Satan ye mme demon esie idikaha iso ibian̄a ubonowo ke nsinsi. Jehovah ama ososion̄o mmọ ke heaven ọduọn̄ọ. (Ediyarade 12:9) Ke n̄kpet n̄kpet ini iso, Abasi eyefiak anam n̄kpọ aban̄a Satan ye mme demon esie. Ke n̄kukụt kiet oro otode Abasi, apostle John ọkọdọhọ ete: “Ekem n̄kụt angel otode ke heaven osụhọde, akama ukpọhọde editụn̄ọ ukpe ye akwa n̄kpọkọbi ke ubọk. Enye onyụn̄ omụm dragon, akani urụkikọt, emi edide Andidori ikọt Abasi ikọ ye Satan, onyụn̄ ọkọbi enye ke tọsịn isua, onyụn̄ otop enye esịn ke editụn̄ọ ukpe, onyụn̄ ọkọbi ukpe, onyụn̄ esịri abaha enye, onịm ufịkn̄kpọ ke esịt, man okûbian̄a aba mme idụt tutu tọsịn isua ẹbe.” (Ediyarade 20:​1-3) Ke oro ebede, ẹyesobo Devil ye mme demon esie ẹfep ke nsinsi.​—Ediyarade 20:10.

Ẹyesobo ndiọi owo n̄ko ke isọn̄ ẹfep.​—Psalm 37:​9, 10; Luke 13:5.

Ke ẹma ẹkesio Satan ye mme demon esie ẹfep, Jehovah eyeda ediwak edidiọn̄ ọsọk ubonowo. Afo eyeti ete ke mme akpan̄kpa inyeneke uwem. Jesus ekemen n̄kpa odomo ye idap​—kpa ọkpọsọn̄ idap oro owo mîdabake ndap. (John 11:​11-14) Enye ama anam ntre sia enye ọkọfiọkde ete ke ini eyedi emi ẹdinamde mbon oro ẹdede idap n̄kpa ẹdemerede ẹdinyene uwem. Enye ọkọdọhọ ete: “Ini ke edi eke kpukpru mme andidu ke udi . . . [ẹdiwọn̄ọde] ẹdi.”​—John 5:​28, 29; men Utom 24:15 domo.

Ẹyenam mmọ ẹset ẹdinyene uwem mi ke isọn̄. Utu ke ndinọ ntọt nte ke mme owo ẹma ẹkpan̄a, idara idara ntọt oro aban̄ade mbon oro ẹnamde ẹset ẹdinyene uwem ẹdidu! Nso n̄kpọ inemesịt ke edidi ntem ndidara mbonima oro ẹwọn̄ọde ke udi ẹdi!