Luke Asɛmpa 20:1-47
20 Da kor bi a nna ɔrekyerɛkyerɛ nkorɔfo wɔ asɔrfie hɔ na ɔreka asɛmpa no, asɔfompanyimfo no nye akyerɛwfo no nye ɔman no mu mpanyimfo no baa hɔ.
2 Na wobebisaa no dɛ: “Ka kyerɛ hɛn, ebɛn tum na edze yɛ dɛm ndzɛmba yi? Na woana na ɔmaa wo dɛm tum yi?”
3 Nna ɔkaa kyerɛɛ hɔn dɛ: “Hom mma mara so mimbisa hom asɛm kor, na hom nyi me ano:
4 Tum a nna John wɔ a ɔdze numa no, ofi sor anaa ofi nyimpa?”
5 Naaso ɔyɛɛ huhuhuhu wɔ hɔn mu, na wɔkaa dɛ: “Sɛ yɛka dɛ, ‘Ofi sor’ a, obebisa hɛn dɛ, ‘Sɛ dɛm a, ebɛnadze ntsi na hom anngye no enndzi?’
6 Naaso sɛ yɛka dɛ, ‘Ofi nyimpa’ a, nkorɔfo no nyina besiw hɛn abo, osiandɛ hɔn nyina nyim paa dɛ nna John yɛ nkɔnhyɛnyi.”
7 Ntsi woyii no ano dɛ wonnyim beebi a no tum no fi.
8 Nna Jesus so kaa kyerɛɛ hɔn dɛ: “Sɛ dɛm dze a, nna ɔno mo so merennka tum kor a medze yɛ dɛm ndzɛmba yi nnkyerɛ hom.”
9 Afei ɔhyɛɛ ase yɛɛ mfatoho yi kyerɛɛ nkorɔfo no dɛ: “Ɔbarimba bi yɛɛ wenyin haban na ɔdze maa* ekuafo bi, na otuu kwan kɔr ekyirekyir kedzii ber tsentsen bi wɔ hɔ.
10 Na ber soo dɛ wɔtsetsew wenyinaba no, ɔsomaa akowaa bi kɔr ekuafo no nkyɛn dɛ ɔnkɛgye wenyin haban no mu aba no bi mbra. Naaso ekuafo no boor no, na wɔpaam no ma ɔdze nsapan kɔree.
11 Na ɔsanee somaa akowaa fofor bi so kɔr hɔn hɔ. Ɔno so wɔhwee no na woguu n’enyim ase, na wɔpaam no ma ɔdze nsapan kɔree.
12 Afei ɔsanee somaa akowaa a otsia ebiasa; oyi so wopirapiraa no na wɔpaam no.
13 Ntsi wenyin haban no wura no kaa dɛ, ‘Ebɛnadze na menyɛ? Mobɔsoma me ba a modɔ no no. Oyi dze, bi a wɔbɛfɛr no.’
14 Aber a ekuafo no hun ne ba no, wɔhyɛɛ ase kekaa kyerɛɛ hɔnho dɛ, ‘Oyi na obedzi adze no. Hom mma yenku no ama egyapadze no aabɛyɛ hɛndze.’
15 Ntsi wɔdze no twitwiitwi nye no fii wenyin haban no mu kokum no. Ntsi afei ebɛnadze na wenyin haban no wura no dze bɛyɛ ekuafo no?
16 Ɔbɛba ebokuku ekuafo no, na ɔdze wenyin haban no ama ekuafo afofor.”
Aber a wɔtsee iyi no, wɔkaa dɛ: “Iyi rinnsi da!”*
17 Na ɔhwɛɛ hɔn enyim kaa dɛ: “Nna ɔno asɛm a wɔakyerɛw dɛ: ‘Ɔbo a adansifo powee no, ɔno na ɔabɛyɛ ɔbo a no ho hia paa no,’* ɔkyerɛ dɛn?
18 Obiara a ɔbɔhwe ɔbo yi do no, obepira opira a ɔyɛ hu paa. Na obiara a ɔbo yi bɛba abɔhwe no do mpo dze, ɔbɛyam no.”
19 Nna akyerɛwfo nye asɔfompanyimfo no pɛ dɛ wɔkyer no dɛm aber no ara, osiandɛ wohun dɛ hɔn ntsi na ɔyɛɛ dɛm mfatoho yi, naaso nna wosuro nkorɔfo no.
20 Ntsi wɔtsetsɛɛw no. Afei wɔsomaa mbarimba bi a nna wɔabɔ hɔn paa wɔ nsumaa mu no dɛ wɔnyɛ hɔnho dɛ atseneneefo na wonketsie n’anomu asɛm, mbrɛ ɔbɛyɛ a ɔbɛka asɛm bi ma woeenya no, na wɔdze no aakɛhyɛ aban no nye ambrado no nsa.
21 Na wobebisaa no dɛ: “Kyerɛkyerɛnyi, yenyim dɛ wo nsɛm na wo nkyerɛkyerɛ nyina yɛ nokwar. Ennyɛ nhwehwɛenyim, na dza ekyerɛkyerɛ fa Nyankopɔn ho nyina so yɛ nokwar:
22 Mbra ma kwan* dɛ wotua tow ma Caesar anaa ɔmma kwan?”
23 Naaso ohun hɔn adwembɔn no, na ɔkaa kyerɛɛ hɔn dɛ:
24 “Hom mfa denare* mbɛkyerɛ me. Woana no mfonyin nye yi, na woana no ho asɛm na wɔakyerɛw wɔ do yi?” Woyii no ano dɛ: “Caesar a.”
25 Nna ɔkaa kyerɛɛ hɔn dɛ: “Ɔnodze hom ntua dza ɔyɛ Caesar dze mma Caesar, na hom ntua dza ɔyɛ Nyankopɔn dze so mma Nyankopɔn.”
26 Na woennya biribiara wɔ ne kasaa mu a wobegyina do abɔ no sombo wɔ nkorɔfo no enyim. Mbom mbuae a ɔdze mae no maa hɔn ho dwuruuw hɔn, na wɔyɛɛ komm.
27 Naaso Sadduceefo a nna wɔka dɛ owusoɛr biara nnyi hɔ no, hɔn mu bi baa ne nkyɛn bebisaa no dɛ:
28 “Kyerɛkyerɛnyi, Moses kyerɛwee maa hɛn dɛ, ‘Sɛ ɔbarimba bi no nuabanyin wu gya ne yer, na onnyi ba biara a, ɔsɛ dɛ ɔbarimba no war no nua ne yer no na ɔnye no wo ba ma no nua no.’
29 Nna enuanom beesuon bi wɔ hɔ. Nyia odzi kan no waree, naaso owui a ɔannwo ba biara.
30 Ntsi nyia otsia ebien no
31 nye nyia otsia ebiasa no so waar no. Hɔn beesuon no nyina waar no, naaso wowuwui a woenngya ba biara.
32 Ewiei koraa no, ɔbaa no so wui.
33 Ntsi wɔ owusoɛr no mu no, hɔn mu woana na ɔbaa no bɛyɛ ne yer? Osiandɛ hɔn beesuon no nyinara waar no.”
34 Jesus kaa kyerɛɛ hɔn dɛ: “Wiadze yi* mu mba dze, wɔwar na wɔdze hɔn ma awar.
35 Naaso hɔn a woebu hɔn dɛ wɔfata dɛ wɔtsena wiadze a ɔreba no mu nye hɔn a wobenyan hɔn efi ewufo mu no dze, wɔronnwar na wɔremmfa hɔn mma awar so.
36 Nokwasɛm nye dɛ worunntum nnwu bio, osiandɛ wɔbɛyɛ tse dɛ abɔfo, na osiandɛ wɔyɛ owusoɛr no mba ntsi, wɔbɛyɛ Nyankopɔn ne mba.
37 Moses mpo daa no edzi dɛ ewufo bɔsoɛr, osiandɛ wɔ efuw a nna ɔredzɛw ho asɛm no mu no, ɔfrɛɛ Jehovah* dɛ ‘Abraham Nyankopɔn, nye Isaac Nyankopɔn nye Jacob Nyankopɔn.’
38 Ɔnnyɛ ewufo hɔn Nyankopɔn, mbom ɔyɛ atseasefo hɔn Nyankopɔn, osiandɛ n’enyi do no,* hɔn nyina tse ase.”
39 Nna akyerɛwfo no bi kaa dɛ: “Kyerɛkyerɛnyi, asɛm no ara na aka no.”
40 Na woennya akokodur emmbisa no asɛm biara bio.
41 Afei ɔno so bisaa hɔn dɛ: “Ebɛnadze ntsi na wɔka dɛ Christ no yɛ David ne ba?
42 Osiandɛ David nankasa kae wɔ Ndwom nwoma no mu dɛ, ‘Jehovah* kaa kyerɛɛ mo Wura dɛ: “Tsena me nsa nyimfa,
43 kesi dɛ medze w’atamfo bɛyɛ w’ananadzegua.”’
44 Ntsi sɛ David frɛɛ no Owura dze a, osi dɛn yɛ ne ba ma ɔyɛ yie?”
45 Afei aber a nyimpa no nyina ritsie no no, ɔkaa kyerɛɛ n’esuafo no dɛ:
46 “Hom nhwɛ yie wɔ akyerɛwfo no ho, osiandɛ dza wɔpɛ ara nye dɛ wɔbɛhyɛ ntar atsentsen ekyinkyin, na nkorɔfo dze nkyia soronko bi bɛma hɔn wɔ guado. Wɔkɔ nhyiamudan mu a, wɔpɛ ngua a ɔwɔ enyim,* na sɛ wɔkɔ aponto* ase so a, wɔpɛ beebi a mpanyimfo tsena.*
47 Na wɔgye ekunafo hɔn efie* fi hɔn nsamu, na apɛbiakyerɛ ntsi sɛ wosuo mu dɛ wɔrobɔ mpaa a, wonnwie da.* Woyinom benya atsɛmbu a no mu yɛ dzen.”*
Ase Hɔ Nsɛm
^ Anaa “fɛɛm.”
^ Anaa “Nyame mpa ngu!”
^ Kyerɛ dɛ, kutuwdo-bo.
^ Anaa “Ɔfata.”
^ Hwɛ Nke. B14.
^ Anaa “ndɛ mber yi.” Hwɛ Nkyerɛkyerɛmu Ɔfa hɔ.
^ Hwɛ Nke. A5.
^ Anaa “n’afamu no.”
^ Hwɛ Nke. A5.
^ Anaa “beebi a ɔyɛ papa.”
^ Anaa “ewimbir edzidzi.”
^ Anaa “beebi a enyimnyam wɔ.”
^ Anaa “egyapadze.”
^ Anaa “wɔhyɛ da ara bɔ mpaa atsentsen mbrɛ ɔbɛyɛ a nkorɔfo bohu.”
^ Anaa “no mu yɛ dur.”
