ADZESUA ASƐM 46
NDWOM 49 Ma Jehovah N’akoma Ntɔ Ne Yamu
Enuanom Mbarimba—Hom Pɛ Dɛ Hom Bɛyɛ Asafo Mu Asomfo?
‘Ɔma mu wɔ nhyira kyɛn ɔgye.’—ANDW. 20:35.
DZA YEBOSUA
Adzesua yi bɛhyɛ enuanom mbarimba a woenuma hɔn no nkuran ma wɔaayer hɔnho abɛyɛ asafo mu asomfo.
1. Nna ɔsomafo Paul bu asafo mu asomfo dɛn?
ASAFO mu asomfo yɛ ndwuma ahorow bi a no ho hia wɔ asafo ahorow no mu. Nna ɔsomafo Paul bu dɛm mbarimba anokwafo yi dɛ hɔn ho hia wɔ asafo no mu. Iyi ntsi, wɔ krataa a ɔkyerɛwee kɛmaa Christianfo a nna wɔwɔ Philippi mu no, okyiaa asafo mu mpanyimfo nye asafo mu asomfo nyina.—Phil. 1:1.
2. Hokwan a onua bi a wɔfrɛ no Luis enya dze rosom dɛ asafo mu somfo no, ɔma ɔtse nka dɛn?
2 Enuanom mbarimba a hɔn enyi efir nye hɔn a wonnyinii no mu pii dze enyigye rosom dɛ asafo mu asomfo. Devan bɛyɛɛ asafo mu somfo no, nna oedzi mfe 18. Naaso onua bi a wɔfrɛ no Luis dze, ɔbɛyɛɛ asafo mu somfo no, nna ɔabor mfe 50. Hokwan a oenya dze rosom dɛ asafo mu somfo no, ɔma ɔtse nka dɛn? Ɔkaa dɛ: “Sɛ modwendwen ɔdɔ a enuanom ada no edzi akyerɛ me no ho a, ɔma muhu dɛ ɔyɛ hokwan kɛse paa dɛ morosom dɛ asafo mu somfo.” Asafo mu asomfo piinara so tse nka dɛmara.
3. Ebɛn nsɛmbisa na yebosusu ho wɔ adzesua yi mu?
3 Sɛ eyɛ onua a woenuma wo, na ennyɛ asafo mu somfo a, ibotum dze esi w’enyi do na aabɛyɛ bi anaa? Ebɛnadze na obotum ekenyan wo ma aayɛ dɛm? Ebɛn suban ahorow na Kyerɛwnsɛm no ka dɛ ɔsɛ dɛ inya ansaana etum abɛyɛ asafo mu somfo? Adzesua yi mu no, yebosusu dɛm nsɛmbisa yi ho. Naaso, hom mma yendzi kan nhwɛ edwuma a asafo mu asomfo yɛ wɔ asafo no mu.
EBƐN EDWUMA NA ASAFO MU ASOMFO YƐ WƆ ASAFO NO MU?
4. Ebɛn ndwuma na asafo mu asomfo yɛ wɔ asafo no mu? (Hwɛ mfonyin no so.)
4 Asafo mu somfo yɛ onua bi a sunsum krɔnkrɔn no boa asafo mu mpanyimfo ma woyi no. Ɔyɛ ndwuma ahorow bi a no ho hia dze boa asafo mu mpanyimfo wɔ asafo no mu. Asafo mu asomfo binom hwɛ hu dɛ enuanom benya nsaasesin a wɔbɛyɛ mu edwuma nye nwoma ahorow a wɔdze bɛyɛ asɛnka edwuma no. Binom so boa ma wosiesie Ahendzi Asa do. Asafo mu asomfo binom yɛ attendant na binom so hwɛ mfir a wɔdze bɔ ndwom na wɔdze yi video wɔ asafo nhyiamu ase no do. Asafo mu asomfo yɛ ndwuma ahorow pii dze boa enuanom a wɔwɔ asafo no mu no. Naaso dza ohia hɔn paa nye dɛ wɔnye Jehovah ntamu bɛyɛ kama. Nokwasɛm nye dɛ, wɔdɔ Jehovah na wɔdze n’Asɛm so bɔ hɔn bra. Afei so, wɔdɔ hɔn nuanom Christianfo paa. (Matt. 22:37-39) Onua bi a woenuma no besi dɛn abɛyɛ asafo mu somfo?
Asafo mu asomfo suasua Jesus na wɔyɛ ndzɛmba ahorow bi dze boa afofor (Hwɛ nkyekyɛmu 4)
5. Onua bi besi dɛn abɛyɛ asafo mu somfo?
5 Bible no ka suban ahorow a ɔsɛ dɛ onua bi da no edzi ansaana oetum abɛyɛ asafo mu somfo ho asɛm. (1 Tim. 3:8-10, 12, 13) Sɛ epɛ dɛ ebɛyɛ asafo mu somfo a, sua dɛm suban ahorow yi ho adze na bɔ mbɔdzen dɛ ebɛda no edzi. Naaso, ɔsɛ dɛ idzi kan hu siantsir a epɛ dɛ ebɛyɛ asafo mu somfo no.
EBƐNADZE NTSI NA EPƐ DƐ EBƐYƐ ASAFO MU SOMFO?
6. Ebɛnadze ntsi na epɛ dɛ esom wo nuanom Christianfo? (Matthew 20:28; hwɛ mfonyin no so.)
6 Dza Jesus Christ yɛe biara, ɔdɔ a nna ɔwɔ ma n’Egya nye nyimpa no na ɔkaa no ma ɔyɛe. Dɛm dɔ no maa ɔyeer no ho yɛɛ edwumadzen. Afei so ɔmaa ɔyɛɛ ndwuma ahorow bi a nna nkorɔfo tse nka dɛ ɔba famu dze boaa afofor. Nokwasɛm nye yi, Jesus etwa sa pa ato hɔ ama hɛn. (Kenkan Matthew 20:28; John 13:5, 14, 15) Sɛ ema ɔdɔ a ewɔ ma Jehovah nye afofor no kenyan wo ma eyer woho wɔ asafo no mu a, Jehovah behyira wo na ɔbɔboa wo ma eetum abɛyɛ asafo mu somfo.—1 Cor. 16:14; 1 Pet. 5:5.
Dza Jesus yɛe no boaa n’asomafo no ma wohun dɛ, ɔnnsɛ dɛ wɔhwehwɛ hokwan a ɔbɔtwetwe afofor adwen aba hɔn do. Mbom ɔsɛ dɛ wɔbrɛ hɔnho adze na wɔyɛ ndzɛmba boa afofor (Hwɛ nkyekyɛmu 6)
7. Ebɛnadze ntsi na ɔnnsɛ dɛ onua bi nya adwen dɛ ɔpɛ dɛ onya hokwan bi wɔ asafo no mu ama enuanom aabɔ agye no do?
7 Wiadze yi mu dze, hɔn a wɔpɛ dɛ wɔgye dzin na nkorɔfo taa bɔ gye hɔn do. Naaso ɔnntse dɛm koraa wɔ Jehovah n’ahyehyɛdze no mu. Sɛ onua bi dɔ afofor dɛ mbrɛ nna Jesus dɔ afofor no a, n’enyi remmber dɛ obenya hokwan bi anaa tum wɔ asafo no mu. Obi a ɔwɔ adwen a ɔtse dɛm no, sɛ wɔdze hokwan bi ma no wɔ asafo no mu a, bi a ɔrennyɛ ndwuma a nkorɔfo susu dɛ ɔba famu no mmfa mmboa Jehovah no nguan a wɔda n’akoma do no. Bi a obenya adwen dɛ edwuma a ɔtse dɛm mmfata no. (John 10:12) Obiara a ɔpɛ dɛ onya hokwan wɔ asafo no mu mbrɛ ɔbɛyɛ a enuanom bɔbɔ agye no do anaa ɔdze bɛmema noho do no, Jehovah rinnhyira no.—1 Cor. 10:24, 33; 13:4, 5.
8. Ebɛn afotu na Jesus dze maa n’asomafo no?
8 Jesus n’anyɛnkofo a nna wɔbɛn no paa no mpo, odur mber bi no, nna wɔpɛ dɛ ɔdze hokwan ahorow bi hyehyɛ hɔn nsa. Naaso nna ɔnnyɛ adwen pa na wɔdze rohwehwɛ dɛm hokwan no. Ma yɛnhwɛ dza Jesus n’asomafo James na John yɛe. Wɔkɛserɛɛ Jesus dɛ ɔmma hɔn hokwan soronko bi wɔ n’Ahendzi no mu. Naaso Jesus annka annkyerɛ hɔn dɛ wɔayɛ adze dɛ woebisa biribi a ɔtse dɛm. Mbom dza ɔkaa kyerɛɛ n’asomafo 12 no nyina nye dɛ: “Obiara a ɔpɛ dɛ ɔyɛ kɛse wɔ hom mu no, ɔsɛ dɛ ɔsom hom. Na obiara a ɔpɛ dɛ odzi kan wɔ hom mu no, ɔnyɛ akowaa mma hom nyina.” (Mark 10:35-37, 43, 44) Enuanom mbarimba a wɔpɛ dɛ wɔsom hɔn nuanom no dze adwen pa hwehwɛ hokwan ahorow wɔ asafo no mu. Sɛ wɔyɛ dɛm a, wɔboa enuanom no wɔ akwan ahorow pii do.—1 Thess. 2:8.
EBƐNADZE NA ƆBƐMA W’ENYI AGYE HO DƐ EBƆSOM ENUANOM?
9. Sɛ epɛ dɛ esom enuanom a, ebɛnadze na obotum aboa wo?
9 Yenyim dɛ edɔ Jehovah na epɛ dɛ esom enuanom. Naaso bi a ndwuma ahorow a asafo mu asomfo yɛ dze boa enuanom no, w’enyi nngye ho dɛ ebɛyɛ bi. Sɛ dɛm a, nna ɔno ebɛnadze na ɔbɔboa wo? Ibotum adwendwen mbrɛ w’enyi besi agye aber a ereyɛ ndzɛmba bi dze aboa enuanom no ho. Jesus kaa dɛ: ‘Ɔma mu wɔ nhyira kyɛn ɔgye.’ (Andw. 20:35) Jesus dze dɛm asɛm yi bɔɔ ne bra. Ɔyɛɛ ndzɛmba ahorow bi dze boaa afofor, na iyi maa n’enyi gyee. Ntsi woara so sɛ eyɛ dɛm a, w’enyi bɛgye.
10. Ebɛnadze na Jesus yɛe dze kyerɛɛ dɛ nna n’enyi gye ho dɛ ɔbɛyɛ ndzɛmba bi dze aboa afofor? (Mark 6:31-34)
10 Hom mma yɛnhwɛ adze bi a Jesus yɛe a ɔma yehu dɛ nna n’enyi gye ho dɛ ɔbɛyɛ ndzɛmba bi dze aboa afofor. (Kenkan Mark 6:31-34.) Mber bi, nna Jesus nye n’asomafo no aberɛ paa. Ntsi nna wɔrekɛpɛ beebi a obiara nnyi hɔ akɛhyɛ agye hɔn ahom. Naaso nyimpadɔm no dzii hɔn enyim kan kodur hɔ. Nna wɔpɛ dɛ Jesus kyerɛkyerɛ hɔn. Nkyɛ Jesus botum aka dɛ ɔrennyɛ, osiandɛ nna ɔnye n’asomafo no ‘nnyaa adagyer mpo nndzidzii.’ Anaa nkyɛ obotum aka asɛm kor anaa ebien bi akyerɛ nyimpadɔm no, na ɔaapam hɔn dɛ wɔnkɔ. Naaso osiandɛ ɔdɔ hɔn ntsi, “ɔhyɛɛ ase kyerɛkyerɛɛ hɔn ndzɛmba pii.” Na ɔkyerɛkyerɛɛ hɔn araa ‘kodur ewimbir.’ (Mark 6:35) Nna ɔnnyɛ dɛ ɔsɛ dɛ ɔkyerɛkyerɛ hɔn ara ntsi na ɔyɛɛ dɛm, mbom ɔyɛɛ dɛm osiandɛ “hɔn ho yɛɛ no mbɔbɔr.” Nna ɔpɛ dɛ ɔkyerɛkyerɛ hɔn osiandɛ nna ɔdɔ hɔn. Ndzɛmba a Jesus yɛe dze boaa nkorɔfo no maa n’enyi gyee paa.
11. Nkorɔfo a Jesus kyerɛkyerɛɛ hɔn no, ebɛnadze bio na ɔyɛɛ maa hɔn? (Hwɛ mfonyin no so.)
11 Ɔnnyɛ asɛmpa no nkotsee na Jesus kaa kyerɛɛ nyimpadɔm no. Ɔmaa hɔn nsa kaa dza nna wohia so. Jesus yɛɛ anwanwadze ma edziban buu do, na ɔdze maa n’esuafo no ma wɔkyekyɛɛ maa nyimpadɔm no. (Mark 6:41) Dza Jesus maa n’esuafo no yɛe no boaa hɔn ma wohun mbrɛ wobesi asom afofor. Afei so, ɔmaa wohun dɛ ohia dɛ wɔyɛ ndzɛmba ahorow bi dze boa afofor. Dɛm ndzɛmba ahorow no bi na asafo mu asomfo taa yɛ no. Hwɛ mbrɛ asomafo no enyi sii gyee aber a wɔkaa Jesus ho ma ɔnam anwanwa kwan do maa nyimpadɔm no edziban kesii dɛ “hɔn nyina dzidzii mee.” (Mark 6:42) Ɔnnyɛ dɛm aber yi nkotsee na Jesus dze dza ohia no no too nkyɛn na ɔdze dza afofor hia maa hɔn. Ɔdze nda a odzii no wɔ asaase yi do no nyina yɛɛ ndzɛmba boaa nkorɔfo. (Matt. 4:23; 8:16) Aber a Jesus kyerɛkyerɛɛ nkorɔfo na ofii ne pɛ mu dze dza wohia maa hɔn no, ɔmaa n’enyi gyee paa, na n’akoma so tɔɔ ne yamu. Ntsi woara so, sɛ ifi wo pɛ mu yɛ ndzɛmba bi boa wo nuanom Christianfo na eyer woho bɛyɛ asafo mu somfo a, w’enyi bɛgye paa.
Sɛ edɔ Jehovah na epɛ dɛ esom afofor a, obekenyan wo ma aayɛ dza ibotum biara aboa enuanom (Hwɛ nkyekyɛmu 11) a
12. Ebɛnadze ntsi na ɔnnsɛ dɛ hɛn mu biara nya adwen dɛ biribiara nnyi hɔ a obotum ayɛ dze aboa enuanom no?
12 Sɛ etse nka dɛ ɔwo dze innyi adom akyɛdze bi a ibotum dze aboa wo nuanom Christianfo a, mma w’abaw mu mmbu. Ɔnnyɛ dɛn ara ewɔ suban pa ahorow bi a ibotum dze aboa enuanom. Ibotum adwendwen asɛm a Paul kae wɔ 1 Corinthfo 12:12-30 no ho, na aaserɛ Jehovah dɛ ɔmboa wo ma nya dza akenkan no do mfaso. Asɛm a Paul kae yi ma ɔda edzi pefee dɛ, Jehovah no somfo biara ho hia na ɔsom bo ma asafo no. Ahwehwɛdze a ɔsɛ dɛ idu ho ana etum abɛyɛ asafo mu somfo no, sɛ innyae nndur ho a, mma w’abaw mu mmbu. Mbom kɔ do ara yer woho som Jehovah na yɛ dza ibotum biara boa enuanom no. Nya awerɛhyɛmu dɛ asafo mu mpanyimfo no enyi tua mbɔdzen a erobɔ no nyina, na wɔdze dwumadzi ahorow a ibotum ayɛ bɛhyehyɛ wo nsa.—Rom. 12:4-8.
13. Suban a ɔsɛ dɛ obi nya ama oeetum abɛyɛ asafo mu somfo no, woananom so na ɔsɛ dɛ wonya dɛm suban no bi?
13 Ma yɛnhwɛ siantsir fofor ntsi a ɔsɛ dɛ eyer woho bɛyɛ asafo mu somfo: Suban ahorow a ɔsɛ dɛ obi nya ama oeetum abɛyɛ asafo mu somfo no, no mu beberee wɔ hɔ a ɔsɛ dɛ Christianfo nyina da no edzi. Nokwasɛm nye dɛ, ɔsɛ dɛ Christianfo nyina twe bɛn Jehovah, wɔma hɔn enyi gye ho dɛ wɔbɔboa afofor, na wɔyɛ ndzɛmba a ɔbɛma Jehovah n’enyi agye. Ebɛnadze pɔtsee na ɔsɛ dɛ onua bi yɛ ama oeetum abɛyɛ asafo mu somfo?
DZA ƆSƐ DƐ EYƐ AMA EETUM ABƐYƐ ASAFO MU SOMFO
14. Sɛ wɔka dɛ ɔnnsɛ dɛ asafo mu somfo ‘dze n’edwuma dzi agor’ a, ɔkyerɛ dɛn? (1 Timothy 3:8-10, 12)
14 Suban a ɔsɛ dɛ obi nya ama oeetum abɛyɛ asafo mu somfo a wɔaka ho asɛm wɔ 1 Timothy 3:8-10, 12 no, hom mma yensusu no mu bi ho. (Kenkan.) Ɔnnsɛ dɛ asafo mu somfo ‘dze n’edwuma dzi agor.’ Wobotum so akyerɛ dɛm asɛm yi ase dɛ “obi a ɔfata dɛ wobu no” anaa “obi a ɔfata dɛ wodzi no nyi.” Dɛm asɛm yi nnkyerɛ dɛ ɔnnsɛ dɛ eserew anaa ema w’enyi gye. (Ɔsɛnk. 3:1, 4) Naaso, ɔsɛ dɛ eyer woho yɛ dwumadzi biara a wɔdze bɛhyɛ wo nsa no yie. Sɛ enuanom no hu dɛ wobotum dze hɔn ho ato wo do a, ɔbɛma woebu wo paa.
15. Sɛ wɔka dɛ obi ‘nnyɛ tɛkyerɛmanta’ na ‘ɔnnyɛ odzifodzepɛfo’ so a, ɔkyerɛ dɛn?
15 Sɛ wɔka dɛ obi ‘nnyɛ tɛkyerɛmanta’ a, dza ɔkyerɛ nye dɛ odzi nokwar na afofor botum dze hɔn ho ato no do. Sɛ ɔka dɛ ɔbɛyɛ biribi a, ɔyɛ, na ɔnndaadaa nkorɔfo so. (Mbɛ. 3:32) Sɛ wɔka dɛ obi ‘nnyɛ odzifodzepɛfo’ a, dza ɔkyerɛ nye dɛ sɛ ɔnye obi reyɛ edwuma a, odzi nokwar na sɛ ɔba no sikasɛm so a, odzi nokwar. Afei so ɔmmfa nyansakwan bi do nndzidzi no nuanom Christianfo ho.
16. (a) Sɛ wɔka dɛ obi ‘nnyɛ nsahweam’ a, ɔkyerɛ dɛn? (b) Sɛ wɔka dɛ obi wɔ “tsibowa a no ho tsew” a, ɔkyerɛ dɛn?
16 Sɛ wɔka dɛ obi ‘nnyɛ nsahweam’ a, dza ɔkyerɛ nye dɛ ɔnnwe nsa anaa ɔnnom nsa ma ɔnntra do. Sɛ wɔka dɛ obi wɔ “tsibowa a no ho tsew” a, ɔkyerɛ dɛ ɔdze Jehovah ne mbra bɔ ne bra. Ɔwɔ mu dɛ bɔn wɔ noho dze, naaso osiandɛ ɔnye Jehovah ntamu yɛ kama ntsi, n’asomu dwe no.
17. Sɛ wɔka dɛ ‘wɔasɔ onua bi ahwɛ’ dɛ ɔfata a, ɔkyerɛ dɛn? (1 Timothy 3:10; hwɛ mfonyin no so.)
17 Sɛ wɔka dɛ ‘wɔasɔ obi ahwɛ’ a, dza ɔkyerɛ nye dɛ asafo mu mpanyimfo edzi kan dze dwumadzi ahorow bi ahyehyɛ ne nsa ma ɔayɛ no yie, ntsi wobotum dze hɔn ho ato no do. Dɛm ntsi sɛ asafo mu mpanyimfo dze dwumadzi bi hyɛ wo nsa a, akwankyerɛ biara a wɔdze bɛma wo nye akwankyerɛ biara a ahyehyɛdze no dze ama no, bɔ mbɔdzen fa yɛ edwuma. Hwɛ hu dɛ etse dza wɔpɛ dɛ eyɛ no ase, na hu ber so a ɔsɛ dɛ edze wie. Sɛ wɔdze dwumadzi bi hyɛ wo nsa na etsen woho yɛ no yie a, enuanom no bohu dɛ erokɔ w’enyim wɔ Jehovah no som mu. Asafo mu mpanyimfo, yɛserɛ hom, hom nhwehwɛ hokwan ahorow mfa ntsetse enuanom mbarimba a woenuma hɔn no. (Kenkan 1 Timothy 3:10.) Enuanom mbarimba a woenuma hɔn a woedzi mfe 10 kesi mfe 14 anaa wonnyaa nndzii mfe 10 wɔ hom asafo mu anaa? Hɔnankasa gye ber sua adze anaa? Wɔtaa ma mbuae wɔ asafo nhyiamu ase na wɔtaa kɔ asɛnka so anaa? Sɛ dɛm a, nna ɔno hom nhwɛ mfe a woedzi nye dza wobotum ayɛ na hom mfa dwumadzi nhyehyɛ hɔn nsa. Sɛ hom yɛ dɛm a, ɔbɛma hom etum ‘asɔ dɛm enuanom mbarimba yi ahwɛ’ dɛ wɔfata anaa. Ɔba no dɛm a, ɔntɔ ara dɛ wobedzi mfe 17 kesi mfe 19 no, wobotum abɛyɛ asafo mu asomfo.
Sɛ asafo mu mpanyimfo dze dwumadzi ahorow bi hyehyɛ enuanom mbarimba a woenuma hɔn no nsa a, ɔbɛma woetum ‘asɔ hɔn ahwɛ’ dɛ wɔfata anaa (Hwɛ nkyekyɛmu 17)
18. Sɛ wɔka dɛ obi ‘noho nnyi asɛm’ a, ɔkyerɛ dɛn?
18 Sɛ wɔka dɛ obi ‘noho nnyi asɛm’ a, ɔkyerɛ dɛ obiara runntum mmbɔ no sombo dɛ ɔayɛ bɔn kɛse bi. Ɔwɔ mu, nkorɔfo botum etwa asɛm ato Christianfo do. Jesus mpo, wotwaa asɛm too no do na ɔkaa too hɔ dɛ dɛmara na wɔdze bɛyɛ n’ekyirdzifo so. (John 15:20) Naaso sɛ ebɔ bra pa dɛ mbrɛ Jesus yɛe no a, wɔbɔbɔ wo dzin pa wɔ asafo no mu.—Matt. 11:19.
19. Sɛ wɔka dɛ ɔsɛ dɛ obi yɛ ‘okun a ne yer kor’ a, ɔkyerɛ dɛn?
19 Ɔwɔ dɛ asafo mu somfo yɛ ‘okun a ne yer kor.’ Ahyɛse no, banyin kor na basia kor na Jehovah kaa hɔn bɔɔ mu dɛ awarfo. Ntsi sɛ awar a, ɔsɛ dɛ wo yer yɛ kortsee. (Matt. 19:3-9) Ɔnnsɛ dɛ Christiannyi barimba bɔ edwaman. (Heb. 13:4) Dɛm asɛm yi kyerɛ dɛ, ɔsɛ dɛ idzi wo yer nokwar. Dɛm ntsi, ɔnnsɛ dɛ eyɛ biribiara a ɔbɛma mbaa afofor enya adwen dɛ epɛ hɔn.—Job 31:1.
20. Ɔbarimba bi besi dɛn ahwɛ ne fie do “yie”?
20 “Wɔhwɛ hɔn mba nye hɔnankasa hɔn fie do yie.” Sɛ eyɛ ebusuatsir a, ɔnnsɛ dɛ edze w’asodzi dzi agor koraa. Ɔsɛ dɛ eyɛ ebusua som dapɛn biara. Afei so, ɔsɛ dɛ enye wo yer na wo mba taa bɔ mu kɔ asɛnka. Bio so, ɔsɛ dɛ eboa wo mba no ma wɔfa Jehovah nyɛnko. (Eph. 6:4) Ɔbarimba a otum hwɛ n’ebusua do yie no, obotum ahwɛ enuanom a wɔwɔ asafo no mu so.—Fa toto 1 Timothy 3:5 ho.
21. Sɛ seseiara ennyɛ asafo mu somfo a, ebɛnadze na ibotum ayɛ?
21 Sɛ eyɛ onua na seseiara ennyɛ asafo mu somfo a, kenkan adzesua asɛm yi na bɔ ho mpaa. Suban a ɔsɛ dɛ obi nya ama oeetum abɛyɛ asafo mu somfo no, sua ho adze na bɔ mbɔdzen da dɛm su ahorow no edzi. Ɔdɔ a ewɔ ma Jehovah nye wo nuanom no, hyɛ mu dzen na ma w’enyi ngye ho dɛ ebɛyɛ ndzɛmba ahorow bi dze aboa enuanom no. (1 Pet. 4:8, 10) Yer woho bɛyɛ asafo mu somfo, na w’enyi bɛgye dɛ ereyɛ biribi dze aboa enuanom. Yɛserɛ Jehovah dɛ onhyira mbɔdzen biara a erobɔ dɛ ebɛba abɛyɛ asafo mu somfo no do.—Phil. 2:13.
NDWOM 17 ‘Mepɛ Na Mebɛyɛ’
a MFONYIN NO HO NKYERƐKYERƐMU: Sɛ yɛhwɛ bankum hɔ a, yehu dɛ Jesus abrɛ noho adze na ɔreyɛ biribi dze aboa n’esuafo no; nyimfa so, yehu dɛ asafo mu somfo bi roboa onua bi a n’enyi efir.
