N̄kokpon ke Alicante ke Spain. N̄kesiyoyo ke efak ke ini n̄kedide akparawa sia ima ikodụhe ke ufọk nnyịn. Itie udiọn̄ taya moto ama ekpere ufọk nnyịn. Mma ntọn̄ọ ufan ye José María, kiet ke otu mbon emi ẹkenamde utom do. Enye ama enem itie onyụn̄ ama mi. Ama enem mi tutu sia ima ikodụhe ke ubon nnyịn. Okposụkedi emi enye ọkọsọn̄ọde mi isua 20, enye eketie nte ata eyeneka ọnọ mi—ata ufan ke ini nnanenyịn.

José María ama ọtọn̄ọ ndikpep Bible ye Mme Ntiense Jehovah. Enye ama enen̄ede ama Bible, esinyụn̄ awak ndineme se enye ekpepde ke Bible ye ami. Mma nsikpan̄ utọn̄ nnọ enye, edi n̄kenen̄ekede nsịn esịt ke se enye ekesitịn̄de. Esịt mi ekesịne ke mme n̄kpọ en̄wen. Edi ikebịghike, oro ama okpụhọde.

Nsimaha nditịn̄ mban̄a aksiden oro. Ami n̄kanam idem sia n̄kanam n̄kpọ nte owo emi mînyeneke ibuot. Ntibọp enyịn ntat, uwem mi ama ọtọ etịmede. Okopidem akparawa emi n̄kedide, ndikụt idem ke bed ufọkibọk, n̄kemeke aba ndimenede ubọk ye ukot. Ama enen̄ede ọsọn̄ mi ndidu utọ uwem emi. Mma nsikere m̀mê n̄kpa ikpọfọnke mi ikan uwem.

José María ama edise mi, onyụn̄ ọsọsọp anam ndutịm man Mme Ntiense Jehovah emi ẹdude ẹkpere ẹsidi ẹdise mi ke ufọkibọk. Ama esinem mi nte ẹkesidide ẹdise mi. Ke mma n̄kọkpọn̄ ikpehe ufọkibọk emi ẹsisede owo udọn̄ọ enyịn kpukpru ini, mma ntọn̄ọ ndikpep Bible. Mma ndikụt ntak emi mme owo ẹbọde ufen ẹnyụn̄ ẹkpade ye ntak emi Abasi esiyakde ndiọi n̄kpọ ẹtịbe. Mma n̄kpep n̄ko mban̄a se Abasi aduakde ndinam ke ini iso, ke ini mbon oro ẹfọnde ẹma ẹdidụn̄de ke isọn̄. Ini oro, owo ndomokiet ididọhọke ite: “Ndọdọn̄ọ.” (Isaiah 33:24) Akpa ini n̄kenyenede ata idotenyịn ekedi oro tọn̄ọ n̄kamana.

Ke mma n̄kọkpọn̄ ufọkibọk, mma nnen̄ede nsịn idem n̄kpep Bible. Mma nnyene san̄asan̄a n̄kpọitie mbon n̄kpọnnam, ndien emi ama anam n̄keme ndisidụk mbono esop Mme Ntiense Jehovah, nnyụn̄ ntiene mmọ n̄kwọrọ ikọ. Ke November 5, 1988, ke ini n̄kedide isua 20, mma nna baptism ke n̄kpọ uyeremmọn̄ mbakara. Jehovah Abasi ikayakke uwem odorode mi. Edi nso ke n̄kpanam  ndiwụt Abasi ke mmama ofụri se enye anamde ọnọ mi?

Mma mbiere ke ndiyakke se iwọrọde mi akpan mi ndinam ofụri se n̄kemede ke utom Jehovah. Mma nyom ndika iso nnam n̄kọri ke esop Abasi. (1 Timothy 4:15) Ke nsonso oro, ikememke utom inọ mi koro mbonubon mi ikamaha se n̄kekpepde ke Bible. Edi ndima nditọete mi ẹma ẹbere ye ami. Mmọ ẹma ẹsikụt ẹte ke mmodụk kpukpru mbono esop nnyụn̄ ntiene n̄kwọrọ ikọ.

Nte ini akakade, idem ama ọdiọk mi tutu edi se nyomde ebiet emi ẹdisede mi enyịn kpukpru ini. Ke akpatre, mma ndikụt ata eti itie ke Valencia. Tọn̄ọ ke Valencia sịm Alicante edi n̄kpọ nte itiat 100. Mma n̄ka n̄kodụn̄ do.

Mma mbiere ndika iso nnam n̄kpọ Jehovah okposụkedi emi udọn̄ọ mîyakke ndaha nda. Mma nda okụk oro ukara ẹsinọde mbon n̄kpọnnam ndep kọmputa nnyụn̄ nnam ẹnim enye ẹkpere ibuot bed mi. Mma ndep fon n̄ko. Kpukpru usenubọk, owo emi esede mi enyịn esidomo fon ye kọmputa mi. Enyene n̄kpọ emi ẹsiode ẹdi, emi anamde n̄keme ndida ebek mi nnam se nyomde ke kọmputa mi. Enyene ekpri eto emi nsifakde ke inua nda n̄wet n̄kpọ ke kọmputa nnyụn̄ nda mfịk nọmba ke fon.

Didie ke mme n̄kpọ emi ẹn̄wam mi? Akpa kan̄a, mmọ ẹn̄wam mi n̄keme ndidụk ikpehe Intanet jw.org ye Watchtower LIBRARY EKE INTANET. Mme n̄kpọ emi ẹnen̄ede ẹnyene ufọn ẹnọ mi. Mmesida ediwak hour kpukpru usen n̄kpep n̄kpọ nnyụn̄ nnam ndụn̄ọde ke mme n̄wed Ikọ Abasi man n̄keme ndika iso n̄kpep n̄kpọ mban̄a Jehovah ye nti edu esie. Ndien ini ekededi emi n̄kopde ndobo m̀mê idem ememde mi, mmesida nsio nsio n̄kpọ ke ikpehe Intanet emi ndọn̄ idem esịt.

Mmesida kọmputa mi n̄kop se ẹnamde ke mbono esop. Mmesinyụn̄ ntie ke ufọk mbọrọ mbụme, mbọn̄ akam, nnọ utịn̄ikọ, nnyụn̄ n̄kot ikpehe Enyọn̄-Ukpem Okposụkedi emi mmesikemeke ndika Ufọkmbono Obio Ubọn̄, esitie mi nte ndu do ye nditọete mi.

Fon ye kọmputa emi ẹsinam n̄keme ndikwọrọ ikọ nnọ mme owo. Nsikemeke ndisisan̄a ke ufọk ke ufọk n̄kwọrọ ikọ nte ata ediwak Mme Ntiense Jehovah ẹnamde, edi emi ikpanke mi ndikwọrọ ikọ. Mmesida fon n̄kwọrọ ikọ tutu mbiowo esop nnyịn ẹdọhọ nsida esop usụn̄ ke nte ẹkpedade fon ẹkwọrọ ikọ. Utọ ndutịm emi enen̄ede ọfọn ye nditọete emi udọn̄ọ mîyakke mmọ ẹkeme ndikpọn̄ ufọk.

 Edi idịghe kọmputa ye fon kpọt ẹsin̄wam mi. Kpukpru usen, ndima ufan mi ẹsidi ẹdise mi. Mmọ ẹsisan̄a ye mme owo ke ubon mmọ ye mbon oro ẹyomde ndikpep Bible ẹdi. Ediwak ini, mmọ ẹsidọhọ nda iso ke nneme oro. Ke ini ke ini, ediwak ubon ẹsidi ẹdise mi ẹnyụn̄ ẹdọhọ ntiene ndụk ukpepn̄kpọ ubon mmimọ. Esinen̄ede enem mi ndikụt nditọwọn̄ ẹtiede ẹkanade bed mi ẹtịn̄ se inamde mmọ ẹma Jehovah.

Esinem mi nte ediwak owo ẹdide ẹdise mi. Mme owo ẹsiyọyọhọ ubet mi; ndusụk mmọ ẹsito anyan usụn̄ ẹdise mi. Emi esinam idem akpa mbon oro ẹsisede nnyịn enyịn. Kpukpru usen, mmesikọm Jehovah nte enye anamde nnyene utọ ndima nditọete emi.

Ke ini owo ọkọmde mi onyụn̄ obụpde m̀mê idem mi etie didie, nsidọhọ, “Ami do, ke ntetime.” Mmọdiọn̄ọ ke idịghe ami kpọt nnyene mfịna. Inamke n̄kpọ m̀mê nso iwọrọ mme Christian, enyene en̄wan emi kpukpru mmọ ẹn̄wanade, oro edi, “eti en̄wan mbuọtidem.” (1 Timothy 6:12) Nso in̄wam mi nyọ se iwọrọde mi ke ata ediwak isua? Mmesibọn̄ akam kpukpru usen n̄kọm Jehovah ke enye ndinam uwem mi enyene se ọwọrọde. Ndien mmesidomo ndinam ofụri se n̄kemede ke utom Abasi nnyụn̄ ndori enyịn ke Obio Ubọn̄ esie.

Mmesitie n̄kere nte uwem edinemde ke obufa ererimbot ye nte ndikemede ndifehe itọk nnyụn̄ mfrọ nte mmama. Ndusụk ini, mmesinam mbubru ye José María ufan mi, emi ọdọn̄ọde polio, mban̄a nte idikade mbuba itọk. Mmesibụp enye m̀mê anie idikan. Enye esibọrọ ete: “Inamke n̄kpọ m̀mê anie edikan. Yak ikam isịm do kan̄a. Ima isịm Paradise, iyefehe.”

Imemke utom ndiyọ se iwọrọde mi. Mmọdiọn̄ọ ke ndisịme oro n̄kanamde ke ini akparawa etem mi itie emi. Edi mmọkọm Jehovah nte enye mîkpọn̄ke mi. Enye enen̄ede ọdiọn̄ mi—ọnọ mi ndima nditọete ke esop, ọnọ mi idotenyịn nsinsi uwem, anam n̄keme ndin̄wam mbon en̄wen, inyụn̄ iyakke uwem odorode mi. Edieke ẹdọhọde ntịn̄ ibio ibio nte etiede mi ke idem, n̄kpọdọhọ ke Jehovah ọdiọn̄ mi akan nte n̄kekerede.