Ibuot 12

Nso ke N̄kpanam Man Nnen̄ede Mma Nte Ntiede?

Ih Ihih

Ke ini esede idemfo ke ukụtiso, □ □

ndi emesima nte etiede?

Ndi emesikere ke imenyene usọ □ □

oro mme owo ẹnen̄erede ẹma?

Ndi emesikeme ndisịn ndinam □ □

se mme uke fo ẹnamde?

Ndi emesikeme ndinyịme ke emedue □ □

ke ini owo owụtde fi ndudue fo?

Ndi emesikeme ndimụm idem n̄kama □ □

ke ini mbon en̄wen ẹtịn̄de idiọk ẹdian fi?

Ndi emesikere ke mme owo ẹma fi? □ □

Ndi emesinam n̄kpọ man aka iso okop nsọn̄idem? □ □

Ndi emesitiene mbon en̄wen adara □ □

ke ini mmọ ẹkụtde unen?

Ndi emesida idemfo nte owo emi okụtde unen? □ □

Edieke ọbọrọde ihih ke ndusụk mbụme oro ẹbụpde ke enyọn̄ emi, etie nte afo nditre ndinen̄ede mma nte etiede iyakke okụt ndusụk nti n̄kpọ oro afo enyenede. Ẹtịm ibuotikọ emi man an̄wam fi okụt nti n̄kpọ oro!

 ATA ediwak uyen imaha nte mmọ ẹtiede ye nte mmọ ẹsinamde n̄kpọ, ẹsinyụn̄ ẹkere ke mme uke mmimọ ẹfọn ẹkan mmimọ. Ndi esitie fi ntre n̄ko? Edieke edide ntre, fiọk ke idịghe afo ikpọn̄ esinyene orụk ekikere emi!

“Mme ndudue mi ẹsinam idem emem mi. Mmesinen̄ede nsua nte nsinamde n̄kpọ.”​—Leticia.

“Ọkpọkọm eye nte nso, oyosụk okụt owo emi eyede akan fi.”​—Haley.

“Mmesinen̄ede n̄kpeme idem ke ini ndude ye mbon en̄wen. Ndịk esinam mi n̄kere ke mme owo ididaha mi ke n̄kpọ ndomokiet.”​—Rachel.

Edieke edide esitie fi ke idem nte ẹtịn̄de ke enyọn̄ emi, kûkere ke okwo okụre. Ẹkeme ndin̄wam fi. Kere ban̄a n̄kpọ ita emi ẹdinen̄erede ẹn̄wam fi ama nte etiede.

Nam N̄kpọ Nọ Mbon En̄wen

Akpan itie N̄wed Abasi. “Inemesịt odu ke ndinọnọ akan ke ndibọbọ.”​—Utom 20:35.

Se oro ọwọrọde. Ke ini an̄wamde mbon en̄wen, afo an̄wam idemfo. Didie? N̄ke kiet ke Bible ọdọhọ ete: “Ukpọn̄ eke atatde ubọk eyesehe, ndien owo eke atatde ubọk ọnọ mbon en̄wen mmọn̄, ẹyetat ubọk n̄ko ẹnọ enye mmọn̄.” (Mme N̄ke 11:25) Se idude edi nte ke edieke an̄wamde owo, esịt eyenem fi. a

“Mmesikere se n̄kpanamde nnọ mbon en̄wen nnyụn̄ ndomo ndin̄wam owo ke esop nnyịn. Ndima mbon en̄wen nnyụn̄ ndu ye mmọ esinam n̄kop inemesịt.”​—Breanna.

“Utom ukwọrọikọ oro inamde nte mme Christian enyene ufọn sia enye esinam etre ndikere  mban̄a idemfo onyụn̄ ọtọn̄ọ ndikere mban̄a mbon en̄wen.”​—Javon.

Item: Kûn̄wam mbon en̄wen n̄kukụre ke ntak emi oyomde mmọ ẹn̄wam fi n̄ko. (Matthew 6:2-4) Udukopke inemesịt edieke mûnọhọ owo n̄kpọ ke ofụri esịt. Mme owo ẹyenyụn̄ ẹfiọk ke unamke ke ofụri esịt!​—1 Thessalonica 2:5, 6.

Nam emi. Kere ban̄a owo emi afo akan̄wamde. Anie ke ekedi, ndien nso ke akanam ọnọ enye?

․․․․․

Eketie fi didie ke idem ke ama akan̄wam enye?

․․․․․

Kere ban̄a owo en̄wen emi ekemede ndin̄wam, nyụn̄ wet se ekemede ndinam nnọ enye.

․․․․․

Nam Ufan ye Mme Owo

Akpan itie N̄wed Abasi. “Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.”​—Mme N̄ke 17:17.

Se oro ọwọrọde. Eti ufan ekeme ndinen̄ede n̄n̄wam fi ke ini afanikọn̄. (1 Samuel 18:1; 19:2) Afo ndikam mfiọk ke owo  ke ekere aban̄a fi ekeme ndinam esịt enem fi. (1 Corinth 16:17, 18) Ntre, dian idem ye mbon oro ẹkemede ndin̄wam fi.

“Nti ufan ẹyesịn udọn̄ ẹnọ fi.”​—Donnell.

“Ndusụk ini, se isikam idide akpan n̄kpọ ikan edi ndifiọk ke owo enen̄ede ekere aban̄a fi. Oro ekeme ndinam enịm ke ẹma fi.”​—Heather.

Item: Kụt ete ke mme ufan fo ẹn̄wam fi anam n̄kpọ nte akpanade anam—kûyom ndidu uwem nte owo en̄wen man etiene odụk otu. (Mme N̄ke 13:20; 18:24; 1 Corinth 15:33) Edieke anamde mme n̄kpọ oro mîfọnke n̄kukụre man enem mbon en̄wen esịt, afo oyosụhọde idemfo itie, edinyụn̄ etie fi ke idem nte ke odụk ufụn ọnọ owo.​—Rome 6:21.

Nam emi. Ke idak emi, wet enyịn̄ ufan fo kiet emi ekemede ndin̄wam fi enen̄ede ama nte etiede.

․․․․․

Ntak mûdiomike nte edibiatde ndusụk ini ye owo oro afo asiakde ke enyọn̄ emi?​—Fiọk ete: Idịghe tutu owo emi ededi ubọkn̄ka fo.

Kûyak Idem Emem Fi Edieke Anamde Ndudue

Akpan itie N̄wed Abasi. “Kpukpru owo ẹnam idiọkn̄kpọ ẹnyụn̄ ẹtaba ubọn̄ Abasi.”​—Rome 3:23.

Se oro ọwọrọde. Se idude edi ke afo ufọnke uma. Oro ọwọrọ ke ndusụk ini afo eyetịn̄ ikọ mîdịghe anam n̄kpọ oro mîfọnke. (Rome 7:21-23; James 3:2) Okposụkedi emi mîdụhe nte mûdunamke ndudue, emekeme ndikpeme nte anamde n̄kpọ aban̄a ndudue fo. Bible ọdọhọ ete: “Edinen owo ekeme  ndiduọ utịm ikatiaba, onyụn̄ adaha ada.”​—Mme N̄ke 24:16.

“Ntak emi ndusụk nnyịn mîsidaha idem nnyịn ke n̄kpọ esidi ke imesimen mmeme nnyịn ikodomo ye ukeme mbon en̄wen.”​—Kevin.

“Kpukpru owo ẹnyene nti ye ndiọi edu. Akpana ikop inemesịt iban̄a nti edu nnyịn, inyụn̄ idomo ndikpụhọde ndiọi edu nnyịn.”​—Lauren.

Item: Kûkere ke unana mfọnmma ọnọ fi isọn̄ ndika iso nnam idiọkn̄kpọ. (Galatia 5:13) Ndikokoi nnam idiọkn̄kpọ ayanam ataba akakan mfọn oro ekpenyenede, oro edi, mfọn Jehovah Abasi!​—Mme Hebrew 10:26, 27.

Nam emi. Ke idak emi, wet edu kiet oro afo akpamade ndikpụhọde.

․․․․․

Wet usenọfiọn̄ mfịn kpere edu oro. Nam ndụn̄ọde ban̄a nte ekemede ndikpụhọde edu emi, ndien ke ufan̄ ọfiọn̄ kiet, se adan̄a nte anamde n̄kọri.

 Se Afo Enen̄erede Edi

Bible ọdọhọ ke ‘Abasi okpon akan esịt nnyịn.’ (1 John 3:20) Emi ọwọrọ ke enye ekeme ndikụt nti edu oro afo enyenede, emi afo ke idemfo mûkwe. Edi ndi unana mfọnmma fo esinam enye etre ndikụt nti edu emi? Ọfọn, da nte ke emenyene ₦1,000 emi awahade. Ndi okpotop enye ọduọk, mîdịghe ndi ekpekere ke enye inyeneke ufọn aba ke ntak emi awahade? Baba-o! Okụk oro osụk edi ₦1,000 m̀mê awaha m̀mê iwahake.

Kpasụk ntre ke Abasi ese fi. Ndudue fo inamke enye etre ndikụt nti edu fo. Enye okụt onyụn̄ ama ofụri ukeme oro esịnde ndinam se inemde enye esịt, inamke n̄kpọ m̀mê mmọ ekpri fi didie ke enyịn! Ke akpanikọ, Bible ọnọ fi nsọn̄ọ nte ke ‘Abasi ikwan̄ake eke ekpesịnde enye efre utom fo ye ima emi afo owụtde aban̄a enyịn̄ esie.’​—Mme Hebrew 6:10.

KE IBUOTIKỌ ORO ETIENEDE

Ndi emesinen̄ede ofụhọ ndusụk ini? Edieke edide ntre, nso ke akpanam?

[Ikọ Idakisọn̄]

AKPAN ITIE N̄WED ABASI

“Yak owo kiet kiet owụt se utom esie edide, ndien adan̄aoro enye eyenyene ntak ndidat esịt mban̄a idemesie, idịghe ke ndimen idem ndomo ye owo en̄wen.”​—Galatia 6:4.

ITEM

Kûkere ke akananam imọ ikwe unen ye nte ke imọ isinamke n̄kpọ ndomokiet ọfọn. Ndikere n̄kpọ ke utọ usụn̄ oro edikam ananam idem emem fi. Utu ke oro, nyịme ke emesinam ndudue, edi ke emesinam nti n̄kpọ n̄ko.

NDI AMA ỌFIỌK . . . ?

Nte afo esede idemfo ekeme ndinam mme owo ẹse fi . . . ẹnyụn̄ ẹnam n̄kpọ ye afo ke ukem usụn̄ oro.

SE NDINAMDE

Ke ini mme uke mi ẹkụtde ndudue ẹnọ mi, se ndinamde edi

Ke ini mfiọkde ke n̄wụk ntịn̄enyịn ke mme mmeme mi kpọt, se ndinamde edi

Se ndibụpde ete ye eka mi mban̄a n̄kpọ emi edi

AFO EKERE DIDIE?

● Nso ikeme ndinam mme uyen ẹkûma nte mmọ ẹtiede?

● Ntak emi ọfọnde ama nte afo etiede?

[Se ẹwetde ke ikpọ abisi ke page 88]

“Owo ekeme ndinen̄ede nye, edi osụk ekere ke ibiet ikọn̄wọ. Mîdịghe, owo emi mînen̄ekede iye ekeme ndikere ke imọ ikam iye ikan kpukpru owo. Etiene nte owo esede idemesie.”​—Alyssa

[Ndise ke page 90]

Owo isidọhọke ke okụk oro awahade inyeneke aba ufọn​—kpasụk ntre, unana mfọnmma fo inamke Abasi ese fi ke usụhọde