Matthew Asɛmpa 18:1-35
18 Dɛm aber no esuafo no baa Jesus ne nkyɛn bebisaa no dɛ: “Woana paa na ɔyɛ kɛse wɔ ɔsor Ahendzi no mu?”
2 Ntsi ɔfrɛɛ abofra kakraba bi baa ne nkyɛn na ɔdze no begyinaa hɔn finimfin.
3 Nna ɔkaa kyerɛɛ hɔn dɛ: “Nokwar mese hom dɛ, sɛ hom anndan homho* na hom annyɛ dɛ mbofraba a, hom ronnkɔ ɔsor Ahendzi no mu da.
4 Dɛm ntsi obiara a ɔbɛbrɛ noho adze tse dɛ abofra kakraba yi no, ɔno na ɔyɛ kɛse wɔ ɔsor Ahendzi no mu.
5 Na obiara a me dzin ntsi ɔbɛgye abofra kakraba a ɔtse dɛm no, nna ɔagye mara so.
6 Naaso obiara a ɔbɔto mbofra nkakraba a wɔgye me dzi yi mu kor fintsidua no, sɛ wɔdze ewuyambo* a asoasopɔnkɔ twe sɛɛn no kɔn mu nye no kɔtoo po finimfin mpo a nkyɛ oye.
7 “Wiadze no ndue osian fintsidua a ɔto ntsi! Nokwasɛm nye dɛ, mbrɛ ɔtse biara fintsidua no dze ɔbɛba, naaso obi a ɔnam no do bɛba no, ondue!
8 Ntsi sɛ wo nsa anaa wo nan to wo fintsidua a, twa fi hɔ na tow kyen. Na oye dɛ ibedzi dzɛm anaa ebɛyɛ apakye na eenya nkwa, kyɛn dɛ ewɔ nsa ebien anaa anan ebien na wɔbɔtow wo akyen gya a onndum da no mu.
9 Bio so, sɛ w’enyiwa kor to wo fintsidua a tu fi hɔ na tow kyen. Na oye dɛ edze enyiwa kor bɔkɔ nkwa mu kyɛn dɛ ewɔ enyiwa ebien na wɔbɔtow wo akyen Gehenna* gya no mu.
10 Hom nhwɛ na hom eemmbu nkakraba yi mu kor enyimtsia, na mereka akyerɛ hom dɛ hɔn abɔfoe a wɔwɔ sor no hwɛ m’Egya a ɔwɔ sor no enyim daa.
11 * ——
12 Hom dwen ho dɛn? Sɛ obi wɔ nguan 100 na hɔn mu kor yew a, orinngya 99 no wɔ mbepɔw do na onnkyin nnkɔhwehwɛ kor a ɔayew no anaa?
13 Na sɛ ohu no a, nokwar mese hom dɛ, odzi ehurusi wɔ no ho kyɛn 99 no a wɔnnyewee no.
14 Dɛmara so na m’Egya* a ɔwɔ sor no enyi nngye ho dɛ nkakraba yi mu kor mpo bɛyew.
15 “Bio so, sɛ wo nua yɛ wo bɔn a, kɔ ne nkyɛn na kɛda no mfomdo edzi kyerɛ no* wɔ ɔwo nye ɔno nkotsee ntamu. Sɛ otsie wo a, enya wo nua.
16 Naaso sɛ oenntsie a, fa nyimpa baako anaa beenu ka woho, ama asɛm biara eegyina adasefo beenu anaa baasa hɔn dasee* do.
17 Sɛ oenntsie hɔn a, kɛka kyerɛ asafo no. Sɛ oenntsie asafo no so a, bu no dɛ ɔyɛ amanaman munyi nye towgyenyi.
18 “Nokwar mese hom dɛ, adze biara a hom bɛkyekyer no wɔ asaase do no, ɔbɛyɛ biribi a woedzi kan akyekyer no wɔ sor dada. Na adze biara a hom besian no wɔ asaase do no ɔbɛyɛ biribi a woedzi kan esian no wɔ sor dada.
19 Nokwar mese hom bio dɛ, sɛ hom mu beenu pen do wɔ asaase yi do dɛ wobebisa adze bi a no ho hia a, m’Egya a ɔwɔ sor no so bɛyɛ ama hɔn.
20 Na beebi a beenu anaa baasa ehyia mu wɔ me dzin mu no, mowɔ hɔn finimfin.”
21 Afei Peter bae bebisaa no dɛ: “Ewuradze, mpɛn ahen na sɛ mo nua yɛ me bɔn a ɔwɔ dɛ medze kyɛ no? Onkesi mpɛn esuon anaa?”
22 Jesus kaa kyerɛɛ no dɛ: “Mereka akyerɛ wo dɛ, mma ɔnnyɛ mpɛn esuon, mbom onkesi mpɛn 77.
23 Dɛm ntsi ɔsor Ahendzi no tse dɛ ɔhen bi a nna ɔpɛ dɛ ɔnye no nkowaa bu nkontaa.
24 Aber a ɔhyɛɛ ase dɛ orubu nkontaa no, wɔdze ɔbarimba bi bae a ɔdze no kaw talɛnt 10,000.*
25 Naaso osiandɛ nna orunntum nntua ntsi, no wura no kaa dɛ wɔntɔn ɔno na ne yer na ne mba nye dza ɔwɔ nyinara mfa ntua kaw no.
26 Ntsi akowaa no bɔɔ no mu adze wɔ n’enyim, na ɔtotɔe serɛɛ no dɛ, ‘Nya abotar ma me, na mubotua ne nyinara ama wo.’
27 Asɛm no yɛɛ akowaa no no wura no mbɔbɔr na ogyaa no na ɔdze ne kaw no kyɛɛ no.
28 Na akowaa no puei kohun ne nyɛnko akowaa bi a ɔno so dze no kaw denare* 100, na ɔyeer no na omiaa no kɔn kaa kyerɛɛ no dɛ, ‘Tua kaw a edze me no nyinara.’
29 Dɛm ntsi ne nyɛnko akowaa no bɔɔ no mu adze wɔ n’enyim totɔe serɛɛ no dɛ, ‘Nya abotar ma me, na mubotua ama wo.’
30 Naaso ɔammpen, na ɔmaa wɔdze no kɔtoo efiadze kesi dɛ obotua ne kaw no.
31 Aber a no wura no no nkowaa binom hun dza woesi no, hɔn werɛ hoow paa, na wɔkɛkaa dza woesi no nyinara ho asɛm kyerɛɛ hɔn wura no.
32 Ntsi no wura no frɛɛ no kaa kyerɛɛ no dɛ: ‘Akowaa bɔn, aber a etotɔe serɛɛ me no, medze wo kaw no nyinara kyɛɛ wo.
33 Ehwɛ a, nkyɛ ɔnnsɛ dɛ woara so hu wo nyɛnko akowaa no mbɔbɔr dɛ mbrɛ muhun wo mbɔbɔr no anaa?’
34 Na no wura no no bo fuwii, na ɔdze no hyɛɛ hɔn a wɔhwɛ efiadze hɔ no nsa dɛ wɔnye no nto mu, kesi dɛ obotua kaw a ɔdze no nyinara.
35 Sɛ hom so hom emmfi hom akoma mu ammfa annkyekyɛ hom nuanom a, dɛmara na mo sor Egya no so dze bɛyɛ hom.”
Ase Hɔ Nsɛm
^ Anaa “sɛ hom annsesa.”
^ Ɔkyerɛ “bobaa kɛse bi a nna wɔdze yam hwiit.”
^ Hwɛ Nkyerɛkyerɛmu Ɔfa hɔ.
^ Hwɛ Nke. A3.
^ Obotum so akyerɛ, “hom Egya.”
^ Greek, “kɔ ne nkyɛn na kɛka n’enyim.”
^ Greek, “hɔn ano.”
^ Nna dwetɛ talɛnt 10,000 yɛ denare 60,000,000. Hwɛ Nke. B14.
^ Hwɛ Nke. B14.
