John Asɛmpa 13:1-38
13 Ansaana woribedzi Apaho afahyɛ no, nna Jesus nyim dɛ ne ber aso dɛ ofi wiadze kɔ Egya no nkyɛn. Na osiandɛ nna Jesus dɔ nankasa nedze a wɔwɔ wiadze no ntsi, ɔkɔr do dɔɔ hɔn kesii ewiei.
2 Na woridzidzi ewimbir no, nna Abɔnsam dze ahyɛ Simon ne ba Judas Iscariot n’akoma mu dada dɛ onyi Jesus mma.
3 Nna Jesus nyim dɛ Egya no dze ndzɛmba nyina ahyɛ ne nsa, na ofi Nyankopɔn ne nkyɛn bae na ɔresan akɔ Nyankopɔn ne nkyɛn. Dɛm ntsi
4 aber a woridzidzi no ɔsoɛree na oyii n’atar ngugudo no guu hɔ na ɔfaa entuho dze sii n’asen.*
5 Afei ɔdze nsu guu kyɛnse bi mu na ɔhyɛɛ ase hohor n’esuafo no hɔn anan ho, na ɔdze entuho a osi n’asen* no pepae.
6 Na aber a odur Simon Peter no do no, Peter bisaa no dɛ: “Ewuradze, dɛ ɔwo na erobɔhohor me nan ho a?”
7 Nna Jesus kaa kyerɛɛ no dɛ: “Dza mereyɛ yi, erenntse ase seseiara, naaso iyinom nyinara ekyir no, ebɛtse ase.”
8 Nna Peter kaa kyerɛɛ no dɛ: “Meremma ennhohor me nan ho da.” Na Jesus kaa kyerɛɛ no dɛ: “Sɛ amma maannhohor wo nan ho a, ɔkyerɛ dɛ innyi m’afa.”
9 Nna Simon Peter kaa kyerɛɛ no dɛ: “Ewuradze, nna ɔno mma nnhohor me nan ho nkotsee, mbom hohor me nsa ho na me tsirmu nyina so ka ho.”
10 Jesus kaa kyerɛɛ no dɛ: “Obi a oeguar no, noho nyina atsew, ntsi ne nan ho ara na ohia dɛ ɔhohor. Na homho tsew, naaso ɔnnyɛ hom nyina.”
11 Nna onyim obi a oribeyi no ama no. Iyi ntsi na ɔkaa dɛ: “Nnyɛ hom nyina na homho tsew” no.
12 Afei aber a ɔhohoor hɔn anan ho wiei no, ɔhyɛɛ n’atar ngugudo no, na ɔsanee kɛtsenaa pon no ho, na obisaa hɔn dɛ: “Dza mayɛ ama hom yi hom tse ase a?
13 Hom frɛ me ‘Kyerɛkyerɛnyi’ na ‘Ewuradze,’ na ɔyɛ no kwan do, osiandɛ meyɛ Kyerɛkyerɛnyi nye Ewuradze.
14 Ntsi sɛ emi a meyɛ Ewuradze nye Kyerɛkyerɛnyi no ahohor hom anan ho a, nna ɔno ɔsɛ dɛ* hom so, hom mu biara hohor ne nyɛnko ne nan ho.
15 Osiandɛ metwa sa ato hɔ ama hom, ntsi dɛ mbrɛ mayɛ ama hom no, hom so hom nyɛ dɛmara.
16 Nokwar, nokwar mese hom dɛ, akowaa nnsen no wura, na dɛmara so na ɔsomafo nnsen obi a ɔsomaa no no.
17 Sɛ hom nyim dɛm ndzɛmba yi na hom yɛ a, hom enyi bɛgye.
18 Asɛm a mereka yi, ɔmmfa hom nyina ho; osiandɛ minyim hɔn a meyi hɔn no. Na mbom mbrɛ ɔbɛyɛ a kyerɛwsɛm no bɛba mu ntsi a. Ɔka dɛ: ‘Obi a nna ɔnye me dzidzi no* ama ne nantsir do etsia me.’*
19 Ofitsi dɛm aber yi rokɔ no, mereka akyerɛ hom ansaana woesi, ama sɛ osi a hom aagye edzi dɛ emi nye no.
20 Nokwar, nokwar mese hom dɛ, nyia ɔgye obiara a mosoma no no, ɔgye mara so, na obiara a ɔgye me no, ɔgye Nyia ɔsomaa me no so.”
21 Aber a Jesus kaa dɛm nsɛm yi wiei no, noho yerɛɛw no, na ɔkaa dɛ: “Nokwar, nokwar mese hom dɛ, hom mu kor beyi me ama.”
22 Ntsi esuafo no mu biara hyɛɛ ase dɛ ɔrohwɛ ne nyɛnko n’enyim, naaso nna wonnhu obi a ɔreka no ho asɛm no.
23 Nna esuafo no mu kor a Jesus dɔ no no tsena Jesus ne nkyɛn pɛɛ.*
24 Ntsi Simon Peter buu no enyiwa na ɔkaa kyerɛɛ no dɛ: “Kyerɛ hɛn obi a ɔreka no ho asɛm no.”
25 Ntsi osuanyi a Jesus dɔ no no tweer Jesus n’akoko na obisaa no dɛ: “Ewuradze, ɔyɛ woana a?”
26 Nna Jesus yii no ano dɛ: “Ɔno nye obi a medze paanoo sin yi robɔbɔ mu ama no no.” Ntsi ɔdze paanoo no bɔɔ mu,* na ɔdze maa Simon Iscariot ne ba Judas.
27 Na aber a Judas gyee paanoo sin no, Satan bɛhyɛɛ no mu. Ntsi Jesus kaa kyerɛɛ no dɛ: “Dza ereyɛ no, yɛ no ntsɛntsɛm.”
28 Naaso nna hɔn a wɔtsenatsena pon no ho no mu biara nnyim siantsir a ɔkaa dɛm asɛm no kyerɛɛ no no.
29 Nna hɔn mu binom adwen yɛ hɔn dɛ osiandɛ sika adaka no wɔ Judas hɔ ntsi, Jesus reka akyerɛ no dɛ ɔnkɔtotɔ ndzɛmba a wɔdze bedzi afahyɛ no anaadɛ ɔmfa biribi nkɛma ehiafo.
30 Na aber a ɔgyee paanoo sin no, ntsɛmara na opuei. Nna ɔyɛ anafua.
31 Ntsi aber a opuei no, Jesus kaa dɛ: “Afei na wɔahyɛ nyimpa Ba no enyimnyam, na wɔnam no do ahyɛ Nyankopɔn so enyimnyam.
32 Nyankopɔn nankasa bɛhyɛ no enyimnyam, na ɔbɛhyɛ no enyimnyam seseiara.
33 Mbofra nkakraba, mebɛtsena hom nkyɛn mber kakra. Hom bɔhwehwɛ me; na dɛ mbrɛ mekaa kyerɛɛ Jewfo no, seseiara mereka akyerɛ homara so dɛ, ‘Beebi a morokɔ no hom runntum mmba hɔ.’
34 Merema hom ahyɛdze fofor bi dɛ, hom ndodɔ homho; dɛ mbrɛ madɔ hom no, hom so hom ndodɔ homho dɛmara.
35 Sɛ hom dodɔ homho a, ɔno na ɔbɛma nyimpa nyina ehu dɛ hom yɛ m’esuafo.”
36 Nna Simon Peter bisaa no dɛ: “Ewuradze, henfa na erokɔ?” Jesus yii no ano dɛ: “Beebi a morokɔ no, irunntum nndzi m’ekyir nnkɔ hɔ seseiara, naaso ekyir yi ibedzi m’ekyir aba hɔ.”
37 Nna Peter kaa kyerɛɛ no dɛ: “Ewuradze, ebɛnadze ntsi na murunntum nndzi w’ekyir seseiara? Medze mo nkwa* mpo bɔto hɔ ama wo.”
38 Jesus kaa kyerɛɛ no dɛ: “Ese edze wo nkwa* bɔto hɔ ama me a? Nokwar, nokwar mese wo dɛ, ansaana akokɔ bɔbɔn no, nna aka no mpɛn ebiasa dɛ innyim me.”
Ase Hɔ Nsɛm
^ Anaa “dze bɔɔ n’asen do.”
^ Anaa “entuho a ɔbɔ n’asen do.”
^ Anaa “ɔyɛ hom asodzii dɛ.”
^ Anaa “obi a nna odzi me paanoo no.”
^ Anaa “asoɛr etsia me.”
^ Greek, “twer Jesus no koko mu.”
^ Anaa “ɔdze bɔɔ kyɛnse no mu.”
^ Anaa “me kra.”
^ Anaa “kra.”
