John Asɛmpa 9:1-41
9 Aber a orutwa mu no, ohun ɔbarimba bi a wɔwoo no onyifuranyi.
2 Na n’esuafo no bisaa no dɛ: “Rabbi, woana na ɔyɛɛ bɔn ma ntsi wɔwoo ɔbarimba yi onyifuranyi yi, ɔyɛ noara anaa n’awofo?”
3 Jesus yii hɔn ano dɛ: “Nnyɛ dɛ ɔbarimba yi anaa n’awofo ayɛ bɔn ntsi a, mbom mbrɛ ɔbɛyɛ a nyimpa bohu Nyankopɔn no ndwuma ntsi a.
4 Adzekyee wɔ hɔ yi, ɔsɛ dɛ yɛyɛ Obi a ɔsomaa me no n’apɛdze; osiandɛ adzesaa reba, na nyimpa biara runntum nnyɛ edwuma.
5 Mowɔ wiadze yi mu yi ara dze, emi nye wiadze ne kan.”
6 Ɔkaa dɛm wiei no, ɔtoow ntafi too famu, na ɔdze ntafi no foraa dɛtse na ɔdze seraa ɔbarimba no n’enyiwa do.
7 Na ɔkaa kyerɛɛ no dɛ: “Kɔhohor wɔ Siloam nsutaae no mu.” (Siloam n’asekyerɛ nye dɛ “Wɔasoma No.”) Ntsi ɔkɔree kɔhohoree, na ɔsanee bae no nna ohu adze.
8 Na apaamu hɔfo nye hɔn a nna wonyim no dɛ ɔserɛserɛ adze no hyɛɛ ase kaa dɛ: “Nnyɛ ɔbarimba a nna ɔtsena hɔ serɛserɛ adze no nye yi a?”
9 Nna binom reka dɛ: “Ɔyɛ ɔno a.” Naaso nna binom so reka dɛ: “Oho, mbom ɔsɛ no.” Na ɔbarimba no nankasa dze, nna ka ara na ɔreka dɛ: “Ɔyɛ mara a.”
10 Ntsi wobisaa no dɛ: “Ɔnodze, ɔyɛɛ dɛn na w’enyiwa no buei?”
11 Nna oyii hɔn ano dɛ: “Ɔbarimba no a wɔfrɛ no Jesus no na ɔdze ntafi foraa dɛtse dze seraa m’enyiwa do, na ɔkaa kyerɛɛ me dɛ, ‘Kɔ Siloam mu na kɔhohor.’ Ntsi mokɔree kɔhohoree na muhun adze.”
12 Nna wobisaa no dɛ: “Dɛm ɔbarimba no wɔ hen?” Oyii hɔn ano dɛ: “Minnyim o.”
13 Ntsi wɔdze ɔbarimba a nna nkyɛ n’enyi efura no kɔr Phariseefo no hɔ.
14 Mbrɛ ɔtse nye dɛ, da a Jesus dze ntafi foraa dɛtse na obuee n’enyiwa no, nna ɔyɛ Ahomgyeda.
15 Ntsi Phariseefo no so hyɛɛ ase bisaa ɔbarimba no mbrɛ ɔyɛe a n’enyiwa no buei. Na ɔkaa kyerɛɛ hɔn dɛ: “Ɔdze ntafi foraa dɛtse dze yɛɛ m’enyiwa do, na mokɔhohoree, na muhun adze.”
16 Nna Phariseefo no mu binom hyɛɛ ase kaa dɛ: “Ɔbarimba yi mmfi Nyankopɔn osiandɛ onndzi Ahomgyeda.” Na binom so kaa dɛ: “Ɔbɛyɛ dɛn na obi a ɔyɛ dzebɔnyɛnyi eetum ayɛ nsɛnkyerɛdze a ɔtse dɛm?” Na iyi maa hɔn mu kyɛe.
17 Na wɔsanee bisaa onyifuranyi no dɛ: “Ɔwo na oebue w’enyiwa, ntsi ebɛn asɛm na ebɛka afa no ho?” Nna ɔbarimba no kaa dɛ: “Ɔyɛ nkɔnhyɛnyi.”
18 Naaso nna Jewfo no nngye nndzi dɛ nna ɔyɛ onyifuranyi na afei ohu adze, ntsi wɔfrɛɛ ɔbarimba a afei ohu adze no n’awofo.
19 Na wobisaa hɔn dɛ: “Hom ba no a hom se nna ɔyɛ onyifuranyi no nye yi anaa? Ntsi ɔbaa no dɛn na afei dze ohu adze yi?”
20 N’awofo no yii hɔn ano dɛ: “Yenyim dɛ hɛn ba no nye yi, na yɛwoo no no nna ɔyɛ onyifuranyi.
21 Naaso mbrɛ ɔyɛe a seseiara ohu adze no dze, yennyim; na yennyim obi a obuee n’enyiwa no so. Hom mbisa no, ɔnnyɛ abofra. Nankasa botum akasa ama noho.”
22 Siantsir a n’awofo kaa dɛm nye dɛ nna wosuro Jewfo no, osiandɛ nna Jewfo no abɔ pɔw dɛ obiara a ɔbɛgye Jesus ato mu dɛ ɔno nye Christ no, wɔbɛpam no efi nhyiamudan no mu.
23 Iyi ntsi na n’awofo no kaa dɛ: “Ɔnnyɛ abofra. Wombisa noara” no.
24 Ntsi wɔsanee frɛɛ ɔbarimba a nna ɔyɛ onyifuranyi no bio na wɔkaa kyerɛɛ no dɛ: “Fa enyimnyam ma Nyankopɔn, na ɔbarimba yi dze yenyim dɛ ɔyɛ ɔdzebɔnyɛnyi.”
25 Nna ɔno so kaa kyerɛɛ hɔn dɛ: “Sɛ ɔyɛ ɔdzebɔnyɛnyi a, emi dze minnyim. Mbom adze kor na minyim, ɔno nye dɛ nna meyɛ nyifuranyi naaso seseiara dze muhu adze.”
26 Nna wobisaa no dɛ: “Ɔyɛɛ wo dɛn? Osii dɛn buee w’enyiwa no?”
27 Nna oyii hɔn ano dɛ: “Maka akyerɛ hom dada, naaso hom enntsie. Ebɛnadze ntsi na hom pɛ dɛ hom tse no bio? Hom so hom pɛ dɛ hom bɛyɛ n’esuafo anaa?”
28 Nna wodzii no ho fɛw kaa kyerɛɛ no dɛ: “Ɔwo na eyɛ dɛm ɔbarimba no no suanyi, hɛn dze yɛyɛ Moses n’esuafo.
29 Yenyim dɛ Nyankopɔn kasaa kyerɛɛ Moses, naaso dɛm ɔbarimba yi dze, yennyim beebi a ofi.”
30 Nna ɔbarimba no kaa kyerɛɛ hɔn dɛ: “Asɛm yi dze ɔyɛ nwanwa o, dɛ hom nnyim beebi a ofi, naaso oebue m’enyiwa.
31 Yenyim dɛ Nyankopɔn nntsie ndzebɔnyɛfo, mbom obi a osuro Nyankopɔn na ɔyɛ n’apɛdze no, ɔno na otsie no.
32 Ofi tsetse besi ndɛ, yɛnntsee dɛ obi ebue nyia wɔawo no nyifuranyi n’enyiwa da.
33 Sɛ ɔbarimba yi mmfi Nyankopɔn a, nkyɛ orunntum nnyɛ hwee.”
34 Nna wɔkaa kyerɛɛ no dɛ: “Ɔwo a wɔwoo wo wɔ bɔn mu yi, ɔwo na erebɛkyerɛkyerɛ hɛn a?” Na wɔpaam no fii hɔ!
35 Jesus tsee dɛ wɔapam no efi hɔ, na aber a ohun no no, obisaa no dɛ: “Egye nyimpa Ba no dzi a?”
36 Ɔbarimba no yii no ano dɛ: “Mo wura, ɔno nye woana, na mengye no ndzi?”
37 Nna Jesus kaa kyerɛɛ no dɛ: “Ehu no, na nokwasɛm nye dɛ ɔnoara na ɔnye wo rekasa yi.”
38 Nna ɔkaa kyerɛɛ no dɛ: “Ewuradze, megye no dzi.” Na ɔkotoow no.
39 Afei Jesus kaa dɛ: “Dɛm atsɛmbu yi ntsi na mebaa wiadze, ama hɔn a wonnhu adze no eehu adze na hɔn a wohu adze no aayɛ enyifurafo.”
40 Na Phariseefo a nna wɔnye no wɔ hɔ no tsee dza ɔkae no, na wobisaa no dɛ: “Hɛn so yɛyɛ enyifurafo anaa?”
41 Nna Jesus kaa kyerɛɛ hɔn dɛ: “Sɛ hom yɛ enyifurafo a, nkyɛ bɔn nnyi homho. Naaso seseiara dze hom ka dɛ, ‘Yehu adze.’ Ntsi hom bɔn rimmfi homho.”
