Ke 1985, mma ntọn̄ọ nditiene nnam fim, ndien ediwak ini ami n̄kesidi akpan owo ke fim. Mme ewetmbụk n̄kpọntịbe ẹkesimama ndiwet n̄kpọ mban̄a mi ndien mme osio ndise ẹkesiyoyom ndisio mi ndise. Ẹma ẹsikot mi nditiene nse mbufa fim emi ẹduakde ndisio. Ẹma ẹsikot mi udia ye usọrọ obufa ufọk ye mbubehe. Kpukpru owo ẹkesiyoyom mi.

Edi mma ntọn̄ọ ndikụt ke kpukpru emi itiehe nte n̄kekerede. N̄kesiwak ndinam fim emi etiede ekọn̄ ekọn̄, ndien utọ fim emi ekeme ndida owo ibuot. Mbon fim ke Hong Kong ikesimaha ndikpe owo en̄wen anam n̄kpọ ke mme itie emi ẹtiede afai afai nte ẹsinamde ke fim America, ntre mma nsinam mme n̄kpọ ntem, utọ nte ndiwat masịn ke enyọn̄ moto. Mma nsinam fim emi ẹnamde afai ye oburobụt ido, ẹnyụn̄ ẹbrede ibọk.

Ke 1995, mma ndọ owo emi esisede aban̄a fim. Okposụkedi emi eketiede nte mmenyene kpukpru se ikpanamde esịt enem mi—uwọrọiso, inyene, eti ebe—n̄kesisụk ntie mfụhọ mfụhọ. Mma mbiere ke ndinamke fim aba.

Mma nti se n̄kesikpepde ke ini eyenọwọn̄. Ini oro, kpukpru Saturday, ami ye eyeneka mi ima isika ikese ubon kiet emi ẹdide Mme Ntiense Jehovah. Joe McGrath emi ekedide ete ubon oro ama esikpep nnyịn ye nditọ esie ita Bible. Kpukpru owo ke ubon oro ẹma ẹma kiet eken, ntre ubon oro ama enem etieti. Ete mmọ ekesinam n̄kpọ ye n̄wan ye nditọ esie ukpono ukpono. Ama esinem mi n̄ko nditiene mmọ n̄ka mme mbono esop mmọ. Ndusụk ini nnyịn ima isitiene mmọ ika ikpọ mbono mmọ. Ekesinenem mi ndidu ye Mme Ntiense Jehovah.

Edi uwem ikenemke ke ufọk nnyịn. Eka mi ikamaha nte ete mi odude uwem, ntre emi ama esinam enye enen̄ede ofụhọ. Ini n̄kedide isua duop, eka mi ama ọkpọn̄ esop Mme Ntiense Jehovah.  Ami mma n̄ka iso, edi esịt mi ikesịneke do. Kpa ye oro, mma nna baptism ke ini n̄kedide isua 17. Edi esisịt ini ke oro ebede, mma nnam idiọkn̄kpọ ndien ẹma ẹsio mi ke esop.

Esisịt ini ke mma n̄kọdọ ndọ, mbiowo Mme Ntiense Jehovah iba ẹma ẹdi ẹdise mi. Mmọ ẹma ẹtịn̄ se n̄kpanamde man mfiak nnyọn̄ mbịne Jehovah Abasi, ndien mmọ ẹma ẹnam ọkwọrọikọ emi ekerede Cindy an̄wam mi. Etisịm ini emi, n̄kọbuọtke idem aba ye Abasi, ntre mma ndọhọ mma emi owụt mi ke Bible edi Ikọ Abasi. Enye ama owụt mi mme prọfesi Bible emi ẹsude. Nte ini akade, ima ikabade idi ufan, ndien enye ama ọdọhọ ke ikpama ndikpep mi mme akpan n̄kpọ emi ẹdude ke Bible. Mma nnyịme. Akpa ini n̄kokụtde ke Jehovah edi Abasi ima edi oro, ndien ke enye oyom mi n̄kop inemesịt.

Ke mma n̄kafiak ntọn̄ọ ndika mbono esop Mme Ntiense Jehovah, mma ndikụt ke esinem mi ke idem ndidu ye Mme Ntiense Jehovah akan ndidu ye mbon fim. Edi se ikọwọrọde mi ke ini eyenọwọn̄ ama anam ọsọn̄ mi ndinyene mbuọtidem ke idem owo ekededi, n̄konyụn̄ mmaha idemmi. Mma kiet ke esop ama ada Bible owụt mi se n̄kpanamde, ndien mma n̄kpep n̄ko ndinyene nti ufan.

Ke 1997, ami ye ebe mi ima iwọrọ ikodụn̄ ke Hollywood emi odude ke California ke United States. Do ke n̄kenen̄ede nsịn idem n̄kpep mme owo Bible man mmọ ẹdia ufọn Ikọ Abasi. Ndinam emi ọnọ mi inemesịt akan ndinam fim. Ke uwụtn̄kpọ, ke 2002, mma nsobo ye Cheri emi n̄kọdiọn̄ọde ke Hong Kong. Mbụk uwem nnyịn mbiba aka nditie ukem ukem. Ẹma ẹmek enye n̄ko nye-n̄kan an̄wan ke ofụri Hong Kong isua kiet mbemiso ẹmekde mi. Ke nditịm ntịn̄, enye akayara mi itam oro ẹsiyarade owo emi ẹmekde nye-n̄kan an̄wan. Nte ini akakade, enye n̄ko ama etiene anam fim onyụn̄ edi owo emi esisede aban̄a fim. Enye n̄ko ama ọwọrọ okodụn̄ ke Hollywood.

Mbọm Cheri ama anam mi ke ini n̄kokopde ke udọn̄ọ esịt ama owot owo emi enye okoyomde ndidọ. Ufọkabasi Buddha emi enye ekesikade ikọdọn̄ke enye esịt. Ukem nte ami, enye ekedi ọwọrọiso-owo, edi okosụk etie mfụhọ mfụhọ inyụn̄ inyeneke mbuọtidem ke idem owo ndomokiet. Mma ntọn̄ọ nditịn̄ nnọ enye se n̄kekpepde ke Bible, edi sia enye ekedide owo Buddha, ama ọsọn̄ enye ndinịm emi.

Usen kiet ke 2003, Cheri ama okot mi ke fon. Enye okodu ke Vancouver ke Canada anam fim. Enye ama etịn̄ inua imam imam ete ke imọ ikawat isan̄a ise obio. Nte isụk iwakde ika, imọ ima isioro uyo ibọn̄ akam idọhọ ata Abasi anam imọ idiọn̄ọ owo emi enye edide onyụn̄ anam imọ ifiọk enyịn̄ esie. Kpa idaha oro, imọ iwat ibe Ufọkmbono Obio Ubọn̄ inyụn̄ ikụt enyịn̄ oro Jehovah. Enye ọkọdọhọ ke Abasi ọkọbọrọ akam imọ oro, onyụn̄ ebiere ndisọsọp n̄kụt Mme Ntiense Jehovah. Mma nnam ndutịm nnọ enye, ndien ke ufan̄ usen ifan̄, enye ama odụk mbono esop ke esop kiet emi ẹsemde Chinese ke Vancouver.

Cheri ọkọdọhọ mi nte ini akade ete: “Mbon emi ẹma mi ke ofụri esịt. Mmekeme nditịn̄ nnọ  mmọ nte etiede mi ke idem.” Esịt ama enen̄ede enem mi ndikop oro sia ke ini Cheri ekesinamde fim, enye ikenyeneke ufan. Cheri ama aka iso odụk mbono esop. Edi ke 2005, enyene nnyan fim iba emi ẹkekpede enye ẹte akanam ke China. Ntre, akana enye afiak ọnyọn̄ Hong Kong. Ke 2006, Cheri ama ayak idemesie ọnọ Jehovah onyụn̄ ana baptism ke mbono Mme Ntiense Jehovah ke Hong Kong. Okposụkedi emi enye okoyomde ndinen̄ede nnam n̄kpọ Jehovah, utom fim ikayakke, ndien enye ikokopke inemesịt.

Ke 2009, n̄kpọ ama okpụhọde akamba akamba ke uwem Cheri. Enye ama ebiere ndikpọn̄ fim man enen̄ede esịn idem ke utom Jehovah. Enye ama enyene ediwak mbufa ufan ke esop Abasi. Enye ama akabade edi ọkwọrọikọ ofụri ini onyụn̄ ama ndin̄wam mme owo ẹfiọk se mmọ ẹkpedade uwem mmọ ẹnam.—Matthew 24:14.

Ekem Cheri ama ebiere ndikpep usem Nepalese man an̄wam mme Ntiense emi ẹsemde usem emi ke Hong Kong. Owo idaha ediwak mbon Nepal emi ẹdụn̄de ke Hong Kong ke n̄kpọ sia mmọ mînen̄ekede idiọn̄ọ Ikọmbakara m̀mê usem Chinese. Ntak en̄wen emi owo mîdaha mmọ ke n̄kpọ edi ke nte mmọ ẹsinamde n̄kpọ okpụhọde ye nte mbon Hong Kong ẹsinamde. Cheri ama etịn̄ ọnọ mi nte enemde imọ ndin̄wam mbon Nepal ẹfiọk se Bible ekpepde. Ke uwụtn̄kpọ, nte enye okosụk ọkwọrọde ikọ ke ufọk ke ufọk usen kiet, enye ama okụt mma kiet emi ọdiọn̄ọde ata esisịt n̄kpọ aban̄a Jesus, edi idiọn̄ọke n̄kpọ ndomokiet iban̄a Jehovah emi edide ata Abasi. Cheri ama ada Bible owụt enye ke Jesus ọkọbọn̄ akam ọnọ Ete esie ke heaven. Ke ini mma emi ọkọdiọn̄ọde ke imekeme ndibọn̄ akam nnọ ata Abasi emi ekerede Jehovah, enye ama enyịme ndikpep Bible. Ikebịghike, ebe esie ye eyen esie ẹma ẹtiene ẹkpep Bible.—Psalm 83:18; Luke 22:41, 42.

Ke ini n̄kokụtde nte enemde Cheri ndikwọrọ ikọ ofụri ini, mma mbụp idemmi nte, ‘Nso ikpan mi nditiene nnam se enye anamde emi?’ Ini oro, ami n̄ko mma mfiak nnyọn̄ Hong Kong. Mma mbiere ndifiak nse nte ndude uwem man n̄keme ndinen̄ede nsịn idem n̄kpep mme owo Bible. Mmokụt ke ndikpan̄ utọn̄ nnọ mme owo nnyụn̄ n̄n̄wam mmọ ẹdiọn̄ọ Ikọ Abasi anam nnen̄ede n̄kop inemesịt.

Ke uwụtn̄kpọ, mma n̄kpep mma kiet emi otode Vietnam Bible. Mma emi ekesifofụhọ kpukpru ini, mmọn̄eyet ikesinyụn̄ isatke enye ke enyịn. Enye okop inemesịt idahaemi onyụn̄ enenem enye ndisidụk mbono esop.

Ami ye Cheri ima ikụt n̄kpọ emi ọfọnde akan uwọrọiso. Okposụkedi emi ndinam fim ekenemde onyụn̄ anamde iwọrọ iso, ndikpep mme owo mban̄a Jehovah Abasi enem akan oro sia emi ọnọ Abasi ubọn̄. Imokụt ke ikọ Jesus emi edi akpanikọ: “Inemesịt odu ke ndinọnọ akan ke ndibọbọ.”—Utom 20:35.