Jesus ekedi isọn̄ man edikwọrọ eti mbụk Obio Ubọn̄ Abasi. Edi Jehovah ama ọnọ Jesus edisana spirit anam nsio nsio utịben̄kpọ man ẹkụt se Jesus edinamde enye ama akara. Idụhe udọn̄ọ emi enye mîkekemeke ndikọk. Itie ekededi emi enye akakade, mbon udọn̄ọ ẹma ẹdi, enye ama onyụn̄ anam idem ọsọn̄ kpukpru mmọ. Enye ama anam nnan ẹkụt usụn̄, inan ẹtịn̄ ikọ, mbụn̄ọ ẹsan̄a isan̄, onyụn̄ osion̄o mme owo demon ke idem. Idem ama esisọn̄ mbon udọn̄ọ ke ini mmọ ẹtụkde utọn̄ ọfọn̄ esie. Mme owo ẹma ẹsitiene enye ẹka itie ekededi emi enye akade. Edi enye ikesibịnke mmọ, idem ke ini enye okoyomde ndiduọk odudu.

Isan̄ kiet mme owo ẹma ẹda owo akpauben̄ edi ufọk emi Jesus odude. Edi ẹma ẹwak do tutu mmọ ikwe ufan̄ idụk esịtufọk. Ntre mmọ ẹma ẹyarade ọkọm ufọk oro ekpri, ẹda do ẹsụhọde ete oro ẹsịn ke esịtufọk ẹnọ Jesus. Jesus ama ọdọhọ ete oro ete: ‘Daha da san̄a.’ Idem ama akpa mme owo ini ete oro adahade ada.

Isan̄ en̄wen, nte Jesus osụk asan̄ade odụk obio kiet, mbon akpamfia duop ẹma ẹda nsannsan ẹfiori ẹte: ‘Jesus, tua nnyịn mbọm!’ Ini oro owo ikesiyakke mbon akpamfia ẹsan̄a ẹkpere mbon en̄wen. Jesus ama ọdọhọ mmọ ẹka temple ẹkewụt oku idem. Ibet Jehovah ọkọdọhọ owo akpamfia anam ntre ke ini udọn̄ọ esie okụrede. Nte mmọ ẹsụk ẹkade ke  usụn̄, udọn̄ọ ama okụre mmọ. Edi owo mmọ kiet kpọt akafiak edikọm Jesus onyụn̄ otoro Abasi.

Enyene mma kiet emi ọkọdọn̄ọde ofụri isua 12 onyụn̄ oyomde usọbọ ke mbrenyịn. Enye ama asan̄a edem edem odụk otuowo okotụk utọn̄ ọfọn̄ Jesus. Udọn̄ọ esie ama okụre kpa idahaoro. Ndondo oro, Jesus ama obụp m̀mê anie otụk imọ. Idem ama enyek mma oro, edi enye ama ọwọrọ editịn̄ akpanikọ. Jesus ama ọdọn̄ enye esịt ete: ‘Eyenan̄wan, nyọn̄ ke emem.’

Akwaowo kiet emi ekekerede Jairus ama edikpe Jesus ubọk ete: ‘Di ufọk mi! Ekpri adiaha mi ọdọn̄ọ n̄kpa n̄kpa.’ Edi eyen oro ama akpa mbemiso Jesus esịmde ufọk Jairus. Ini Jesus esịmde do, enye ama okụt nte ediwak owo ẹtuade; mmọ ẹkedi ndidọn̄ Jairus ye n̄wan esie esịt. Enye ama ọdọhọ mmọ ete: ‘Ẹkûtua; eyen oro edede.’ Ekem enye ama omụm eyen oro ubọk onyụn̄ ọdọhọ ete: ‘Eyenan̄wan, daha da!’ Eyen oro ama adaha etetie inikiet inikiet, Jesus onyụn̄ ọdọhọ ete ye eka esie ete ẹnọ enye n̄kpọ adia. Ndi ọmọdiọn̄ọ nte esịt ekenemde ete ye eka eyen oro?