SESE mme owo ẹsakde akparawa emi. Nte ọmọfiọk owo emi enye edide? Emi edi Jeremiah. Enye edi ata akpan prọfet Abasi.

Ibighịke ke Edidem Jo·siʹah ama ọkọtọn̄ọ ndisobo mme ndem ke obio, Jehovah ọdọhọ Jeremiah edi prọfet Imọ. Nte ededi, Jeremiah ekere ete imekpri ikaha ndidi prọfet. Edi Jehovah ete iyen̄wam enye.

Jeremiah asian nditọ Israel ẹtre mme idiọk n̄kpọ. Enye ọdọhọ, ‘Mme abasi mme idụt ẹdi nsu.’ Edi uwak nditọ Israel ẹmek ndikpono ndem n̄kan ndikpono Jehovah Abasi akpanikọ. Ke Jeremiah asiande mme owo ete Abasi eyenọ mmọ ufen ke idiọkn̄kpọ mmọ, mmọ ẹkam ẹsak enye.

Ediwak isua ẹbe. Jo·siʹah akpa, ndien ọfiọn̄ ita ẹbede, eyen esie Je·hoiʹa·kim akabade edidem. Jeremiah osụk ọdọhọ mme owo: ‘Eyesobo Jerusalem ke mbufo mikpọn̄ke idiọk usụn̄ mbufo.’ Mme oku ẹmụm Jeremiah ẹfiori: ‘Akpana ẹwot fi ke nditịn̄ mme n̄kpọ emi.’ Do, mmọ ẹdọhọ mbọn̄ Israel: ‘Ekpewot Jeremiah koro enye etịn̄de ikọ adian obio nnyịn.’

Nso ke Jeremiah edinam ke emi? Enye ifeheke ndịk! Enye asian mmọ kpukpru: ‘Jehovah ọkọdọn̄ mi ntịn̄ mme ikọ emi nnọ mbufo. Ke mbufo mikpọn̄ke idiọk usụn̄ uwem mbufo, Jehovah eyesobo Jerusalem. Edi ẹtịm ẹfiọk emi: Ke mbufo ẹwotde mi, mbufo ediwot owo oro miduehe.’

Mbọn̄ ẹyak Jeremiah odu uwem, edi nditọ Israel ikpụhọkede usụn̄ mmọ. Ekem Neb·u·chad·nezʹzar, edidem Babylon edin̄wana ye Jerusalem. Ke akpatre, Neb·u·chad·nezʹzar anam nditọ Israel ẹdi ifụn esie. Enye ada ediwak tọsịn ọnyọn̄ Babylon. Kam kere nte ekpetiede isenowo ndimen fi n̄kpọn̄ ufọk fo n̄ka esen idụt!