1. Besôsôe bebo bisèñ Jehôva bézing be ne bele za bisô ?

 KE DA ve bia n’nem mevakh a yem naa, Jehôva a ve ayong dèñ ayebe dèñ nga ! Bible a dzô naa : « Jehôva a dzing ayong dèñ » (Bya 149:4). Ve, biyong bizing é ne kuiñ naa, bevoo bézing ba sili mo ôsi, ye sili bebièn naa, ‘Ye Jehôva a yen faa ma n’nem mbeng ?’ Besôsôe bebo bisèñ Jehôva bézing be ye metam me ya Bible, baa fe be nga lumane aval mesimane meté (1 Sam. 1:6-10 ; Job 29:2, 4 ; Bya 51:11).

2. Za a bele ayebe Jehôva ?

² Bible a tugha lere naa, bôt a minsem be ne bele ayebe Jehôva. Aval avé ? Bia yiène lere mebun ébe Yésu Christ ye duban (Jean 3:16). Aval té bia lere a bôt été naa, bi dzôbaneyang minsem miè ye bo Jehôva ngiagh naa bia sèhane ñe (Bisè mintôl 2:38 ; 3:19). Jehôva a yen n’nem mbeng éyong bia dang bitéñ bité, nfa ya bele mbemba élat ye ñe. Nté sese bia ve mengu’u naa bi kang é ngiagh bi nga bo éyong bi nga ve ñe éning dèè, Jehôva a ve bia ayebe dèñ ye ñong bia ane memvuiñ mèñ (Bya 25:14).

3. Za dzam bia ye yen ayeghle di été ?

³ Éde, amu dzé biyong bizing, bôt bézing be ne simane naa béé bele ki ayebe Jehôva ? Aval avé Jehôva a lere bia naa bi bele ayebe dèñ ? Aval avé moan kristen a ne wône mebun mèñ naa a bele ayebe Nzame ?

AMU DZÉ BÔT BÉZING BE NE SIMANE NAA BÉÉ BELE KI AYEBE JEHÔVA

4-5. Amben bia wôrane naa bii se ki éban, za dzam bi ne tobe de ndzi-n’nem ?

⁴ Asoo y’ô mong, abuiñ y’ébe bia bi nga wôrane naa bii se ki éban (Bya 88:15). Moadzang ézing a too éyôla naa  Adrián a dzô naa : « Ma so ma lumane ye ôsimane ye naa méé se ki éban. Éyong me mbe mong, ma simane naa me mbe méé yaghlane naa, é nda-bôt dzam é ning ô Paradis, amben me nga simane naa méé se ki mbemba môt naa me ning wéñ. » Tony, éñi éé dzi ki vem é nda-bôt Bengaa, a dzô naa : « Bebyèñ bam béé dzi ki me vaghle dzô môs ézing naa ba dzing ma, nge ki naa ba yen ma n’nem mvèñ. Dzam té é nga ve naa, me simane naa, méé se ki vaghle bo é dzam é ne mbeng. »

⁵ Nge biyong bizing bia lumane ye ôsimane ye naa bii se ki éban, bi ne simane naa, Jehôva éñ’a nga dure bia (Jean 6:44). A yen ébe bia, mbeng bia bebièn biaa yen ki, a yem fe n’nem wèè (1 Sam. 16:7 ; 2 Mila. 6:30). Éde, bi ne bele mebun ébe ñe éyong a dzô bia naa, bi ne tang nden (1 Jean 3:19, 20).

6. Za dzam ntôl Pablo nge ki Paul a nga wôran nfa minsem a nga bo melu mvus ?

⁶ Kaa naa be yem bebela, bevoo y’ébe bia bi nga bo é mam ma ve bia bidzô ya zu kuiñ ému (1 Pierre 4:3). Amben besôsôe bekristen, ba lumane fe ye nkômane ya bo nsem. Ye n’nem wônan wa ve mia bidzô ? Nge é ne aval té, mi taa sili mo ôsi, amu mia yem naa besôsôe bebo bisèñ Jehôva baa fe, be nga lumane aval mesimane meté. Éfônan, ntôl Pablo nge ki Paul a mbe éé wôrane naa, a ne kaa éban éyong a mbe éé fas bikop bièñ (Bero. 7:24). Bebela a ne naa, ntôl Paul a nga dzôbane minsem mièñ, éde a nga duban. Amben aval té, a mbe éé kobe émièn ane « ntôl wa dang avitsang ye mintôl mivoo », ye ane, mbo minsem « ôsua » (1 Becor. 15:9 ; 1 Tim. 1:15).

7. Za dzam bia yiène baghle ôsiman nfa minsem bi nga bo melu mvus ?

⁷ Ésaa wèè a ne a dzôp été a kiagh bia naa, nge bia dzôbane minsem miè, a dzame bia (Bya 86:5). Éde, nge bia dzôbane minsem bi nga bo metam ô mvus, bi ne bele mebun ébe Jehôva éyong a dzô bia naa, a dzameyang bia (Becol. 2:13).

8-9. Aval avé bi ne dang ôsimane ye naa bii se ki ve Jehôva n’nem mbeng ?

⁸ Bia besese bia kômô sèhane a Jehôva ya n’nem ôsese. Ve, bevoo bézing be ne wôrane naa béé se ki vaghle bo abim ba yiène bo, naa be bele ayebe dèñ. Kal dzèè ézing a too éyôla naa, Amanda a dzô naa : « Me bele fulu ya simane naa, a ve Jehôva é dzam da dang mbeng, da yili naa ma yiène bira sèñ éyong ésese. Éde, biyong bizing ma dzeng naa me bo a lôt abim me ne bo. Éde, éyong ‘maa dzale ki’ é dzam ma kômô bo, ma kikh naa Jehôva aa yen ki ma n’nem mbeng ane mamièn ma simane de. »

⁹ Aval avé bi ne dang ôsimane ye naa, bii se ki vaghle ve Jehôva n’nem mbeng ? Simane naa, Jehôva aa sili ki bia naa bi bo é dzam a yem naa bii se ki bo. A vaghle ki yane naa bi bo abim mam a yem naa bii se ki bo. A ñeghe é mam mesese bia bo akal dèñ, éyong bia bo me ya n’nem ôsese. Simghane fe, é bôt a Bible été be nga sèhane a Jehôva ya n’nem ôse. Simghane Paul. A nga sèhane ñe y’ayông tang abuiñ mimbu, a nga bo bikena ébe betoyini bekilomètre, éé ke a tele abuiñ bikôan. Ve, éyong mam me nga tsen éning dèñ, ye naa, éé mbe ki fe kanghle ane a mbe éé bo de melu mvus, ye dzam té é nga yili naa, a dzimleyang ayebe Nzame ? Kaa. A nga tsini naa a bo abim a mbe bo, éde Jehôva a nga bôrane ñe (Bisè mintôl 28:30, 31). Aval dèè fe, abim bia ve Jehôva é ne tsen. Ve, é dzam da dang éban ébe ñe, a ne amu dzé bia bo mam meté. Éde, abong di, n’yeneghane  aval Jehôva a lere bia naa bi bele ayebe dèñ.

AVAL AVÉ JEHÔVA A LERE NAA A VE BIA AYEBE DÈÑ ?

10. Aval avé bi ne « wokh » Jehôva éé dzô bia naa a ve bia ayebe dèñ ? (Jean 16:27)

¹⁰ Ngalane Bible. Jehôva a dzeng meval a ne lere ayong dèñ naa a dzing de, ye naa, be bele ayebe dèñ. Mintsili mia tu biyong bibèñ Jehôva a nga dzô Yésu, é Moan wèñ naa, A dzing ñe, ye naa, a bele ayebe dèñ (Mat. 3:17 ; 17:5). Ye wa kômô wokh ane Jehôva a dzô wô naa, ô bele ayebe dèñ ? Jehôva aa kobe ki ye bia ane bia kobe ye moan môt, ve, a kobe bia ngalane Nkobe wèñ. Bi ne « wokh » ane Jehôva a kobe bia éyong bia lang é mbemba bifiè Yésu a mbe éé dzô beyeghe bèñ (A lang Jean 16:27). Yésu a nga tugha yem vu aval môt Ésaa a ne. Éde, éyong bia lang naa, Yésu a nga dzô besôsôe betông bèñ be mbe bôt a bikop naa a dzing be, bi ne yen Jehôva éé dzô bia bifiè bité (Jean 15:9, 15).

11. Amu dzé minzukh bia tubane mio miaa yili ki naa bi dzimléyang ayebe Jehôva ? (Jacques 1:12)

¹¹ Ngalane mimboane mièñ. Jehôva a bele nkômane ya vole bia, ane éyong a ve bia é mam bia yi nfa ya nsôn. Biyong bizing, Jehôva a ne likh naa bi tubane minzukh, aval ane a nga bo de ye sôsôe Job (Job 1:8-11). A tubane minzukh daa yili ki naa bi dzimléyang ayebe Nzame. Ndaane de, minzukh mité mia likh bia tam naa bi lere é môra édzing bi bele akal dèñ, ye mebun bi bele ébe ñe (A lang Jacques 1:12). Éde, nté bia ye tubane minzukh mité, bia ye yen nté mbé a dzing bia, ye sukh bia asi nté a vole bia a zôme mio.

12. Za ayeghle bi ne ñong ya éfônane Dmitrii ?

¹² N’yeneghan éfônane moadzang ézing ye Asia, a too éyôla naa Dmitrii. A nga dzimle ésèñ dèñ, kaa ki yen éfe ébe abuiñ mengoan. Ane a nga kikh naa, a veme ésèñ minkanghle dèñ, éé lere vèè mebun a mbe a bele ébe Jehôva. Abuiñ mengoan me nga lôt kaa naa a yen ésèñ. Éyong té a nga ku môra nkukoan, kaa fe naa a ne wule. A nga sum sôô naa a ne mbemba n’nôm ye mbemba ésaa, éde a nga sili nge a dzimléyang ayebe Jehôva. Éde, ngogho ézing, ngo-dzèñ a nga kule afep é bele bifiè bia yen nten Esaïe 30:15 bia dzô naa : « É ngu’u duè da ye bo naa ô tobe mvoa ye bele mebun. » A nga bwi de énong dèñ  nfeng ye dzô naa : « A pa, éyong wa ye wokh ñuu abé été, ô ne simane éfus di. » Dmitrii a nga yen naa, ngalane avole Jehôva, é nda-bôt dzèñ é ngen é bele bidzi, bitôp ye nda. A dzô naa : « É dzam me nga yiène bo é mbe a tobe mvoa ye tsini naa ma lere mebun ébe é Nzame wom. » Nge wa fe, wa tuban aval ndzukh té, ô ne tobe ndzi-n’nem naa Jehôva a bis wa, ye naa, a ye wô vole a zôme.

13. Ngalane za Jehôva a ne bia dzô naa bi bele ayebe dèñ, aval avé ki ?

¹³ Ngalane bobedzang ye bekal bèè. Jehôva a ne belane bobedzang ye bekal bèè naa a dzô bia naa bi bele ayebe dèñ. Éfônan, a ne tsini é bôt bevoo naa be dzô bia bifiè bia saghe é tam da yiène. Kal dzèè ézing ye Asia a nga buane aval avole té metam a mbe éé bira yep a n’nem. A nga dzimle ésèñ dèñ, ye ku mbimbia nkukoan. Ye fe naa, n’nôm a nga bo nsem ônen éde be nga vèè ñe mvene. A nga dzô naa : « Méé mbe ki méé wokh amu dzé dzam té é nga boban. Me mbe méé simane naa, éyong ézing me va bo é dzam é ne abé, éde me va dzimlé ayebe Jehôva. » Kal dzèè té, a nga dzaa Jehôva naa, a ban ñe naa, a ngen a bele ayebe dèñ. Aval avé a nga bo de ? A dzô naa : « Bemvene be y’ékôan be nga kobe ye ma, ye ban me naa, Jehôva a ngen a dzing ma. » Ôsu vèè, a nga bera dzaa Jehôva avole. A dzô naa : « Môs té ébién, bobedzang ye bendôm bam be y’ékôan be nga tsili me kalare. Nté me mbe méé lang é mbemba bifiè bii mbe été, me nga wôrane naa, Jehôva a nga bèè ma. » Ôwé, Jehôva a wôla bia dzô naa bi bele ayebe dèñ ngalane é mbemba bifiè é bôt bevoo (Bya 10:17).

14. Aval avé afe Jehôva a ne bia lere naa bi bele ayebe dèñ ?

¹⁴ Jehôva a lere fe naa bi bele ayebe dèñ,  éyong a belane bekristen bevoo naa, be ve bia melepgha éyong bia yi de. Éfônan, ntet mimbu ôsua, Jehôva a nga belane ntôl Pablo nge ki Paul naa a tsili bekalare 14, ngalane nsisim wèñ akal bekristen bevoo. Bekalare beté, be mbe be bele melepgha me ne ngu’u, ve me too ndzalan ya édzing. Amu dzé Jehôva a nga belane Paul naa a ve be melepgha meté ? Jehôva a ne mbemba Ésaa, éde a ve é boan « a dzing » akira (Mink. 3:11, 12). Éde, nge môt ézing a ve bia melepgha ma so a Bible été, daa yili ki naa Jehôva a wokh bia abé, ndaane de, dzam té da yili naa Jehôva a ngen a dzing bia (Behéb. 12:6). Za mam mefe ma lere naa bi bele ayebe Jehôva ?

MENDEM MEFE MA LERE NAA BI BELE AYEBE JEHÔVA

15. Za Jehôva a ve nsisim wèñ, amu dzé ki dzam té é ne bia ve ndzi-n’nem ?

¹⁵ Jehôva a ve é bôt a yebe nsisim wèñ (Mat. 12:18). Bi ne sili bia bebièn naa, ‘Ye me lereyang fulu ézing y’ébuma ya nsisim Nzame éning dzam ?’ Ye mi yenang naa mi nga danghang ôdzibi y’é bôt bevoo a lôt metam mi mbe kaa yem Jehôva ? Nté wa ke wa veme é mbemba mefulu nsisim Nzame wa ve naa ô bele, nté té fe, éde wa ye tugha bele mebun naa Jehôva a ñeghe wa ! (A daghe nkaalé «  Ébuma ya nsisim é ne [. . .] »)

16. Beza Jehôva a belane be naa be kanghle mbemba fuèñ, dzam té da ve naa mi wôrane yè ? (1 Bethessalonicien 2:4)

¹⁶ Ya mevakh, Jehôva a lôm é bôt be bele ayebe dèñ naa be ke kanghle mbemba fuèñ (A lang 1 Bethessalonicien 2:4). N’yeneghan ane kal dzèè ézing a too éyôla naa Jocelyn, a nga ñong abuan éyong a nga kanghle é bôt bevoo mbemba fuèñ. Môs ézing, Jocelyn a nga véé ôyô y’abuiñ meyep a n’nem. A dzô naa : « Me nga wôrane naa, méé bele ki fe ngu’u. Ve, me mbe mpwaghe mefan, ye naa, môs té me nga yiène wô kanghle. Éde me nga yaghlan, ye ke minkanghle. » Kikiri té, Jocelyn a nga tubane minenga ézing a too édedèè mbemba fulu, béé luè ñe naa Mary, a nga yebe ayeghe Bible. Ôyôm mengoan ôsu vèè, Mary a nga dzô naa, a nga yaghlane Nzame naa a vole ñe, éyong Jocelyn ñ’a nga kur mbéñ wèñ. Éyong Jocelyn a fas é dzam é nga bobane ñe, a dzô naa : « A ne ane Jehôva a nga dzô me naa, ‘Ma ve wa  ayebe dam’. » Bebela a ne naa, môt asese aa ye ki yebe ésèñ minkanghle dèè. Ve, bi ne tobe ndzi-n’nem naa, Jehôva a ne mevakh éyong bia ve mengu’u naa bia kanghle môt asese mbemba fuèñ.

17. Za ayeghle mia ñong ébe é dzam Vicky a dzô nfa ntang ? (Bya 5:12)

¹⁷ Jehôva a ve naa, é bôt besese be bele ayebe dèñ, be buane ntang (1 Tim. 2:5, 6). Ve, za dzam da lôran, nge bia tsini naa bia wôrane naa Jehôva aa ve ki bia ayebe dèñ, amben nge bi bele mebun ébe ntang, ye naa bi ne nduban ? Simghane naa, se ki éyong ésese éde bi ne tobe mebun ya é mam bia wôran, ve, bi ne tobe Jehôva mebun éyong asese. A yen naa, é bôt besese be bele mebun ébe ntang, be ne sôsôe é mis mèñ, éde a kiagh naa a ye bôrane be (A lang Bya 5:12 ; Bero. 3:26). A binan ébe ntang é nga vole Vicky. Môs ézing niène a nga bira mane binan ébe ntang, a nga dzô naa : « Jehôva a nga lere ma ôdzibi, nté sese té. [. . .] Ve, me mbe méé dzô ñe naa : ‘Édzing duè déé se ki édedèè ngu’u naa é zu ébe ma. Atunegha é Moan wiè déé se ki ve naa minsem miam mi tobe ndzaman.’ » Éyong a nga fas ébe das ntang, a nga sum naa a wôran édzing Jehôva. Bia fe,bia ye wôrane naa, Jehôva a dzing bia ye naa, a ve bia ayebe dèñ éyong bia binan ébe ntang.

18. Za dzam bi ne tobe de ndzi-n’nem nge bi tsini naa bia dzing Ésaa wèè a ne a dzôp été ?

¹⁸ Amben bia ve mengu’u naa bia dzale melepgha bi va yen ôyô, biyong bizing, bi ne sulu ye sili bia bebièn nge bi bele faa ayebe Jehôva. Nge dzam té da sia boban, simghane naa, Jehôva a yebe é « bôt ba tsini naa ba dzing Ñe » (Jacq. 1:12). Éde, tsinighane naa, mia yir Jehôva bebéñ ye dzeng meval mesese a lere mia naa mi bele ayebe dèñ. Mi taa vuène naa, Jehôva « éé se ki ôyap ye kada môt y’ébe bia » (Bisè mintôl 17:27).