Anthony: Bassey, enem mi ndifiak n̄kụt fi.

Bassey: Enem mi n̄ko.

Anthony: N̄kọdọhọ nda obufa Enyọn̄-Ukpeme ye Ẹdemede! emi nsọk fi. Mmekere ke ayama se idude ke magazine emi.

Bassey: Amanam tutu. Akam ọfọn nte edide mfịn sia enyene se n̄koyomde ndibụp fi.

Anthony: Mbọk bụp.

Bassey: N̄kosụk nneme nneme ye owo itieutom nnyịn urua oko. Mma ntịn̄ n̄kpọ mban̄a n̄kpri n̄kpri n̄wed oro ọkọnọde mi nnyụn̄ ndọhọ enye ke enem etieti. Enye ama ọdọhọ n̄kûkot aba, ke Mme Ntiense Jehovah inịmke Jesus ke akpanikọ. Mma ndọhọ enye ke nyobụp fi ama afiak edi. Ndi ntre?

Anthony: Mmama nte obụpde mi utu ke ndika n̄kobụp owo en̄wen. Okpoyom ndifiọk se owo enịmde ke akpanikọ, udubụpke owo en̄wen, edibụp andinịm n̄kpọ ke akpanikọ, idịghe ntre?

Bassey: N̄kere ntre.

Anthony: Nnyịn Mme Ntiense Jehovah imenen̄ede inịm Jesus ke akpanikọ. Nnyịn ikam inịm ke owo eke mîbuọtke idem ke enye idinyeneke edinyan̄a.

Bassey: Mma n̄kere ke edi ntre. Edi tọn̄ọ owo itieutom nnyịn ọkọdọhọ ke mbufo inịmke Jesus ke akpanikọ, mma mfiak ntie n̄kere n̄kpọ oro. Akanam nnyịn inemeke n̄kpọ emi.

Anthony: Yak n̄wụt fi mme itie Bible emi ẹwụtde ke ana owo ọbuọt idem ke Jesus. Imesiwak ndikot mme itie oro nnọ mme owo ke ini ikwọrọde ikọ.

Bassey: Ọfọn, wụt mi ise.

Anthony: Yak itọn̄ọ ye se Jesus eketịn̄de ke John 14:6. Enye eketịn̄ ikọ emi ye apostle esie kiet. Itie oro okot ete: “Jesus ọdọhọ enye ete: ‘Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.’” Itie oro ọdọhọ ke nso idi n̄kukụre usụn̄ oro owo ekemede ndisan̄a n̄kpere Ete?

Bassey: Ọdọhọ ke edi Jesus.

Anthony: Ntre ke edi. Mme Ntiense Jehovah ẹnịm oro n̄ko. Yak mbụp fi ise: Edieke owo oyomde Abasi ọbọrọ akam imọ, enye ọkpọbọn̄ ke enyịn̄ anie?

Bassey: Ke enyịn̄ Jesus.

Anthony: Akpanikọ. Ntak edi oro ami nsinyụn̄ mbọn̄de akam ke enyịn̄ Jesus. Kpukpru Mme Ntiense Jehovah ẹsinam ntre n̄ko.

Bassey: Enem mi ndifiọk oro.

Anthony: Itien̄wed en̄wen emi nyomde ikot edi John 3:16. Ẹsikot itien̄wed emi ekpri Gospel sia kpukpru se iban̄ade uwem Jesus ke isọn̄ ye se enye akanamde esịne ke itien̄wed kiet emi. Mbọk n̄wam mi kot itie oro ise.

Bassey: Ọfọn. Itie oro ete: “Koro Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke  ọbuọtde idem ye enye okûtak edi enyene nsinsi uwem.”

Anthony: Sọsọn̄ọ-o. Mmekere ke idịghe akpa okopde itien̄wed oro edi emi?

Bassey: Ih, mmokop ata ediwak ini. Mme etubom ufọkabasi ẹkot ke ubọk ke ubọk, ndusụk owo ẹnyụn̄ ẹkọkwọ ke ikwọ.

Anthony: Ntre ke edi. Ama etịm ese itie oro, oyokụt ke Jesus ọkọdọhọ ke ima emi Abasi amade nnyịn anam nnyịn idori enyịn ndinyene nsinsi uwem. Edi enye ọdọhọ inam nso man inyene nsinsi uwem emi?

Bassey: Ọdọhọ ibuọt idem ye Jesus.

Anthony: Nnennen. Ama ese ọyọhọ page 2 ke magazine emi n̄kọnọde fi, enye ọdọhọ ke ndibuọt idem ke Jesus anam owo enyene nsinsi uwem. Ẹtịn̄ ediwak n̄kpọ do ndiwụt ntak emi ẹmịn̄de Enyọn̄-Ukpeme. Kiet ke otu n̄kpọ emi ẹtịn̄de do edi ke magazine emi “esịn udọn̄ ọnọ nnyịn ete inyene mbuọtidem ke Jesus Christ, emi akakpade man nnyịn ikpenyene nsinsi uwem, emi onyụn̄ edide Edidem oro akarade idahaemi ke Obio Ubọn̄ Abasi.”

Bassey: Ah-ah, n̄kọ enye edi oro. Magazine mbufo akam etịn̄ ke mbufo ẹmebuọt idem ke Jesus.

Anthony: N̄kọ omokụt do?

Bassey: Ntak ndien emi mme owo ẹdọhọde ke mbufo ikam inịmke Jesus ke akpanikọ?

Anthony: Ndusụk owo ẹtịn̄ ntre sia ẹkop nte mbon en̄wen ẹtịn̄de, mbon en̄wen ẹtịn̄ se mme etubom ufọkabasi ẹdọhọde mmọ ẹtịn̄ ẹban̄a nnyịn.

Bassey: Okûdi nte mbufo ẹkotde idem mbufo Mme Ntiense Jehovah utu ke Mme Ntiense Jesus anam ndusụk owo ẹdọhọ ke mbufo inịmke Jesus ke akpanikọ?

Anthony: Ekeme ndidi ntre.

Bassey: Ntak emi mbufo ẹsikwọde-kwọ Jehovah ntre ke inua?

Anthony: Akpa kan̄a, nnyịn inịm ke akpana owo okot enyịn̄ Abasi, Jehovah, kpa nte Jesus Eyen esie okokotde. Kop se enye eketịn̄de ke ini enye ọkọbọn̄de akam ọnọ Ete esie ke John 17:26. Mbọk kot ise.

Bassey: Ọfọn. “Ami mmonyụn̄ nnam mmọ ẹfiọk enyịn̄ fo nyonyụn̄ nnam mmọ ẹfiọk, man ima oro afo akamade mi okpodu ye mmọ, ami n̄kponyụn̄ mbuana n̄kpọ ye mmọ.”

Anthony: Sọsọn̄ọ-o. Jesus ọkọdọhọ ke imanam mme owo ẹfiọk enyịn̄ Abasi. Afo ekere ke nso ikanam enye anam oro?

Bassey: Hmm. Ndiọn̄ọke.

Anthony: Yak ikot itie Bible en̄wen emi edinamde itie oro etịm an̄wan̄a. Yak ikot Utom 2:21. Itie oro ọdọhọ: “Ẹyenyan̄a kpukpru owo eke ẹsemede ẹkot enyịn̄ Jehovah.” Edieke Jehovah ọdọhọde ke ana owo okot enyịn̄ imọ edieke enye oyomde edinyan̄a, ndi ukereke ke Jesus ama ọdiọn̄ọ emi?

Bassey: Mmekere.

Anthony: Ntre, ntak kiet emi Jesus okoyomde mbet esie ẹdiọn̄ọ enyịn̄ Abasi ẹnyụn̄ ẹkot enyịn̄ oro ekedi man mmọ ẹkpenyene edinyan̄a. Akpan ntak emi anamde isitịn̄ n̄kpọ iban̄a Jehovah ke ubọk ke ubọk edi oro. Ikere ke ana ẹnam mme owo ẹdiọn̄ọ enyịn̄ Abasi man mmọ ẹtiene ẹkot enyịn̄ oro.

Bassey: Edi ekpededi mme owo idiọn̄ọke enyịn̄ Abasi inyụn̄ ikotke-kot enyịn̄ emi, mmọ ẹma ẹdọdọhọ “Abasi,” ẹdiọn̄ọ ke mmimọ ikot Abasi emi odude ke enyọn̄.

Anthony: Ekeme ndidi ntre. Edi, Abasi asiak enyịn̄ esie ọnọ nnyịn man emem nnyịn utom ndisan̄a n̄kpere enye.

Bassey: Mbọk in̄wan̄ake mi.

 Anthony: Ọfọn, se enye ke usụn̄ emi ise: Ndi ufọn odu nnyịn ndidiọn̄ọ enyịn̄ Moses? N̄kọ ikposụk idọdiọn̄ọ enye nte owo emi akanamde Ididuot Inyan̄ abahade m̀mê nte owo emi Abasi ọkọnọde Ibet Duop. Kpasụk ntre ye Noah—ufọn ndidiọn̄ọ enyịn̄ esie? Ẹkpediọn̄ọ enye nte owo emi ọkọkọn̄de ubom anyan̄a mbonufọk esie ye mme unam. Jesus Christ ndien? Ndi nnyịn ikpọdiọn̄ọke enye nte owo emi okotode heaven edikpa man ẹfen mme idiọkn̄kpọ nnyịn?

Bassey: Ikpọdiọn̄ọ.

Anthony: Edi Abasi ama anam ẹwet enyịn̄ mmọ ke Bible man itịm idiọn̄ọ mmọ. Enyịn̄ mmọ anam mbụk mmọ okûtie nte n̄ke. Kpa ye emi nnyịn mîkekwe Moses, Noah, m̀mê Jesus ke enyịn, ndifiọk enyịn̄ mmọ anam nnyịn ikụt ke mmọ ẹkedi mme owo nte nnyịn.

Bassey: Ọmọdiọn̄ọ akanam n̄kereke n̄kpọ emi ntem. Se ata ikọ ke etịn̄ oro!

Anthony: Ntak en̄wen emi Mme Ntiense Jehovah ẹsikotde enyịn̄ Abasi ke ubọk ke ubọk edi oro. Iyom ndinam mme owo ẹbuọt idem ke Jehovah Abasi, ẹda enye nte Owo emi mmọ ẹkemede ndisan̄a n̄kpere. Edi isụk inanam mme owo ẹdiọn̄ọ ke ndibuọt idem ke Jesus edinam inyene edinyan̄a. Mbọk yak ikot itie Bible kiet en̄wen emi ọsọn̄ọde emi ise.

Bassey: Mfịna idụhe, kot.

Anthony: Ọfọn. Ikebem iso ikot John 14:6 emi Jesus ọkọdọhọde ke imọ idi “usụn̄ ye akpanikọ ye uwem.” Yak ifiak ika edem edem ikese se enye eketịn̄de ke John ibuot 14 ufan̄ikọ kiet. Mbọk kot ise utịt utịt ufan̄ikọ oro.

Bassey: Ọfọn. Ọdọhọ ete: “Ẹbuọt idem ye Abasi, ẹbuọt idem n̄ko ye ami.”

Anthony: Sọsọn̄ọ. Mbọk ndi emi ọwọrọ ke owo ekeme ndimemek owo emi enye amade ndibuọt idem? Oro edi, akpama afo ọbuọt idem ye Jesus, okponyụn̄ ama Jehovah afo ọbuọt?

Bassey: Ihih. Jesus ọkọdọhọ ibuọt idem ye Abasi inyụn̄ ibuọt ye imọ.

Anthony: Nnennen. Mmenịm n̄ko ke ọmọdiọn̄ọ ke nditetịn̄ ke inua ke imọbuọt idem ye Abasi ye Jesus ikemke. Ana nte idude uwem nnyịn owụt ke imọbuọt.

Bassey: Akpanikọ-o.

Anthony: Edi nso akpan n̄kpọ ke owo akpanam man enye owụt ke imenen̄ede ibuọt idem ye Abasi ye Jesus? Yak ineme oro mma mfiak ndi. *

Bassey: Ọfọn, nyebet fi.