mu na yɛkɔree. Yekodurii no, yebisaa Onua Kenneth Little a nna ɔyɛ Nkorbata Egyinatukuw no munyi no dɛ, “Na sɛ wɔto nsa frɛ hɛn dɛ yɛnkɔ Gilead a, yɛbɛyɛ no dɛn?” Asɛm a ɔkaa kyerɛɛ hɛn nye dɛ, “Sɛ yedu nsu no ho a, yebohu mbrɛ yebesi etwa.”

Dapɛn kor ekyir no, yedur nsu no ho, kyerɛ dɛ, wɔtoo nsa frɛɛ emi na Debbie dɛ yɛnkɔ Gilead. Ntsi nna ɔsɛ dɛ yesi gyinae dɛ yɛbɛtsena Bethel anaa yɛbɔkɔ Gilead. Onua Little kaa kyerɛɛ hɛn dɛ: “Dza hom bɛfa biara, da kor da kor, bi a hom bɛka dɛ hom yamu a nkyɛ hom ammfa ɔno. Naaso no mu biara  nnkyɛn ne nyɛnko; Jehovah botum ehyira no mu biara do.” Yɛgyee too mu kɔr Gilead Skuul no, na ndɛ na ndɛ nyina, yehu dɛ asɛm a Onua Little kae no yɛ nokwar turododo. Mpɛn pii no, enuanom a ɔyɛ dzen ma hɔn dɛ wɔbɛfa ɔsom hokwan kor na woeegya kor no, ɔyɛ a yɛtaa ka asɛm a Onua Little kaa kyerɛɛ hɛn no bi kyerɛ hɔn.

YƐBƐYƐƐ ASƐMPATSERƐWFO

Nna yɛka enuanom 24 a wɔwɔ Gilead adzesuakuw a otsia 83 no ho, na mese, hɛn enyi gyee araa ma nna yɛyɛ hɛnho hwee a ɔnnyɛ yie. Wɔyɛɛ skuul no April 1987 wɔ Brooklyn a ɔwɔ New York. Nna Onua Ulysses Glass nye Onua Jack Redford na wɔtaa kyerɛ hɛn adze. Wɔannkyɛr na abosoom enum a yɛdze kɔr skuul no baa ewiei, na September 6, 1987 na yewiee skuul. Wɔmaa yɛnye Onua John Goode na ne yer Marie kɔr Haiti dɛ yɛnkɔsom wɔ hɔ.

Asɛmpatserɛwfo a woewie Gilead a nna wɔwɔ Haiti no, afe 1962 mu no, wɔpaam hɔn nyina fii ɔman no mu, na ofitsi dɛm aber no, wɔammfa asɛmpatserɛwfo biara annkɔ hɔ kesii dɛ yɛkɔr hɔ. Yewiee skuul no, adapɛn ebiasa ekyir no, yekodur Haiti, na wɔdze hɛn kɔr asafo bi a nna ɔhyɛ mbepɔw no mu. Nna adawurbɔfo 35 na wɔwɔ dɛm asafo no mu. Nna yennyiin pii ntsi nna yennyi suahu pii. Afei so, nna hɛn nkotsee na yɛtse asɛmpatserɛwfo fie (missionary home) hɔ. Nna kurow mu hɔfo no dzi hia, na nna hɔn mu pii so nnyim akenkan. Aber a yɛhyɛɛ asɛmpatserɛw edwuma no ase fofor no, osian amanyɛsɛm mu nsɛnsɛm ntsi, nna nkorɔfo yɛ basabasa wɔ ɔman no mu. Ɔreyɛ ara nye yi nna worutu aban egu, na ebɔhwɛ no, nna etuatsewfo so dze ndzɛmba esisiw akwan na woetwa gya ato mu. Yɛreka yi ara so, nna ehum gyampaturdu so mma amamfo no hɔnho nntɔ hɔn koraa

Yesuaa ndzɛmba pii fii enuanom a wɔwɔ Haiti no hɔ; nna hɔn enyi yɛ dzen paa, na ɔmmfa ho dza nna wɔrefa mu no nyina ekyir no, nna wɔdze enyigye rosom Jehovah. Ɔwɔ mu dɛ nna asetsena nnda famu mma hɔn mu pii dze, naaso nna wɔdɔ Jehovah na nna wɔpɛ asɛnka so kɔ paa. Akyerɛbaa kor bi a ne mfe  akɔ enyim dɛm yi, nna onnyim akenkan, naaso otumii twuuw kyerɛwnsɛm bɛyɛ 150 guu ne tsirmu. Dza nna ɔrokɔ do no hyɛɛ hɛn dzen ma yɛkɔr do kaa Ahendzi ho asɛmpa no kyerɛɛ nkorɔfo, osiandɛ nna yenyim dɛ ɔno nkotsee na obotum edzi adasamba haw ho dwuma. Afei so, aber a yehun dɛ nkorɔfo a yedzii kan nye hɔn suaa Bible no hɔn mu binom abɛyɛ akwampaafo, akwampaafo etsitsir, nye asafo mu mpanyimfo no, hɛn enyi gyee paa.

Yɛwɔ Haiti no, mihyiaa aberantsɛ bi a wɔfrɛ no Trevor. Nna ɔyɛ Latter-Day Saints asɛmpatserɛwnyi, na minyaa hokwan nye no bɔɔ Bible mu nkɔmbɔ mpɛn pii. Mfe bi ekyir no, mowɔ hɔ araa na ɔkyerɛɛw me krataa bi, na nna monnhwɛ kwan koraa. Ɔkae wɔ krataa no mu dɛ: “Ɔrennkyɛr yɛbɔkɔ ehyiadzi na mubonuma wɔ ase! Mepɛ dɛ mesan ba Haiti na mobɔsom dɛ ɔkwampaafo tsitsir wɔ beebi a nna mosom dɛ Latter-Day Saints asɛmpatserɛwnyi no ara.” Asɛm a ɔkae no, dɛm pɛpɛɛpɛ na ɔyɛe, na ɔnye ne yer dze mfe pii yɛɛ akwampaa edwuma no wɔ hɔ.

YƐKƆSOMEE WƆ EUROPE, NA ƆNO EKYIR NO YƐKƆR AFRICA

Wɔkaa kyerɛɛ hɛn dɛ yɛnkɔsom wɔ aman ahorow bi a wɔwɔ Europe no. Mber bi a abɛsen kɔ no, nna wɔdze nsa ato hɛn dwumadzi ahorow bi do wɔ hɔ, naaso dɛm aber yi dze, nna enuanom a wɔwɔ hɔ no rinya fahodzi a obotum ama wɔaka asɛmpa no. Afe 1992 no, yekodur kurow a wɔfrɛ no Ljubljana a ɔwɔ Slovenia mu; nna ɔbɛn beebi a wɔwoo m’awofo, na nna hɔ na wɔtse ansaana worutu akɛtsena Italy. Mbea ahorow a nkan no nna wɔka bɔ mu yɛ Yugoslavia no, nna akodzi taa mu gidzigidzi wɔ hɔ. Nna Austria Bethel a ɔwɔ Vienna, hɛn ɔfese a ɔwɔ Croatia n’ahenkurow Zagreb, nye hɛn ɔfese a ɔwɔ Serbia n’ahenkurow Belgrade no na wɔhwɛ asɛnka edwuma a wɔyɛ wɔ mbea ahorow a nkan no nna wɔka bɔ mu yɛ Yugoslavia no do. Naaso sesei dze, nna ɔsɛ dɛ aman ahorow no mu biara nya nankasa ne Bethel.

Dɛm ntsi nna no ho ebehia dɛ yesua kasa nye amambra fofor koraa. Nna asɛm a kurow mu hɔfo taa ka nye dɛ, “Jezik je težek,” na dza ɔkyerɛ nye dɛ “Kasa no sua yɛ dzen.” Na ampaara so, nna kasa no no sua yɛ dzen! Nna enuanom no dze nokwardzi rosom Jehovah, na hɛn enyi gyee mbrɛ nna wofi hɔn akoma mu gye nsesa ahorow a ahyehyɛdze no dze ba no to mu ntsɛmara no ho. Yehun mbrɛ Jehovah sii boaa hɔn no so. Dɛm aber yi so, yehun mbrɛ sɛ ndzɛmba nnkɔ yie a, Jehovah dzi ho dwuma wɔ ne ber a ɔsɛ mu no. Dza yɛfaa mu wɔ Slovenia no maa yesuaa ndzɛmba afofor pii, na ndzɛmba ahorow so a nna yeesua no dada no boaa hɛn ma yegyinaa ɔhaw ahorow a yehyiae no ano.

 Naaso, nna nsesa pii da hɛn enyim rotweɔn hɛn. Afe 2000 mu no, wɔmaa yɛkɔr Côte d’Ivoire a ɔwɔ Africa n’Anee afamu. Ekyir yi, wɔ November 2002 no, osian ɔko bi a osii wɔ hɔ ntsi, wɔmaa yefii hɔ kɔr Sierra Leone. Nna wɔdze mfe pɔrpɔr 11 na wɔdze ako wɔ hɔ, na akodzi no baa ewiei no, wɔannkyɛr biara na yɛkɔr hɔ. Aber a yerifi Côte d’Ivoire no, nna ɔnnda famu mma hɛn koraa, osiandɛ nna ɔsɛ dɛ yɛyɛ no ntsɛntsɛm fi hɔ. Ne nyina mu no, ndzɛmba ahorow a nna yeesua no dada no boaa hɛn ma yɛkɔr do dze enyigye somee.

Nna nkorɔfo pii enyi gye nokwar no ho, na nna hɛn nuanom a wɔdze mfe pii egyina ɔhaw a akodzi dze bae no ano no so pɛ hɛn asɛm, na ɔno na yɛdze hɛn adwen sii do. Nna enuanom no nnyi bi, naaso nna wɔpɛ dɛ wɔnye afofor kyɛ dza wɔwɔ biara. Akyerɛbaa bi bɛkyɛɛ Debbie ntar. Nna Debbie rotwetwe noho, naaso akyerɛbaa no yɛe ara dɛ ɔngye, na ɔkae mpo dɛ: “Ɔko no taa mu no, enuanom a wɔwɔ aman afofor do no boaa hɛn. Ntsi seseiara, woedu hɛn so hɛn do dɛ yɛboa hom.” Yɛdze sii hɛn enyi do dɛ yebosuasua suban pa a nna enuanom yi wɔ no bi.

Ekyir yi, yɛsanee kɔr Côte d’Ivoire. Nna ɔtse dɛ mbrɛ ndzɛmba mu adwe kakra, naaso wɔsanee dze taa mu bio. Ntsi wɔ November 2004 mu no, wɔdze helicopter bɛfaa hɛn fii ɔman no mu. Dza yetumii dze guanee ara yɛ hɛn baag nkorkor; nna ndzɛmba kakraabi na ɔwɔ mu. Wɔdze hɛn kɔr France asogyafo hɔn asoɛe bi, na yɛdaa famu dɛm anafua no. Adze kyee no, wɔdze wimhɛn faa hɛn kɔr Switzerland. Yekodur Switzerland Bethel esuom, na nna Nkorbata Egyinatukuw no mufo nye enuanom a wɔkyerɛ adze wɔ Asomfo Ntsetsee Skuul nye hɔn yernom tse hɔ rotweɔn hɛn. Wɔdze enyigye yeyɛɛ hɛn etuu, wɔmaa hɛn edziban dɛɛdɛw ma yedzii, na wɔkyɛɛ hɛn Switzerlandfo hɔn chocolate piigyan. Wɔmaa yɛtsee nka dɛ wɔdɔ hɛn paa na dza wɔyɛe no kaa hɛn akoma paa.

Wɔmaa yɛkɔsomee wɔ Ghana kakra, na ɔno ekyir no, yɛsanee kɔr Côte d’Ivoire bio. Dɛm aber yi, nna ntokwaa no n’ano abrɛ adze kakra. Ɔdɔ na ayamuyie a enuanom daa no edzi kyerɛɛ hɛn no boaa hɛn ma yetumii gyinaa akɔnaaba nye dwumadzi ahorow a wɔdze hyehyɛɛ hɛn nsa wɔ ber tsiabaa mu no ano. Yenyim dɛ Jehovah n’asomfo dodɔ hɔnho, naaso menye Debbie nyina ayɛ hɛn adwen dɛ yɛronntoto ɔdɔ a enuanom da no edzi kyerɛ hɛn no adze koraa. Ɔwɔ mu dɛ yeehyia bi paa wɔ asetsena mu dze, naaso nokwasɛm so nye dɛ, yeesua ndzɛmba pa pii efi ɔhaw ahorow a yehyiae no mu.

YƐKƆSOMEE WƆ MIDDLE EAST

Afe 2006 mu no, hɛn nsa kaa krataa bi fii wiadze nyina edwumayɛbea tsir, na nna wɔrema yeehu dɛ wɔama hɛn dwumadzi fofor. Wɔkaa kyerɛɛ hɛn yɛnkɔ Middle East. Dɛm aber yi so, nna ɔsɛ dɛ yɛyɛ krado dɛ yebosua ndzɛmba afofor. Nna ɔhaw afofor da hɛn enyim rotweɔn hɛn, na nna ɔsɛ dɛ yesua kasa nye amambra fofor so. Nna amanyɛsɛm nye nyamesom agye nkorɔfo beberee hɔn tsir, na nna hɔ nnhyɛ da ara nndwe dɛm, ntsi nna yɛwɔ ndzɛmba pii sua. Nsafo a nna ɔwɔ hɔ no, nna ɔsorsor mbea a enuanom no fifi nye kasa ahorow so a wɔka, na nna iyi ma hɛn enyi gye paa. Afei so, yehun dɛ sɛ yɛdze akwankyerɛ a ahyehyɛdze no dze ma no yɛ edwuma a, ɔma koryɛ tsena asafo no mu. Nna yɛpɛ enuanom no hɔn asɛm paa. Nna hɔn ebusuafo, hɔn skuulfo, hɔn edwumamufo, nye hɔn apaamufo soɛr tsia hɔn, naaso hɔn mu pii dze akokodur gyinaa ano.

Afe 2012 mu no, yɛkɔr ehyiadzi tsitsir bi a wɔyɛe wɔ Tel Aviv a ɔwɔ Israel no. Na ofitsi Pentecost 33 H.B reba no, dɛm ehyiadzi yi nye ehyiadzi kɛse a odzi kan a Jehovah n’asomfo yɛe wɔ dɛm apaamu hɔ. Mese, hɛn werɛ nnkefir dɛm ehyiadzi no da!

Aber a yɛwɔ hɔ no, wɔsomaa hɛn dɛ yɛnkɛsera enuanom a wɔwɔ ɔman bi a nna wɔdze nsa ato hɛn dwumadzi ahorow bi do no. Yɛrokɔ no, yɛdze nwoma ahorow kɔree, na yɛnye enuanom no kɔr asɛnka, na  yɛyɛɛ amansin ehyiadzi ahorow so, naaso nna yɛmma enuanom beberee mmba ase. Beebi a ebɛfa biara no, nna ibohu dɛ asogyafo a wokitsakitsa etur gyinagyina kwan mu a wɔpɛ dɛ wɔhwehwɛ wo ndzɛmba mu. Naaso, nna yɛtaa nye adawurbɔfo kakra a wɔwɔ hɔ no nantsew asɛnka mu, ntsi nna wɔboa hɛn ma yɛyɛ ahwɛyie paa, na iyi amma yɛammbɔ hu aber a yɛnam dɛm mbea no.

YƐASAN ABA AFRICA

Afe 2013 mu no, wɔmaa hɛn dwumadzi fofor bi. Wɔkaa dɛ yɛnkɔsom wɔ Bethel a ɔwɔ Kinshasa, Congo no. Congo man no so, na no mu yɛ fɛw papaapa, naaso wodzi hia paa na ɔreyɛ ara nye yi nna amamfo no etwa hɔnho roko. Aber a wɔkaa kyerɛɛ hɛn dɛ yɛnkɔ hɔ no, ahyɛse no yɛkaa dɛ, “Oh! Africa a? Yenyim hɔ, ntsi yɛayɛ krado.” Naaso, saana nna ndzɛmba pii wɔ hɔ a ɔsɛ dɛ yesua. Osiandɛ nna ɔman no mu mmbue ntsi, nna wonnyi kaar akwan nye bregye a wɔfa do tutu akwan wɔ hɔ. Naaso yenyaa ndzɛmba pa pii dze hɛn adwen sii do. Bi nye mbrɛ nna enuanom no dze enyimia na enyigye rosom Jehovah ɔmmfa ho dɛ nna wodzi hia no. Afei so, nna wɔmmfa hɔn asɛnka edwuma no nndzi agor koraa, na nna wɔbɔ mbɔdzen kɔ asafo nhyiamu nye ehyiadzi nkakraba na akɛse nyina. Yehun dɛ Jehovah boaa enuanom no wɔ Ahendzi edwuma no mu, na ohyiraa hɔn mbɔdzembɔ so do. Na iyi maa nkorɔfo beberee bɛgyee nokwar no. Hɛn werɛ rimmfir ndzɛmba pii a yesuae aber a nna yɛrosom wɔ Congo no, na yenyaa anyɛnkofo pii a wɔbɛyɛɛ hɛn ebusuafo.

Afe 2017 reba n’ewiei no, wɔsanee maa hɛn dwumadzi fofor; wɔmaa yɛkɔr South Africa. Bethel ahorow a yɛasom wɔ hɔ nyina no, South Africa Bethel no na ɔso paa. Afei so, edwuma a wɔdze maa hɛn wɔ ha no so, nna yɛnnyɛɛ bi da. Dɛm aber yi so, nna ndzɛmba pii wɔ hɔ a ɔsɛ dɛ yesua, naaso esuadze ahorow a nna yeenya no dada no boaa hɛn. Enuanom a wɔwɔ ha no mu beberee dze nokwardzi asom Jehovah mfe pii, ntsi yɛpɛ hɔn asɛm paa. Afei so, enuanom a wɔwɔ Bethel ha no, ɔsor mbea a wofifi nye hɔn amambra, naaso sɛ yehu mbrɛ wɔdze koryɛ bɔ mu yɛ edwuma no, ɔma hɛn enyi gye paa. Ɔda edzi dɛ, osiandɛ Jehovah n’asomfo bɔ mbɔdzen dɛ wobosuasua suban pa a ɔwɔ, na wɔdze Bible mu afotusɛm bɔ hɔn bra ntsi, Jehovah hyira hɔn na ɔma hɔn asomu dwe hɔn.

Ofitsi aber a menye Debbie hyɛɛ ber nyina som edwuma no ase no, yeenya dwumadzi ahorow a ɔyɛ enyigye pii, na yeesua amambra nye kasa ahorow pii so. Ɔwɔ mu dɛ ɔnnyɛ aber nyina na ɔyɛ mberɛw ma hɛn dze, naaso wɔ ne nyina mu no, yehu dɛ Jehovah fa n’ahyehyɛdze no nye hɛn nuanom Christianfo do boa hɛn ma yehu dɛ ɔdɔ hɛn paa. (Ndw. 144:2) Yɛgye dzi paa dɛ esuadze ahorow a yeenya wɔ hɛn ber nyina som edwuma no mu no aboa hɛn ma yɛabɛyɛ Jehovah n’asomfo mapa.

M’enyi sɔ ntsetsee a m’awofo dze maa me, mboa a me yer Debbie dze aboa me, nye suban pa a hɛn nuanom a wɔwɔ wiadze nyina da no edzi no. Yeesua ndzɛmba pa pii efi hɔn nkyɛn. Ofitsi dɛm aber yi rokɔ no, menye me yer esi hɛn bo dɛ, yɛbɔkɔ do ara esua adze biara a hɛn Kyerɛkyerɛfo Kunyin no dze bɛkyerɛ hɛn no.