Mme Andikot N̄wed Nnyịn Ẹbụp Ẹte . . .

Ntak Emi Abasi Ọkọdọhọde Ikọt Esie Ẹdọ Ekemmọ Ikọt Esie?

▪ Abasi ama owụk nditọ Israel ete ẹkûdọ mbon idụt oro ẹkekande mmọ ẹkụk. Enye ọkọdọhọ ete: “Kûdụk ediomi ndọ ye mmọ. Kûda eyenan̄wan fo unọ eyeneren esie, kûnyụn̄ uda eyenan̄wan esie unọ eyeneren fo.” (Deuteronomy 7:3, 4) Ntak emi enye okowụkde mmọ utọ ewụhọ emi-e?

Jehovah ama ọfiọk ke Satan oyom ndibiat ikọt imọ, nnam mmọ ẹtuak ibuot ẹnọ mme nsunsu abasi. Abasi ama anam mmọ ẹfiọk ke mme idụt oro ẹkekande mmọ ẹkụk ‘ẹyenam nditọiren mmọ ẹtre nditiene imọ, ẹnyụn̄ ẹnam n̄kpọ mme abasi efen.’ Emi akpabiat ekese n̄kpọ. Edieke nditọ Israel ẹkponode mme abasi efen, Abasi idimaha mmọ aba, idinyụn̄ ikpemeke mmọ aba. Mme asua ẹkpesọp ẹnam mmọ n̄kpọ. Mmọ ikponyụn̄ ikemeke ndibon Messiah emi ẹken̄wọn̄ọde. Ntak edi oro Satan okoyomde nditap nditọ Israel ẹdọ mbon oro mînamke n̄kpọ Abasi.

N̄kpọ efen oro anade iti edi ke Abasi ama ekere aban̄a ikọt esie kiet kiet. Enye ama ọdiọn̄ọ ke se idinọde owo mmọ kiet kiet inemesịt inyụn̄ inam n̄kpọ ọfọn enye edi ndisan̄a n̄kpere imọ. Ndi enyene se ikanamde Jehovah ọdọhọ ke ikọt imọ ndidọ owo emi mîtuakke ibuot inọ imọ ekeme ndinam mmọ ẹkpọn̄ imọ? Kere ban̄a uwụtn̄kpọ Edidem Solomon. Enye ama ọdiọn̄ọ se Jehovah eketịn̄de emi aban̄a edidọ iban esenidụt: “Mmọ ẹyewọn̄ọde mbufo esịt ẹtiene mme abasi mmọ.” Edi sia ọniọn̄ Solomon mîkenyeneke mbiet, etie nte enye ekekere ke imokpon ibe ndikop item Abasi mîdịghe ke item enye emi ibeheke imọ. Ntre, enye ama amia utọn̄ osio. Nso iketịbe? “Sụn̄sụn̄, iban esie emi [ẹma] ẹwọn̄ọde enye esịt . . . ẹtiene mme abasi efen.” Nso n̄kpọ mmọn̄eyet ke emi ekedi ntem! Emi ama anam Jehovah etre ndima enye, onyụn̄ anam ẹbahade ikọt esie.—1 Ndidem 11:2-4, 9-13.

Ndusụk owo ẹkeme ndidọhọ ke idịghe kpukpru mme okpono ndem emi ikọt Abasi ẹdọde ẹdiwọn̄ọde mmọ ikpọn̄ Abasi. Ke uwụtn̄kpọ, Mahlon eyen Israel ama ọdọ Ruth eyen Moab, ndien nte ini akade, Ruth ama akabade edi ata owo Abasi. Edi se Mahlon akanamde emi ekeme ndinam owo ọkpọn̄ Abasi. Bible inyụn̄ itoroke enye ke ndikọdọ owo esenidụt. Enye ama akpa idem mbemiso Ruth ọtọn̄ọde ndikpono Jehovah Abasi. Chilion eyeneka esie okonyụn̄ ọdọ n̄wan Moab emi ekerede Orpah. Orpah ikọkpọn̄ke “mme abasi esie.” Edi Boaz ọkọdọ Ruth ke enye ama akakabade edi andituak ibuot nnọ Jehovah ke anyan ini. Ke akpanikọ, mme Jew ẹkedi ẹdida Ruth nte ata eyen mmọ. Ndọ Boaz ye Ruth ekenen̄ede edi edidiọn̄ Abasi ọnọ mmọ mbiba.—Ruth 1:4, 5, 15-17; 4:13-17.

Ndi owụt ifiọk ndikere ke ndọ Mahlon ye Ruth owụt ke owo ekeme ndifụmi item oro Jehovah ọnọde ete idọ ekemmọ andinịm ke akpanikọ, inyeneke mfịna? Ndi oro ikponyụn̄ itiehe nte ndidọhọ ke mbre mfọniso ọfọn sia owo kiet ama ebre adia?

Bible ọdọhọ mme Christian ete ẹdọ ndọ “ke Ọbọn̄ ikpọn̄-ikpọn̄.” Enye ọdọhọ mme Christian oro ẹyomde ndidọ ndọ ete “ẹkûdian idem utịn̄e utịn̄e ye mmọ eke mînịmke ke akpanikọ.” Edi amaedi mbon oro ebe m̀mê n̄wan mmọ mînịmke ke akpanikọ, Bible eteme nte mmọ ẹkpedude uwem. (1 Corinth 7:12-16, 39; 2 Corinth 6:14) Kpukpru item emi ẹwụt ke Jehovah Abasi emi ọkọtọn̄ọde ndọ oyom nnyịn ikop inemesịt, edide imọdọ ndọ m̀mê idọhọ.