Worusũa Bengali Dze Ayɛ Dɛn?
Wɔ Queens a ɔwɔ New York no, wɔyɛɛ skuul bi maa Jehovah Adasefo 23 bi. Wɔdze skuul yi kyerɛɛ hɔn mbrɛ wobesi akã na wɔaakenkan Bengali kasa no. Bengali yɛ kasa bi a wɔkã no wɔ Bangladesh nye India n’afã ahorow bi. Woesiesie dɛm skuul yi dɛ ɔmboa afofor ma wonsũa kasa bi ntsɛntsɛm, na ɔyɛ Jehovah Adasefo noara bi na wɔma wɔkyerɛ adze no.
Nnyɛ Bengali nkotsee nye kasa a wɔayɛ ho skuul. Na mbom, wɔ United States nye aman ahorow pii do no, wɔayɛ skuul yi bi dze akyerɛ kasa ahorow pii. Tsirmpɔw a wɔdze yɛ skuul yi nye dɛ, wɔdze bɛtsetse obi ma oeetum akã Bible no mu nsɛm akyerɛ afofor a ɔsor kasa a wɔkã no.
Magaly, a wɔkyerɛɛ no Bengali kasa no kyerɛkyerɛɛ mu dɛ: “Nyimpa a wɔkã Bengali kasa wɔ hɛn apaamu ha no dodow kɔ ara na ɔrokɔ enyim. Nkorɔfo rohwehwɛ mbuae ama nsɛmbisa bi a noho hia tse dɛ, Ebɛnadze ntsi na amandzehu ebu do dɛm? Sɛ mekã nhyira a Nyankopɔn abɔ anohoba dɛ ɔdze bɛma hɛn daakye no ho asɛm kyerɛ afofor a, nna wɔpɛ dɛ wohu pii kã ho. Naaso osian hɔn kasaa a wɔkã ntsi, nna iyi abɛyɛ asɛndzendzen.”
Akyerɛkyerɛfo no faa akwan a ɔyɛ enyikã do na wɔkyerɛɛ adze no, mbrɛ ɔbɛyɛ a skuulfo no bohu no ntsɛntsɛm. Ɔkwan kor a wɔfaa do kyerɛɛ adze no nye dɛ, wɔdze ɔyɛkyerɛ kãa adzesua no ho mbrɛ ɔbɛyɛ a wɔbɛkaa no ntsɛntsɛm.
Nna wɔkyerɛ ɔfã biara wie a, wɔma skuulfo no dze dza woesũa no kɛyɛ edwuma ntsɛmara wɔ asɛnka mu. Wɔkɛseraseraa hɔn a wɔkã Bengali kasa wɔ hɔn apaamu hɔ no, na wɔnye hɔn bɔɔ Bible no mu nkɔmbɔ. Magaly kãa dɛ: “Ɔyɛ a nkorɔfo enyi gye, na wɔpɛ dɛ wohu siantsir a murusũa hɔn kurow mu kasa no. Osiandɛ nna menya adagyer rusũa hɔn kasaa no ntsi, ɔmaa wohun mbrɛ hɛn asɛm a yɛkã no ho hia.”
Nnyɛ kasa fofor nkotsee na Jehovah Adasefo kyerɛ, na mbom wɔtsetse afofor ma wɔbɛyɛ kasa ho akyerɛkyerɛfo so. Wɔ United States nkorbata no ne mansin mu nkotsee no, ofitsi January 2006 kesi January 2012 mu no, wɔyɛɛ skuul bɛyɛ 38 dze tsetsee nyimpa 2,244 ma wɔbɛyɛɛ kasa ho akyerɛkyerɛfo. Ɔdze bodur September 1, 2012 no, nna Jehovah Adasefo ayɛ skuul bɔbor 1,500 dze akyerɛ kasa ahorow 37 wɔ United States nkorbata no ne mansin mu.