“Mekamfo hom ahyehyɛdze no mufo wɔ ɔpɛ nye enyigye a wɔwɔ dɛ wotu hɔnho ma Nyankopɔn n’ahendzi no. Hom adɔyɛ nye mbɔdzen a hom bɔ dze boa hom mfɛfo Jehovah Adasefo nye hom mpotamu no som bo, na yɛkyerɛ ho enyisɔ papaapa.”

Iyi yɛ asɛm a ɔwɔ krataa bi a Kasim Reed a ɔyɛ aban no n’ananmusinyi a ɔwɔ Atlanta, Georgia, U.S.A no kyerɛwee no mu. Wɔdze krataa no mu nsɛm no maa Jehovah Adasefo akɔaba baa ehyiadzi akɛse ebiasa a nna wɔrebɛyɛ wɔ hɔ no ase.

Dɛmara so na Atlanta Kurow Amambu (City Council) no dze mpaamukã krataa maa hɔn a wɔaba ehyiadzi no akɔaba. Krataa no mu nsɛm kãa dɛ: “Jehovah Adasefo bɛyɛ ɔpepem awɔtwe na wɔwɔ wiadze nyina, wofifi . . . ebusuakuw ɔhaha pii mu na ɔsosor hɔn kasaa so, naaso . . . hɔn botae ama wɔayɛ kor . . . [Hom] pɛ dɛ hom hyɛ Jehovah, Nyankopɔn a Bible no kã no ho asɛm na ɔyɛ adze nyina Bɔfo no enyimnyam.”

Wɔyɛɛ ehyiadzi ebiasa yi wɔ July nye August 2014 mu. Wɔdze Borɔfo kasa yɛɛ ehyiadzi no mu ebien na wɔdze Spanish so yɛɛ kor. Annyɛ yie koraa no, hɔn a wɔbaa ehyiadzi no fifi aman ahorow bɛyɛ 28 mu, na wɔkyerɛɛ Borɔfo kasa no ase kɔr Russian nye Japanese mu wɔ ber kor noara mu, na ama hɔn a wɔkã dɛm kasa yi eenya ehyiadzi yi do mfaso. Nyimpa a wɔbaa dɛm ehyiadzi ebiasa yi nyina no dodow si 95,689.

Mfe 2014 mu no, Jehovah Adasefo yɛɛ amanaman ntamu ehyiadzi akɛse 24 wɔ aman ahorow akron mu, na wɔyɛɛ no mu 16 wɔ United States n’afã ahorow bi.