ẸMA ẹbahade Israel ke ini emi Solomon ọkọkpọn̄de utuakibuot akpanikọ, kpa nte Jehovah ọkọdọhọde. Rehoboam eyen Solomon, emi akadade itie ete esie nte edidem ama ọsọn̄ ido akakaha. Ndien emi ama anam esien Israel duop ẹyat esịt ẹkesiak obio ubọn̄ edem edere. Esien iba ẹma ẹsọn̄ọ ẹda ye edidem emi eketiede ke ebekpo David ke Jerusalem, mmọ ẹkedi obio ubọn̄ edem usụk ke Judah.

Obio ubọn̄ iba emi ẹma ẹnyene ata ediwak mfịna, akpan akpan ke ntak emi ndidem mmọ mîkenyeneke mbuọtidem, ẹkenyụn̄ ẹsọn̄de ibuot. N̄kpọ ama ọdiọk ye obio ubọn̄ esien duop ke Israel akan eke esien iba ke Judah, sia ndidem mmọ ẹkenamde mme owo ẹkpono ndem. Kpa ye ofụri ikpọ utịben̄kpọ oro mme utọ prọfet nte Elijah ye Elisha ẹkenamde—mmọ mbiba ẹma ẹkam ẹnam mme akpan̄kpa ẹset—nditọ Israel ẹkesụk ẹsesịn idem ẹnam idiọk. Ke akpatre, Abasi ama ayak mbon Assyria ẹsobo obio ubọn̄ edem edere oro.

Obio ubọn̄ edem usụk oro okodude ke Judah ama osụk odu ebe isua ikie ke ẹma ẹkesobo obio ubọn̄ Israel, edi Abasi ama osobo enye n̄ko. Ndidem Judah ifan̄ kpọt ẹkedomo ndinam se mme prọfet Abasi ẹketịn̄de, ẹnyụn̄ ẹdomo ndinam idụt oro ẹfiak ẹbịne Jehovah. Ke uwụtn̄kpọ, Edidem Josiah ama ọtọn̄ọ ndision̄o ndisọi n̄kpọ oro ẹkesidade ẹkpono ndem efep ke Judah onyụn̄ afiak ọdiọn̄ temple Jehovah. Ke ini ẹkekụtde Ibet oro Abasi ọkọnọde Moses ada ọsọk nditọ Israel, emi ama enen̄ede otụk Josiah, anam enye enen̄ede esịn idem ke se enye akanamde.

Edi n̄kpọ mfụhọ nditịn̄ nte ke ndidem oro ẹkekarade ke Josiah ama akakpa iketieneke eti uwụtn̄kpọ Josiah. Ntre, Jehovah ama ayak mbon Babylon ẹkan Judah, ẹnyụn̄ ẹsobo Jerusalem ye temple esie. Ẹma ẹtan̄ mbon oro ẹkebọhọde ekọn̄ oro ẹka ntan̄mfep ke Babylon. Abasi ama etetịn̄ ete ke mmọ ẹdidu ke ntan̄mfep oro isua 70. Judah akana ndon ke ofụri isua oro tutu mmọ ẹnyọn̄ ntan̄mfep ẹdi, nte Abasi ọkọdọhọde.

Edi edidem ndomokiet efen emi otode ubon David idikarake tutu Andifak emi ẹken̄wọn̄ọde, kpa Messiah, edi. Se ata ediwak ke otu ndidem oro ẹkekarade ke Jerusalem ẹkenamde ama owụt ke anana-mfọnmma owo ndomokiet idotke ndikara. Messiah kpọt odot ndikara mme owo. Ntak edi oro Jehovah ọkọdọhọde akpatre edidem oro eketiede ke ebekpo David ete: “Ẹyarade anyanya, . . . tutu enye emi edikpede ikpe edi; ndien nyada nnọ enye.”—Ezekiel 21:26, 27.

—Ẹda ẹto 1 ye 2 Ndidem; 2 Chronicle ibuot 10 esịm 36; Jeremiah 25:8-11.