É ñiè a ne édzing a tugha kôman é moan wèñ a yiène ke a sikôlô. A tugha daghe nge a va wobane, nge bitôp bièñ bi ne nfuban ya mbemba nkôman. Dzam té da ve naa a tobe mvoa nfa ya minsôn, ye naa da lere fe é bôt bevoo naa bebyèñ bèñ ba yem ñe baghle. Aval dèè fe Ésaa wèè Jehôva a ne édzing, a kômô naa be-bo bisèñ bèñ be bo nfuban—ô ñuu, nfa ya mesiman meba, ye aval ba kobe ya bo mam. Éyong bi ne nfuban da ve bia bebièn abuan, ya fe naa mboane té wa ve Jehôva ôlughu.

1. Aval avé bi ne baghle é ñuu dzèè nfuban ?

Jehôva a dzô bia naa : « Mia yiène bo nfufup. » (1 Pierre 1:16) Naa bi bo nfufup bia yiène baghle meñuu, mesiman ya mimboane miè nfuban. Bi ne nfuban éyong bia wobane éyong ésese, éyong bia baghle bitôp biè, menda mèè ya metua wèè nkôman ya nfuban. Bi ne fe vole nfa ya baghle é nda ékôan dzèè nfuban. Éyong bia bebièn ya é biôm biè bi ne nfuban, bia ve Jehôva ôlughu.—2 Becorinthien 6:3, 4.

2. Naa bi bo nfuban za mbimbia mefulu bia yiène dzame ?

Bible a dzô bia naa « bi fupghan bia bebièn ébe é mam mesese me ne bia ve mvîn nfa ya minsôn ya nfa ya nsisim. » (2 Becorinthien 7:1) Dzam té da yili naa, bia yiène tup é dzôm ésese é ne bia ve mvîn nfa ya minsôn ya nfa ya nsisim. Mesiman mèè ma yiène ve Jehôva n’nem mbeng, éde bia yiène bo dzam asese naa bi tsirane mbimbia mesiman. (Bya 104:34) Bia yiène fe yem ngu’u naa éyong bia kobe bi belane bifiè bia yiène.—A lang Becolossien 3:8.

Za mam me ne bia ve mvîn ô ñuu, nfa ye mesiman ya mimboane miè ? Biôm bizing bi ne ve é ñuu dzèè mvîn. Ébe é mam bia yiène saalé bi ne lang : a ñu sigha, a ñale taa, nge ki a ñong bang. Éyong bia ve mengu’u naa bi tup mam mesese meté, da ye ve naa bi bo mvoa nfa ya minsôn, ye lere fe naa bia kang das ye éning. Naa bi bo nfuban nfa ye mesiman ya mimboane miè, bia ye fe ve mengu’u naa bi taa bo mam ane masturbación nge ki masturbation, nge a daghe pornographie nge ki pornografía. (Bya 119:37 ; Beéphésien 5:5) É ne bia bo nzukh naa bi dzame mbimbia mefulu meté, ve Jehôva a ne bia vole naa bi bo do.—A lang Esaïe 41:13.

 A TUGHA FAS

3. Éyong bi ne nfuban nfa ya minsôn bia ve Jehôva ôlughu

Éyong bia lang metsing Jehôva a nga kee ayong Israél, bia yeghe nté mbé é ne édedèè éban ébe ñe naa ayong dèñ é bo nfuban. A lang Akôre 19:10 ya 30:17-19, éyong té mia lèè minlang mia daghe minsili mia zu mi :

• Za dzam bifus bi va lang bi, bia lere aval Jehôva a ñong nfuban ya minsôn ?

• Za dzam bia yiène bo éyong ésese naa é ñuu dèè é tobe nfuban ?

A baghle ñuu nfuban da sili tam ya ngu’u. Ve, bi ne de bo amben é vôm bi too, a bo naa bi ne mikukuma nge ki naa bi ne agèñ. Daghane ÉNGENGENG, éyong té mia lèè minlang mia daghe nsili wa zu wi :

• Amu dzé é bôt bia kanghle ba ye bira kang Jehôva éyong ba ye yen naa é biôm bia belane bio bi ne nfuban ?

4. Dzamghe mbimbia mefulu

Nge wa ñu sigha nge ki naa wa ñong bang biyong bizing, wa yem naa é ne bo nzukh naa ô dzame mbimbia mefulu meté. Za dzam é ne wô vole ? Yeneghe aval mefulu meté me ne wô bo abé. A lang Matthieu 22:37-39, ya yen aval n’ñuan sigha nge ki ñonghane bang a name . . .

• élat môt a bele ya Jehôva.

• élat môt a bele ya é nda bôt dzèñ ya é bôt be too ñe minfeng.

Taghe mam nfa ye aval ô ne dang mbimbia fulu. a Daghane ÉNGENGENG.

A lang Bephilippien 4:13, éyong té mia lèè minlang mia daghe nsili wa zu wi :

• Aval avé a bele fulu ya yaghlan, a yeghe Bible ya ke bisulan éyong ésese é ne ve môt ngu’u naa a dang mbimbia fulu ?

 5. A lumane mesiman ya mimboane mi ne mvîn

A lang Becolossien 3:5, éyong té mia lèè minlang mia daghe minsili mia zu mi :

• Aval avé bia yem naa pornographie, sexting ya masturbation nge ki pornografía, sextear ya masturbarse, be ne é mam me ne mvîn é mis Jehôva ?

• Ye wa tem naa aval Jehôva a kômô naa bi bo nfuban nfa ye mesiman ya mimboane miè da yiène ? Amu dzé wa tem do ?

Yeneghe aval ô ne lumane ya mbimbia mesiman. Daghane ÉNGENGENG.

Yésu a nga belan éfônane naa a lere bia naa bia yiène ve mengu’u naa bi bo nfuban nfa ye mesiman ya mimboane miè. A lang Matthieu 5:29, 30, éyong té mia lèè minlang mia daghe nsili wa zu wi :

• Amben Yésu éé mbe ki é dzô naa bia yiène dzughu meñu’u mèè, ve a mbe é lere naa, bia yiène ñong besôsôe ba yiène naa bi sanghle. Za aval besôsôe môt a yiène ñong naa a saalé mesiman me ne mvîn ? b

Nge wa yirane nfa ye naa ô dang mesiman me ne mvîn, Jehôva a dzing a tèè mengu’u wa ve. A lang Bya 103:13, 14, éyong té mia lèè minlang mia daghe nsili wa zu wi :

• Nge wa yirane nfa ye naa ô dzame fulu ézing é ne mvîn, aval avé éfus di é ne wô ve ngu’u naa ô tsini naa wa yirane ?

 AKIGHE BES

Bia ve Jehôva n’nem mbeng éyong bia baghle meñuu, mesiman ya mimboane miè nfuban.

Ôbaghle

• Amu dzé é ne édedèè éban naa ô tobe nfuban ?

• Aval avé ô ne baghle é ñuu duè nfuban ?

• Aval avé ô ne baghle mesiman muè ya abo dulu duè nfuban ?