Enyene akpan n̄kpọ emi akanade Jesus anam ke enye ama ọkọkwọrọ ikọ ke n̄kpọ nte isua kiet ye ubak. Akana enye emek mbon emi ẹdisan̄ade ye enye inam utom kpukpru ini, mbon emi enye edikpepde nte ẹdidade mme anditiene imọ usụn̄ ke esop. Jesus okoyom Jehovah an̄wam enye emek, ntre enye ama ọdọk obot kiet okodu ikpọn̄ ọbọn̄ akam kan̄a ọnọ Jehovah ofụri okoneyo. Ke ini eyo esierede, enye ama okot ndusụk mbet esie onyụn̄ emek owo 12 ke otu mmọ nte mme apostle. Ndi emeti enyịn̄ apostle ndomokiet? Anie ye anie ke eti? Enyịn̄ mmọ edi Peter, Andrew, James, John, Philip, Bartholomew, Thomas, Matthew, James eyen Alphaeus, Thaddaeus, Simon, ye Judas Iscariot.

Owo 12 emi ẹkesisan̄a ye enye kpukpru ini. Enye ama ekpep mmọ ndikwọrọ ikọ, onyụn̄ ọdọn̄ mmọ ẹkekwọrọ ikọ. Jehovah ama ọnọ mmọ odudu ẹbịn demon ẹsion̄o mme owo ke idem ẹnyụn̄ ẹkọk mme owo udọn̄ọ.

Jesus ekesikot mmọ mme ufan onyụn̄ enịm ke mmọ ẹyenam  se imọ iyomde. Kpa ye oro mme Pharisee ẹkedade mmọ nte mbon emi mîdiọn̄ọke n̄wed mînyụn̄ idịghe n̄kpọ ndomokiet, Jesus ama ekpep mmọ nte mmọ ẹdinamde utom mmọ. Mmọ ẹyedu ye Jesus ke ini enye enen̄erede oyom mmọ, utọ nte ke ini ẹkeyomde ndiwot enye ye ke enye ama ekeset. Ediwak mmọ ẹketo Galilee ukem nte Jesus. Ndusụk mmọ ẹma ẹdọ n̄wan.

Mme apostle ẹma ẹsinam ndudue. Ndusụk ini mmọ ẹma ẹsinana ime, ẹtịn̄ se mîkpetịn̄ke, ẹnam se mîkpanamke, ẹnyụn̄ ẹfan̄a ke otu idemmọ m̀mê anie ikpon itie ikan. Edi mmọ ẹkedi nti owo, ẹma ẹnyụn̄ ẹma Jehovah. Mmọ ke Jesus akada ọtọn̄ọ esop Christian onyụn̄ ọnọ akpan utom ẹnam ke ini enye afiakde ọnyọn̄ heaven.