August 2013 mu no, Jehovah Adasefo Ahendzi Asa nsii edwuma no dur ne mpɛmpɛndo wɔ Philippines ber a wosii Ahendzi Asa a otsĩa apem wɔ ɔman no mu no. Dɛ mbrɛ ɔtse wɔ aman ahorow pii do no, asafo ahorow a ɔwɔ Philippines nntumii nnsii hɔnankasa hɔn Ahendzi Asa a mboa afofor nnkã ho, osiandɛ wonnyi sika anaa adansi ho nyimdzee ntsi. Mfe pii na asafo ahorow no mu bi hyiaa mu somee wɔ Adasefo binom efie mu, ber a afofor so hyiaa mu wɔ adan a wɔdze nkampor esi mu.

Jehovah Adasefo rinya nkɔenyim ntsɛntsɛm wɔ Philippines nye aman ahorow pii do, na iyi ama no ho ebehia dɛ wosisi Ahendzi Asa ahorow pii. Dɛm ntsi, wɔ afe 1999 mu no, Jehovah Adasefo Akwankyerɛ Kuw no yɛɛ nhyehyɛɛ a wɔnam do besisi Ahendzi Asa ahorow wɔ aman a wonnyi sika pii do no mu. Dɛm nhyehyɛɛ yi mu no, Adasefo a wɔwɔ dɛm aman yi mu no beyi ntoboa dɛ mbrɛ hɔn ahoɔdzen botum, iyi ekyir no wɔdze ntoboa a wonya fi Adasefo a wɔwɔ aman afofor do no akã ho. Wɔboaboa adansifo a wɔatsetse hɔn no ano yɛ hɔn ekuwekuw ma wɔkɔboa asafo ahorow no ma wosi hɔnankasa hɔn Ahendzi Asa. November 2001 mu no, wɔhyɛɛ dɛm adansi edwuma yi a wɔbɛyɛ wɔ aman ahorow mu no ase wɔ Philippines.

Iluminado wɔ asafo a ɔwɔ Marilao, Bulacan no mu. Hɔ nye bea a wosii Ahendzi Asa a otsĩa apem no. Dza ɔkãe nye dɛ: “Muhun enuadɔ ankasa a ɔwɔ hɛn enuanom Christianfo mu no. Mbanyimfo na mbasiafo, mpanyin na mbofra pii tuu hɔnho mae. Yɛbɔɔ mu yɛɛ edwuma wɔ ewia a n’ano yɛ dzen no mu. Yɛbɛyɛ edwuma bowie no nna yɛayɛ dɛ nkontombire a wɔdze gya akã, naaso dza yetumii yɛe no maa hɛn enyi gyee papanara.”

Bio so, hɔn a wɔnnyɛ Adasefo no enyi gyee mbɔdzen a edwumayɛfo no bɔe no ho. Owura bi a ne hɛn dze anhwea nye mbosaabo brɛɛ hɛn wɔ bea a yerisi dan no kãa dɛ: “Hom tse dɛ mpataakowa, hom dɔɔ sõ araa yie! Obiara reyɛ edwuma no bi. Munnhun nsi nye ahokẽka a ɔtse dɛm da.”

Wosii dan no wiei wɔ adapɛn esia ntamu, kyerɛ, ofitsi ber a wɔtoo fapem dze kesi ber a wowiei no. Ahendzi Asa a wosii no ntsɛntsɛm no boaa enuanom no maa wɔkɔr do nyaa edwuma a ɔsen biara a ɔno nye Nyankopɔn N’ahendzi no ho asɛmpaka edwuma no mu kyɛfa kesii ase.​—Matthew 24:14.

Ellen so wɔ dɛm asafo kor yi ara mu; dza ɔkãe nye dɛ: “Nna hɛn Ahendzi Asa dadaw no suar ma hɛn, ntsi nna hɛn mu dodowara tsena abowano. Ahendzi Asa fofor yi yɛ fɛw, na no mu so yɛ ahomka araa yie. Iyi bɛma hɛn nyina enya nkyerɛkyerɛ nye nkuranhyɛsɛm a hɛn nsa kã wɔ hɛn Christianfo nhyiamu ase no do mfaso kɛsenara.”