Jehovah Adasefo wɔ ho kwan soronko bi. Dɛ Christianfo a yehyira hɛnho do na woenuma hɛn no, hɛn mu biara bɔ mbɔdzen dɛ ɔnye Ewuradze Tumfo Jehovah benya ebusuabɔ a no mu yɛ dzen. Ɔnam ne Ba no do atwe hɛn aba ne nkyɛn. (Joh 6:44) Otsie hɛn mpaabɔ.​—Nd 34:15.

Ebusuabɔ a ɔsom bo a yɛnye Jehovah wɔ no, yebesi dɛn abɔ ho ban? Adze kor nye dɛ, ndzeyɛbɔn a Israelmba no yɛe no, ɔnnsɛ dɛ yɛyɛ bi. Wɔnye Jehovah yɛɛ ahyɛmu wiei no, annkyɛr koraa na wɔyɛɛ sika nantwiba bi soom no. Nna dza wɔyɛe no yɛ abosonsɔr. (Ex 32:7, 8; 1Co 10:7, 11, 14) Yebotum ebisa hɛnho dɛ: ‘Sɛ mihyia nsɔhwɛ bi a, meyɛ m’adze dɛn? Aso me ndzeyɛɛ kyerɛ dɛ ebusuabɔ a menye Jehovah wɔ no som bo ma me anaa?’ Ɔdɔ a no mu yɛ dzen a yɛwɔ ma hɛn sor Egya no bɔboa hɛn ma yaatwe hɛnho efi ndzɛmba a okyir no ho koraa.​—Nd 97:10.

HWƐ VIDEO A WƆATO DZIN BƆ EBUSUABƆ A ENYE JEHOVAH WƆ NO HO BAN (COL 3:5) NO, NA YIYI NSƐMBISA A ODZIDZI DO YI ANO:

• Ebɛnadze nye enyikaber anaa enyiber?

• Ebɛnadze ntsi na ɔsɛ dɛ yɛpow enyiber na abosonsɔr?

• Ebɛn kwan do na awartõ tse dɛ abosonsɔr?

• Ebɛnadze ntsi na ɔwɔ dɛ hɔn a wɔwɔ asodzi wɔ Nyankopɔn n’ahyehyɛdze no mu ne tsitsir no hwɛ hu dɛ woedzi hɔn ahokafo ehiadze ho dwuma?