Jesus ọnọnọ mme mbet esie uwụtn̄kpọ emi aban̄ade ntak emi mmọ ẹkpekọbọde ke akam. (Luke 11:5-13) Etie nte enye odu idahaemi ke Samaria mîdịghe edi ke Galilee, ndien enye afiak etịn̄ ntak emi anade ẹkọbọ ke akam. Uwụtn̄kpọ emi ke enye ada anam oro:

“Ebiereikpe emi mîbakke Abasi mînyụn̄ ikponoke owo okodu ke obio kiet. Edi ebeakpa kiet ama odu ke obio oro onyụn̄ esika ebịne enye ediwak ini, ete, ‘Biere ikpe enen ke ufọt mi ye asua emi enyenede ikpe ye ami.’ Edi, enye inyịmeke ke ndusụk ini, ekem enye ọdọhọ ke esịt esie ete, ‘Okposụkedi nte mmembakke Abasi, mmennyụn̄ n̄kponoke owo, edi, sia ebeakpa emi afịnade mi ndien ndien, nyebiere edinen ikpe nnọ enye, man enye okûdi mi aba edifịna mi tutu n̄kpa mba.’”—Luke 18:2-5.

Jesus aka iso ọdọhọ ete: “Ẹkop se ukwan̄ ebiereikpe oro ọkọdọhọde! Ke akpanikọ, ndien, nte Abasi idinamke ẹbiere edinen ikpe ẹnọ ndimek ikọt esie emi ẹsemede ẹnọ enye uwemeyo ye okoneyo, idem okposụkedi enye enyenede anyanime ye mmọ?” (Luke 18:6, 7) Nso ke Jesus ekpep idahaoro aban̄a Ete esie?

Ikọ Jesus iwọrọke nte ke Jehovah Abasi etie nte idiọk ebiereikpe oro. Jesus akam emen se idiọk ebiereikpe emi anamde odomo ye se Abasi ekemede ndinam: Edieke idiọk ebiereikpe edinamde n̄kpọ oro ẹyịrede ẹben̄e enye, idụhe se idinamde Abasi etre ndinam n̄kpọ mban̄a eben̄e nnyịn. Jehovah ọfọn onyụn̄ enen, ndien enye eyeyere nnyịn edieke nnyịn mîyakke idem emem nnyịn. Se Jesus afiakde etịn̄ adian do anam nnyịn idiọn̄ọ emi: “Ndọhọ mbufo nte, [Abasi] ayawara anam ẹbiere edinen ikpe ẹnọ mmọ.”—Luke 18:8.

Owo isiwakke ndibiere edinen ikpe nnọ mme ubuene ye mme usụhọde owo, edi ẹsikam ẹda ye ikpọ owo ye mme imọ owo. Abasi isinamke n̄kpọ ntem. Ke ini ekemde, enye ọyọnọ mme idiọkowo ufen onyụn̄ ọnọ mme asan̄autom esie uwem nsinsi.

Mmanie ẹnyene mbuọtidem nte ebeakpa oro? Owo ifan̄ inen̄ede inịm ke akpanikọ ke Abasi “ayawara anam ẹbiere edinen ikpe ẹnọ mmọ”? Idahaemi ke Jesus osụk okụre ndinọ uwụtn̄kpọ emi ekpepde nnyịn ndikọbọ ke akam. Ekem enye obụp mbụme aban̄a owo ndinyene mbuọtidem ke akam esinyene odudu ete: “Ke ini Eyen owo edidide, nte enye ayakam okụt orụk mbuọtidem emi ke isọn̄?” (Luke 18:8) Ikọ Jesus ọwọrọ ke ekeme ndidi ediwak owo idinyeneke utọ mbuọtidem emi ke ini Christ edide edisịm.

Ndusụk mbon emi ẹkopde ikọ Jesus ẹkere ke imenyene mbuọtidem ikem. Mmọ ẹbuọt idem ke idem mmọ ẹnyụn̄ ẹda idem ke edinen ke adan̄aemi mîdaha mbon en̄wen ke n̄kpọ. Jesus ọnọ uwụtn̄kpọ enye emi aban̄a mmọ:

“Owo iba ẹkedọk ẹka temple ndibọn̄ akam, kiet edi Pharisee enye eken edi ọbọ a-tax. Pharisee ada ọbọn̄ akam emi ke esịt esie ete, ‘O Abasi, mmọkọm fi koro mmentiehe nte mmọ en̄wen, mbon n̄kanubọk, mme anam ukwan̄ido, mme esịn efịbe, m̀mê idem nte ọbọ a-tax emi. Ntetre udia utịm ikaba ke  urua, nsosio ubak kiet ke itie duop ke kpukpru se nnyenede nnọ.’”—Luke 18:10-12.

Mme Pharisee ẹsima ndida ke mme efak nnam nte idi ata nti owo man mbon en̄wen ẹkpono mmọ. Mmọ ẹsiwak ndinam emi ke Monday ye Thursday oro ẹdide ikpọ usen urua man ediwak owo ẹkpekụt mmọ. Ndien mmọ ẹsisio kpukpru n̄kpri ikọn̄udia kiet ke itie duop ẹnọ. (Luke 11:42) Ọfiọn̄ ifan̄ ko ke edem, mmọ ẹma ẹtịn̄ ikọ emi owụtde nte mmọ ẹdade mme usụhọde owo ke mbio ẹte: “Otuowo emi mîfiọkke Ibet mi [nte mme Pharisee ẹkerede] ẹdi mbon oro ẹma ẹkesụn̄i.”—John 7:49.

Jesus aka iso ke uwụtn̄kpọ esie ete: “Edi ọbọ a-tax emi adade nsannsan inyịmeke ndikam mmenede enyịn esie nse enyọn̄, edi ọdọdiọn̄ amia ubọk ke ikpanesịt esie, ete, ‘O Abasi, tua mi, anamidiọk, mbọm.’” Ọbọ a-tax oro ọdiọn̄ọ ke imọ idi anamidiọk, ntem Jesus ọdọhọ ete: “Ndọhọ mbufo nte, Owo emi osụhọde ọnyọn̄ ufọk esie nte edinen owo akan owo enye eken; koro owo eke emenerede idemesie ke enyọn̄ ẹyesụhọde enye ẹnịm, edi owo eke osụhọrede idemesie ẹyemenede enye.”—Luke 18:13, 14.

Ntem Jesus etịn̄ in̄wan̄-in̄wan̄ ke oyom ẹsụhọde idem. Ọfọn ẹnọ mme mbet item emi sia mmọ ẹkekponde ke otu mme Pharisee emi ẹdade idem ke edinen ẹnyụn̄ ẹmade ikpọ itie ye uwọrọiso. Ata eti item ke Jesus ọnọ kpukpru mme anditiene enye emi.