Akpatre Passover emi Jesus okodụkde ama okpụhọde ye mbon eken emi enye ekesidụkde. Sia ini n̄kpa esie ekekperede, enye akadia Passover oro ye mme apostle esie onyụn̄ ọtọn̄ọ obufa edinam emi ẹdisinịmde kpukpru isua, oro edi, Udia Mbubreyo Ọbọn̄. Ntre enye ama osio Peter ye John ọdọn̄ ẹketịm ubet ẹben̄e edinam oro. (Lu 22:7-13; se ndise ikpaedem.) Emi owụt ke ọfọn itịm idem inọ Editi oro ẹdinịmde ke March 27. Anaedi esop ẹmemek owo emi edinọde utịn̄ikọ ẹnyụn̄ ẹneme nte ẹdisan̄ade inyene uyo, wine, ye mme n̄kpọ eken. Edi didie ke nnyịn owo kiet kiet ikeme ndiben̄e idem nnọ Editi?

Tịm esịt fo. Kot mme itie Bible oro ẹsidọhọde ẹkot ke ini Editi nyụn̄ tie kere se okotde. Mme itie Bible emi ẹdu ke Ẹdụn̄ọde N̄wed Abasi ke Usen ke Usen. Oyokụt n̄ko ediwak itie N̄wed Abasi en̄wen ke ekpri n̄wed emi Se Idin̄wamde Fi Ekpep Ikọ Abasi, ikpehe 16. (Se n̄ko N̄wed Mbono Esop Uwem ye Utom Nnyịn eke April 2020.) Ẹmekeme ndikụt nsio nsio n̄kpọ oro ẹwetde ẹban̄a ufak ke N̄wed Ndụn̄ọde Mme Ntiense Jehovah, emi mbufo ẹkemede ndineme ke ini utuakibuot ubon.

Kot mbon en̄wen ẹdidụk Editi. Tiene sịn idem nọ mme owo n̄wedikot Editi. Kere ban̄a mbon emi afo okpokotde, utọ nte mbon emi ọkọkwọrọde ikọ ọnọ, n̄kani nditọ ukpepn̄kpọ Bible fo, mme iman fo, ye mbon eken emi afo ọdiọn̄ọde. Akpana mbiowo ẹkụt ẹte ke ẹkot mbon oro mîsidụkke mbono esop aba m̀mê emi mîsikaha ukwọrọikọ aba. Edieke owo oro afo oyomde ndikot Editi mîdụn̄ke ke edem mbufo, emekeme ndika www.jw.org/efi ekefịk itie oro okụtde ABAN̄A NNYỊN, ekem efịk itie emi ẹwetde “Editi N̄kpa Christ” man okụt ini ye ebiet emi ẹdinịmde Editi ke edem mmọ.

Nso en̄wen ke ikpanam man iwụt ke imeben̄e idem inọ Editi?