ADZESUA ASƐM 33
NDWOM 130 Fa Bɔn Kyɛ
Mbrɛ Jehovah Pɛ Dɛ Asafo No Nye Hɔn A Wɔyɛ Bɔn No Dzi
“Sɛ obi yɛ bɔn a, yɛwɔ ɔkasamaafo a otwitwa gye hɛn.”—1 JOHN 2:1.
DZA YEBOSUA
Mbrɛ wodzii bɔn a no mu yɛ dur bi ho dwuma wɔ tsetse Corinth asafo no mu no, yɛbɔhwɛ dza yebotum esua efi mu.
1. Ebɛnadze na Jehovah pɛ dɛ nyimpa nyina yɛ?
JEHOVAH bɔɔ nyimpa no, ɔdze hɔn pɛ hyɛɛ hɔn nsa. Iyi ntsi, hɛnankasa yetum sisi hɛn gyinae da biara. Naaso gyinae a nyimpa sisi nyinara, dza ohia wɔ mu paa nye dɛ obi behyira noho do ama Jehovah na ɔaabɛka n’asomfo ho. Dɛm gyinae no na Jehovah pɛ dɛ obiara si. Ebɛnadze ntsi a? Osiandɛ ɔdɔ nyimpa, na ɔpɛ dɛ osi hɔn yie. Ɔpɛ dɛ obiara fa no nyɛnko ama wɔaatsena ase daa.—Deut. 30:19, 20; Gal. 6:7, 8.
2. Ndzebɔnyɛfo a wonnuu hɔnho no, ebɛnadze na Jehovah pɛ dɛ wɔyɛ? (1 John 2:1)
2 Naaso, Jehovah nnhyɛ obiara dɛ ɔnsom no. Ɔama obiara kwan dɛ onsi dza ɔpɛ dɛ ɔyɛ ho gyinae. Naaso sɛ Christiannyi bi a woenuma no yɛ bɔn a no mu yɛ dur bi so ɛ, ebɛn asɛm bɔto no? Sɛ oennu noho a, ɔsɛ dɛ woyi no fi asafo no mu. (1 Cor. 5:13) Naaso sɛ woyi ɔdzebɔnyɛnyi no fi asafo no mu mpo a, Jehovah hwɛ kwan paa dɛ ɔbɛsan aba ne nkyɛn bio. Nokwasɛm nye dɛ, Jehovah maa ne Ba no bowui maa hɛn ama oeetum dze ndzebɔnyɛfo a wonu hɔnho no hɔn bɔn akyɛ hɔn. (Kenkan 1 John 2:1.) Hɛn Nyankopɔn a ɔdɔ hɛn no reserɛ hɔn a wɔayɛ bɔn no dɛ wonnu hɔnho.—Zech. 1:3; Rom. 2:4; Jas. 4:8.
3. Ebɛnadze na yɛbɔbɔ ho nkɔmbɔ wɔ adzesua yi mu?
3 Adwen a Jehovah wɔ wɔ bɔn nye hɔn a wɔyɛ bɔn a no mu yɛ dur ho no, ɔpɛ dɛ hɛn so yenya dɛm adwen no ara bi. Adzesua yi bɛma yeehu mbrɛ yebesi enya dɛm adwen no bi. Yebohu (1) mbrɛ Corinth asafo no dzii bɔn a no mu yɛ dur bi ho dwuma, (2) dza ɔsomafo Paul kaa dɛ wɔnyɛ aber a ɔdzebɔnyɛnyi bi nuu noho no, nye (3) mbrɛ dɛm asɛm yi ma yehu adwen a Jehovah wɔ wɔ Christianfo a wɔayɛ bɔn a no mu yɛ dur bi no ho.
MBRƐ CORINTH ASAFO NO DZII BƆN A NO MU YƐ DUR BI HO DWUMA
4. Nna ebɛnadze na ɔrokɔ do wɔ Corinth asafo no mu? (1 Corinthfo 5:1, 2)
4 Kenkan 1 Corinthfo 5:1, 2. Paul n’asɛmpatserɛw akwantu a otsia ebiasa mu no, ɔtsee Corinth asafo a nna wɔtsewee nnkyɛree no ho awerɛhosɛm bi a nna n’enyi soso paa. Wɔbɔɔ no amandzɛɛ dɛ onua bi a ɔwɔ asafo no mu nye ne papa ne yer da. Ebususɛm yi dze, nna ɔnntsee bi da, na nna “amanamamfo mpo” rennyɛ biribi a ɔtse dɛm! Naaso nna Corinth asafo no rososɔw suban bɔn yi do, na nna woegyaa ɔbarimba no mpo ma ɔnenam asafo no mu. Obotum aba dɛ, nna binom susu dɛ Nyankopɔn n’ehumbɔbɔr a ɔda no edzi kyerɛ nyimpa no bi na wɔreda no edzi no. Naaso Jehovah n’asomfo yɛ bɔn a, ɔnnsosɔw hɔn do. Nna dɛm ɔbarimba a ɔatoto n’enyi awe yi dze ne brafun no resɛɛ asafo no ne dzin. Bio so, nna Christianfo binom a wɔnye no bɔ no botum esuasua no suban bɔn no. Ntsi, ebɛnadze na Paul kaa kyerɛɛ asafo no dɛ wɔnyɛ?
5. Ebɛnadze na Paul kaa kyerɛɛ asafo no dɛ wɔnyɛ, na nna ɔpɛ dɛ ɔkyerɛ dɛn? (1 Corinthfo 5:13) (Hwɛ mfonyin no so.)
5 Kenkan 1 Corinthfo 5:13. Jehovah maa Paul kyerɛɛw krataa kɛmaa Corinth asafo no dɛ, wonyi ɔdzebɔnyɛnyi no a onnuu noho no mfi asafo no mu. Nna ebɛn kwan do na ɔsɛ dɛ hɔn a wɔwɔ asafo no mu no nye no dzi? Paul kaa kyerɛɛ hɔn dɛ ‘mma wɔnye no nndzi afora’ anaa wɔnye no mmbɔ. Nna iyi bɛkyerɛ dɛn? Paul kyerɛɛ mu dɛ, ndzɛmba a ɔnnsɛ dɛ wɔnye no yɛ no, no mu bi nye dɛ ‘ɔnnsɛ dɛ wɔnye dɛm nyimpa no dzidzi mpo.’ (1 Cor. 5:11) Sɛ enye obi tsena pon ho dzidzi a, ɔnnyɛ dzen koraa dɛ enye no bɔbɔ nkɔmbɔ, na nkɔmbɔ so dze ɔnye anyɛnkoyɛ nam. Ntsi dza nna Paul pɛ dɛ ɔkyerɛ ara nye dɛ, ɔnnsɛ dɛ wɔnye dɛm nyimpa no bɔ anaa wɔfa no nyɛnko. Sɛ nna wɔdze dɛm afotu yi yɛ edwuma a, ɔremma asafo no nnsuasua no suban bɔn no. (1 Cor. 5:5-7) Afei so, sɛ wɔnye ɔbarimba no ammbɔ a, nna obotum ama oehu dɛ ɔnye Jehovah ntamu asɛɛ koraa. Na bi a ɔno bɛma n’enyi ewu na oeenu noho.
Jehovah maa Paul kyerɛɛw krataa kɛmaa Corinth asafo no dɛ wonyi ɔdzebɔnyɛnyi no a onnu noho no mfi asafo no mu (Hwɛ nkyekyɛmu 5)
6. Aber a asafo no nsa kaa Paul ne krataa no, wɔyɛɛ hɔn adze dɛn, na ɔmaa ɔdzebɔnyɛnyi no so yɛɛ dɛn?
6 Aber a Paul kyerɛɛw krataa kɛmaa Christianfo a wɔwɔ Corinth no, nna ɔnntse ho asɛm ntsi nna ɔhaw no. Naaso ekyir yi, Titus dze asɛmpa bi brɛɛ no ma serew hyɛɛ n’afon mu ma. Ɔbɔɔ no amandzɛɛ dɛ asafo no dze nsɛm a ɔwɔ ne krataa no mu no ayɛ edwuma. (2 Cor. 7:6, 7) Afei so, aber a Paul dze ne krataa a odzi kan no kɛmaa hɔn no, wɔannkyɛr koraa na ɔbarimba no nuu noho. Nna ɔasesa no suban ma ɔahyɛ ase dze Jehovah n’akwankyerɛ robɔ ne bra. (2 Cor. 7:8-11) Sɛ dɛm a, nna ɔno ebɛnadze bio na Paul bɛka akyerɛ asafo no dɛ wɔnyɛ?
DZA NNA ƆSƐ DƐ ASAFO NO YƐ ABER A ƆDZEBƆNYƐNYI NO NUU NOHO NO
7. Aber a woyii ɔdzebɔnyɛnyi no fii asafo no mu no, ebɛn mfaso na ofii mu bae? (2 Corinthfo 2:5-8)
7 Kenkan 2 Corinthfo 2:5-8. Paul kaa dɛ “nkaenyim a dodow no dze aka nyimpa no enyim no dɔɔ so ma no.” Asɛm a Paul kae yi ma yehu dɛ ntsea a wɔdze maa ɔbarimba no boaa no. Ebɛn kwan do? Ɔboaa no ma onuu noho.—Heb. 12:11.
8. Ebɛnadze bio na Paul kaa kyerɛɛ asafo no dɛ wɔnyɛ?
8 Ntsi Paul kaa kyerɛɛ asafo no dɛ: ‘Ɔsɛ dɛ hom dze kyɛ onua no a ɔayɛ bɔn no na hom kyekye no werɛ,’ na hom ma ohu dɛ hom dɔ no. Hyɛ no nsew dɛ, nna ɔnnyɛ dza Paul reka akyerɛ asafo no nye dɛ wɔmma ɔbarimba no a nna oenu noho no nsan mbɛka Jehovah n’asomfo ho kɛkɛ. Mbom nna ɔpɛ dɛ wɔdze hɔn kasaa nye hɔn ndzeyɛɛ so ma ohu dɛ wɔdze no bɔn akyɛ no ampa na wɔdɔ no. Sɛ wɔyɛ dɛm a, nna ɔno bɛma ɔbarimba no ehu dɛ asafo no enyi agye dɛ ɔasan abɛka hɔn ho bio.
9. Nna ebɛnadze ntsi na bi a ɔyɛ dzen ma enuanom binom dɛ wɔdze ɔdzebɔnyɛnyi no a onuu noho no no bɔn bɛkyɛ no?
9 Nna ɔyɛ dzen ma enuanom binom a wɔwɔ dɛm asafo no mu no dɛ wɔbɛtsew hɔn enyim ama ɔdzebɔnyɛnyi a onuu noho no anaa? Bible no nnka, naaso obotum aba no dɛm. Adze yi ara nna dza ɔbarimba no ayɛ no akɛfa ɔhaw abɔto asafo no do, na obotum aba no dɛ nna wɔama enuanom binom so enyim egu ase. Nna enuanom a wɔwɔ asafo no mu no robɔ mbɔdzen dze Nyankopɔn n’akwankyerɛ abɔ hɔn bra. Ntsi bi a nna hɔn mu bi tse nka dɛ, osiandɛ ɔbarimba no ammfa Nyankopɔn ne mbra annyɛ edwuma ntsi ɔmmfata dɛ wɔma ɔsan ba asafo no mu bio. (Fa toto Luke 15:28-30 ho.) Naaso, nna ebɛnadze ntsi na ohia dɛ enuanom no nyina ma onua no hu dɛ wɔdɔ no paa?
10-11. Sɛ asafo mu mpanyimfo no ammfa ɔdzebɔnyɛnyi no a nna oenu noho no bɔn annkyɛ no a, nkyɛ ebɛn asɛm botum esi?
10 Sɛ asafo mu mpanyimfo no anngye ɔbarimba a nna oenu noho ampa no ammba asafo no mu bio a, nkyɛ ɔbɛtse nka dɛn? Anaadɛ aber a ɔsanee bae no, sɛ enuanom no amma oennhu dɛ wɔdɔ no a, ehwɛ a nkyɛ n’enyi bɛgye? Oho. Nkyɛ ‘awerɛhow dodow’ bɛmeen no. Nkyɛ obotum enya adwen dɛ orunntum nnsom Jehovah bio. Afei so, mbɔdzen a nna ɔrobɔ dɛ obesiesie ɔnye Nyankopɔn ntamu bio no mpo, nkyɛ n’abaw mu botum ebu ma oeegyaa.
11 Dza ɔma asɛm no yɛ hu mpo nye dɛ, sɛ enuanom a wɔwɔ asafo no mu no ammfa ɔdzebɔnyɛnyi a nna oenu noho no no bɔn annkyɛ no a, nkyɛ hɔnankasa nye Jehovah ntamu anyɛnkofa no so botum asɛɛ. Ebɛnadze ntsi na yɛreka dɛm? Siantsir no nye dɛ sɛ wɔammfa annkyɛ no a, ɔbɛkyerɛ dɛ worusuasua Satan a ne tsirmu yɛ dzen na onnyi ehumbɔbɔr no, na mbom ɔnnyɛ Jehovah a ɔdze ndzebɔnyɛfo a wonu hɔnho no bɔn kyɛ hɔn no. Ɔba no dɛm so a, nna wɔrema kwan ma Abɔnsam afa hɔn do ebu ɔbarimba no abaw mu ma oeegyaa Jehovah som.—2 Cor. 2:10, 11; Eph. 4:27.
12. Nna ebɛnadze na Corinth asafo no botum ayɛ dze esuasua Jehovah?
12 Ntsi nna ebɛnadze na Corinth asafo no botum ayɛ dze akyerɛ dɛ worusuasua Jehovah na nnyɛ Satan? Dɛ mbrɛ Jehovah dze ndzebɔnyɛfo a woenu hɔnho no hɔn bɔn kyɛ hɔn no, nna ɔsɛ dɛ hɔn so wɔyɛ dɛmara. Hom mma yɛnhwɛ dza Bible akyerɛwfo binom kae faa Jehovah ho. David kaa dɛ: ‘Jehovah ye na ɔdze bɔn kyɛ.’ (Ndw. 86:5) Micah so kaa dɛ: ‘Woana na ɔtse dɛ ɔwo, Nyankopɔn a edze emumuyɛ kyɛ na epa mbrato ho?’ (Mic. 7:18) Na Isaiah so kaa dɛ: “Hom mma omumuyɛnyi ndan no kwan ngya, na ɔbrakyewnyi ndan n’adwen ngya: na ɔnsan mbra [Jehovah ne] nkyɛn, na obohu no mbɔbɔr; na hɛn Nyankopɔn nkyɛn, na ɔdze bɛkyɛ mbordo.”—Isa. 55:7.
13. Nna ebɛnadze ntsi na ɔsɛ dɛ wɔgye ɔbarimba no ba asafo no mu bio? (Hwɛ adakaba a wɔato dzin “ Ebɛn Aber Na Wɔgyee Ɔbarimba A Nna Ɔwɔ Corinth No?”)
13 Nna ɔsɛ dɛ Corinth asafo no suasua Jehovah na wɔdze ɔbarimba a nna oenu noho no no bɔn kyɛ no, na wɔma ohu dɛ wɔdɔ no, na hɔn enyi agye dɛ ɔasan aba. Sɛ asafo no dze Paul n’akwankyerɛ yi yɛ edwuma na wɔgye ɔdzebɔnyɛnyi a oenu noho no ba asafo no mu bio a, nna wɔbɛma ada edzi dɛ “wɔyɛ setsie wɔ adze nyina mu.” (2 Cor. 2:9) Ɔyɛ nokwar, woyii ɔbarimba no fii asafo no mu no, odzii abosoom kakraabi pɛ dze, naaso ntsea a wɔdze maa no no boaa no ma onuu noho. Ntsi nna no ho nnhia dɛ wɔma ɔkyɛr ansaana wɔagye no aba asafo no mu bio.
MBRƐ YEBESI ESUASUA JEHOVAH N’ATSƐNTSENENEE NYE N’EHUMBƆBƆR
14-15. Mbrɛ wodzii asɛm a osii wɔ Corinth asafo no mu no ho dwuma no, ebɛnadze na yesua fi mu? (2 Peter 3:9) (Hwɛ mfonyin no so.)
14 Mbrɛ wodzii asɛm a osii wɔ Corinth asafo no mu no ho dwuma no, Jehovah maa wɔkyerɛwee too hɔ mbrɛ ɔbɛyɛ a ‘ɔbɛkyerɛkyerɛ hɛn.’ (Rom. 15:4) Asɛm a osii no ma yehu dɛ sɛ obi yɛ bɔn a no mu yɛ dur bi wɔ asafo no mu a, Jehovah nnsosɔw do. Ɔmmpɛ dɛ n’asomfo nya adwen dɛ sɛ wɔma ɔdzebɔnyɛnyi bi a onnu noho kɔ do tsena asafo no mu a, ɔkyerɛ dɛ wɔwɔ ehumbɔbɔr. Jehovah wɔ ehumbɔbɔr paa, naaso ɔnnsosɔw bɔn do. Dɛmara so na dza ɔaka dɛ ɔyɛ papa anaa bɔn no, ɔnnkɛsesa no dabiarada. (Jude 4) Nokwasɛm nye dɛ, sɛ Jehovah ma ɔdzebɔnyɛnyi a onnu noho no kɔ do tsena asafo no mu a, obotum asɛɛ asafo no, na ɔno mbom bɛkyerɛ dɛ onnyi ehumbɔbɔr.—Mbɛ. 13:20; 1 Cor. 15:33.
15 Naaso iyi nyina mu no, yenyim dɛ Jehovah mmpɛ dɛ ɔsɛɛ obiara. Mbom ne yamu a nkyɛ ɔbɛgye obiara nkwa. Hɔn a wogyaa bɔn yɛ na wɔpɛ dɛ wɔfa no nyɛnko bio no, ohu hɔn mbɔbɔr. (Ezek. 33:11; kenkan 2 Peter 3:9.) Ntsi aber a ɔbarimba no a ɔwɔ Corinth asafo no mu nuu noho na ɔsesaa no suban bɔn no, Jehovah nam Paul do maa asafo no hun dɛ, ɔsɛ dɛ wɔdze ɔbarimba no no bɔn kyɛ no na wɔsan gye no ba asafo no mu bio.
Sɛ wɔgye obi a, enuanom yɛ no etuu, na wɔma ohu dɛ hɔn enyi agye dɛ ɔasan aba. Wɔyɛ dɛm dze kyerɛ dɛ worusuasua Jehovah no dɔ na n’ehumbɔbɔr (Hwɛ nkyekyɛmu 14-15)
16. Mbrɛ wodzii asɛm a osii wɔ Corinth asafo no mu no ho dwuma no, ɔma etse nka dɛn?
16 Mbrɛ wosii dzii asɛm a osii wɔ Corinth asafo no mu ho dwuma a yɛasan abɔ ho nkɔmbɔ yi aboa hɛn paa. Wɔama yeehu dɛ, Jehovah dɔ nyimpa, ɔyɛ dza ɔtsen na ɔnnkyea atsɛmbu so. (Ndw. 33:5) Yɛda Jehovah ase paa dɛ ɔwɔ suban a ɔtse dɛm, na yɛkamfo no kɛse! Adze yi ara, bɔn wɔ hɛn nyina hɛnho, na hɛn mu biara hia no bɔnfakyɛ. Ntsi hɛn mu biara dze no aseda kaw osian werdam afɔrbɔ no ntsi. Sɛ ɔnnyɛ dɛm afɔrbɔ no a, nkyɛ yennyi bɔnfakyɛ biara. Yenyim dɛ Jehovah dɔ n’asomfo paa, na ɔpɛ dɛ osi hɔn yie. Iyi ma hɛn akoma tɔ hɛn yamu ankasa!
17. Ebɛnadze na yebosusu ho wɔ adzesua nsɛm a odzidzi do no mu?
17 Ndɛ so ɛ, sɛ obi yɛ bɔn a no mu yɛ dur bi wɔ asafo no mu a, wosi dɛn dzi ho dwuma? Asafo mu mpanyimfo besi dɛn esuasua Jehovah na wɔaaboa ɔdzebɔnyɛnyi bi ma oeenu noho? Sɛ mpanyimfo no yi obi fi asafo no mu anaa wɔgye obi a, ɔsɛ dɛ asafo no mufo suo mu dɛn? Yebosusu dɛm nsɛmbisa yi ho wɔ adzesua nsɛm a odzidzi do no mu.
NDWOM 109 Hom Mfa Hom Akoma Nyina Ndɔ Enuanom
