Enuanom a wɔdze mfe pii asom Jehovah no nnyɛ na wɔ hɛn asafo ahorow no mu. Wɔdze hɔnho ato Jehovah do mfe pii, na yebotum esũa biribi efi hɔn hɔ. Yebotum ebisa hɔn ma wɔaakã Jehovah n’ahyehyɛdze no ho abakɔsɛm akyerɛ hɛn. Yebotum so ama wɔaakã mbrɛ Jehovah aboa hɔn ma woetum egyina ɔhaw ahorow a wohyiae no ano no ho asɛm akyerɛ hɛn. Yebotum ato nsa afrɛ dɛm enuanom yi bi ma wɔaaba hɛn Ebusua Som ase na wɔaakã hɔn suahu ahorow akyerɛ hɛn.

Sɛ edze mfe pii asom Jehovah a, fi w’akoma nyinara mu kã wo suahu kyerɛ Christianfo a wɔmmfaa mfe pii nnsomee tse dɛ ɔwo no. Jacob na Joseph kãa hɔn suahu kyerɛɛ hɔn mba na hɔn mbanana. (Ge 48:21, 22; 50:24, 25) Ekyir yi, Jehovah kãa kyerɛɛ ebusuatsir ahorow no dɛ wɔnkã ne mbanyinyɛ ho asɛm nkyerɛ hɔn mba. (De 4:9, 10; Nd 78:4-7) Wɔ hɛn aber yi do no, awofo nye enuanom afofor a wɔwɔ asafo no mu no nyina botum akã anwanwadze ahorow a woehu dɛ Jehovah nam n’ahyehyɛdze no do ayɛ no ho asɛm akyerɛ mbofra nye mbabun.

HWƐ VIDEO A WƆATO DZIN SƐ WƆDZE NSA TO HƐN DWUMADZI DO A, ƆWƆ DƐ YƐKƆ DO DZE KORYƐ SOM NO, NA YIYI NSƐMBISA A ODZIDZI DO YI ANO:

• Ebɛn kwan na Austria Bethel no faa do boaa hɛn nuanom a nna wɔwɔ aman ahorow a nna wɔdze nsa ato hɔn dwumadzi do no?

• Ebɛn kwan do na enuanom a nna wɔwɔ dɛm aman ahorow yi do no kɔr do hyɛɛ hɔn gyedzi mu dzen?

• Ebɛnadze ntsi na adawurbɔfo a nna wɔwɔ Romania no mu piinara fii Jehovah n’ahyehyɛdze no mu, na ebɛnadze na ɔmaa wɔsanee baa bio?

• Ebɛn kwan do na dɛm suahu ahorow yi hyɛ wo gyedzi dzen?