IKPEHE 14
Abasi Ada Mme Prọfet Esie Etịn̄ Ikọ
Jehovah emek mme prọfet man mmọ ẹnọ mme owo etop ẹban̄a ubiereikpe, edisana utuakibuot, ye edidi Messiah
KE EYO ndidem Israel ye Judah, ama odu otu irenowo oro ẹkedide mme prọfet. Mmọ ẹma ẹnyene ata mbuọtidem ye uko ẹnyụn̄ ẹtan̄a etop Abasi. Kere ban̄a akpan etop inan̄ oro mme prọfet Abasi ẹketan̄ade.
1. Nsobo Jerusalem. Ata anyan ini ke edem, mme prọfet Abasi—akpan akpan Isaiah ye Jeremiah—ẹma ẹtọn̄ọ ndidụri mme owo utọn̄ mban̄a nte ẹdisobode Jerusalem ye nte enye edinade ndon. Mmọ ẹma ẹtịn̄ ntak emi Abasi ayatde esịt ye obio oro. Mme andidụn̄ Jerusalem ẹkenam nte idi ikọt Jehovah, edi emi ekedi abian̄a sia mmọ ẹkekponode ndem ẹnyụn̄ ẹnamde mbubiam ido ye afai.—2 Ndidem 21:10-15; Isaiah 3:1-8, 16-26; Jeremiah 2:1-3:13.
2. Ẹfiak ẹtọn̄ọ edisana utuakibuot. Ẹyesana ikọt Abasi ẹyak ke Babylon ke mmọ ẹma ẹkedu ke ntan̄mfep isua 70. Mmọ ẹyefiak ẹnyọn̄ obio emana mmọ oro akanade ndon ẹnyụn̄ ẹfiak ẹbọp temple Jehovah do ke Jerusalem. (Jeremiah 46:27; Amos 9:13-15) N̄kpọ nte isua 200 mbemiso emi, Isaiah ama etịn̄ ke Cyrus edikan Babylon onyụn̄ anam ikọt Abasi ẹfiak ẹnyọn̄ ẹketọn̄ọ edisana utuakibuot. Isaiah ama onyụn̄ etịn̄ se Cyrus edinamde man akan Babylon.—Isaiah 44:24–45:3.
3. Ini oro Messiah edidide ye mme n̄kpọ emi ẹdiwọrọde enye. Messiah edimana ke Bethlehem. (Micah 5:2) Enye oyosụhọde idem awat ke ass odụk Jerusalem. (Zechariah 9:9) Kpa ye oro enye edinyenede sụn̄sụn̄ ido onyụn̄ ọfọn ido, ediwak owo idimaha enye, ẹyenyụn̄ ẹsịn enye. (Isaiah 42:1-3; 53:1, 3) Ẹyewot enye ke ata ibak ibak usụn̄. Edi ndi oro edidi utịt uwem esie? Ihih, sia akana uwa esie anam ẹfen idiọkn̄kpọ ediwak owo. (Isaiah 53:4, 5, 9-12) Edieke Jesus mîsetke ke n̄kpa, owo idikemeke ndinam emi.
4. Ini Messiah edikarade isọn̄. Mme anana-mfọnmma owo ikemeke ndikara idemmọ ke emem, edi ẹdikot Edidem Messiah emi Ọbọn̄ Emem. (Isaiah 9:6, 7; Jeremiah 10:23) Ke ini ukara esie, kpukpru owo ẹdidu ke emem ndien mme unam n̄ko ẹditie emem emem. (Isaiah 11:3-7) Udọn̄ọ ididụhe aba. (Isaiah 33:24) Abasi eyemen n̄kpa ke nsinsi. (Isaiah 25:8) Ke ini ukara Messiah, mbon emi ẹkekpade ẹyeset ẹdidu uwem ke isọn̄.—Daniel 12:13.
—Ẹda ẹto n̄wed Isaiah, Jeremiah, Daniel, Amos, Micah, ye Zechariah.
