Kere ban̄a uwụtn̄kpọ emi ise: Alex ifiọkke aba se ekpenịmde. Enye enịm ke Abasi odu, ke enye okonyụn̄ obot mme n̄kpọ. Edi mfịn ke ubet ukpepn̄kpọ, titia emi esikpepde mmọ n̄kpọ aban̄a mme odu-uwem n̄kpọ ọsọn̄ọ etịn̄ ke n̄kpọ ẹkefoforo, ke ndụn̄ọde oro ntaifiọk ẹnamde ẹnen̄ede owụt ke emi edi akpanikọ. Alex iyomke ẹda imọ nte ndisịme. Ntre enye ọdọhọ ke esịt esie ete: ‘Edieke ntaifiọk ẹdọhọde ke n̄kpọ ẹkefoforo, ami ndi anie ndifan̄a n̄kpọ ye mmọ?’

Nso ke afo akpanam edieke ekpedide Alex, ndi ekpenịm ke n̄kpọ ẹkefoforo ke ntak se ntaifiọk ẹdọhọde?

Mbon oro ẹnịmde ke Abasi okobot n̄kpọ ye mbon oro ẹnịmde ke n̄kpo ẹkefoforo, ẹsisọsọp ẹtịn̄ se mmọ ẹnịmde kpa ye oro mmọ mîfiọkke ntak emi mmọ ẹnịmde.

• Ndusụk owo ẹnịm ke Abasi okobot n̄kpọ koro se ẹsikpepde mmọ ke ufọkabasi edi oro.

• Ndusụk owo ẹnịm ke n̄kpọ ẹkefoforo sia se ẹsikpepde mmọ ke ufọkn̄wed edi oro.

Bible ọdọhọ ke “kpukpru ufọk ẹnyene andibọp, edi enye emi ọkọbọpde kpukpru n̄kpọ edi Abasi.” (Mme Hebrew 3:4) Ndi se itien̄wed emi etịn̄de edi akpanikọ?

ẸDỌHỌ: Ke ata ekpri n̄kpọ akakabade ekondo.

ẸDỌHỌ: Ke unam okoforo owo.

ẸDỌHỌ: Ke ndụn̄ọde oro ntaifiọk ẹnamde enen̄ede owụt ke n̄kpọ ẹkefoforo.

“Edieke okpokụtde ata ediye ufọk ke akai, ndi ọkpọdọhọ: ‘Oh se nte nsio nsio eto ẹduọde ẹkabade ediye ufọk emi!’ Ukpûdọhọke! Sia ọmọdiọn̄ọ ke utọ n̄kpọ oro ikemeke-keme nditịbe. Ntak ndien emi owo ekpenịmde ke kpukpru n̄kpọ ke ekondo ẹkedidu ke mbuari?”—Julia.

“Ndi ekpenịm edieke owo ọkpọdọhọde fi ke ini imọ ikakade itie umịn̄n̄wed, masịn umịn̄n̄wed ama otop obomo osio mmọn̄n̄wed ọduọk ke ibibene ye ceiling ufọk ndien mmọ ẹkabade n̄wed ukabadeikọ.”—Gwen.

Bible ọdọhọ fi ‘odụn̄ọde kpukpru n̄kpọ’ ese. (1 Thessalonica 5:21) Emi ọwọrọ ke ikpanaha enịm ke Abasi odu sia:

• SE AFO EKEREDE EDI ORO (N̄kere ke ana edi Abasi odu)

• MBON EN̄WEN ẸNỊM (Ndu ye mbon emi ẹnịmde ke Abasi odu)

• SE ẸDỌHỌDE FI ENỊM EDI ORO (Ete ye eka mi ẹkekpep mi ke Abasi odu—Ntre nnam didie)

Akpana enyene ntak emi anamde enịm ke Abasi odu.

“Ke ini titia nnyịn esikpepde nte idem nnyịn etiede, emi esinam nnen̄ede nnịm ke Abasi odu. Kpukpru ndido idem nnyịn, ọkpọkọm ekpri didie enyene utom. Ediwak ini, mmọ ẹsinam utom mmọ nnyịn ifiọkke. Idem owo enen̄ede enyene ndyọ!” —Teresa.

“Ke ini n̄kụtde ikpọ ufọkenyọn̄, moto, m̀mê nsụn̄ikan̄, mmesibụp idemmi nte: ‘Anie akanam mme n̄kpọ emi?’ Ke uwụtn̄kpọ, owo emi mîdiọn̄ọke n̄kpọ ikemeke ndinam moto, sia ediwak n̄kpri n̄kpri n̄kpọ ẹdu ke moto emi edide edieke owo mînamke mmọ ọfọn, moto oro idiwatke. Edieke edide owo akanam moto, ọwọrọ enyene owo emi okobotde nnyịn n̄ko.”—Richard.

“Nte nnen̄erede n̄kpep n̄kpọ mban̄a n̄kpọ-obot, ntre ke ntetetịm n̄kụt ke edi nsu ndidọhọ ke n̄kpọ ẹkefoforo. . . . Ami n̄kere ke emem utom ndinịm ke Abasi okobot n̄kpọ akan ndinịm ke n̄kpọ ẹkefoforo.”—Anthony.

Kpa ye ofụri ndụn̄ọde oro ntaifiọk ẹnamde ndiwụt ke n̄kpọ ẹkefoforo, kpukpru mmọ ẹtịn̄ nsio nsio n̄kpọ ẹban̄a n̄kpọ emi. Edieke ntaifiọk ke idemmọ mînyeneke ikọ inua kiet ke n̄kpọ emi, ndi ọkpọfọn afo enịm se mmọ ẹtịn̄de??