John Asɛmpa 3:1-36
3 Nna Phariseenyi bi wɔ hɔ a wɔfrɛ no Nicodemus. Nna ɔyɛ Jewfo hɔn mpanyimfo no mu kor.
2 Ɔbaa Jesus ne nkyɛn anafua na ɔbɛkaa kyerɛɛ no dɛ: “Rabbi, yenyim dɛ eyɛ kyerɛkyerɛnyi a ifi Nyankopɔn ne nkyɛn aba, osiandɛ obiara runntum nnyɛ asɛnkyerɛdze a ereyɛ yi gyedɛ Nyankopɔn ka no ho.”
3 Nna Jesus kaa kyerɛɛ no dɛ: “Nokwar, nokwar mese wo dɛ, sɛ wɔannsan annwo obi bio a,* orunntum nnhu Nyankopɔn n’Ahendzi* no.”
4 Nna Nicodemus bisaa no dɛ: “Obi a oenyin dze, wobesi dɛn awo no bio? Orunntum nnkɛhyɛ ne maame ne yamu ma wɔnnsan nnwo no bio, anaa moboa?”
5 Jesus yii no ano dɛ: “Nokwar, nokwar mese wo dɛ, sɛ wɔammfa nsu na sunsum annwo obi a, orunntum nnkɔ Nyankopɔn n’Ahendzi no mu.
6 Obi a wofi honam mu awo no no yɛ honam, na obi a wofi sunsum mu awo no no yɛ sunsum.
7 Mma ɔnnyɛ wo nwanwa dɛ mekaa kyerɛɛ wo dɛ: Ɔsɛ dɛ wɔsan wo hom bio.
8 Mframa bɔ kɔ beebi a ɔpɛ dɛ ɔbɔ kɔ biara, na hom tse dɛ ɔrobɔ, naaso hom nnyim beebi a ofi nye beebi a ɔrokɔ. Dɛmara na obiara a wɔdze sunsum awo no no so tse.”
9 Nna Nicodemus bisaa no dɛ: “Obesi dɛn na iyinom ayɛ yie?”
10 Nna Jesus bisaa no dɛ: “Ekyerɛkyerɛ Israelfo, nna innyim iyinom yi a?
11 Nokwar, nokwar mese wo dɛ, dza yenyim na yɛka, na dza yeehu no na yedzi ho dase, naaso hom nngye dase a yedzi no nnto mu.
12 Sɛ maka asaase do nsɛm akyerɛ hom na hom nngye nndzi a, ɔnodze ɔbɛyɛ dɛn na sɛ meka ɔsor nsɛm kyerɛ hom a hom bɛgye edzi?
13 Bio so, nyimpa biara nnyi hɔ a ɔafow akɔ sor, mbom nyimpa Ba no na oesian efi sor aba.
14 Na dɛ mbrɛ Moses maa ɔwɔ no do wɔ sar no do no, dɛmara so na ɔsɛ dɛ wɔma nyimpa Ba no do,
15 ama obiara a ɔgye no dzi no eenya onnyiewiei nkwa.
16 “Na Nyankopɔn dɔ wiadze paa, ntsi na ɔdze ne Ba a ɔwoo no kor no mae, ama obiara a ɔbɛgye no edzi no aannsɛɛ, na mbom oeenya onnyiewiei nkwa.
17 Osiandɛ Nyankopɔn annsoma ne Ba no ammba wiadze dɛ ombobu wiadze atsɛn, mbom dɛ wɔmfa no do ngye wiadze nkwa.
18 Obiara a ɔgye no dzi no, worummbu no atsɛn. Naaso obiara a ɔnngye no nndzi dze, woebu no atsɛn dada, osiandɛ ɔanngye Nyankopɔn ne Ba a ɔwoo no kor no ne dzin enndzi.
19 Siantsir a wobobu atsɛn nye dɛ: kan no aba wiadze, naaso nyimpa adɔ sum no akyɛn kan no, osiandɛ wɔyɛ ndzɛmba bɔn.
20 Na obiara a ɔyɛ ekyiwadze no kyir kan no, na ɔmmba kan no ho mbrɛ ɔbɛyɛ a no ndwuma nnkɛda edzi.*
21 Naaso obiara a ɔyɛ adze pa* no ɔba kan no ho, mbrɛ ɔbɛyɛ a ɔbɛda edzi dɛ no ndwuma nye Nyankopɔn n’apɛdze hyia.”
22 Iyi ekyir no, Jesus nye n’esuafo no kɔr Judea nkuraase, na ɔnye hɔn tsenaa hɔ kakra na onumaa nkorɔfo.*
23 Nna John so runuma nkorɔfo wɔ Aenon a ɔbɛn Salim no, osiandɛ nna nsu pii wɔ hɔ. Na nkorɔfo kɔr do baa hɔ ma onumaa hɔn;
24 osiandɛ dɛm aber no, nna wonnyae mmfaa John nnkɔtoo efiadze.
25 Na ekyingyegye bi soɛree wɔ John n’esuafo no na Jewnyi bi ntamu. Nna ɔfa ahoguar mbra no ho.
26 Ntsi wɔbaa John ne nkyɛn bɛkaa kyerɛɛ no dɛ: “Rabbi, ɔbarimba no a nna enye no wɔ Jordan Esutsen no n’ekyir* a idzii no ho dase no, hwɛ, orunuma nkorɔfo, na nyimpa nyina rokɔ ne nkyɛn.”
27 Nna John kaa kyerɛɛ hɔn dɛ: “Sɛ nyimpa botum enya biribi a, gyedɛ wɔdze efi sor ama no ansaana.
28 Homankasa hom dzi me dase dɛ mekaa dɛ, ‘Nnyɛ emi nye Christ no, na mbom wɔsomaa me dzii n’enyim kan.’
29 Obi a ayefor no yɛ nedze nye ayeforkun no. Naaso ayeforkun no ne nyɛnko dze, sɛ ogyina hɔ na ɔtse ne ndze a, n’enyi gye paa, osian ayeforkun no ne ndze a ɔatse ntsi. Dɛm ntsi enyigye ahyɛ me ma.
30 Ɔno dze ɔsɛ dɛ ɔkɔ do dɔr, naaso emi dze ɔsɛ dɛ mo do kɔ do tsew.”
31 Obi a ofi sor aba no, ɔkyɛn obiara. Na obi a ofi asaase do dze, ofi asaase yi do na ɔka asaase do nsɛm. Naaso obi a ofi sor aba no dze, ɔkyɛn obiara.
32 Dza oehu na ɔatse na odzi ho dase, naaso nyimpa biara nngye ne dasedzi no nnto mu.
33 Na obiara a ɔagye ne dasedzi no ato mu no, ɔdze no nsɔwano etsim do* dɛ Nyankopɔn yɛ nokwafo.
34 Osiandɛ obi a Nyankopɔn somaa no no ka Nyankopɔn ne nsɛm, na Nyankopɔn dze no sunsum no ma ma ɔbor do.*
35 Egya no dɔ Ɔba no na ɔdze ndzɛmba nyina ahyɛ ne nsa.
36 Obi a ɔgye Ɔba no dzi no wɔ onnyiewiei nkwa; naaso obi a onntsie Ɔba no n’asɛm no runnhu nkwa, na Nyankopɔn n’ebufuhyew rimmfi no do da.
Ase Hɔ Nsɛm
^ Obotum so akyerɛ, “sɛ woemmfi sor annwo obi a.”
^ Anaa “n’Ahenman.”
^ Anaa “worummbu no ndwuma atsɛn.”
^ Anaa “ɔyɛ dza ɔyɛ nokwar no.”
^ Anaa “Jordan Esutsen no boka afamu.”
^ Anaa “oesi no pi.”
^ Anaa “sɛ Nyankopɔn dze no sunsum no rema a, onnsusu anaa ɔnnsɔn.”
