Ke angel Gabriel ama ọkọdọhọ Mary ke enye ayaman eyen erenowo emi edikerede Jesus, emi edinyụn̄ edide Edidem ke nsinsi, Mary obụp enye ete: “Emi edikeme didie ndisu, ke emi mmenyeneke ebuana ye erenowo?”—Luke 1:34.

Gabriel ọbọrọ enye ete: “Edisana spirit oyodoro fi ke idem, odudu Ata Edikon̄ oyonyụn̄ ofụk fi. Ke ntak oro n̄ko eyen oro edimanade edikere edisana, Eyen Abasi.”—Luke 1:35.

Gabriel etịn̄ n̄kpọ oro anamde Mary enịm ikọ esie ete: “Sese! Elizabeth iman fo n̄ko omoyomo eyeneren ke ini usọn̄ esie, ndien emi edi ọyọhọ ọfiọn̄ itiokiet, kpa n̄wan emi ẹkekotde ada; koro idụhe ikọ baba kiet eke otode Abasi eke mîditreke ndisu.”—Luke 1:36, 37.

Mary enịm se Gabriel etịn̄de, onyụn̄ ọdọhọ ete: “Sese! Ofụn an̄wan Jehovah! Akpakam osu ọnọ mi nte uyo fo edide.”—Luke 1:38.

Ke ndondo oro Gabriel ọnyọn̄de, Mary ọsọsọp eben̄e idem ekese Elizabeth emi odụn̄de ye Zechariah ebe esie ke obot obot ikpehe Judea emi ekperede Jerusalem. Ekeme ndidi usen ita m̀mê inan̄ ẹbe mbemiso Mary oto Nazareth ekesịm ufọk mme Elizabeth.

Mary edi edisịm ufọk Zechariah, ebe odụk onyụn̄ ọkọm Elizabeth iman esie. Ke ini Elizabeth okopde ekọm Mary, edisana spirit anam enye ọdọhọ Mary ete: “Ọfọfọn ọnọ fi ke otu iban, onyụn̄ ọfọfọn ọnọ mfri idịbi fo! Ntre nsan̄a didie nnyene utọ ifet emi, eka Ọbọn̄ mi ndidi ndise mi? Koro, sese! uyo ekọm fo okododụk mi utọn̄, nsekeyen ke esịt idịbi mi ọfrọ ye akwa idatesịt.”—Luke 1:42-44.

Mary etịn̄ ikọ oro owụtde nte esịt enemde enye ete: “Ukpọn̄ mi ọnọ Jehovah ubọn̄, spirit mi inyụn̄ itreke ndikop akwa idatesịt ke Abasi Andinyan̄a mi; koro enye emenede enyịn ese usụhọde itie ofụn an̄wan esie. Koro, sese! ọtọn̄ọde ke emi kpukpru emana ẹyedọhọ ke ami mmokop inemesịt; koro Enye emi enyenede odudu amanam ikpọ n̄kpọ ọnọ mi.” N̄kọ omokụt ke okposụkedi oro Mary edimande Messiah, ke enye ikohokede idem, edi ọdọhọ ẹkam ẹtoro Abasi. Enye ama ọdọhọ ete: “Enyịn̄ esie . . . edi edisana; ndien mbọm esie odu ke kpukpru emana ọnọ mmọ eke ẹbakde enye.”—Luke 1:46-50.

Mary aka iso otoro Abasi onyụn̄ etịn̄ prọfesi ete: “Enye amada ubọk esie anam ọkpọsọn̄ n̄kpọ, enye amasuan mbon oro ẹtan̄de idem ke uduak esịt mmọ. Enye omodorode mme enyene-odudu efep ke ebekpo onyụn̄ emenede mme usụhọde owo ke enyọn̄; enye amada nti n̄kpọ oyụhọ mbon ọbiọn̄ onyụn̄ anam mbon inyene ẹnyọn̄ọ ubọk ubọk. Enye aman̄wam Israel asan̄autom esie, man enye eti mbọm, kpa nte enye eketịn̄de ọnọ mme ete ete nnyịn, etịn̄de ọnọ Abraham ye mfri esie, ke nsinsi.”—Luke 1:51-55.

Mary etie ye Elizabeth ke n̄kpọ nte ọfiọn̄ ita onyụn̄ an̄wam enye sia etiede nte idịbi esie aka anyan. Enen̄ede ọfọn nte iban iba emi ẹbakde Abasi mi, emi Abasi an̄wamde ẹyomo, ẹdude kiet. Esịt enem mmọ etieti!

N̄kọ omokụt nte ẹkponode Jesus idem mbemiso enye amana. Elizabeth okokot enye “Ọbọn̄ mi,” ndien eyen oro odude ke idịbi esie ama “ọfrọ ye akwa idatesịt” ke ini Mary ọkọkọmde Elizabeth. Nte ikade iso ikot n̄wed emi, iyokụt ke ediwak owo ikanamke n̄kpọ ke ukem usụn̄ emi ye Mary ye eyen emi enye edimande.