1-2. (a) Za mam bekristen be ne minkuèñ ba yiène tare daghe kaa naa ba sum lèè « minlang mi alukh » ? (b) Minlang mi alukh mia yili za dzam ? (A daghe « Ayilgha éfiè. »)

 YE WA kômô lughan ? Amben se ki alughan étam éde da ve ña mevakh, abuiñ bitong nge ki beñabôrô ba kômô dzigha yen é môr be ne lukh. Bebela a ne naa, kaa naa ô sum minlang mi alukh ye môr, wa yiène tare bele élat é ne ngu’u ye Jehôva, a tugha yem wamién ye tobe nkoghane naa wa dzale meyem ma so ye alukh a (1 Becor. 7:36). Nge é ne aval té, é ne ébubu naa ô bele mbemba alukh.

² Ve dèè, déé se ki ébubu éyong ésese naa môr a yen é môr a yiène ñe (Mink. 31:10). Ve, amben éde, éyong wa yen é môr wa kômô tugha yem, déé se ki ébubu naa ô sum minlang mi alukh ye ñe b. Ayeghle di été, bia ye yen é dzam é ne vole bekristen be ne minkuèñ naa be yen é môr a yiène be akal alukh ye sum minlang mi alukh. Bia ye fe yen aval bôr be ye ékôan be ne sukh é bôr ba kômô lughan asi.

A YEN É MÔR A YIÈNE WA

3. Za mam é kristen a ne nkuèñ a yiène tare fas éyong a dzeng é môr a kômô lukh ?

³ Nge wa kômô lughan, da dang mbeng naa ô tare yem é  dzam wa dzeng ébe é môr wa kômô lukh, kaa naa ô sum minlang mi alukh ye ñe c. Nge ôboo kaa de bo, ô a ne vane likh é môr a mbaa yiène wa akal alukh nge ki a vane lukh é môr aa yiène ki wa. Bebela a ne naa, é môr asese ô ne top naa wa lughane ye ñe, a yiène bo é kristen a dubaneyang (1 Becor. 7:39). Ve, se ki é môr asese a ne nduban éñe a ye bo mbemba n’nôm nge ki ngal akal duè. Ya dzam té, ô ne sili wamién naa : ‘Za mam ma song éning dam ? Za mefulu ma dang éban ma kômô yen ébe é môr me ne lukh ? Ye é mam ma yane ma yiène ?’

4. Mam mevé minkuèñ mizing mi nga koghlane meyaghlane meba été ?

⁴ Nge wa kômô lughan, bebela a ne naa, ô yaghlaneyang akal dzam té (Beph. 4:6). Bebela a ne naa, Jehôva aa kiagh ki naa bebo bisèñ bèñ ba ye bele n’nôm nge ki ngal. Ve, a bis mekômgha muè ye é mam wa wôran, éde ane wô vole nté wa dzeng é môr wa ye lukh. Éde, tsinighe ôsu naa wa dzô ñe é mam wa kômô ye wôran (Bya 62:8). Yaghlane naa ô bele ôdzibi ye fakh (Jacq. 1:5). Jean d, moadzang ézing a ne nkuèñ a tobe Estados Unidos nge ki États-Unis, a dzô é dzam a nga koghlan meyaghlane mèñ été : « Ma dzô Jehôva mefulu ma dzeng ébe é môr ma ye lukh. Ma yaghlane ñe naa me bele mefôô ya yen môr té. Ma dzaa fe Jehôva naa a vole ma a bele mefulu ma ye ve naa me bo mbemba n’nôm. » Tanya, kal dzèè ye Sri Lanka, a dzô naa : « Nté ma dzeng é môr ma ye lukh, ma dzaa Jehôva naa a vole ma a tobe sôsôe, a bele mbemba ôsiman ye ña mevakh. » Amben mii be ki yen é môr mia ye lukh, Jehôva a  kiagh naa a ye dzale mekômgha me ya nsôn menan ye ve mia édzing ye nkalane mia yi (Bya 55:22).

5. Za mefôô bekristen be ne minkuèñ be bele naa be tuban é môr a dzing Jehôva ? (1 Becorinthien 15:58) (A daghe fe évaghle).

⁵ Bible a saghe bia naa bi bele « abuiñ mam ya bo ésèñ Nti » (A lang 1 Becorinthien 15:58). Éyong mia bira sèhane Jehôva, ye lôr abuiñ tam ye bobeñong ye bekal benan meval mese, miaa ye ki sughu ve a lôr abuiñ tam ye é bôr ba wône é bôr bevoo nfa ya nsisim, ve, mia ye fe lôr tam ye minkuèñ mia bembe naa mia sèhane Jehôva ane mina. Ye naa, nge ô ve mengu’u mesese muè naa wa ve Jehôva n’nem mbeng, wa ye bele ña mevakh.

6. Nté ba dzeng é môr be ne lukh, za dzam bekristen be ne minkuèñ ba yiène siman ?

⁶ Ve, boghe nkee naa, a dzeng é môr wa ye lukh é taa bo é dzam da dang éban éning duè (Beph. 1:10). Ña mevakh méé tsii ki ébe nge ô ne nlughan nge ki kaa, ve, me tsii ébe élat duè ya Jehôva (Mat. 5:3). Nté ô ngen nkuèñ, ô ne bele abuiñ tam naa ô veme ésèñ minkanghle duè (1 Becor. 7:32, 33). Tugha yeme belane é tam duè. Jessica, kal dzèè ye Estados Unidos nge ki États-Unis, a nga lughane amangha ye mimbu 30 mièñ, a dzô naa : « Me nga bira bo ésèñ minkanghle, dzam té é nga vole me naa me tobe mesan, amben me mbe méé kômô lughan. »

ÑONGHE TAM NAA Ô TUGHA DAGHE

7. Amu dzé é ne fakh naa ô tugha daghe é môr wa kômô lukh, kaa naa ô ke ñe dzô naa wa kômô lèè minlang mi alukh ye ñe ? (Minkana 13:16)

⁷ Za dzam wa yiène bo nge wa tem naa môr ézing a ne bo é môr a yiène wa akal alukh ? Ye wa yiène ñe de dzô étéñ té ébién ? Bible a dzô naa, é môr a ne fakh a tare bele n’yeman, kaa naa a bo dzam (A lang Minkana 13:16). Éde, wa lere naa ô ne fakh, éyong wa tare daghe môr ashuèñ ôyôm tam, kaa naa ô ke ñe dzô naa wa kômô lèè minlang mi alukh ye ñe. Aschwin, moadzang ézing ye Países Bajos nge ki Pays-bas a dzô naa : « Édzing é ne é dzam é ne vem avôô, ve é ne fe dzang avôô. Éde, éyong wa tugha ve wamién tam naa ô tugha daghe môt, waa ye ki sum lèè minlang mi alukh ye môr amu é mam wa wôran me ne dzigha tsen. » Ya fe naa, éyong wa ñong tam naa wa tugha daghe é môr mboo, éyong ézing ô ne yen naa éé se ki é môr a yiène wa.

8. Aval avé é môr a ne nkuèñ a ne tugha daghe é môr a kômô sum minlang mi alukh ye ñe ? (A daghe fe évaghle).

⁸ Aval avé ô ne bo naa ô tugha daghe ashuèñ é môr wa kômô sum minlang mi alukh ye ñe ? Éyong mi ne bisulan bi ye ékôan nge ki naa mia lôr mbemba biyong ye é bôr bevoo, éyong ézing ô ne yen étéñ ya nsisim, mefulu, ye abo-dulu é môr wa kômô sum minlang mi alukh ye ñe. Beza be ne ñe memvuiñ ? Za aval minlang a ñeghe a lèè ? (Luc 6:45). Ye minsonghan a bele mia vaghane ye minsonghane muè ? Ô ne fe kobe ye bemvene be ye ékôan déñ nge ki a kobe ye bekristen be ne biwôlô ba tugha ñe yem (Mink. 20:18). Ô ne fe sili minsili nfa éwogha déñ ye mefulu méñ (Ruth 2:11). Nté wa tugha daghe môr té, ô taa ve naa a wôran ôsoan. Nté wa bo de, kanghe é mam a wôran, kaa ki dzeng naa ô mane yem é mam mesese ma boban éning déñ été.

9. Kaa naa ô ke kobe ye é môr wa song akal alukh, za dzam wa yiène tobe de ndzi-n’nem ?

⁹ Wa yiène yane abim tam évé wéé tugha daghe môr té, kaa ñe dzô naa wa kômô lèè  minlang mi alukh ye ñe ? Nge ô dzigha ñe de kobe, a ne ñong naa ô ne é môr a ñong minkighane kaa tare fas (Mink. 29:20). Nfa mboo ô ne naa, nge é môr mboo a yem naa wa daghe ñe, ve wa ñong abuiñ tam kaa naa wa dzô ñe de, a ne vane simane naa, ô ne é môr a ne ndzukh a ñong minkighan (Eccl. 11:4). Ô taa vuène naa, kaa naa ô ke yen môr naa wa kômô lèè minlang mi alukh ye ñe, déé se ki éban naa ô tobe ndzi-n’nem naa wa ye ñe lukh. Ve, wa yiène tobe ndzi-n’nem naa, ô ntoo nkoghan akal alukh, ye naa, é môr mboo a ne bo é môr a yiène wa akal alukh.

10. Za dzam wa yiène bo nge wa wôrane naa môr a dzing a tè wa ve waa kômô ki lèè minlang mi alukh ye ñe ?

¹⁰ Za dzam wa yiène bo nge wa wôrane naa môr ézing a dzing a tèè wa ? Nge waa kômô ki lèè minlang mi alukh ye môr té, tugha ñe de lere ye mimboane muè. É ne nget naa ô ve môr ôsimane naa mia ñe mi ne lèè minlang mi alukh, atoo naa déé se ki boban (1 Becor. 10:24 ; Beéph. 4:25).

11. Nge mi too é si bôr befe ébe ba top é bôr bebèñ ba yiène lèè minlang mi alukh, nge ki a top é môr a ye lukh, za mam mia yiène baghle ôsiman ?

¹¹ Mesi mezing, bebyèñ nge ki beñabôrô befe, be ne top é môr a ye lughan ye môr ye é ndabôr dzeba a ne nkuèñ. Mesi mefe, nda-bôt nge ki memvuiñ, ba dzeng é môr a ne bo n’nôm nge ki ngal môr ye é nda-bôr dzeba a ne nkuèñ, éyong té ba kôman atuban ézizang fam ye minenga té, naa be yen nge bebèñ ba kômô sum minlang mi alukh nsama. Nge be sili wô naa ô kômane atuban ézizang bôr bebèñ akal a sum minlang mi alukh, nge ki a kôman alukh ézizang bôr bebèñ baa yemane ki, tugha fas é mam kada môr ye été a dzing ye kômô. Nge wa tem naa môr ézing a ne bo mbemba n’nôm nge ki ngal akal ñu-mvuiñ nge ki môr ye é nda-bôr duè, dzeng naa ô tugha yem môr té. Dzenghe naa ô tugha yem mefulu mèñ, aval môr a ne, édi da dang éban, nge môr té a bele élat é ne ngu’u ye Jehôva. Élar é ne ngu’u ye Jehôva da dang éban a lôr mono, besikôlô môr a va bo nge ki éto déñ. Ve, simghane naa, a ne é moadzang a ne nkuèñ ye é kal dzèè é ne nkuèñ ébe ba ye sughlane kikh nge ba ye lughan nge ki kaa (Begal. 6:5).

AVAL AVÉ Ô NE SUM MINLANG MI ALUKH ?

12. Nge wa kômô sum minlang mi alukh ye môr, aval avé ô ne ñe de dzô ?

¹² Nge wa kômô sum minlang mi alukh ye  môr, aval avé ô ne ñe de dzô e ? Ô ne kômane naa ô dzô môr té é dzam wa wôran, a ne bo éyong wa kobe ye ñe é vôm mia ñe mii se ki étam, ngalane videollamada nge ki appel vidéo, nge ki faa a luè ñe ô teléfono. Tugha ñe dzô naa wa dzing ô tèè ñe ye naa wa kômô sum minlang mi alukh ye ñe (1 Becor. 14:9). Nge a dzaa wô de, vakh ñe tam naa a fas ye ve wa éyalane déñ (Mink. 15:28). Nge a bo kaa yebe naa a sum minlang mi alukh ye wa, kanghe nkighane wéñ.

13. Za dzam ô ne bo nge môr a dzô wô naa a dzing a tèè wa, nfa ya sum minlang mi alukh ye wa ? (Becolossien 4:6)

¹³ Za dzam ô ne bo nge môr a dzô wô naa a dzing a tèè wa nfa ya sum minlang mi alukh ye wa ? É va yiène sili môr té abuiñ ayokh naa a zu wô de dzô, éde, lereghe ñe mbemba n’nem ya fe ngang (A lang Becolosien 4:6). Nge wa yi tam naa ô yen nge wa kômô sum minlang mi alukh ye môt, dzôghe ñe de. Ve dèè, ô taa yane aayap ke naa ô ve ñe éyalane duè (Mink. 13:12). Nge waa kômô ki sum minlang mi alukh ye môt, tugha ñe de dzô, ve ya mbemba bifiè. Yeneghan aval Hans, moadzang ya Austria nge ki Autriche, a nga yalane kal dzèè, éyong é nga yir ñe bébéñ naa a dzô ñe é dzam a mbe éé wôran : « Me nga tugha ñe dzô nkighane wom, ve me nga bo de ye akeng. Me nga dzô ñe de étéñ té ébién, amu méé nga kômô ki naa a tem naa, bia ñe bi ne sum minlang mi alukh. Ya dzam té, me nga bo fe nkee naa me taa dzô nge ki a bo dzam ézing é ne ñe ve ôsimane naa, me ne tsen nkighane wom. » Nfa mboo, nge wa kômô sum minlang mi alukh ye môt, dzôghe ñe é dzam wa wôran ye aval wa kômô naa minlang mi alukh mienan mi wulu. É mam kada môr ye ébe mina a wôran nge ki a siman, me ne selan amu é vôm môr a va vem nge ki mam mefe.

AVAL AVÉ BÔR BE YE ÉKÔAN BE NE SUKH BEKRISTEN BE NE MINKUÈÑ ASI ?

14. Aval avé bi ne sukh bekristen be ne minkuèñ asi ye bifiè biè ?

¹⁴ Aval avé bia besese bi ne sukh bekristen be ne minkuèñ ba kômô lughan asi ? Aval évoo bi ne de bo, é ne éyong bia bo  nkee ye é mam bia dzô (Beéph. 4:29). Bi ne sili bia bebién naa : ‘Ye ma bo minkuèñ mia kômô lughan é fiang é ne ane pogho ? Éyong ma yen é moadzang a ne nkuèñ a kobe ye é kal dzèè é ne nkuèñ, ye ma kikh naa bebèñ be nga yièneyang lèè minlang mi alukh ?’ (1 Tim. 5:13) Ya fe naa, biaa yiène ki vaghle ve naa, bekristen be ne minkuèñ be wôrane naa, dzam ézing daa wulu ki mvèñ ye bo, amu béé se ki minlughan. Hans, éñi bi va tare tu ôyôp a dzô naa : « Bobedzang bézing be mbe béé dzô me naa : ‘Amu dzé waa dzeng ki naa ô lughan ? Atoo fe naa ô nga yômeyang.’ Aval minkobe mité mi ne ve naa, é bôr be ne minkuèñ be wôrane naa baa dzing ki be, ye koghle meyep be mbele nfa alukh. » Ke da ye dang bo mbeng nge mia dzeng naa mia saghe bekristen be ne minkuèñ nga ! (1 Beth. 5:11)

15. (a) Kaa naa bi vole é môr a ne nkuèñ a yen é môr a ne lukh, za dzam bia yiène tugha fas ? (Beromain 15:2) (b) Za bura meyeghle mi va ñong éngengeng été ? (A daghe fe évaghle).

¹⁵ Za dzam bi ne bo nge bia tem naa, moadzang ézing ye kal dzèè ézing be ne minkuèñ, be ne bo mbemba minlughan ? Bible a dzô naa bia yiène bis é mam é bôr bevoo ba wôran (A lang Beromain 15:2). Abuiñ minkuèñ mizing miaa dzing ki naa be lere be é môr be ne lukh, éde bia yiène kang minkômane miaba (2 Beth. 3:11). Bevoo be ne kômô naa bi vole be, ve biaa yiène ki bo dzam kaa be tare sili f (Mink. 3:27). Befe baa kômô ki naa be sia be lere môr nèè. Lydia, kal dzèè é ne nkuèñ ye Alemania nge ki Allemagne, a dzô naa : « Mi ne ve naa, ndôm dzèè ye moadzang wèè be tuban e mura nsama été, nfa ya ve be afôô naa be yenan ye likh naa bebèñ be bo aval ba kômô. »

16. Za dzam bekristen be ne minkuèñ ba yiène siman ?

¹⁶ Bia besese, a bo minkuèñ nge ki minlughan, bi ne bele éning é ne ña mevakh ye ndzalan ! (Bya 128:1) Éde, nge wa kômô lughan, ve, wéé be ki yen é môr ô ne lukh, tsinighe naa wa bembe ébe ésèñ wa bo akal Jehôva. Kal dzèè ya Macao a too éyôla naa Sin Yi, a dzô naa : « É tam mia lôt mi too nkuèñ éndagha, é ne étun éyong ba vaghane de ye é tam mia ye lôt ye n’nôm wônan nge ki ngal wônan a Paradis. Yenane tam té anen, ye yem belane de. » Ve, za dzam ô ne bo nge ô yenang é môr wa kômô lukh ye sum minlang mi alukh ye ñe ? Ayeghle da zu, bia ye yen aval ô ne bele minlang mi alukh mia wule mbeng.