Nyew. Nyankopɔn dwen no nkowaa a wɔyar ho. Bible no kãa dɛm asɛm yi faa Nyankopɔn no somfo nokwafo bi ho: “[Jehovah] bɔwowaw no wɔ yarmpa do.” (Ndwom 41:3) Sɛ yarba koannkɔ bi rehaw wo a, ndzɛmba ebiasa a odzidzi do yi botum aboa wo ma eenya awerɛkyekyer:

1.   Bɔ mpaa fa serɛ ahoɔdzen na ama eetum egyina wo haw no ano. Ibotum enya “Nyankopɔn asomdwee a ɔtra ntseasee nyina no” bi. Dɛm asomdwee yi botum aboa wo ma eetum egyina nsɛndzendzen a irihyia no ano.​—Philippifo 4:6, 7.

2.   Nya adwen pa. Bible no kã dɛ: “Enyigye akoma yɛ edur pa: na sunsum bobɔe wew mbiew mu.” (Mbɛbusɛm 17:22) Ma w’enyiwa ngye na serew mpɛn pii. Iyi ye ma w’apɔwmudzen na ɔremma awerɛhow so nnhyɛ wo do.

3.   Hyɛ enyidado a ewɔ dɛ Nyankopɔn bɛma ndzɛmba ayɛ yie daakye no mu dzen. Sɛ inya enyidado dɛ Nyankopɔn bɛma ndzɛmba ayɛ yie a, ɔbɛma enya enyigye ɔmmfa ho yarba koannkɔ a ɔrehaw wo no. (Romefo 12:12) Bible no hyɛ nkɔm dɛ, ber bi bɛba a “ɔmamfo no mu bi nnkɛse dɛ, Meyar.” (Isaiah 33:24) Afei dze, Nyankopɔn beyi yarba koannkɔ a abɔdzenyansahufo nntum nsa nyina efi hɔ. Dɛ nhwɛdo no, Bible no ma yehu dɛ nkɔkora na mberwa bɛsan ayɛ mberantsɛ na nkataasia bio na woeenya apɔwmudzen a odzi mu. Ɔkã no wɔ dɛm kwan yi do: “No honam bɛyɛ fɔrfɔr asen abofra dze; ɔsan kɔ ne mberantsɛber nda mu.”​—Job 33:25.

 Hyɛ asɛm yi nsew: Jehovah Adasefo gye to mu dɛ, sɛ wɔyar a, Nyankopɔn boa hɔn. Naaso sɛ hɔn mu bi wɔ yarba koannkɔ a, wɔkɔ asopitsi kɔhwehwɛ ayarsa. (Mark 2:17) Naaso, yɛnnkamfo ayarsa pɔtsee bi dɛ ɔno na oye; yɛgye dzi dɛ ayarsa ho nsɛm dze, ɔsɛ dɛ ankorankor biara si ne gyinae.