Mebɛyɛ Dɛn Abɛyɛ Jehovah Adasefo No Mu Kor?

BƆ

Jesus kãa anamɔn ahorow bi a ohia dɛ obi tu ansaana oeetum abɛyɛ Jehovah Adasefo no mu kor ho asɛm, na ibohu iyi wɔ Matthew 28:19, 20. Dɛm kyerɛwnsɛm no kã dza ohia dɛ obi yɛ na oeetum abɛyɛ Christ no suanyi ho asɛm, a dza ɔkã ho nye dɛ nyimpa no bɛkã Jehovah no ho asɛm na oeedzi no ho dase.

Anamɔn 1: Sũa dza Bible no kyerɛkyerɛ. Jesus hyɛɛ n’ekyirdzifo no dɛ ‘wɔnkɛyɛ amanaman nyina n’esuafo . . . , nkyerɛkyerɛ hɔn.’ (Matthew 28:19, 20) Dza kasafua a wɔakyerɛ ase “osuanyi” no kyerɛ ankasa nye “obi a orusũa adze.” Wɔ Bible no mu no, tsitsir no Jesus Christ ne nkyerɛkyerɛ no mu no, ibenya nsɛm a ihia na eetum enya asetsena a enyigye nye abotɔyamu wɔ mu. (2 Timothy 3:16, 17) Hɛn enyi bɛgye ho dɛ yɛbɔboa wo ma eesũa dza Bible no kyerɛkyerɛ. Yɛnye wo bosũa Bible no a irunntua hwee.—Matthew 10:7, 8; 1 Thessalonicafo 2:13.

Anamɔn 2: Fa dza isũa no dzi dwuma. Jesus kãa dɛ ɔsɛ dɛ esuafo no ‘dzi dza ɔahyɛ hɔn no nyina’ so do. (Matthew 28:20) Iyi kyerɛ dɛ ɔnnsɛ dɛ ema wo Bible adzesua no yɛ dɛ gyama edze repɛ nyimdzee ara kɛkɛ—no ho behia dɛ eyɛ nsakyer ahorow bi wɔ wo nsusui nye wo ndzeyɛɛ mu. (Ndwuma 10:42; Ephesusfo 4:22-29; Hebrewfo 10:24, 25) Hɔn a wodzi Jesus n’ahyɛdze do no hyira hɔn nkwa do ma Jehovah dze kyerɛ dɛ, wofi hɔn pɛ mu esi gyinae dɛ wɔbɛkã Jesus do anaa wobedzi n’anamɔn ekyir.—Matthew 16:24.

Anamɔn 3: Ma wonnuma wo. (Matthew 28:19) Wɔ Bible no mu no, wɔdze enuma toto efunsie ho. (Fa toto Romefo 6:2-4 ho.) Ɔyɛ asɛnkyerɛdze a ɔkyerɛ dɛ obi ewu ama ne nkan no abrabɔ no, na ɔrehyɛ abrabɔ fofor ase. Ntsi w’enuma no kyerɛ dɛ, ereda no edzi wɔ baguamu dɛ etu anamɔn ebien a odzi kan a Jesus kãa ho asɛm no ewie, na ereserɛ Nyankopɔn dɛ ɔmma wo tsibowa pa.—Hebrewfo 9:14; 1 Peter 3:21.

Mebɛyɛ dɛn ehu dɛ mafata ama enuma?

Enye asafo no mu mpanyimfo no nkasa. Wɔnye wo bɔtwetwe nkɔmbɔ ahwɛ dɛ etse enuma no nye dza ɔsɛ dɛ eyɛ wɔ ho no ase a. Afei so, wɔbɔhwɛ dɛ edze dza esũa no ridzi dwuma, na efi wankasa wo pɛ mu ehyira woho do ama Nyankopɔn anaa.—Ndwuma 20:28; 1 Peter 5:1-3.

Aso Jehovah Adasefo mba so dzi anamɔn ahorow yi ekyir?

Nyew. Yɛtsetse hɛn mba wɔ “Ewuradze setsie nye kasakyerɛ mu,” dɛ mbrɛ Bible no hyɛ hɛn no pɛpɛɛpɛr. (Ephesusfo 6:4) Naaso aber a worinyin no, ɔsɛ dɛ hɔnankasa wosi hɔn gyinae dɛ wobosũa dza Bible no kyerɛkyerɛ no, wɔbɛgye ato mu, na wɔdze edzi dwuma, ansaana wɔaafata ama enuma. (Romefo 12:2) Ewiei koraa no, ɔsɛ dɛ obiara si nankasa ne gyinae fa ɔsom ho.—Romefo 14:12; Galatiafo 6:5.