Luke Asɛmpa 19:1-48
19 Afei Jesus baa Jericho, na nna orutwa mu wɔ hɔ akɔ.
2 Nna ɔbarimba bi wɔ hɔ a wɔfrɛ no Zacchaeus. Nna ɔyɛ hɔn a wɔgyegye tow no hɔn mpanyimfo no mu kor, na nna ɔyɛ sikanyi.
3 Nna ɔreyɛ araa dɛ obohu Jesus ne nyimpaban, naaso osian nyimpadɔm no ntsi nna onnhu no, osiandɛ nna ɔyɛ tsia.
4 Ntsi otuu mbirika dzii hɔn enyim kɔfoow sikamɔ* dua bi mbrɛ ɔbɛyɛ a obohu Jesus, osiandɛ nna hɔ na Jesus rebɛfa.
5 Na aber a Jesus dur hɔ no, ɔmaa n’enyi do hwɛɛ sor na ɔkaa dɛ: “Zacchaeus, yɛ ntsɛm sian famu, na ndɛ ɔsɛ dɛ metsena wo fie.”
6 Ntsi ɔyɛɛ ntsɛm siaan famu, na ɔdze enyigye gyee no kɔr ne fie dɛ no hɔhoe.
7 Aber a nkorɔfo hunii no, hɔn nyina hyɛɛ ase dɛ wɔrekeka dɛ: “Ɔbarimba ɔdzebɔnyɛnyi yi na ɔakɔsoɛ ne fie yi a.”
8 Nna Zacchaeus soɛree gyinaa hɔ, na ɔkaa kyerɛɛ Ewuradze dɛ: “Ewuradze, hwɛ, medze m’ahodze no mu fa bɛma ehiafo, na biribiara a mabɔ nkorɔfo epoo agye efi hɔn nsamu no,* mobɔbɔ ho mpɛn anan ama hɔn.”
9 Nna Jesus kaa kyerɛɛ no dɛ: “Nkwagye aba fie ha ndɛ, osiandɛ ɔbarimba yi so yɛ Abraham ne ba.
10 Na nyimpa Ba no baa dɛ ɔrobɔhwehwɛ hɔn a wɔayew no na ɔaagye hɔn.”
11 Aber a woritsie dɛm nsɛm yi no, ɔsanee maa hɔn mfatoho fofor bi, osiandɛ nna ɔabɛn Jerusalem, na nna hɔn adwen yɛ hɔn dɛ wonya ara du hɔ pɛ a, Nyankopɔn n’Ahendzi no bɛba.
12 Ntsi ɔkaa kyerɛɛ hɔn dɛ: “Ɔdehye bi tuu kwan kɔr asaase bi do wɔ ekyirekyir dɛ ɔrekɛpɛ tum a ɔdze bedzi hen na ɔaasan aba.
13 Ntsi ɔfrɛɛ no nkowaa no mu du, na ɔmaa hɔn mina* du na ɔkaa kyerɛɛ hɔn dɛ, ‘Hom mfa nyɛ edwuma nkesi dɛ mebɛba.’
14 Naaso noara ne mamfo taan no, na wɔsomaa nkorɔfo* ma wodzii n’ekyir kɛkaa dɛ, ‘Yɛmmpɛ dɛ dɛm ɔbarimba yi dzi hɛn do hen.’
15 “Na ɔbaa dɛ aber a onyaa tum a ɔdze bedzi hen no,* ɔsanee bae. Na ɔfrɛɛ nkowaa a ɔdze sika* maa hɔn no dɛ wɔmbɛkyerɛ no dza woefi edwuma a wɔdze sika no yɛe no mu aba.
16 Ntsi nyia odzi kan no bae na ɔkaa dɛ, ‘Owura, mina kor a edze maa me no, menya du aka ho.’
17 Nna ɔkaa kyerɛɛ no dɛ, ‘Ayɛ adze, akowaa pa! Osiandɛ edzi nokwar wɔ adze kakraba mu ntsi, dzi nkurow du do tum.’
18 Afei nyia otsia ebien no bae na ɔkaa dɛ, ‘Owura, mina kor a edze maa me no, menya enum aka ho.’
19 Nna ɔkaa kyerɛɛ no dɛ, ‘Wo so dzi nkurow enum do tum.’
20 Nna ɔfofor so bae bɛkaa dɛ, ‘Owura, wo mina no medze kesiee tam bi mu, ɔno nye yi.
21 Mbrɛ ɔtse nye dɛ nna musuro wo, osiandɛ eyɛ obi a w’asɛm yɛ dzen; dza emmfae nnsiei no, ɔno na efa, na dza innduae no, ɔno na itwa.’
22 Ɔkaa kyerɛɛ no dɛ, ‘Akowaa bɔn, wankasa w’anomu asɛm na mibegyina do ebu wo atsɛn. Inyim dɛ meyɛ obi a m’asɛm yɛ dzen, dza memmfae nnsiei no na mefa, na aba a munnduae no na mutwa, ɔnntse dɛm a?
23 Nna ɔno ebɛnadze ntsi na ammfa me sika* no annkɔto sikakorabea? Nkyɛ mebae yi, mibenya me sika no na meenya ho nsiho.’
24 “Ntsi ɔkaa kyerɛɛ hɔn a wogyinagyina hɔ no dɛ, ‘Hom ngye mina kor no mfi ne nsamu na hom mfa mma nyia ɔwɔ mina du no.’
25 Naaso wɔkaa kyerɛɛ no dɛ, ‘Owura, ɔwɔ mina du o!’—
26 ‘Mereka akyerɛ hom dɛ, obiara a ɔwɔ bi no, wɔbɛma no pii aka ho, naaso obi a onnyi bi no dze, dza ɔwɔ no mpo wɔbɛgye efi ne nsamu.
27 Afei so, atamfo a nna wɔmmpɛ dɛ midzi hɔn do hen no, hom mfa hɔn mbra ha na hom mbokuku hɔn wɔ m’enyim.’”
28 Aber a ɔkaa dɛm nsɛm yi wiei no, osii mu dɛ ɔrofow akɔ Jerusalem.
29 Na aber a ɔbɛɛn Bethphage nye Bethany a ɔwɔ Ngodua Bepɔw no do no, ɔsomaa esuafo beenu,
30 na ɔkaa kyerɛɛ hɔn dɛ: “Hom nkɔ ekuraase a hom enyi tua yi mu, na sɛ hom du hɔ a hom bohu asoasopɔnkɔ ne ba a wɔamontan no a obiara nntsenaa no do da. Hom nsan no na hom mfa no mbra ha.
31 Na sɛ obi bisa hom dɛ, ‘Ebɛnadze ntsi na hom resan no?’ a, hom nka dɛ, ‘Ewuradze hia no.’”
32 Aber a hɔn a ɔsomaa hɔn no kɔree no, wokohun no dɛ mbrɛ ɔkaa kyerɛɛ hɔn no ara pɛpɛɛpɛ.
33 Aber a wɔresan asoasopɔnkɔ ne ba no, no wuranom bisaa hɔn dɛ: “Hom resan asoasopɔnkɔ ne ba no ayɛ dɛn?”
34 Nna wɔkaa dɛ: “Ewuradze hia no.”
35 Na wɔdze asoasopɔnkɔ no kɛmaa Jesus, na wɔdze hɔn ntar ngugudo guu no do na Jesus tsenaa do.
36 Aber a Jesus rokɔ nyina nna wɔdze hɔn ntar ngugudo resesɛw kwan no mu.
37 Na aber a ɔbɛɛn kwan a osian fi Ngodua Bepɔw no do no ara pɛ na esuafo beberee no nyina hyɛɛ ase dɛ woridzi ehurusi, na osian anwanwadze a nna woehu no nyina ntsi, wɔdze ndze kɛse yii Nyankopɔn ayɛw.
38 Wɔkaa dɛ: “Nhyira nye nyia ɔreba dɛ Ɔhen wɔ Jehovah* ne dzin mu no! Asomdwee wɔ sor, na enyimnyam wɔ ɔsorsor noho!”
39 Naaso Phariseefo bi a wɔwɔ nyimpadɔm no mu no kaa kyerɛɛ no dɛ: “Kyerɛkyerɛnyi, ka w’esuafo no enyim.”
40 Naaso Jesus kaa kyerɛɛ hɔn dɛ: “Mereka akyerɛ hom dɛ, sɛ woyinom mpo ka hɔn ano to mu a, mbobaa bɛtsea mu.”
41 Na aber a ɔbɛɛn Jerusalem no, ɔhwɛɛ kurow no na osuu kurow no,
42 na ɔkaa dɛ: “Woara mpo, sɛ ndɛ inyim dza ɔbɛma enya asomdwee a nkyɛ oye. Naaso seseiara dze, wɔdze esie wo.
43 Osiandɛ ber bi bɛba a, w’atamfo dze ndua a n’ano yɛ mfeamfea botwa wo ho ehyia tse dɛ fasu, na wɔbɛka wo ahyɛ mu, na wobefi afa ahorow nyina abɔtow ahyɛ wo do.*
44 Na wobodwuruw wo egu, na wɔaasɛɛ wo mba a wɔwɔ wo mu no pasaa, na worinngya ɔbo kor mpo wɔ ɔbo fofor do wɔ wo mu, osiandɛ ber a wɔbɔhwehwɛɛ wo mu no, ennhu.”
45 Afei ɔkɔr asɔrfie hɔ na ɔhyɛɛ ase paam hɔn a wɔrotɔn ndzɛmba wɔ hɔ no,
46 na ɔkaa kyerɛɛ hɔn dɛ: “Wɔakyerɛw dɛ, ‘Me fie bɛyɛ mpaabɔ fie,’ naaso hom dze ayɛ beebi a epoobɔfo suma.”
47 Na ɔkɔr do kyerɛkyerɛe wɔ asɔrfie hɔ da biara. Naaso nna asɔfompanyimfo nye akyerɛwfo no nye ɔman no mu etsitsir no pɛ dɛ woku no.
48 Naaso woennya kwan biara a wɔbɛfa do ayɛ dɛm, osiandɛ nyimpa no nyina dze hɔnho bɛbataa no ho na wotsiee no.
Ase Hɔ Nsɛm
^ Anaa “ankye.”
^ Anaa “na biribiara a mebu nkorɔfo agye efi hɔn nsamu no.”
^ Nna Greek mina kor no mu dur yɛ gram 340, na nna wobu no dɛ ɔyɛ drakma 100. Hwɛ Nke. B14.
^ Anaa “ahembɔfo.”
^ Anaa “onyaa ahendzi no.”
^ Greek, “dwetɛ.”
^ Greek, “me dwetɛ.”
^ Hwɛ Nke. A5.
^ Anaa “ebehiahia wo ho.”
