1. Aval avé ayong Jehôva é mbe nkôman ntet mimbu ôsua ?

 ÉYONG ésese Jehôva a kee ayong dèñ ésèñ, a yane naa be bo de aval é ne nkôman (1 Becor. 14:33). Éfônan, Jehôva a kômô naa be kanghle mbemba fuèñ asi se ngura (Mat. 24:14). Jehôva a nga tele Yésu naa a wulu ya ésèñ té. Yésu a nga ve naa ésèñ té é boban aval é ne nkôman. Ntet mimbu ôsua, atoo naa, be nga ke ba tele bikôan mevôm-mevôm, be nga tele bemvene nfa ye a wulu ayong ye tebe ôsu (Bisè mintôl 14:23). A Jérusalem, tsîn ékôan é mbe dé lang été, mintôl ye bemvene be mbe béé ñong minkighan bikôan bi nga yiène kang (Bisè mintôl 15:2 ; 16:4). A kôre ye vèè, amu be nga bo mewokh ébe melepgha be nga ve be, « bikôan bi nga tsini naa, bia wôneban a mbunan été ya vem » (Bisè mintôl 16:5).

2. Atéé ye mbu 1919, aval avé Jehôva a nga wulu ye ayong dèñ, ye ve de bidzi nfa ya nsisim ?

² Jehôva a tsini naa, a kôm ayong dèñ ye ze kuiñ ému. Atéé ye mbu 1919, Yésu a nga belane moan nsama minwoghan, naa be kôman ésèñ minkanghle ye ve beyeghe bèñ bidzi bi ya nsisim a (Luc 12:42). Jehôva a boran ésèñ ékôan té (Esaïe 60:22 ; 65:13, 14).

3-4. (a) Vaan éfônan da lere aval bia ñong abuan ye Ékôan Jehôva. (b) Za dzam bia ye yen ayeghle di été ?

 ³ Nge bi mbe ki mbemba nkôman, bii nga ye ki yem a dzale ésèñ Yésu a nga likh bia naa bi bo (Mat. 28:19, 20). Éfônan, nge ékôan ésese déé mbe ki é bele abeng minkanghle dèñ, môr ase a nga ye ke a kanghle é vôm a kômô. É nga ye vane kuiñ naa, bekare fuèñ be nga ye bira kanghle mebeng minkanghle mizing, béé likh ki émi mivoo. Ye mi ne tu minfa mife bia ñong abuan ye Ékôan Jehôva ?

⁴ Aval ane Yésu a nga kôman beyeghe bèñ éyong a mbe a si va, aval daa fe, éde a tsini naa a kôman de ye mbemba ntaane mam ému wi. Ayeghle di été, bia ye yén éfônane Yésu a nga likh bia, ye aval ékôan dèè da béé éfônane dèñ. Bia ye fe yen aval a fe bi ne lere naa bia dzing Ékôan Jehôva.

ÉKÔAN DÈÈ DA BÉÉ ÉFÔNANE YÉSU

5. Za abuane bia ñong éyong bia yeghe Bible ? (Jean 8:28)

⁵ Yésu a nga yeghe ébe Ésaa é dzam a nga yiène bo ye dzô. Ékôan Jehôva da béé éfônane Yésu déé belane Nkobe Nzame naa da vole bia a yem é dzam é ne mbeng ya édi é ne abé, ye lere bia zen éning dèè (A lang Jean 8:28 ; 2 Tim. 3:16, 17). Ba simane bia éyong ésese naa bi lang ye dzale Nkobe Nzame. Za abuan bi ne ñong nge bia bo de ?

6. Za aval évoo Ékôan dèè da béé éfônane Yésu ?

⁶ Bia bira buan ayeghe Bible éyong bia belane mebakh me ye Ékôan. Éfônan, da ve bia naa bine vaghan é dzam Bible a dzô ya é zen Ékôan dèñ da lere bia. Éyong bia yen naa, aval Ékôan da wule bia da wule nsama ye é dzam bia yen a Bible été, mebun bi bele ébe Ékôan Jehôva ma tugha vem (Bero. 12:2).

7. Za fuèñ Yésu a mbe éé kanghle, ye naa, aval avé Ékôan Jehôva da béé éfônane déñ ?

⁷ Yésu a nga kanghle « mbemba fuèñ y’Édjié Nzame » (Luc 4:43, 44). Éde fe a nga likh beyeghe bèñ naa be kanghle Édjié té (Luc 9:1, 2 ; 10:8, 9). Ému, é bôr besese be ne Ékôan Jehôva été, ba kanghle fuèñ y’Édjié té, a bo é vôm ésese be too, nge ki abim meyem be bele Ékôan été.

8. Za môra maa be nga ve bia ?

⁸ Ébe bia, a kanghle é bôr bevoo mbemba fuèñ y’Édjié Nzame, é ne mura maa ! Se ki môr asese éñ’a bele mura maa té. Éfônan, éyong Yésu a mbe a si va, éé dzi ki likh naa mbia minsisim mi kanghle akal dèñ (Luc 4:41). Ému wi, kaa naa môr a sum a kanghle ye Bengaa Jehôva, a yiène tare lere naa a ntoo nkoghan akal ayem té. Bia lere naa bia dzing mura maa té, éyong bia kanghle bôr mbemba fuèñ y’Édjié Nzame é tam, y’é vôm ôsese bi ne de bo. Bia kômô bo ane Yésu, éde bia bo é dzam ésese bi ne bo naa, bi kanghle é bôr bevoo ye yeghle be bebela (Mat. 13:3, 23 ; 1 Becor. 3:6).

9. Aval avé Ékôan da likh naa bôr be yem éyôla Nzame ?

⁹ Yésu a nga ve naa bôr be yem éyôla Nzame. Meyaghlan a nga bo Ésaa wèñ a n’a dzôp été, Yésu a nga dzô naa : « Me va ve naa be yem éyôla duè » (Jean 17:26). Amu da vu éfônane Yésu, Ékôan Jehôva da bo é dzam ésese é ne bo n’é ve naa bôr be yem éyôla Nzame. Aval évoo Ékôan Jehôva é nga bo de, é ne ngalane Traducción del Nuevo Mundo nge ki Traduction du monde nouveau. N’konghlane Bible té été, be nga bera furu éyôla Nzame mevôm mesese é mbe déé tare kuiñ minkobe be nga  tare tsile Bible. Abong di, Traducción té, bii mbele ñe abim, nge ki ngura minkobe 270. A traducción té été, Apéndice A4 y A5 nge ki Appendice A4 et A5, ba lere aval avé, y’amu dzé be nga bera furu éyôla Jehôva. Apéndice C nge ki Appendice C é ne a Bible akal ayeghe, da ve abuiñ mekalgha mefe ma lere amu dzé éyôla Nzame da yiène kuiñ biyong 237 a Ecrituras Griegas Cristianas nge ki Écritures grecque chrétiennes.

10. Za dzam bia yeghe y’é dzam é minenga a ning ô Myanmar a nga dzô ?

¹⁰ Ane Yésu, bia kômô vole abim bôr ése é ne kuiñ naa be yem éyôla Jehôva. Éyong a nga yem naa Nzame a bele éyôla, minenga ézing ye Myanmar a bele mimbu 67, a nga sum naa a yi ye dzô naa : « A ne éyong ôsua ave maa byale, naa ma wokh naa, éyôla Nzame é ne Jehôva. [. . .] Mi va yeghe ma é dzam da dang éban me mba ki méé yem, ve, môr a yiène yeghe. » Aval ane éfônane té da lere de, a yeghe bôr éyôla Nzame é ne bira name min’nem besôsôe be bôt.

TSINGHANE NAA MIA LERE NAA MIA DZING ÉKÔAN DÈÈ

11. Aval avé bemvene be ne lere naa ba dzing Ékôan Jehôva ? (A daghe fe évaghle).

¹¹ Aval avé bemvene be ne lere naa ba dzing Ékôan Jehôva ? Éyong ba ve be menvena mézing, bemvene ba yiène ma tugha yem a lang, ye bo é dzam ésese be ne bo naa be dzale me. Éfônan, ba ve be melepga mézing nfa y’aval ba yiène wulu mengap bisulan y’ézizang sono, aval ba yiène bo meyaghlan ékôan été, ye aval be ne yem kale mintôma Christ. Éyong bemvene ba dzale melepgha mesese, ma so be ébe Tsîn Ékôan, bobedzang ye bekal bèè ba wôrane naa Jehôva a dzing be ye kale fe be.

12. (a) Amu dzé bia yiène sukh é bôr be tele bia ôsu ? (Behébreu 13:7, 17) (b) Amu dzé bia yiène bembe ébe é mbemba mefulu é bôr be tele bia ôsu ?

¹² Éyong bemvene baa, ba ve bia menvena mézing, bia yiène me béé ye n’nem ôsese. Aval té, bia ye ve naa, ésèñ é bo be ébubu. Bible a sekh bia naa bi bèè ye bo é bôr be tele bia ôsu mewokh (A lang Behébreu 13:7, 17). Biyong bizing, é wôla bo ndzukh. Amu dzé ? Amu naa bôr beté be ne bôr a minsem. Ve, nge bia bembe ébe bikop bieba, ndaane naa bia bembe ébe é mbemba mefulu meba, bia ye vole minzinzing mia. Aval avé ? Bia ye dzimle mebun bi bele y’Ékôan Jehôva, dzam té éde minzinzing mia, mia dzeng faa. Za dzam bia yiène bo naa bi yem, ye tep minèè minzinzing miè, mia bo ?

MI TAA DZIMLE MEBUN MI BELE ÉBE ÉKÔAN JEHÔVA AMU É BÔR BEVOO

13. Aval avé minzinzing Nzame mi nga dzeng naa, mia ve Ékôan dèñ mvin ?

¹³ Minzinzing Nzame mia dzeng naa mi ve naa, é mbemba be mam me y’Ékôan dèñ me yene abé. Éfônan, Bible a nga yeghe bia naa, Jehôva a yane naa bebo bisèñ bèñ be tobe nfuban ô ñuu, mesiman ya nsisim. A yane naa, é môr asese a tsini naa a bo é mam me ne abé kaa naa a tsen, be tele ñe afeng (1 Becor. 5:11-13 ; 6:9, 10). Bia bo atsing té mewokh. Ve minzinzing mia, mia belane atsing té naa be dzô naa, bi ne é bôr be ne nget, éba ba kikh é bôr bevoo mbia nsang ye kaa édzing.

14. Za a ne tsîn minaa ba bôre Ékôan Nzame ?

¹⁴ Bia yiène tugha yem é môr a lumane bia. Debele Satan éñe a tele minaa mité ô mvus. A ne « ésaa minaa » (Jean 8:44 ; Atar. 3:1-5). Ye dzam té, biaa yiène ki yaghane naa, Satan ye é bôr ba sukh ñe asi,  ba kane minaa nfa y’a ve Ékôan Jehôva mvin. Dzam té é nga lereban ntet mimbu ôsua.

15. Za dzam betebe ôsu be ye menda menzame be nga bo Yésu ye beyeghe bèñ ?

¹⁵ Amben Yésu é Moan Nzame a mbe kaa ékop, ye naa a nga bo bura mekengha, Satan a nga belane bôr bézing naa be miaman abuiñ minaa nfa wèñ. Éfônan, betebe ôsu be ye menda menzame be nga kane bôr naa, é ngu’u Yésu a tsirane de mbia minsisim é nga so ñe ébe « ndjié mbia minsisim » (Marc 3:22). Éyong be nga kikh Yésu nsang, betebe ôsu be ye menda menzame be nga bôre ñe naa a nga tè Nzame, éde fe be nga tsini minsama mi bôr naa be wiñ ñe (Mat. 27:20). Ôsu vèè, atoo naa beyeghe Christ be mbe bé kanghle mbemba fuèñ, é bôr be mbe be é ngam ayat « be nga tsini minsama mi bôr » naa, be vini ye tsible bekristen beté (Bisè mintôl 14:2, 19). Édi da daghe Bisè mintôl 14:2, a La Atalaya, 1 de deciembre de 1998 nge ki La Tour de Garde, 1er décembre 1998 a nga dzô naa : « É bôr be mbe béé sukh Satan, be nga tep é fuèñ bekristen be mbe béé kanghle ye fe naa, be mbe béé dzô mbimbia bemam nfa wôba naa, bôr be taa be bèè ye vini be. »

16. Za dzam bia yiène baghle éyong bia wokh mefuèñ me ne minaa ?

¹⁶ Satan éé dzi ki sughu naa a kobe minaa fave ntet mimbu ôsua. Ému wi fe, Satan a ngen a tsini naa, « a dukh si ése ngura » (Mel. 12:9). Nge ô wogho ba kane minaa mii dagha Ékôan, ye é bobedzang be tele ôsu, simghan aval minzinzing mi nga bo Yésu ye beyeghe bèñ ye ntet mimbu ôsua. Yésu a nga dzô naa bôr ba ye tsible é bôr ba sèhane Jehôva, ye kane  minaa nfa wôba. Mam meté faa bia tugha yen ému (Mat. 5:11, 12). Biaa ye ki bèè minaa mité nge bia simane é môr a wule mie, ye nge étéñ t’ébiéñ, bia bo é dzam ésese bi ne bo naa bi kamane bia bebièn. Éde, mam mevé bia yiène bo ?

17. Aval avé bi ne ve naa mefuèñ me ne minaa me taa bia dzughu ? (2 Timothée 1:13) (A daghe fe nkaalé, «  Za dzam bia yiène bo éyong bia wokh mefuèñ me ne minaa. »)

¹⁷ A tep mefuèñ me ne minaa. Ntôl Pablo nge ki Paul a nga tugha bia lere é dzam bia yiène bo nge bia wokh mefuèñ me ne minaa. A nga dzô Timothée naa « a dzô bôr bézing naa [. . .] be bo nkee ye minlang mi ne minaa » ye « tep minlang mi ne minaa, mia ve Nzame éyôla mvîn » (1 Tim. 1:3, 4 ; 4:7). Tamane siman é dzam di : Moan a ne sia toa dzôm ézing é ne mvîn ô si metsoo, éyong té a furu d’añu, ve ñamôrô ézing aa ye ki de vaghle bo amu a yem naa, ng’a bo de, é ne ve naa, a bili mbia ôkoan. Bia tep mefuèñ mesese me ne minaa amu bia yem é môr miamane me. Ndaane de, bia bèè fave « mbemba medzô » me ye bebela (A lang 2 Timothée 1:13).

18. Aval avé bi ne lere naa bia dzing Ékôan Jehôva ?

¹⁸ Bi va yen ve mam melal ye aval Ékôan Nzame da vu éfônane Yésu. Nté wa yeghe Bible, baghle meval mefe Ékôan da tsini naa da vu Yésu. Volghe bôr be y’ékôan duè naa be wône édzing be bele akal Ékôan Jehôva. Tsinighe fe naa, wa lere édzing duè akal Jehôva wéé sèhane ñe ya bebela, wéé wulu fe sôsôe y’Ékôan Jehôva a belane de naa a dzale nkômane wèñ (Bya 37:28). Nkaane ôsu ye lere naa bia yem mbeng, naa bi ne bôr be ye ndzindzing Ékôan Jehôva.