Etie nte Jesus osụk odu ke Perea, ke n̄kan̄ edem usiahautịn Akpa Jordan, ke ini enye ọnọde uwụtn̄kpọ okụk drachma ye erọn̄ kiet emi okosopde. Uwụtn̄kpọ mbiba emi ẹkpep nnyịn ndisinem esịt ke ini anamidiọk akabarede esịt onyụn̄ afiakde etiene Abasi. Mme Pharisee ye mme scribe ẹsikụt ndudue ẹnọ Jesus ke ndidụk ndụk ye utọ mbon oro. Edi ndi mbon nsụkuyo emi ẹkpep n̄kpọ ndomokiet ke uwụtn̄kpọ Jesus iba emi? Ndi mmọ ẹdiọn̄ọ nte Ete nnyịn eke heaven adade mme anamidiọk emi ẹkabarede esịt? Idahaemi Jesus ọnọ uwụtn̄kpọ emi anamde owo ekere n̄kpọ, emi onyụn̄ ekpepde owo akpan n̄kpọ emi.

Uwụtn̄kpọ emi aban̄a ete kiet emi enyenede nditọ irenowo iba, ndien udọ esie edi akpan owo ke mbụk emi. Mme Pharisee ye mme scribe ye mbon en̄wen emi ẹkopde se Jesus obụkde emi ẹkeme ndikpep n̄kpọ nto se Jesus etịn̄de aban̄a udọ ete emi. Edi owo ikpefreke se Jesus etịn̄de aban̄a ete ye akpaneka ufan oro, sia imenyene ediwak n̄kpọ ndikpep nto usụn̄ emi mmọ ẹkenamde n̄kpọ. Ntem, nte Jesus ọnọde uwụtn̄kpọ emi, kere ban̄a mmọ mbita ke uwụtn̄kpọ oro.

Jesus ọtọn̄ọ mbụk oro ntem: “Owo kiet ekenyene nditọiren iba. Ndien udọ ọdọhọ ete esie ete, ‘Ete, nọ mi udeme inyene mi.’ Ntem ke enye edeme inyene esie ọnọ mmọ.” (Luke 15:11, 12) Omokụt ke ufan emi idọhọke ẹbahade udeme inyene esie ẹnọ enye sia ete mmọ ama akakpa. Ete mmọ ikpaha kan̄a. Edi eyen emi oyom udeme inyene esie idahaemi man enye ekeme ndida ke idem nnyụn̄ nda inyene esie nnam se enye amama. Ndien nso ke enye ada anam?

Jesus ọdọhọ ete: “Edikem, usen ifan̄ ke oro ebede, udọ atan̄ kpukpru inyene esie adaha aka anyan idụt, ndien do ke enye atahade inyene esie ke ndidu etịme etịme uwem.” (Luke 15:13) Utu ke ndisụhọde ntie ke ufọk ye ete esie emi esede aban̄a onyụn̄ ọbọkde nditọ esie, eyen emi obiom inyene esie ọwọrọ aka idụt en̄wen. Do ke enye aka okodu anam kpukpru etịme etịme n̄kpọ emi ọdọn̄de enye, onyụn̄ ama iban. Ekem uwem ọtọn̄ọ ndisọn̄ ye enye. Jesus aka iso ke mbụk emi ete:

 “Ke ini enye ama akatahade kpukpru ama, ọkpọsọn̄ akan̄ etịbe ke ofụri idụt oro, enye onyụn̄ ọtọn̄ọ ndidu ke unana. Enye akam aka akadian idem ye kiet ke otu nditọ idụt oro, enye oro onyụn̄ ọdọn̄ enye aka in̄wan̄ esie ọkọbọk mme edi. Enye esinyụn̄ oyom ndidia mfri eto carob emi mme edi ẹdiade, baba owo kiet inyụn̄ inọhọ enye n̄kpọ.”—Luke 15:14-16.

Ibet Abasi akasiak edi esịn ke otu unam emi ẹdehede, edi ufan emi aka akanam utom ubọk edi. Biọn̄ okpowot enye, oro anam enye oyom ndidia udia emi ẹkesinọde mme edi emi enye ọkọbọkde. ‘Enyịn edi edin̄wan̄a’ eyen emi ke ini uwem osụk ọsọn̄de ye enye. Nso ke enye anam? Enye ọdọhọ ete: “Se adan̄a ediwak mbonutom ete mi emi ẹnyenede udia barasuene, edi ami mi mmọn̄ ndikpa biọn̄! Nyadaha mbịne ete mi n̄kọdọhọ enye nte: ‘Ete, mmanam idiọkn̄kpọ ndian heaven nnyụn̄ nnam ndian fi. Ndotke aba ndikere eyen fo. Da mi nte kiet ke otu mbonutom fo.’” Ntre enye adaha ke enyọn̄ etiene ete esie.—Luke 15:17-20.

Ete esie edinam n̄kpọ didie? Ndi enye ọyọtọhọ onyụn̄ ayat esịt ye enye ke ndikọwọrọ n̄kpọn̄ ufọk? Ndi ete esie ayasua onyụn̄ etre ndidara eyen emi? Edieke afo ekpedide enye, akpanam n̄kpọ didie? Nso ke akpanam edieke eyen oro ekpedide eyen fo?

Jesus etịn̄ nte ete anamde n̄kpọ ete: “Ke adan̄aemi [eyen oro] odude kan̄a anyan usụn̄, ete esie ada okụt enye, mbọm onyụn̄ anam enye, ndien enye efehe akawan̄a enye ke itọn̄ onyụn̄ etịm enye inua ima ima.” (Luke 15:20) Idem ọkpọkọm ete emi ama okop idiọk uwem emi eyen esie odude ke anyan idụt, enye osụk adadara eyen emi ke ndifiak nnyọn̄ ndi. Ndi mme adaiso mme Jew emi ẹdọhọde ke imọdiọn̄ọ inyụn̄ ituak ibuot inọ Jehovah ẹkụt nte Ete nnyịn eke heaven adade mme anamidiọk oro ẹkabarede esịt? Ndi mmọ ẹkụt n̄ko ke Jesus esidara mme anamidiọk emi ẹkabarede esịt kpasụk ntre?

Ete emi enyene mbufiọk, enye okụt nte eyen emi ofụhọde onyụn̄ ada oro ọdiọn̄ọ ke enye atua n̄kpọfiọk onyụn̄ akabade esịt. Edi enye ete ndibem iso mfehe n̄kawan̄a enye ke itọn̄ anam enen̄ede emem utom ọnọ eyen emi nditịn̄ idiọkn̄kpọ esie. Jesus ọdọhọ ete: “Edi eyen ọdọhọ enye ete, ‘Ete, mmanam idiọkn̄kpọ ndian heaven nnyụn̄ nnam ndian fi. Ndotke aba ndikere eyen fo.’”—Luke 15:21.

Ete esie ọdọhọ ifịn esie ete: “Ẹwara! ẹda ewụra eke ọfọnde akan ẹdisịne enye, ẹnyụn̄ ẹsịne enye n̄kpanuen ke ubọk ye ikpaukot ke ukot. Ẹnyụn̄ ẹda eyenenan̄ eke enyenede isek ẹdiwot, ẹyak nnyịn idia inyụn̄ idara, koro eyen mi emi ama akpa onyụn̄ ọtọn̄ọ ntak odu uwem; enye ama osop ndien imokụt enye.” Mmọ ẹnyụn̄ ẹtọn̄ọ “ndidara.”—Luke 15:22-24.

Akpan ete oro osụk odu ke in̄wan̄. Jesus etịn̄ ntem aban̄a enye: “Nte enye asan̄ade ekpere ufọk, enye okop mbre ikwọ ye unek. Ntre enye okot kiet ke otu mme asan̄autom obụp se mme n̄kpọ emi ẹwọrọde. Enye oro ọbọrọ enye ete, ‘Eyenuka ọmọnyọn̄ edi, ndien ete fo owot eyenenan̄ eke enyenede isek, koro okụtde enye ye nsọn̄idem.’ Edi enye ayat esịt inyụn̄ inyịmeke ndidụk ufọk. Ekem ete esie ọwọrọ edi edikpe enye ubọk. Enye ọbọrọ ete esie ete, ‘Sese mmodụk ufụn nnọ fi adan̄a ediwak isua emi, akanam nnyụn̄ mbiatke ewụhọ fo, edi akananam afo  unọhọ mi ndomo eyen ebot kiet ete nda ndara ye mme ufan mi. Edi ndondo oro eyen fo emi akataharede inyene fo ye mme akpara ọnyọn̄de edi, afo owot eyenenan̄ eke enyenede isek ọnọ enye.’”—Luke 15:25-30.

Mmanie ẹbiet akpan ete emi, oro ẹsikụtde ndudue ẹnọ Jesus ke nditua mme usụhọde owo ye mme anamidiọk mbọm nnyụn̄ n̄n̄wam mmọ? Mme scribe ye mme Pharisee. Mmọ ndisikụt ndudue nnọ Jesus ke ndidụk nsan̄a ye mme anamidiọk anam Jesus ọnọ uwụtn̄kpọ emi. Ana owo ekededi emi mîsimaha Abasi atua mme idiọkowo mbọm ekpep n̄kpọ oto uwụtn̄kpọ emi.

Akpatre n̄kpọ emi Jesus etịn̄de ke uwụtn̄kpọ emi aban̄a nte ete oro ekpede akpan esie ubọk ete: “Eyen, afo odu ye ami kpukpru ini, kpukpru se idide okịm ẹdi okwo; edi nnyịn inyene ndidara nnyụn̄ nnem esịt, koro eyenuka emi ama akpa ekem edidu uwem, enye ama osop ndien imokụt enye.”—Luke 15:31, 32.

Jesus itịn̄ke se akpan ete emi anamde ke oro ebede. Edi ke Jesus ama akakpa ẹnyụn̄ ẹnam enye eset, “akwa otu mme oku [ẹma] ẹtọn̄ọ ndisụk ibuot nnọ akpanikọ.” (Utom 6:7) Ekeme ndidi emi ama esịne ndusụk mbon emi ẹkekopde Jesus ọnọde okopodudu uwụtn̄kpọ emi aban̄ade eyen emi okosopde mi. Ke akpanikọ, enyịn ama an̄wan̄a mmọ, mmọ ẹma ẹnyụn̄ ẹkeme ndikabade esịt mfiak ntiene Abasi.

Ọtọn̄ọde ke usen oro, mme mbet Jesus ẹma ẹkeme ndikpep, ẹkenyụn̄ ẹnyene ndikpep n̄kpọ nto uwụtn̄kpọ emi. Akpa ukpepn̄kpọ edi nte ke enen̄ede ọfọn ndisọn̄ọ nsịne ke otu ikọt Abasi ye edima Ete nnyịn emi amade onyụn̄ esede aban̄a nnyịn. Ifọnke ndikpọn̄ esop n̄ka mbịne se idude ke ererimbot emi onyụn̄ etiede nte “anyan idụt.”

N̄kpọ en̄wen emi ikpepde edi nte ke edieke owo nnyịn ndomokiet ọkpọn̄de esop Abasi, ọfọn isụhọde idem ifiak inyọn̄ ibịne Ete nnyịn man enye afiak ama nnyịn.

N̄kpọ efen emi ikemede ndikpep ke uwụtn̄kpọ emi edi nte ke ete ama enyịme nditua mbọm nnyụn̄ mfen nnọ, edi akpaneka ama ayat esịt inyụn̄ imaha ndifen nnọ eyeneka esie ke ndikọkpọn̄ ufọk. Nte an̄wan̄ade, ana ikọt Abasi ẹsifen ẹnọ ẹnyụn̄ ẹdara owo ekededi oro ọkọkpọn̄de esop, edi oro akabarede esịt onyụn̄ afiak ọnyọn̄ edi ‘ufọk Ete esie.’ Ẹyak idara ke eyeneka nnyịn oro ‘akakpade afiak odu uwem’ ye nte ke ẹfiak ẹkụt eyeneka nnyịn ‘emi okosopde.’