Sɛ wɔkã awarfo a wɔyɛɛ ɔdɔ na obu a wɔkyerɛ wɔ awar mu ho nhwɛdo pa a, yerunntum nnkã nngya Abraham na Sarah. (Ge 12:11-13; 1Pe 3:6) Naaso, osiandɛ nna wɔyɛ nyimpa ntsi, wohyiaa nsɛndzendzen ahorow bi wɔ hɔn awar no mu a nna otwar dɛ wogyina ano. Ebɛnadze na awarfo botum esũa efi Abraham na Sarah hɔn awar no mu?

Hom nye homho mbɔ nkɔmbɔ. Sɛ wo hokafo dze ebufuw kasa kyerɛ wo a, mma nnyi no ano wɔ ebufuw mu, sie abotar na enye no nkasa. (Ge 16:5, 6) Hom nyɛ nhyehyɛɛ na aama hom enya ber dze ayɛ ndzɛmba abɔ mu. Aber biara, ma wo hokafo no nhu wɔ wo kasaa na wo ndzeyɛɛ mu dɛ edɔ no. Dza ɔkyɛn ne nyina no, hom nkɔ do nsũa adze mbɔ mu, mbɔ mpaa, na hom mbɔ mu nsom na aama Jehovah atsena hom awar no mu. (Ɔsɛ 4:12) Awar a ɔsɔ no hyɛ Jehovah a ɔyɛ dɛm nhyehyɛɛ krɔnkrɔn no Farbaa no enyimnyam.

HWƐ VIDEO A WƆATO DZIN MBRƐ EBƐMA W’AWAR ASƆ NO, NA YIYI NSƐMBISA A ODZIDZI DO YI ANO:

• Wɔ video no mu no, ebɛn ndzɛmba na ɔkyerɛ dɛ nna Shaan na Kiara ntamu retsetsew?

• Ebɛnadze ntsi na no ho hia dɛ awarfo fi hɔn akoma mu kã dza ɔhaw hɔn kyerɛ hɔnho hɔnho?

• Ebɛn kwan do Abraham na Sarah hɔn nhwɛdo no boaa Shaan na Kiara?

• Ebɛn anamɔn na Shaan na Kiara tui dze hyɛɛ hɔn ntamu ebusuabɔ no mu dzen?

• Ebɛnadze ntsi na ɔnnsɛ dɛ okun na ɔyer hwɛ kwan dɛ biribiara bɔkɔ do pɛpɛɛpɛ wɔ hɔn awar mu?