UKPEPN̄KPỌ 26
Nso Inam Ndiọi N̄kpọ ye Ufen Ọyọhọ Ererimbot Emi?
N̄kpọ ama etịbe mme owo ẹsiyom ndidiọn̄ọ ntak. Enem nnyịn nte Bible anamde nnyịn idiọn̄ọ ntak emi ediwak n̄kpọ esitịbede!
1. Didie ke Satan akanam ndiọi n̄kpọ ọtọn̄ọ ke ererimbot?
Satan, emi ẹsinyụn̄ ẹkotde Devil, ọkọtọn̄ọ n̄sọn̄ibuot ye Abasi. Enye ama edinam Adam ye Eve, akpa owo iba emi Abasi okobotde, ẹtiene ẹsọn̄ ibuot ye Abasi sia enye okoyom mbon emi enye edikarade. Enye ama ada nsu abian̄a Eve. (Genesis 3:1-5) Nsu esie ọkọwọrọ ke mme owo ẹyenen̄ede ẹkop inemesịt ẹkpesọn̄ ibuot ye Abasi. Satan ama anam Eve ekere ke enyene eti n̄kpọ emi Abasi mîyomke Eve enyene; enye ama osu akpa nsu ete ke Eve idikpaha. Imosụk ise Bible okotde Satan “osu nsu ye ete nsu”!—John 8:44.
2. Nso ke Adam ye Eve ẹkenyịme ndinam?
Jehovah ama ọnọ Adam ye Eve kpukpru n̄kpọ. Enye ama ọdọhọ mmọ ẹdia kpukpru n̄kpọ ke In̄wan̄ Eden ibọhọke mfri eto kiet kpọt. (Genesis 2:15-17) Edi mmọ ẹma ẹsọn̄ esịt ẹdia mfri eto oro. Eve ama “ekịbi mfri esie adia.” Ekem, Adam ama etiene adia. (Genesis 3:6) Mmọ mbiba ẹma ẹsọn̄ ibuot ye Abasi. Ikpọkọsọn̄ke mmọ ndinam nnennen n̄kpọ sia mmọ ẹma ẹfọn ẹma. Edi mmọ ẹma ẹsọn̄ esịt ẹsọn̄ ibuot ye Abasi, ẹnam idiọkn̄kpọ, ẹnyụn̄ ẹwụt ke mmimọ iyomke Abasi akara mmimọ. Se ikanamde mmọ ẹtọn̄ọ ẹbọ ufen edi oro.—Genesis 3:16-19.
3. Nso ke idiọkn̄kpọ Adam ye Eve anam nnyịn?
Ke Adam ye Eve ẹma ẹkesọn̄ ibuot ye Abasi, idiọkn̄kpọ ama odụk mmọ idem. Ndien idiọkn̄kpọ oro ama ebe esịm kpukpru owo. Bible ọdọhọ ke “idiọkn̄kpọ [okoto] owo kiet [Adam] odụk ererimbot, n̄kpa onyụn̄ [oto] ke idiọkn̄kpọ oro odụk, ndien n̄kpa atara esịm kpukpru owo.”—Rome 5:12.
Se inamde nnyịn mme owo ibọ ufen awawak. Ndusụk ini se nnyịn ikanamde esinam ufen esịm nnyịn. Ndusụk ini isibọ ufen ke ntak n̄kpọ emi mbon en̄wen ẹnamde. Ndien ndusụk ufen emi ibọde edi ke ntak n̄kpọ emi nnyịn mîkodorike enyịn ke eyetịbede.—Kot Ecclesiastes 9:11.
SỊN IDEM KPEP
Se se iwụtde ke idịghe Abasi edi ntak ndiọi n̄kpọ ye ufen emi ọyọhọde ererimbot emi, nyụn̄ se nte esitiede enye ke idem ke ini nnyịn mme owo ibọde ufen.
4. Owo emi anamde nnyịn ibọ ufen
Ediwak owo ẹsidọhọ ke Abasi akara ererimbot emi. Ndi ikọ oro esidi akpanikọ? Se VIDIO emi.
Kot James 1:13 ye 1 John 5:19, ekem ẹbọrọ mbụme emi ẹnyụn̄ ẹneme ẹban̄a enye:
-
Ndi ufen ye ndiọi n̄kpọ emi ọyọhọde ererimbot emi oto Abasi?
5. Nte n̄kpọ etiede tọn̄ọ Satan ọkọtọn̄ọ ndikara
Kot Genesis 3:1-6, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ewe nsu ke Satan okosu?—Se ufan̄ikọ 4 ye 5.
-
Nso ke Satan eketịn̄ emi owụtde ke nsu esie ọkọwọrọ ke enyene eti n̄kpọ emi Jehovah mîyomke mme owo ẹnyene?
-
Nso ke Satan eketịn̄ emi owụtde ke enye ọkọdọhọ ke idịghe n̄kọ Jehovah akakara owo ndien owo okop ata inemesịt?
Kot Ecclesiastes 8:9, ekem ẹbọrọ mbụme emi ẹnyụn̄ ẹneme ẹban̄a enye:
-
Tọn̄ọ Jehovah eketre ndikara ererimbot emi, n̄kpọ etie didie?
-
Adam ye Eve ẹma ẹfọn ẹma, mmọ ẹkenyụn̄ ẹdụn̄ ke Paradise. Edi mmọ ẹma ẹsọn̄ esịt ẹtiene Satan ẹsọn̄ ibuot ye Jehovah
-
Nsọn̄ibuot akanam idiọkn̄kpọ ye ufen ye n̄kpa ọtọn̄ọ ke ererimbot emi
-
Jehovah ayanam idiọkn̄kpọ ye ufen ye n̄kpa etre ke ererimbot emi. Mme owo ẹyefọn ẹma; ofụri isọn̄ edinyụn̄ idi Paradise
6. Ufen emi mme owo ẹbọde esibiak Jehovah
Ndi Abasi idọn̄ke enyịn ke ofụri ufen emi nnyịn ibọde mi? Kere ban̄a se Edidem David ye apostle Peter ẹkewetde. Kot Psalm 31:7 ye 1 Peter 5:7, ekem ẹbọrọ mbụme emi ẹnyụn̄ ẹneme ẹban̄a enye:
-
Etie fi didie ndidiọn̄ọ ke Jehovah esikụt ofụri ufen oro ibọde, ke enye onyụn̄ ekere aban̄a nnyịn?
7. Abasi ayanam kpukpru ufen etre
Kot Isaiah 65:17 ye Ediyarade 21:3, 4, ekem ẹbọrọ mbụme emi ẹnyụn̄ ẹneme ẹban̄a enye:
-
Nso inam enem fi ndidiọn̄ọ ke Abasi ayanam ufen etre onyụn̄ anam kpukpru n̄kpọ etie nte enye okoyomde?
Ndi ọmọdiọn̄ọ?
Akpa nsu oro Satan okosude ama abiat enyịn̄ Abasi. Nsu esie ama anam etie nte ke Jehovah Abasi edi idiọk owo, ke Jehovah imaha mbon oro enye akarade. Edi ibịghike Jehovah ayanam kpukpru ufen etre onyụn̄ owụt ke imọ idịghe idiọk owo. Jehovah oyowụt ke idụhe ukara emi ọfọnde nte ukara imọ. Ọfọn iti ke ndinam enyịn̄ Abasi asana edi ata akpan n̄kpọ ke enyọn̄ ye ke isọn̄.—Matthew 6:9, 10.
NDUSỤK OWO ẸSIDỌHỌ ẸTE: “Abasi anam mme owo ẹbọ ufen ke ererimbot emi.”
-
Nso ke ọkpọbọrọ utọ owo oro?
SE IKPEPDE
Satan kpa Devil ye Adam ye Eve ẹdi ntak ndiọi n̄kpọ emi ọyọhọde ererimbot emi. Ibịghike Jehovah ayanam ufen etre ke ererimbot emi onyụn̄ anam n̄kpọ etie nte enye okoyomde, sia inemke enye nte nnyịn ibode ufen.
Se M̀mê Emeti
-
Ewe nsu ke Satan okosu ọnọ Eve?
-
Nso ke nsọn̄ibuot Adam ye Eve anam nnyịn?
-
Nso iwụt ke isinemke Jehovah ndikụt nnyịn ibọde ufen?
KPEP N̄KPỌ EN̄WEN
Se se Bible etịn̄de aban̄a idiọkn̄kpọ.
Kot nsio nsio n̄kpọ ban̄a se Satan ọkọtọn̄ọde ke In̄wan̄ Eden.
“Ntak Emi Abasi Ayakde Ibọ Ufen-e?” (Enyọn̄-Ukpeme, January 1, 2014)
Se mbụme emi esifịnade ediwak owo ye ibọrọ emi ọdọn̄de owo esịt.
Se se ete kiet ekedide edidiọn̄ọ aban̄a ufen emi ọyọhọde ererimbot emi.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
