Ẹkot kpukpru Ufọkmbono Obio Ubọn̄ Mme Ntiense Jehovah ẹdian enyịn̄ edisana Abasi. Ke ntre, nnyịn nditiene mbuana ke ndinam enye asana, eye, onyụn̄ odu ke eti idaha, edi n̄kpọ ukpono onyụn̄ esịne ke otu akpan n̄kpọ oro inyenede ndinam ke edisana utuakibuot nnyịn. Kpukpru owo ẹkeme nditiene mbuana.

Tiene nam enye asana ke mbono esop ama akasuana. Ke mbono esop kiet kiet asuanade, nditọete iren ye iban ẹsikop inemesịt ndinam n̄kpri utom man ẹnam Ufọkmbono Obio Ubọn̄ nnyịn asana. Ke ini ke ini, ẹsinam utom oro okponde esisịt. Ebiowo m̀mê asan̄autom unamutom esida usụn̄ ke utom emi, enye esiwak ndise mme n̄kpọ oro ẹdinamde emi ẹkewetde ẹnịm. Etiene utom oro oyomde ẹnam, owo kiet kiet ekeme ndikpọri isọn̄, eyet isọn̄, eduep ntọn̄, enen̄ede mme n̄kpọitie obon, anam itie uken̄idem asana, eyet mme window ye ukụtiso, emen mbio ọkọduọk, mîdịghe anam an̄wa asana. Ke nsụhọde n̄kaha ini kiet ke isua, ẹsisio usen kiet ẹnịm man ẹnam ata akamba utom. Ke ini inamde nditọ nnyịn ẹtiene ẹnam ndusụk utom, nnyịn ikpep mmọ ndiwụt ukpono nnọ itie utuakibuot nnyịn.—Ecclesiastes 5:1.

Tiene diọn̄ n̄kpọ ekededi oro oyomde ẹdiọn̄. Kpukpru isua, ẹsisan̄a ẹse kpukpru itie ke esịt ye ke an̄wa Ufọkmbono Obio Ubọn̄. Emi esinam ẹkụt mme n̄kpọ ye itie oro oyomde ẹdiọn̄ kpukpru ini man ẹnam ufọkmbono odu ke eti idaha, ndien emi ayanam ẹkûbiat okụk nte mîdotke. (2 Chronicle 24:13; 34:10) Ufọkmbono Obio Ubọn̄ oro asanade, emi ẹnyụn̄ ẹtịmde ẹse ẹban̄a edi eti itie oro ẹtuakde ibuot ẹnọ Abasi nnyịn. Nnyịn nditiene mbuana ke utom emi owụt nte imade Jehovah ye nte idade itie utuakibuot nnyịn ke akpan n̄kpọ. (Psalm 122:1) Emi n̄ko esinam mbio obio ẹtịn̄ nti n̄kpọ ẹban̄a itie utuakibuot nnyịn.—2 Corinth 6:3.

• Ntak emi nnyịn mîkpofụmike itie utuakibuot nnyịn?

• Mme ndutịm ewe ke ẹnam man ẹnam Ufọkmbono Obio Ubọn̄ asana?