Minsili belang
Amu dzé bôr bézing ba tem naa bifiè « Wa ye be baghle », bia kuane nten Bya 12:7, bia tsinane ye « bifiè Jehôva » (ye abong 6) nté Traducción del nuevo mundo nge ki Traduction du monde nouveau a lere naa bifiè bité bia tsinane ye « é bôr min’nem mia dzukh » (ye abong 5) ?
Abong ye nten bya té da lere naa, éfus té da kobe bôt.
Nten Bya 12:1-4, bia lang naa « besôsôe be-bôr be mane-yang ézizang bôr été. » Éndagha, ntamane yen bifus bi ye nten Bya 12:5-7 bia tsinane nsili té.
« ‘Amu naa ba tsible é bôr min’nem mia dzukh,
Amu ntat é bôr be ne ajèñ été,
Ma ye tebe naa me ‘vole’ éde Jehôva a dzô.
‘Ma ye be kôre é mo é bôr ba belane be ye abian.’
Bifiè Jehôva bi ne nfuban ;
Bi ne ane miang be va fubu biyong zangbwa a dzii été.
Wa ye be baghle, a Jehôva ;
Wa ye kame mboo sese ye ébe be, ébe mièñ bôr té mbèmbèè. »
Éfus 5 da lere é dzam Nzame a dzô dé daghe « é bôr min’nem mia dzukh. » A ye be kôre.
Éfus 6 da koghle naa « bifiè Jehôva bi ne nfuban » ‘ane miang be va ngengle.’ Dzam té da lere aval bia wôran nfa éfiè Jehôva (Bya 18:30 ; 119:140).
Éndagha n’yenane éfus é ne ôsu, nten Bya 12:7 : « Wa ye be baghle, a Jehôva ; wa ye kame mboo sese ye ébe be, ébe mièñ bôr té mbèmbèè. » Éfiè « be » da tsinane za dzam ?
Amu naa éfus 7 éde da berane éfus 6 da tsiè dzam « bifiè Jehôva », bôr bézing be ne tem naa, da yili naa Nzame a ‘baghle’ bifiè bièñ. Ye fe, amu bia yem naa, Nzame a nga kale Bible amben mengu’u mesese be nga ve, minzinzing mii dzi ki kuiñ naa be mane ve naa Bible a dzang (Esaïe 40:8 ; 1 Pierre 1:25).
Ve daa, é ne fe été naa Jehôva a baghle é bôr ba kobe be éfus 5. Jehôva a vole ye kôre « é bôr min’nem mia dzukh », ye fe éba be ne « étsible été » (Job 36:15 ; Bya 6:4 ; 31:1, 2 ; 54:7 ; 145:20).
Ya dzam té éfiè « be » ye éfus 7 da tsinane dzé ?
Éyong bia tugha daghe nten Bya té, é ne bia ébubu a wokh naa éfiè « be » ba belane de, da tsinane bôt.
Nten Bya 12:1 wa sum ye tsiè adzô « besôsôe bebo-bisèñ » Jehôva, mbia bebôt be nga yiane dukh. A kôre ye vaa, bia lang naa Jehôva a ye tebe é bôr ba kobe mbia bemam, é ngam ayat. Nten bya wa ban bia naa, bi ne tobe mebun naa, Jehôva a ye tebe é bôr ba belane ôyem wôba naa be dzughu é bôr bevoo é ngam ayat, amu naa bifiè bia so añu dèñ bi ne nfuban.
Ya dzam té, éde éfus 7 da dzô naa, Jehôva a ye baghle ye kame « be », da yili naa, é bôr min’nem mia dzukh étom mbia môr.
Éfiè « be » ba belane de, da so mintsili mi ye hebreo nge ki hébreu bi ne tobe a mie mebun. Be nga belane éfiè « bia » biyong bibèñ éfus 7 mintsili mi ye hebreo nge ki hebreu be nga tare konghlan a griego nge ki grec, ba luè naa Septuaginta nge ki Septante, dzam té da lere naa, bifiè bité bibèñ bia sukh asi naa, éfus té da tsinane é bôr min’nem mia dzukh, ye fe é bôr be ne étsible été. Amangha, éfus 7 da dzô naa « mboo sese ye ébe be » besôsôe be bôr ba ye tobe nkaman ébe « mièñ bôr », da yili naa, mbimbia bebôt ba mieman abé (Bya 12:7, 8). Éyong bia lang éfus 7, mintsili mi ye hebreo nge ki hébreu, be nga konghlan nkobe Arameo nge ki Araméen, da dzô naa : « Wa, A NTI, wa ye kame besôsôe, wa ye be baghle ébe mbia mièñ bôr wi mbèmbèè. » Dzam té da bera ban naa, nten Bya 12:7 waa kobe ki adzô bifiè Nzame.
Ya dzam té, éfus té da ve « besôsôe be-bôr » ôyane naa, Jehôva a ye ba vole.
