Iwakke n̄kpọ emi ekenemde Mme Ntiense Jehovah ke England ye mbon emi ẹketode-to ẹdi, nte mbono ofụri ererimbot ke London ke England. Andrew ye Elizabeth ẹma ẹka ufọkisen kiet ke London ndikọm mbon emi ẹketode idụt en̄wen ẹdi mbono oro. Ke ini mmọ ẹsịmde do, mmọ ẹma ẹkụt n̄wan emi esịnede ọfọn̄ ọfọn ẹnyụn̄ ẹkere ke enye edi mbono oro. Elizabeth  ama efehe akafat enye. Idem ama akpa n̄wan oro, ntre Elizabeth ama ekpe enye ubọk ete okûyat esịt ke ikekere ke enye ekedi mbono.

Enye ama obụp ete: “Ewe mbono?”

Elizabeth ama anyan ubọk owụt enye idiọn̄ọ ke ufọkisen oro; idiọn̄ọ oro ọkọdọhọ ke ẹdara Mme Ntiense Jehovah emi ẹtode ẹdi mbono. N̄wan oro ama etịn̄ n̄kpọ emi akakpade mmọ idem. Enye ọkọdọhọ ete: “Enem mi tutu! Ndi mmebiet Mme Ntiense Jehovah?”

Nte nneme oro akakade iso, Elizabeth ama edidiọn̄ọ ke enye ekere Vivien, ke ata idụt mmọ edi Nigeria, ke to ke ufọk imọ sịm esie edi minit ifan̄ kpọt. Vivien ama ọdọhọ edikpep imọ ye nditọ imọ Bible. Andrew ye Elizabeth ẹma ẹka ufọk esie, ndien isan̄ emi idịghe mmọ ẹkefehe ẹkefat enye, enye akakam efehe edifat mmọ. Se iketịbede oro ke London ama enem Vivien. Idem ama akpa mme Andrew ke ini mmọ ẹkewụtde enye n̄wed Bible Ekpep yak enye ọdọhọ ke imenyenyene, ke enye ke isikot ye nditọ imọ mbinan̄. Ke ini mmọ ẹkedọhọde ke imesida n̄wed oro ikpep mme owo Bible ke mfọn, enye ama ọsọsọp ọdọhọ ete: “Yak itọn̄ọ idahaoro!”

Ke November 2014 ke ẹkesiak akpa esop usem Romany ke Slovakia. Ke mbono circuit kiet emi osụk ebede, owo 21 emi ẹsemde Romany ẹma ẹna baptism. Kpukpru mmọ ẹketo obio kiet. Owo 495 ẹkedụk Editi n̄kpa Christ ke usem oro. Brọda kiet emi akanade baptism obufa ama ewet ete:

 “Ami ndi owo Roma nnyụn̄ nto Žehra ke Slovakia. Ediwak mbakara ke obio emi ndụn̄de ẹsida nnyịn nte nyon̄, nte mbon emi mîsanake idem, ye mme inọ ye mbon nsu. Ke ini n̄kakade ufọkabasi, akwaowo do ama ebịn mi ete nnyọn̄ ke idịghe utọ owo nte ami ke ẹyom. Mbakara ẹma ẹsiwak ndinam mi utọ n̄kpọ oro, ntre akpana an̄wan̄a fi nte n̄kesidade mmọ. Edi isan̄ kiet Mme Ntiense Jehovah ẹma ẹdọhọ ndi Ufọkmbono Obio Ubọn̄. Mma ndọhọ yak nnyụn̄ n̄kaka n̄kese, sia n̄kekere ke ẹyenam mi se mbakara ẹsiwakde ndinam. Edi ke ini n̄kesịmde do, owo mbakara ama ọkọm mi ubọk onyụn̄ enen̄ede adara mi mbemiso n̄kam ndụkde esịtufọk, idem ama akpa mi. N̄kokopke ofụri se ẹkekwọrọde usen oro sia n̄kosụk n̄kere m̀mê nso inam kpukpru owo do ẹma mi ntre.

“N̄kekemeke ndide idap okoneyo oro sia n̄kosụk n̄kere nte ẹkenamde n̄kpọ ye ami ke Ufọkmbono Obio Ubọn̄ oro. Mma ndọhọ ke nyafiak n̄ka man n̄kese m̀mê okonyụn̄ edi n̄kpọ usen kiet oro. Edi mmọ ẹma ẹfọn ye ami ọyọhọ usen iba ẹkan akpa; ẹkenam n̄kpọ ye ami nte ẹnam ye ata akani ufan mmọ. Tọn̄ọ usen oro n̄kafiakke aba, ndien ke akpatre mma nna baptism. Nditọete itreke ndifọn ido ye ami, mmọ ẹsiwụt ke imama mi etieti. Ndusụk ini mmọ ẹsinọ mi udia emi ọfọnde akan enye emi mmọ ẹdiade. Ndikpọn̄ke esop emi, nyom ndinam n̄kpọ Jehovah Abasi ke nsinsi nsinsi.”

Sista emi ekerede Aysel ama odụk bọs oto Ganja aka Baku ke Azerbaijan. Enye ama ọbọn̄ akam ete Jehovah an̄wam imọ ikwọrọ ikọ. Kpa ye oro ẹkenọde enye n̄kpọitie en̄wen, n̄wan kiet ama eyịre ete yak enye editie ye imọ. Aysel ye enye ẹma ẹtọn̄ọ nneme ndien Aysel  ama ọwọn̄ọde nneme oro esịn ke nneme Ikọ Abasi. Mma oro ama ọdọhọ ke imama Jesus etieti, ke iyom ndinen̄ede ndiọn̄ọ enye. Mmọ mbiba ẹma ẹbọ kiet eken nọmba fon, ẹnyụn̄ ẹdiomi ndifiak nsobo. Mma oro ama ọdọhọ Aysel ete edieke Bible odude yak enye emen ọsọk imọ.

Ke ini Aysel akafiakde ọnyọn̄ Ganja, enye ama aka okokụt n̄wan oro ke itieutom. Mma oro ama ọdọhọ ke imenyene “n̄wed akam” emi isikotde kpukpru usen. Idem ama akpa Aysel ke ini enye okokụtde ke Ẹdụn̄ọde N̄wed Abasi ke Usen ke Usen eke 2013 ke enye okokot n̄wed akam. Aysel ama ọtọn̄ọ ndikpep n̄wan oro Bible, esịt onyụn̄ enem enye ke Jehovah ama anam imọ inyene uko ikwọrọ ikọ.

Ẹkewet leta emi ke Spain:

Mma kiet emi ekerede Felicity onyụn̄ edide isua 68 ke Sweden, ọdọhọ ete: “Esịt ama esitịmede mi kpukpru ini, ekesinyụn̄ etie mi nte ke uwem mi iwọrọke usụn̄.  Mma nsinen̄ede nyom ndikop inemesịt, edi eketie nte ke tutu amama ndikopke inemesịt.” Eketie enye nte ke se Catholic ẹsikpepde idịghe akpanikọ. Ntre enye ama ọdọhọ yak ika nsio nsio ufọkabasi ise, ndien ke akpatre enye ama ọtọn̄ọ ndisịn idem ke n̄kpọ ibọk ye idiọn̄.

Enye ama ekere ke ufọn uwem emi idụhe. Esịt ama etịmede enye tutu enye ekere ndiwot idem. Enye ọkọdọhọ ete: “Mma ntua ata ọkpọsọn̄ eyet nnyụn̄ ndọhọ Abasi eteme mi se enye oyomde nnam. Ke urua iba ebede, mma n̄kop ẹkọn̄de usụn̄ufọk mi sụn̄sụn̄. Akparawa emi iso eketiede imam imam ama obụp mi m̀mê n̄kpama ndikop ikọ Abasi. Mma n̄kere ke esịt mi nte: ‘O Abasi, idịghe Mme Ntiense Jehovah ke n̄koyom!’”

Kpa ye oro esịt kiet ọkọdọhọde enye eberi usụn̄, enye ama ọdọhọ yak isụk ikop se mmọ ẹyomde nditịn̄ onyụn̄ enyịme ẹda n̄wed Bible Ekpep, ẹkpep enye Bible. Idahaemi enye ọdọhọ ete: “Ẹma ẹnam Bible an̄wan̄a mi ke usụn̄ emi mmen̄kekereke.” Felicity ama ana baptism ke akamba mbono 2014 ke Sweden. Enye ọdọhọ ete: “Se n̄koyomde edi emi. Mmọbọ emem ndien.”