Ndịk anam mme owo ke ekọn̄ nuclear ọmọn̄ an̄wana ke isọn̄ emi sia ikpọ mme andikara ererimbot emi ke ẹbot mbufa n̄kpọ-ekọn̄ nuclear. Se inamde ndịk anam mme owo ntre edi ke mmọ ẹkere ke edieke n̄kpọekọn̄ nuclear enen̄erede awak, ke ekọn̄ nuclear ekeme nditọn̄ọ ini ekededi ke isọn̄ emi. Ndịk akam anam mme owo ke edieke ẹtopde ekpri n̄kpọ-ekọn̄ nuclear, ke ekọn̄ nuclear ekeme nditọn̄ọ ndien osobo ofụri ererimbot. Bulletin of the Atomic Scientists ọdọhọ ‘ke mme owo ẹdu uwem ke ndịk ke ntak emi ẹkerede ke ekọn̄ nuclear ekeme ndin̄wana.’

 Ndi ekọn̄ nuclear ekeme ndin̄wana? Edieke edide ntre, ndi oyosobo isọn̄ emi? Ndien nso ikeme ndin̄wam nnyịn ke ini ndịk anamde nnyịn ke ekọn̄ nuclear ekeme ndin̄wana ke isọn̄ emi? Nso ke Bible etịn̄?

Iyọbọrọ mme mbụme emi ke ibuotikọ emi

•  Ndi Bible ama etịn̄ ke ekọn̄ nuclear ayan̄wana?

•  Ndi Abasi ayayak ekọn̄ nuclear an̄wana?

•  Ndi ekọn̄ nuclear oyosobo isọn̄ emi?

•  Nso idin̄wam fi edieke ndịk anamde fi ke ekọn̄ nuclear ekeme ndin̄wana?

•  Ndi Bible ọdọhọ ke ekọn̄ Armageddon edidi ekọn̄ nuclear?

•  Bible ọdọhọ ke nso idinam ekọn̄ etre?

•  Ndi n̄wed Ediyarade etịn̄ aban̄a ekọn̄ nuclear?

 Ndi Bible ama etịn̄ ke ekọn̄ nuclear ayan̄wana?

 Idụhe itie ndomokiet edikụtde ikọ oro “ekọn̄ nuclear” ke Bible. Edi, se inamde ekọn̄ nuclear anam mme owo ndịk edi nte mme owo ẹdude uwem ye mme n̄kpọ emi Bible ọkọdọhọde ke ẹyetịbe.

 Men se mme itie Bible emi ẹtịn̄de domo ye se ikade iso ke ererimbot mfịn:

 Itie Bible: Mbet Jesus ẹma ẹbụp Jesus ẹte: “Nso idinyụn̄ idi idiọn̄ọ edidu fo ye eke akpatre ini editịm n̄kpọ emi?” Jesus ama ọbọrọ mmọ ete: “Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen.”​—Matthew 24:3, 7.

 Se ikade iso ke ererimbot: Nsio nsio idụt, esịnede mbon emi ẹnyenede n̄kpọ-ekọn̄ nuclear, ke ẹtọhọ ke usen ke usen ke ẹnyụn̄ ẹn̄wana.

 “Ke mme isua emi osụk ẹbede, afai enen̄ede ọsọn̄ ubọk.”​—The Armed Conflict Location & Event Data Project.

 Itie Bible: “Ke utịt ini edidem usụk ye [edidem edere] ẹyenụk kiet eken.”​—Daniel 11:40.

 Se ikade iso ke ererimbot: Nsio nsio idụt ye mbon emi ẹdade ye mmọ ke ẹn̄wana ẹyom ndidiọn̄ọ idụt emi enyenede odudu akan nte Bible ọkọdọhọde. Mme idụt emi ẹnyenede ikpọ n̄kpọ-ekọn̄ nuclear idaha mme n̄kpọ-ekọn̄ oro in̄wana ye idemmọ kan̄a, edi mmọ ke ẹka iso ndibot mme ikpọ n̄kpọ-ekọn̄ nuclear nnịm.

 “Ke isua duop emi ẹbede, mme idụt ẹnen̄ede ẹtọhọ ẹnyụn̄ ẹn̄wana ẹkan nte ekesidide. Emi esịne mme idụt oro mme idụt emi ẹkarade ofụri ererimbot ẹdade ye mmọ.”​—The Uppsala Conflict Data Program.

 Itie Bible: ‘Ndiọkeyo emi ọsọn̄de ndiyọ oyodu ke mme akpatre usen. Koro mme owo idinyịmeke ndidụk ediomi ekededi, ẹyedi mbon edidọk, ẹnana mfara ke idem ẹnyụn̄ ẹtie obom obom.’​—2 Timothy 3:1-3.

 Se ikade iso ke ererimbot: Ukem nte ediwak owo mfịn mîsimaha ndidụk ediomi, ikpọ mme andikara ererimbot emi n̄ko isimaha ndidụk ediomi. Utu ke ndikọk mfịna emi mmọ ẹnyenede ke emem emem usụn̄, mmọ ẹsika ikọ ye en̄wan mîdịghe ẹtetịn̄ ikọ ẹsịn mme owo ndịk ke idem. Ofụri emi esinam etie nte ekọn̄ nuclear ọmọn̄ an̄wan̄wana.

 “Edieke owo mînen̄ekede inam n̄kpọ man edidianakiet ye emem odu, utọk emi ayakaka iso ọsọn̄ ubọk akan emi.”​—S. Saran and J. Harman, World Economic Forum.

 Ndi Abasi ayayak ekọn̄ nuclear an̄wana?

 Bible itịn̄ke, edi ama ọdọhọ ke mme owo “ẹyekụt n̄kpọ ndịk” ke eyo nnyịn emi. (Luke 21:11) Ẹma ẹkụt utọ n̄kpọ ndịk oro ini ẹketopde ikpọ bọmb atom ke Ọyọhọ Ekọn̄ Ererimbot Iba. Bible etịn̄ ntak emi Abasi ayakde ekọn̄ odu. Edieke oyomde ndidiọn̄ọ n̄kpọ en̄wen mban̄a se isụk itịn̄de emi, se vidio emi Ntak Emi Abasi Ayakde Mme Owo Ẹbọ Ufen?

 Ndi ekọn̄ nuclear oyosobo isọn̄ emi?

 Ihih. Idem ekpededi ẹfefiak ẹtop n̄kpọ-ekọn̄ nuclear, Abasi idiyakke enye abiat n̄kpọ tutu edi se ẹsobode ofụri isọn̄. Abasi ama etetịn̄ ke Bible ke isọn̄ emi edidu ke nsinsi, mme owo ẹyenyụn̄ ẹdụn̄ ke nsinsi.

 Ndusụk owo ẹkere ke ini iso, ke n̄kpata owo ifan̄ kpọt ẹdidu ke ererimbot emi ẹma ẹkeda ikpọ n̄kpọ-ekọn̄ nuclear ẹbiat ẹma. Edi, Bible owụt ke Abasi ọyọdiọn̄ kpukpru se ibiarade ke isọn̄ emi ke ntak ekọn̄.

 Abasi okobot isọn̄ nnyịn emi ke usụn̄ emi isọn̄ ekemede ndidiọn̄ idem esie. Imonyụn̄ idiọn̄ọ n̄ko ke Abasi enyene odudu ndinam isọn̄ emi afiak etie nte enye okobotde; enye edisụk edi n̄kukụre ebiet emi ọfọnde se mme owo ẹdụn̄de.​—Psalm 37:11, 29; Ediyarade 21:5.

 Nso idin̄wam fi edieke ndịk anamde fi ke ekọn̄ nuclear ekeme ndin̄wana?

 Ndusụk owo ẹnen̄ede ẹkop ndịk ke ekọn̄ nuclear ekeme ndin̄wana ẹnyụn̄ ẹfehe ndịk m̀mê nso ke ekọn̄ oro edida idi. Se Bible ọn̄wọn̄ọde ye nti item emi ọdọn̄ọde ke Bible ẹkeme ndin̄wam utọ mbon emi tutu mmọ inen̄ekede ikop ndịk aba. Didie ke Bible ekeme ndin̄wam?

 Bible etịn̄ nte n̄kpọ edifọnde ke isọn̄ ye nte edifọnde ye mbon oro ẹdụn̄de ke esịt. Ndikpep mban̄a idotenyịn emi ayanam nnyịn inen̄ekede ikop ndịk ekọn̄ nuclear aba sia idotenyịn emi editie nte ukwak ubom emi omụmde nnyịn akama. (Mme Hebrew 6:19) N̄kpọ en̄wen emi edin̄wamde nnyịn ikûnen̄ede utịmede esịt edi ndida uwem nte ikụtde kpukpru usen, utu ke nditie n̄kere m̀mê emi ye oko eyetịbe ke ini iso. Onyụn̄ edi nte Jesus eketịn̄de ke “afanikọn̄ usen ekem ye usen.”​—Matthew 6:34.

 Se idude edi ke ọfọn ikpeme idem man nnyịn idikere ekikere tutu ọkpọsọn̄ ekikere anam ibuot ebe nnyịn. Imekeme ndinam emi ke ndimia utọn̄ nsio ke mme n̄kpọ emi ẹkemede ndinam esịt enen̄ede etịmede nnyịn, utọ nte nneme ye se mme owo ẹtịn̄de ẹban̄a ekọn̄ nuclear ye mbufa n̄kpọ-ekọn̄ nuclear emi ẹsion̄ode ẹdi. Idịghe nte ẹdọhọ ke nnyịn idọn̄ke enyịn ke se ikade iso. Inam emi man isio esịt ikpọn̄ ndifịna idem mban̄a mme n̄kpọ emi nnyịn mîkemeke ndinyan̄a, emi onyụn̄ ekemede ndidi iditịbeke tutu amama.

 Tre kan̄a ndikop ndiọi mbụk nyụn̄ nen̄ede kere nti n̄kpọ emi Abasi anamde ọnọ fi.

 Afo ndikpep mban̄a nsio nsio n̄kpọ oro Abasi anamde ekeme ndinam enyene idotenyịn, okop idatesịt onyun̄ anam esịt ana fi sụn̄.

 Ndi Bible ọdọhọ ke ekọn̄ Armageddon edidi ekọn̄ nuclear?

 Ndusụk owo ẹkere ke ekọn̄ Armageddon edidi ekọn̄ nuclear emi an̄wanade ke ofụri ererimbot. Anaedi mmọ ẹsikere nte utọ ekọn̄ oro edibiatde n̄kpọ.

 Bible okot ekọn̄ emi Abasi edin̄wanade ye “ndidem ofụri isọn̄,” m̀mê ukara ubọkowo, ekọn̄ “Har–​Magedon,” m̀mê Armageddon. a (Ediyarade 16:14, 16) Armageddon idiwotke mme owo ntịme ntịme nte n̄kpọ-ekọn̄ nuclear okpowotde. Ke ekọn̄ Armageddon, Abasi ediwot mme idiọkowo kpọt ndien oro ayanam emem ye ifụre odu ke isọn̄.​—Psalm 37:9, 10; Isaiah 32:17, 18; Matthew 6:10.

 Bible ọdọhọ ke nso idinam ekọn̄ etre?

 Jehovah b oyowụt ke imenyene odudu ikan kpukpru idụt oro ẹsin̄wanade ekọn̄, etre ekọn̄ onyụn̄ osobo kpukpru n̄kpọ-ekọn̄ mmọ. Enye edida Obio Ubọn̄ esie inam emi, oro edi, ukara esie emi edidude ke heaven ise iban̄a kpukpru se ikade iso ke isọn̄.​—Daniel 2:44.

 Obio Ubọn̄ Abasi eyekpep mme owo ndidu ke emem nnyụn̄ ndiana kiet. Sia edide ukara kiet kpọt edikara ofụri ererimbot, idụt iditọhọke aba ye idụt, mme owo idinyụn̄ ikpepke aba ndin̄wana ekọn̄! (Micah 4:1-3) Nso iditịbe? “Kpukpru mmọ ẹyetie ke idak vine mmọ ye ke idak fig mmọ, ndien baba owo kiet eke edinamde mmọ ndịk ididụhe.”​—Micah 4:4, Edisana Ŋwed Abasi Ibom.