AYEGHLE 27
DZIA 79 Volghe be naa be wôn
Voleghe n’yeghe Biblia wiè naa a ñong nkighane naa a sèhane Jehôva
« Tebeghe naa bip a mbunane été [. . .] Boghe ngu’u » (1 BECOR. 16:13, atoan).
É DZAM BIA YE YEN
Bia ye yen aval bi ne vole beyeghe Biblia baa naa, be bele mbunane ya ngu’u ya tsen bining bieba ye sum sèhane Jehôva.
1-2. (a) Amu dzé é ne ndzukh akal beyeghe Biblia bézing naa be ñong nkighane ye a bo boan Bengaa Jehôva ? (b) Za dzam bia ye yen ayeghle di été ?
YE WA ko wong naa ô bo môr mboo ye Bengaa Jehôva ? Éyong ézing wa ko wong naa, é bôr mina be-be mia bo ésèñ vôm mboo, mengom muè, nge ki bôr be ye é nda-bôr duè, be tebe wa é ngam ayat. Nge ki naa, ô nga wôrane naa, wéé se ki ning aval metsing Nzame ma sili do. Nge éñe é ne naa, da yili naa wa yem é dzam beyeghe Biblia bézing ba wôran, ye amu dzé, é ne be bo ndzukh naa, be ñong nkighane naa ba bo boan Bengaa Jehôva.
2 Yésu a mbe é yem naa meyep meté me ne ve naa, môr a taa vem a nsisim (Mat. 13:20-22). Ve, éé dzi ki lame é bôr be mbe bé ko wong naa be béé ñe. Ndaane de, a nga lere beyeghe bèñ aval be ne vole bôr beté naa, (1) be yem é mam ma ve naa be taa vem a nsisim, (2) be ve naa édzing deba akal Jehôva é bo édoa, (3) be songhane é mam ba tele ôsu, ye naa, (4) be dang mindzukh ba tubane mio. Za aval bi ne dzale é mam Yésu a nga dzô beyeghe bèñ, nté bia belan abakh Beleghane éning é ne mbembèè !, naa bi vole é bong meyeghle Biblia baa naa, be ñong nkighane naa ba sèhane Jehôva ?
VOLEGHE N’YEGHE BIBLIA WIÈ NAA A YEM É MAM MA VE NAA A TAA VEM A NSISIM
3. Za dzam é nga ve naa é bo Nicodemo ndzukh naa a bo n’yeghe Yésu ?
3 Nicodemo a mbe môra ndjié ébe Bejudíos. Ve dzam ézing é nga ve naa é bo Nicodemo ndzukh naa a bo n’yeghe Yésu. Fave ngoan élal ave Yésu a nga sum ésèñ minkanghle dèñ, éde Nicodemo a nga yebe ñe ane nlômane Nzame (Jean 3:1, 2). Vedaa, Nicodemo a nga top naa a bo é ke yen Yésu ashuèñ amu a mbe é « ko Bejudíos wong » (Jean 7:13 ; 12:42). Éyong ézing a mbe é tem naa, a nga ye dzimle édedaa abuiñ mam nfa ye naa a bo n’yeghe Yésu a.
4. Aval avé Yésu a nga vole Nicodemo naa a wokh é dzam Nzame a mbe é kômô naa a bo ?
4 Nicodemo a mbe é yem Atsing Moisés, vedaa, a mbe é kômô naa be vole ñe a wokh é dzam Nzame a mbe é kômô naa a bo. Aval avé Yésu a nga vole ñe ? Yésu a mbe nkoghane naa, a lôr tam ye kobe ya Nicodemo amben alu. Éde Yésu a nga dzô Nicodemo é dzam a nga yiène bo nfa ye naa, a bo n’yeghe wèñ : a dzôbane minsem mièñ, a dubane mendzim été, ya ve mbunane wèñ ébe é Moan Nzame (Jean 3:5, 14-21).
5. Za aval bi ne vole n’yeghe Biblia waa naa a yem é dzam da ve naa a taa sèhane Jehôva ?
5 Amben n’yeghe Biblia ézing a tugha wokh é dzam Biblia a dzô, a ne fe yi avole nfa ye naa, a yem é dzam da ve naa a taa sèhane Jehôva. Éfônan, é ne bo naa ésèñ dèñ da ñong ñe abuiñ tam, nge ki naa é nda-bôr dzèñ daa kômô ki naa a bo moan Bengaa Jehôva. Ane Yésu, ñonghe tam naa wa vole n’yeghe Biblia wiè. Ô ne ñe luè naa mina ñe mi ñu dzôm ézing nsama, nge ki naa mi ke mia wulu. Éyong wa bo aval mam té mina ñe, éyong ézing, a ne wa kane mam mézing me ye éning dèñ, ye naa, wa ye kuiñ naa ô yem mindzukh a tubane mio. Saghe ñe naa, a songhan é mam a yiène tsen. Ve, a taa de bo naa a ve wa n’nem mbeng, ve, a yiène de bo naa, a lere édzing akal Jehôva.
6. Za aval ô ne vole n’yeghe Biblia naa a bele ngu’u ya dzale é mam a yeghe ? (1 Becorinthien 16:13).
6 Éyong n’yeghe Biblia a tobe mebun naa, Jehôva a ye ñe vole a ning aval ane metsing me ya Biblia ma sili do, a ye bele ngu’u naa a dzale é mam a yeghe (a lang 1 Becorinthien 16:13). Be ne vaghan étéñ duè ya édi n’yeghle a sikôlô. Tame siman é tam ô mbe wé ke a sikôlô, za aval n’yeghle ô mbe wé dang dzing ? Éyong ézing, a mbe éñi a mbe é vole wa ya ôdzibi naa ô yem é mam ô ne bo ya é mam waa yiène ki bo. Aval té daa-daa, éde mbemba n’yeghle Biblia aa yeghle ki fave é dzam Nzame a kômô naa bi bo, ve, a ban fe n’yeghe wèñ naa, ye avole Jehôva, a ne songhan é mam ma yiène éning dèñ. Ô ne de bo aval avé ?
VOLEGHE N’YEGHE BIBLIA WIÈ NAA ÉDZING DÈÑ AKAL JEHÔVA É BO ÉDOA
7. Aval avé Yésu a nga vole bebèè bèñ naa, be veme édzing deba akal Jehôva ?
7 Yésu a mbe é yem naa édzing akal Nzame é nga ye tsini beyeghe bèñ naa be dzale é mam be nga yeghe. A mbe é yeghe é mam me nga ye vole beyeghe bèñ naa, be veme édzing deba akal Ésaa wôba a ne a dzôp été. Éfônan, a nga vaghane Jehôva ya é môr a ve é boan bèñ mbemba be-mam (Mat. 7:9-11). Bebèè Yésu bézing, béé mbe ki be bele aval ndzidzing ésaa té. Tame siman aval be nga yiène da wôran, éyong Yésu a nga belan éfônan ésaa a ne n’nem éngôngoo, éñi a nga yem ñong é ndôma dzèñ é nga bele mbia abo dulu. Aval té, be mbe yen n’nem éngôngoo Jehôva akal é boan bèñ be ne a si va (Luc 15:20-24).
8. Za aval ô ne vole n’yeghe Biblia naa édzing dèñ akal Jehôva é bo édoa ?
8 Wa fe ô ne vole n’yeghe Biblia naa édzing dèñ akal Jehôva é bo édoa, wé bira bo wé kobe adzô é mbemba mefulu Jehôva éyong wa yeghle ñe. Éyong mina ñe mia yeghe, voleghe ñe naa a yem élar é ne é zang é dzam a yeghe, ya édzing Jehôva. Éyong mia kobe dzam ntang, bira bo wé lere ñe aval da dzalban ébe ñe (Bero. 5:8 ; 1 Jean 4:10). N’yeghe Biblia a ne ébubu a dzing Jehôva éyong a binan ébe édzing Jehôva a bele akal dèñ (Begal. 2:20).
9. Dzé é nga vole môr ézing a too éyôla naa Michael naa a tsen aval éning a mbe a bele ?
9 Ntamane yen éfônane Michael, a ne môr ya Indonesia. A nga vem a bebela été, v, éé dzi ki duban. Éyong a mbe a bele mimbu 18, éde a nga ke sèñ si éfe ane nduru camión. Ôsu, a nga lughane vedaa, a nga likh é nda-bôr dzèñ ô mvus naa a tsini naa a duru camión. Nté té, ngal ye ngoan dzèñ be nga sum yeghe Biblia ye vem a nsisim. Éyong ñia wèñ a nga wu, éde Michael a ñong nkighane naa, a bulan a nda dzèñ naa a ke kale ésaa wèñ ye yebe naa a yeghe Biblia. É nga bira name Michael a n’nem éyong a mbe é yeghe « A Tugha fas », ayeghle 27 ye abakh Beleghane éning é ne mbembèè ! Éyong a mbe é binan ébe é dzam Jehôva a nga yiène wôrane nté a nga yen ane Ndôma dzèñ da dzukh, é nga ve Michael naa a yi. Éyong a nga yem nté mbé Jehôva ba Yésu ba dzing ñe, é nga ve naa, a bira ve akiba ye tsen éning dèñ, ya duban.
VOLEGHE N’YEGHE BIBLIA WIÈ NAA A SONGHAN É MAM A TELE ÔSU
10. Aval avé Yésu a nga vole beyeghe bèñ ôsua naa be songhan é mam be mbe bé tele ôsu ? (Luc 5:5-11). (A daghe fe évaghle).
10 Beyeghe ôsua bèñ be nga dzigha yem naa Yésu éñe a mbe é Mesías be nga kiagh. Vedaa, be mbe bé yi avole nfa ye naa be tele minkanghle ôsu bining bieba. Éyong Yésu a nga luè Pedro ba Andrés naa be béé ñé tam ése, a kuane be ntoo beyeghe bèñ ôyôm tam (Mat. 4:18, 19). Be mbe beyop-bekoas nsama ya Santiago nge ki Jacques ye Juan, ye naa, ôkira wôba ô mbe wé wulu mbeng (Marc 1:16-20). Éyong Pedro ba Andrés be « nga likh mevoat meba », be nga yiène ta mam nfa ye naa, be kale menda me-bôr meba nté ba ye béé Yésu. Dzé é nga tsini be naa be songhan é mam be mbe bé tele ôsu ? Nlang bia kuane wô nten Luc wa kane bia naa, Yésu a nga bo akengha é nga wônô mebun meba naa Jehôva a ye ba ve é dzam ba yi nge be tele ñe ôsu bining bieba (a lang Luc 5:5-11).
Za ayeghle bi ne ñong ébe aval Yésu a ñga belane beyeghe bèñ nfa ya songhan é mam be nga tele ôsu ? (A daghe éfaghle 10) b
11. Za aval bi ne belan éfônane daa naa bi wônô mbunane n’yeghe Biblia wèè ?
11 Bii se ki bo mekengha aval ane Yésu a nga bo me, ve, bi ne belan éfônane daa, naa bi lere aval Jehôva a vole é bôr ba tele ñe ôsu bining bieba. Éfônan, ye wa siman aval Jehôva a nga vole wa éyong ô nga sum tobe bisulan ? Éyong ézing, ô nga yiène ke yen é masa wiè naa ô kare ñe amu dzé wéé mbe ki fe sèñ a lôr abim mewala wa yiène de bo nge da tubane mewala wa ke bisulan. Nté wa kane n’yeghe Biblia wiè é dzam é nga lôrane wa, kare fe ñe aval é nga wônô mbunane wiè, éyong ô nga yen ane Jehôva a nga sukh nkighan ô nga ñong naa, wa tele ékang dèñ ôsu éning duè.
12. (a) Amu dzé bia yiène bo bi luè bekare fuèñ befe ayeghe Biblia dèè ? (b) Za aval ô ne belane bingengeng naa ô tugha yeghle n’yeghe Biblia wiè ? Vakh éfônan.
12 N’yeghe Biblia wiè a ye fe ñong abuan éyong a bèè aval bekristen bevoo be nga tsen mam nfa ye naa be tele Jehôva ôsu bining bieba. Ya dzam té, boghe wé luè abuiñ meval bobedzang naa be tobe ayeghe Biblia denan. Silighe be aval be nga ñii a bebela été ya é dzam be nga bo nfa ye naa be tele ésèñ Jehôva ôsu bining bieba. Ya fe naa, ñonghe tam ye a yen bingengeng bi ye « A Tugha fas » nge ki « Ô ne fe ke daghe », ye abakh Beleghane éning é ne mbèmbèè ! Éfônan, éyong mi ne ayeghle 37, ô ne bembe ébe metsin metsing bia kuane me éngengeng Jehová cubrirá nuestras necesidades nge ki Jéhovah pourvoira à nos besoins.
VOLEGHE N’YEGHE BIBLIA WIÈ NAA A DANG MINDZUKH A TUBANE MIO
13. Aval avé Yésu a nga kômane beyeghe bèñ nfa é bôr ba ye be tebe é ngam ayat ?
13 Yésu a nga dzô betông bèñ abuiñ biyong naa, é bôr bevoo ba ye ba tebe é ngam ayat, amben bôr be ye menda me-bôr meba (Mat. 5:11 ; 10:22, 36). Éyong ésèñ minkanghle Yésu é mbe dé yir amanegha, a nga dzô beyeghe bèñ naa, be mbe be wiñ amu be mbe bé sèhane Jehôva (Mat. 24:9 ; Jean 15:20 ; 16:2). Éde a nga dzô be naa, be bo nkee éyong be ne minkanghle. A nga dzô be naa, ndaane naa ba banghane ya é bôr be tele be é ngam ayat, be nga yiène bo nkee nfa ye naa, be tsini naa ba kanghle.
14. Aval avé bi ne kômane n’yeghe Biblia waa nfa é bôr ba ye ñe tebe é ngam ayat ? (2 Timothée 3:12).
14 Bi ne vole n’yeghe Biblia naa a kômane nfa é bôr ba ye ñe tebe é ngam ayat, éyong bia kare ñe é dzam é bôr ba ba sèñ ya ñi vôm mboo, mengom mèñ, ya bôr be ye é nda-bôr dzèñ be ñe bo (a lang 2 Timothée 3:12). É bôr bézing ba sèñ ya ñe vôm mboo, be ne ñe poghe amu a dzeng naa, a ning aval Biblia a yeghle de. É bôr bevoo ki, amben bôr be ye é nda-bôr dzèñ, be ne ñe kobe abé amu é mam a bunu me ne tsîn a Biblia été. Nge bi dzigha kômane beyeghe Biblia baa nfa é bôr ba ye be tebe é ngam ayat, da ye be vole naa be tugha yem é dzam ba yiène bo éyong tam té da ye so.
15. Za dzam é ne vole n’yeghe Biblia naa a tebe naa bip, éyong bôr be ye é nda-bôr dzèñ ba tebe ñe é ngam ayat ?
15 Nge bôr be ye é nda-bôr n’yeghe Biblia wiè ba tebe ñe é ngam ayat, voleghe ñe naa a wokh amu dzé ba wokh abé naa, a yeghe Biblia ya Bengaa Jehôva. É ne bo amu ba tem naa, be va dukh ñe, nge ki faa naa, be nga wokh bôr bé kobe mbia be-mam nfa Bengaa Jehôva. Amben bôr bézing be ye é nda-bôr Yésu, béé mbe ki bé dzing é dzam a mbe é bo (Marc 3:21 ; Jean 7:5). Yeghle é mong meyeghle wiè naa a tsini naa a bo ôdzibi ya kobe ya mbemba bifiè ya é bôr bevoo, amben bôr be ye é nda- bôr dzèñ.
16. Za aval bi ne vole n’yeghe Biblia naa a kobe adzô mebun mèñ ya akeng nkobe ?
16 Amben éyong bôr be ye é nda-bôr dzèñ ba lere naa ba kômô yem bebela, é ne mvèñ naa, n’yeghe Biblia a dzeng naa, a taa kobe abuiñ mam étéñ dèè. Nge a bo de, bôr be ye é nda-bôr dzèñ be ne wôrane naa, da dang be nkông. Asughlan, be ne bo kaa fe kômô naa a kobe be adzô mebun mèñ. Saghe n’yeghe Biblia wiè naa a kobe adzô mebun mèñ aval é ne ébubu a wokh. A kôrô ye vèè, môr ye é nda-bôr dzèñ a ne tobe nkoghane naa a tsini minlang mi ya Biblia ya ñe (Becol. 4:6). Éyong ézing, a ne bane bôr be ye é nda-bôr dzèñ naa be ke daghe é nden wèè jw.org. Nèè té, môr té a ne yeghe abuiñ mam éyong a kômô de bo, ya naa, a ne top abim mam a kômô yeghe.
17. Za aval ô ne vole n’yeghe Biblia naa a yalane minsili é bôr bevoo be ne bele mia daghe Bengaa Jehôva ? (A daghe fe évaghle).
17 Ô ne belane nlong minlô medzô « Preguntas frecuentes nge ki Questions fréquentes » é ne a nden jw.org, naa ô vole n’yeghe Biblia wiè naa a yalane bôr be ye é nda-bôr dzèñ nge ki é bôr ba ba sèñ ya ñi vôm mboo, be ne sili (2 Tim. 2:24, 25). Amanegha kada ayeghle, berghane yen étun « Nge môr ézing a dzô wô naa », ye abakh Beleghane éning é ne mbembèè ! Saghe n’yeghe Biblia naa, a yeghe naa a yalane ya bifiè bièñ. Ô taa ko wong naa, ô ve ñe boan melepgha nfa aval a ne songhan éyalane dèñ. Éyong wa ñong tam naa, wa yeghle ñe naa a sum minlang, da ye bo ébubu naa a tugha dzô é bôr bevoo amu dzé a bunu dzam ézing nge ki kaa.
Vakh naa ésèñ minkanghle é bo ébubu akal n’yeghe Biblia wiè, wé yeghle ñe aval ba kanghle éyong mia bo ayeghe Biblia (A daghe éfaghle 17) c
18. Za aval mi ne saghe n’yeghe Bible naa a kanghle ya ékôan ? (Matthieu 10:27).
18 Yésu a nga dzô beyeghe bèñ naa, be kanghle bôr mbemba fuèñ (a lang Matthieu 10:27). Éyong n’yeghe Bible a sum kanghle ya ékôan, a ye dzigha wôran avole Jehôva, ye yeghe avôô naa, a ve mebun mèñ ébe Jehôva. Za aval ô ne vole n’yeghe Biblia naa a bele nsonghane té ? Éyong ba dzô naa ngura aval minkanghle mia ye boban, saghe n’yeghe Bible wiè naa, a fas aval a ne kômane naa a bo nkare fuèñ. Lereghe ñe amu dzè abuiñ bôr ba yen ébubu naa be sum kanghle metam ngura aval minkanghle. É dzam ézing a ne song, é ne a yeghe a kobe a bôr été, éyong a tobe bisulan bi ye ézizang sono. Nté a bo de, a ye yeghe aval a ne tugha kobe adzô mebun mèñ.
LEREGHE N’YEGHE BIBLIA WIÈ NAA WA BUNU NAA A KÔMÔ VE JEHÔVA N’NEM MBENG
19. Za aval Yésu a nga lere naa a mbe é tobe a beyeghe bèñ mebun, aval avé ki bi ne ñe vu ?
19 Kaa naa Yésu a ke a dzôp été, a nga dzô beyeghe bèñ naa, môs ézing ba ye bera tobe nsama. Béé mbe ki bé wokh naa Yésu a mbe é kobe adzô éyong ba ye ke a dzôp été. Amben beyeghe bèñ béé mbe ki bé wokh mam mesese, Yésu a mbe ndzi-n’nem naa be mbe bé kômô ve Jehôva n’nem mbeng (Jean 14:1-5, 8). A mbe é yem naa, da ye be dzaa tam naa be wokh mam mézing, ane ôyane ya ke ning a dzôp été (Jean 16:12). Bia fe, n’lereghane n’yeghe Biblia wèè naa bia yem naa, a kômô ve Jehôva n’nem mbeng.
Éyong n’yeghe Biblia a sum minkanghle avôô, da ye ñe vole naa, a dzigha fe sum a ve mebun mèñ ébe Jehôva
20. Za aval kal dzaa ézing ya Malawi, a nga lere naa a tobe ndzi-n’nem ébe n’yeghe Biblia wèñ ?
20 Bia baghle ndzi-n’nem naa, n’yeghe Biblia wèè a kômô bo é dzam da yiène. N’ñonghan éfônane kal dzaa, Chifundo, ya Malawi. A nga sum ayeghe Biblia é tam be nga bo ngura aval minkanghle ya abakh Beleghane éning é ne mbembèè !, ya minenga Católica ézing, a mbe éyôla naa, Alinafe. Atoo naa a ke kuè naa, be nga maneyang ayeghle 14, Chifundo a nga sili n’yeghe Biblia wèñ é dzam a mbe é tem nfa a belane biyema akal ékang. Alinafe a nga wokh abé ya dzô naa : « A ne ntopbane wom ! » Chifundo a mbe é sili émièn nge dzam té da ye ve naa be tele ayeghe Biblia deba. Ve, ya édzip, a nga tsini naa a bo ayeghe Biblia ya Alinafe, ya ndzi-n’nem naa, ya tam a ye wokh naa a belane biyema akal ékang é ne abé. Ayôm mengoan ôsu, Chifundo a nga sili ñe nsili ô ne ayeghle 34 ô ne naa : « Ave ô sum yeghe Bible ya fe ña Nzame Jehôva, za biboran ô bele-yang ? » Chifundo a kan aval Alinafe a nga yalan. « A nga tu abuiñ mbemba be-mam, a lang été, é fulu Bengaa Jehôva be bele naa, baa bo ki é dzam ésese Biblia a dzô naa é ne abé. » Ôyôm tam ôsu vèè, Alinafe a nga tele naa a belane biyema akal ékang ya tobe nkoghane naa a duban.
21. Za aval bi ne vole n’yeghe Biblia wèè naa a ñong nkighane naa a sèhane Jehôva ?
21 Amben Jehôva éñe a ne é « môr a ve naa é vem » bia fe, bi bele é ngap dèè nfa ya vole n’yeghe Biblia naa a vem a nsisim (1 Becor. 3:7). Biaa sughu ki fave naa, bia yeghle ñe é dzam Jehôva a kômô naa a bo. Bia vole fe ñe naa, a bele édzing é ne édoa akal Jehôva. Bia saghe fe ñe naa a lere édzing dzèñ é songhan é mam a tele ôsu. Ya naa, bia yeghe ñe naa a yagbe ébe Jehôva éyong a tele mindzukh été. Eyong ki bia dzô ñe naa bia tobe ñe mebun, bia wône é ndzi-n’nem a bele naa, ñe a fe a ne ning é kang memvena Jehôva, ya ñong nkighane naa a sèhane Jehôva.
DZIA 55 Ô taa be ko wong !
a Mimbu mibèñ ya étun niène a nga kobe ya Yésu, a ke kuane naa, Nicodemo a ngen môr mboo ye é nda ba kikh minsang da dang ôyap yôp Bejudíos (Jean 7:45-52). Bôr bézing ba tem naa, Nicodemo a nga bo n’yeghe Yésu fave niène Yésu a nga wu (Jean 19:38-40).
