Hɔn a hɔn abrabɔ ho tsew no nkotsee na wobotum nye Jehovah enya ebusuabɔ a no mu yɛ dzen. (1Pe 1:14-16) Sɛ Bible esuafo gyaa ndzeyɛbɔn yɛ a, wobotum enya ebusua asetsena a ɔyɛ enyigye, apɔwmudzen pa, na hɔn sikasɛm so botum ayɛ papa.

Kyerɛkyerɛ dza Jehovah kã fa abrabɔ ho no mu pefee kyerɛ hɔn, boa hɔn ma wɔntse siantsir a Nyankopɔn n’enyi nngye ndzeyɛɛ pɔtsee bi ho no ase, na ma wonhu siantsir a mfaso wɔ do dɛ wɔdze dɛm afotu no bɛyɛ edwuma. Bɔ mbɔdzen boa w’esuafo no ma wɔnyɛ nsesa wɔ mbrɛ wosi susu ndzɛmba ho no mu, mbrɛ ɔbɛyɛ a wobotum egyaa ndzeyɛbɔn bi a aka hɔn hɔ no ne yɛ. (Eph 4:22-24) Hyɛ hɔn nkuran dɛ Jehovah botum aboa hɔn ma woeegyaa ndzeyɛbɔn bi a aka hɔn hɔ no yɛ. (Php 4:13) Boa wo Bible esuafo no ma wɔnserɛ Jehovah hɔ mboa aber a bɔn ho nkãtse bi ahyɛ hɔn do no. Boa hɔn ma wonhu tsebea ahorow a obotum ama wɔaayɛ bɔn no, na wonkwetsir. Hyɛ hɔn nkuran ma wɔnyɛ ndzɛmba pa a wobenya do mfaso kyɛn dɛ wɔbɛyɛ ndzɛmba bɔn. Sɛ yehu dɛ Jehovah roboa hɛn Bible esuafo aber a wɔreyɛ nsesa ahorow no a, ɔma yedzi dɛw.

HWƐ VIDEO A WƆATO DZIN BOA WO BIBLE ESUAFO MA WONGYAA NDZEYƐƐ A NO HO NNTSEW NO NE YƐ NO, NA YIYI NSƐMBISA A ODZIDZI DO YI ANO:

• Ebɛn kwan do na asafo mu mpanyimfo no nye Neeta daa no edzi dɛ wɔgye dzi dɛ Sandy botum egyaa ndzeyɛbɔn yɛ?

• Ebɛn kwan do na Neeta dze mboa fofor a nna Sandy hia no maa no?

• Ebɛnadze na Sandy yɛe dze hwehwɛɛ Jehovah hɔ mboa?