Luke Asɛmpa 6:1-49
-
Jesus yɛ “Ahomgyeda no no Wura” (1-5)
-
Ɔbarimba bi a ne nsa adwedwe nyaa ayarsa (6-11)
-
Asomafo 12 no (12-16)
-
Jesus kyerɛkyerɛɛ nkorɔfo na ɔsaa hɔn yarba (17-19)
-
Hɔn a ɔsɛ dɛ hɔn enyi gye nye hɔn a wondue (20-26)
-
Dɔ w’atamfo (27-36)
-
Hom ngyaa atsɛn a hom bu no (37-42)
-
Dua n’aba na wɔdze hu dua kor (43-45)
-
Dan a wosii no yie na dan a onnyi fapem papa (46-49)
6 Ber bi nna ɔnam haban bi mu wɔ ahomgyeda, na n’esuafo no tsetseew nduadzewa* no bi, na wɔposaa no wɔ hɔn nsamu na wɔwee.
2 Nna Phariseefo no bi bisaa dɛ: “Ebɛnadze ntsi na hom reyɛ dza mbra mma kwan dɛ wɔyɛ no Ahomgyeda yi?”
3 Nna Jesus yii hɔn ano dɛ: “Dza David yɛe aber a ɔkɔm dzee ɔno na mbarimba a nna wɔka no ho no, hom nnkenkaan no da?
4 David kɔr Nyankopɔn ne fie, na ɔkɛgyee paanoo a wɔdze ba Nyankopɔn n’enyim* no na odzii na ɔmaa mbarimba a wɔka no ho no so bi. Nna mbra mma kwan dɛ obiara dzi bi gyedɛ asɔfo no nkotsee. Ntsi dɛm asɛm yi hom nnkenkanee a?”
5 Afei ɔkaa kyerɛɛ hɔn dɛ: “Nyimpa Ba no nye Ahomgyeda no no Wura.”
6 Na ahomgyeda kor bi so, ɔkɔr nhyiamudan mu na ɔhyɛɛ ase kyerɛkyerɛe. Nna ɔbarimba bi wɔ hɔ a ne nsa nyimfa adwedwe.*
7 Akyerɛwfo na Phariseefo no hwɛɛ Jesus dzinn dɛ ɔbɛsa yarba wɔ Ahomgyeda no a, ama woeenya biribi egyina do abɔ no sombo.
8 Naaso nna Jesus nyim hɔn adwen, ntsi ɔkaa kyerɛɛ ɔbarimba a ne nsa adwedwe* no dɛ: “Soɛr begyina finimfin ha.” Ntsi ɔsoɛree kegyinaa hɔ.
9 Nna Jesus kaa kyerɛɛ hɔn dɛ: “Hom mma mimbisa hom dɛm asɛm yi, Mbra ma kwan dɛ Ahomgyeda wɔbɛyɛ adze pa anaa adze bɔn? Anaadɛ wɔbɛgye obi nkwa* anaa woboku obi?”
10 Na ɔhwɛɛ hɔn nyina hɔn enyim, na ɔkaa kyerɛɛ ɔbarimba no dɛ: “Tsen wo nsa.” Ntsi ɔtsenee, na ne nsa no yɛɛ yie.
11 Naaso hɔn bo fuuw dzendzenndzen, na wɔhyɛɛ ase bɔɔ pɔw hwɛɛ dza wɔdze bɛyɛ Jesus.
12 Da kor bi ɔkɔr bepɔw bi do kɔbɔɔ mpaa, na ɔdze anafua mu no nyina bɔɔ Nyankopɔn mpaa.
13 Adze kyee no, ɔfrɛɛ n’esuafo no baa ne nkyɛn na oyii hɔn mu 12 na ɔfrɛɛ hɔn asomafo.
14 Hɔn edzin nye yi: Simon a ɔsaan so frɛɛ no Peter, nye no nua Andrew, James, John, Philip, Bartholomew,
15 Matthew, Thomas, Alphaeus ne ba James, Simon a wɔfrɛ no “nsiyɛfo no,”
16 James ne ba Judas, nye Judas Iscariot a ekyir yi oyii no mae no.
17 Nna ɔnye hɔn siaan bepɔw no begyinaa beebi a ɔda famu, na n’esuafo beberee nye nyimpadɔm kɛse bi a wofi Judea na Jerusalem na Tyre nye Sidon mpoano baa dɛ woribetsie no na ɔaasa hɔn yarba.
18 Hɔn a esunsum fi rehaw hɔn no mpo, ɔsaa hɔn yarba.
19 Nna nyimpadɔm no nyina pɛ dɛ wɔdze hɔn nsa ka no, osiandɛ nna tum fi no mu reba ma ɔresa hɔn nyina yarba.
20 Na ɔmaa n’enyi do hwɛɛ n’esuafo no na ɔkaa kyerɛɛ hɔn dɛ:
“Enyigye nye hom a hom yɛ ehiafo, osiandɛ Nyankopɔn n’Ahendzi* no yɛ homdze.
21 “Enyigye nye hom a sesei ɔkɔm dze hom, osiandɛ hom bɛmee.
“Enyigye nye hom a sesei hom su, osiandɛ hom bɛserew.
22 “Enyigye nye hom, ber biara a nyimpa bɛtan hom, na wɔaapam hom efi hɔn mu na wɔaahyehyɛ hom ahorba na woeegu hom dzin ho fi* dɛ hom yɛ ndzebɔnyɛfo osian nyimpa Ba no ntsi.
23 Hom mma hom enyi ngye dɛm da no na hom ndzi ehurusi, osiandɛ hwɛ, hom akatua yɛ kɛse wɔ sor, na dɛmara na hɔn egyanom dze yɛɛ nkɔnhyɛfo no.
24 “Naaso hom a hom yɛ esikafo hom ndue, osiandɛ hom enya hom awerɛkyekyer nyina dada.
25 “Hom a sesei hom amee hom ndue, osiandɛ ɔkɔm bɛdze hom.
“Hom a sesei hom reserew hom ndue, osiandɛ hom werɛ bɔhow na hom eesu.
26 “Sɛ nyimpa nyina ka hom ho asɛm pa a hom ndue, osiandɛ dɛmara na hɔn egyanom dze yɛɛ ator nkɔnhyɛfo no.
27 “Naaso mereka akyerɛ hom a hom ritsie me yi dɛ: Hom nkɔ do ndɔ hom atamfo, na hɔn a wokyir hom no, hom nyɛ hɔn papa.
28 Hom nhyira hɔn a wɔdom hom, na hom mbɔ mpaa mma hɔn a wɔhyehyɛ hom ahorba.
29 Sɛ obi bɔ w’asowa mu a, dan kor no so ma no; na sɛ obi fa w’atar ngugudo a, fa w’atar a ehyɛ no wɔ ase no so ka ho ma no.
30 Obiara a ɔbɛserɛ wo biribi no, fa ma no. Na sɛ obi fa w’adze a, mma nnka nnkyerɛ no dɛ ɔnsan mfa mbrɛ wo.
31 “Afei so, dza hom pɛ dɛ nyimpa yɛ ma hom no, hom so hom nyɛ dɛmara mma hɔn.
32 “Sɛ hom dɔ hɔn a wɔdɔ hom a, ebɛn mfaso na hom benya? Osiandɛ ndzebɔnyɛfo mpo dɔ hɔn a wɔdɔ hɔn no.
33 Na sɛ hɔn a wɔyɛ hom papa no na hom yɛ hɔn papa a, ebɛn mfaso na hom benya? Ndzebɔnyɛfo mpo nkyɛ dɛmara na wɔyɛ.
34 Afei so sɛ hom robɔ nkorɔfo bosa,* na hom dze ma hɔn a hom hwɛ a wobotum asan etua ama hom no a, ebɛn mfaso na hom benya? Ndzebɔnyɛfo mpo bɔ ndzebɔnyɛfo bosa, na wɔhwɛ kwan dɛ hɔn nsa bɛka hɔn sika no nyina bio.
35 Naaso hom dze, hom nkɔ do ndɔ hom atamfo na hom nyɛ papa. Na sɛ hom robɔ nkorɔfo bosa a, mma hom nnhwɛ kwan dɛ hom nsa bɛsan aka; na hom akatua bɛyɛ kɛse, na hom bɛyɛ Ɔsorsornyi no ne mba, osiandɛ ne yamu ye ma bɔnyiayɛfo na ndzebɔnyɛfo nyina.
36 Hom nkɔ do nhu nyimpa mbɔbɔr dɛ mbrɛ hom Egya hu nyimpa mbɔbɔr no.
37 “Bio so, hom ngyaa atsɛn a hom bu nkorɔfo no, na worummbu hom atsɛn da; na hom ngyaa dɛ hom bu nkorɔfo fɔ, na worummbu hom fɔ da. Hom nkɔ do mfa bɔn nkyɛ,* na wɔdze hom bɔn bɛkyɛ hom.*
38 Hom nkɔ do mma, na nkorɔfo bɛma hom. Wɔbɛhyɛ esusudze ma, ahohom do, na wɔaawosow no ma woeebu do na wɔdze eegu hom tam mu. Osiandɛ esusudze a hom dze susu ma nkorɔfo no, ɔno ara so na wɔdze bosusu ama hom.”
39 Afei ɔmaa hɔn mfatoho bi dɛ: “Aso onyifuranyi botum akyerɛ onyifuranyi kwan a? Hɔn beenu nyina bɔtɔ amona mu, ɔnntse dɛm anaa?
40 Osuanyi nnkyɛn ne kyerɛkyerɛnyi, naaso obiara a wɔakyerɛkyerɛ no yie no bɛyɛ dɛ ne kyerɛkyerɛnyi.
41 Ɔyɛ dɛn ntsi na ehwɛ dua kakraba a ɔda wo nua n’enyiwa do na innhu dua kɛse* a ɔda wankasa w’enyiwa do no?
42 Ebɛyɛ dɛn etum aka akyerɛ wo nua dɛ, ‘Mo nua, ma minyi dua kakraba a ɔda w’enyiwa do no,’ aber a dua kɛse da wankasa w’enyiwa do? Nyaatwemnyi! Dzi kan yi dua kɛse a ɔda w’enyiwa do no, na ibohu adze yie na eetum eyi dua kakraba a ɔda wo nua n’enyiwa do no.
43 “Na dua pa biara nnyi hɔ a ɔsow aba bɔn, na dua bɔn biara nnyi hɔ a ɔsow aba pa.
44 Dua biara n’aba na wɔdze hu dua kor no. Nkorɔfo nntsetsew adɔmba wɔ nsoɛ do, na wonntwa wenyinaba so wɔ nsoɛ do.
45 Ndzɛmba pa a nyimpa pa akora do wɔ n’akoma mu no, ɔno bi na oyi pue, na nyimpa bɔn so, ndzɛmba bɔn a ɔakora do wɔ n’akoma mu no, ɔno ara bi na oyi pue; osiandɛ dza woebu do wɔ nyimpa n’akoma mu no na n’ano ka.
46 “Ɔyɛ dɛn ntsi na hom frɛ me ‘Ewuradze! Ewuradze!’ naaso hom nnyɛ dza meka no?
47 Obiara a ɔba me nkyɛn na otsie me nsɛm na ɔdze yɛ edwuma no, mebɛkyerɛ hom obi a ɔnye no sɛ:
48 Ɔtse dɛ ɔbarimba bi a orisi dan, na otutuu famu kɔr ekyir na ɔtoow fapem no wɔ ɔbotan do. Na aber a nsu kɛse bi tɔree no, esutsen no yirii bɛpeem dan no naaso woenntum annwosow no, osiandɛ osii no yie.
49 Naaso obiara a ɔtse me nsɛm na ɔmmfa nnyɛ edwuma no, ɔtse dɛ ɔbarimba bi a osii ne dan wɔ asaase enyi na ɔanntow fapem biara. Na aber a esutsen no yirii no, ɔbɛpeem dan no, na amonmu hɔ ara na obubui, na dan no sɛɛ pasaa.”
Ase Hɔ Nsɛm
^ Iyi yɛ eduadzewa bi a nna wodua wɔ tsetse Israel. Nna wotum dze yɛ paanoo.
^ Anaa “paanoo a wɔdze kyerɛ.”
^ Anaa “ne nsa ewu.”
^ Anaa “ne nsa ewu.”
^ Anaa “ne kra.”
^ Anaa “n’Aban.”
^ Anaa “wɔaatow hom dzin akyen.”
^ Kyerɛ dɛ, bosa a nsiho nnka ho.
^ Anaa “ngyaa mu.”
^ Anaa “wobegyaa hom.”
^ Anaa “mpuna.”
