Ke mbụk n̄kpọntịbe New York Times eke June 17, 2024, Dr. Vivek Murthy, akamba dọktọ ke U.S. ọkọdọhọ ete: “Nte nditọwọn̄ ẹnyenede mfịna ibuot idahaemi edi se ẹsọpde-sọp ẹnam n̄kpọ ẹban̄a​—ndien ọkpọsọn̄ ndụk ke Intanet etiene edi ntak.”

 Didie ke mme ete ye eka ẹkeme ndikpeme nditọ mmọ mbak ọkpọsọn̄ ndụk ke Intanet idinam nditọ mmọ n̄kpọ? Bible ọdọn̄ọ nti item oro ẹkemede ndin̄wam mmọ.

 Yak ineme item Bible ifan̄ emi.

 “Owo mbufiọk ekere ikpatisan̄ esie.”​—Mme N̄ke 14:15.

 Sia edide ọmọdiọn̄ọ se ndụk ke Intanet ekemede ndinam eyen fo, kûyak owo ndomokiet enyịk fi ayak eyen fo etiene odụk ndụk ke Intanet. Mbemiso ayakde eyen fo etiene odụk ndụk ke Intanet, kụt ete ke enye okpon ekem ndidiọn̄ọ udomo ini oro enye akpabiatde ke Intanet, ke enye eyekeme ndisasat utọ mbon oro enye odụkde ndụk ke Intanet, onyụn̄ asasat se enye esede.

•   Edieke oyomde ndidiọn̄ọ n̄kpọ en̄wen mban̄a se isụk inemede emi, kot mme ibuotikọ emi “Ndi Akpana Nyak Nditọ Mi Ẹnyene Ufan ke Intanet?” ye “Nte N̄kpan̄wamde Eyen Mi Ọdiọn̄ọ Nte Enye Anamde N̄kpọ ye Mme Ufan Esie ke Intanet.”

 “Ẹdedep ifet ẹnọ idem mbufo.”​—Ephesus 5:16.

 Edieke ayakde eyen fo odụk Intanet, tịn̄ se anade enye anam ye se mînaha enye anam ye nte enye ndinam mme n̄kpọ oro edikpemede enye. Kama enyịn se nte eyen fo anamde n̄kpọ tọn̄ọ akayak enye etiene odụk Intanet, man ọdiọn̄ọ m̀mê edi se akpande enye.

•   Da vidio cartoon emi Kpeme Se Anamde ke Intanet n̄wam eyen fo ekpeme se enye anamde ke Intanet.

 Bible ọdọhọ ke nnyịn idu uwem ke “ndiọkeyo emi ọsọn̄de ndiyọ.” (2 Timothy 3:1-5) Edi enye ọnọ nnyịn nti item emi edin̄wamde nnyịn iyọ. Ẹdọn̄ se ibede ibuotikọ 20 emi ẹdade ẹto Bible ẹnọ mme ete ye eka ye nditọ mmọ ke n̄kpọ aban̄ade mfịna ibuot nditọwọn̄.