Ẹyarade Enye Emi Edịbede Akara Ererimbot Emi

“ẸMỌN̄ ẹsio andikara ererimbot emi ẹduọk.” Se Jesus eketịn̄de edi oro. Ekem enye ama adian do ete: “Andikara ererimbot emi ke edi. Enye inyụn̄ inyeneke odudu ke idemmi,” n̄ko ke “ẹma ẹbebiere ikpe andikara ererimbot emi.” (John 12:31; 14:30; 16:11) Anie ke Jesus eketịn̄ aban̄a?

Ke ini ikerede iban̄a se Jesus eketịn̄de, ana in̄wan̄-in̄wan̄ nte ke idịghe Jehovah Abasi Ete esie ke Jesus okokot “andikara ererimbot emi.” Anie ndien edi “andikara ererimbot emi”? Didie ke ‘ẹdisio enye iduọk’? Ẹkenyụn̄ ‘ẹbiere ikpe esie’ didie?

“Andikara Ererimbot Emi” Ayarade Idem

Kpa nte ndusụk etubom ubi ẹsikpọtde inua nte ke imenyene odudu, ntre n̄ko ke Devil akanam ke ini okodomode Jesus Eyen Abasi. Ke ama okowụt Jesus “kpukpru mme obio ubọn̄ isọn̄,” Satan ama ọdọhọ enye ete: “Nyọnọ fi ofụri odudu emi ye ubọn̄ mmọ, koro ẹma ẹyak enye ẹnọ mi, ndien ami nda enye nnọ owo eke mmade. Ke ntre, edieke afo atuakde ibuot ke iso mi, kpukpru ẹyedi okwo.”​—Luke 4:5-7.

Edieke Devil ekpedide idiọk ekikere emi esịnede owo ke esịt nte ndusụk owo ẹkerede, anie ndien okodomo Jesus? Ndi ama odu idiọkn̄kpọ emi ekesịnede Jesus ke idem odomo enye, mîdịghe, ndi n̄kpọ akafịna enye ke esịt ke ndondo oro enye anade baptism? Edieke edide ntre, Bible anam didie ọdọhọ ke “idiọkn̄kpọ ndomokiet idụhe enye ke idem”? (1 John 3:5) Jesus ikedehedei idọhọ ke Devil idụhe, edi ọkọdọhọ ke enye akam edi “andikara ererimbot emi,” ye “owotowo,” ye “osu nsu.”​—John 14:30; 8:44.

Ke isua 60 ẹma ẹkebe tọn̄ọ Devil okodomo Christ idomo, apostle John ama eti mme Christian adan̄a nte Devil okopde odudu. Enye ọkọdọhọ ke “ofụri ererimbot esịne ke idak odudu andidiọk,” afiak ọdọhọ ke andidiọk emi ada “kpukpru mme andidụn̄ isọn̄ otụn usụn̄.” (1 John 5:19; Ediyarade 12:9) Bible enen̄ede owụt ke “andikara ererimbot emi” edi spirit, ndien ke nnyịn ikemeke ndikụt enye. Edi odudu andikara emi okpon adan̄a didie ke idem mme owo?

Andikara Ererimbot Emi Edeme Ukara Ọnọ Mme Nsan̄a Esie

Ke ini apostle Paul ekewetde n̄kpọ aban̄a en̄wan emi mme Christian ẹn̄wanade mbak ẹdibiat mbuọtidem mmọ, enye ama asiak mbon oro ẹdide ata asua mmọ. Enye ọkọdọhọ ete: “Nnyịn imenyene en̄wan ndin̄wana, idịghe ye obụk ye iyịp, edi in̄wana ye mme ukara, ye mme odudu, ye mme andikara ekịm ererimbot emi, ye odudu ndiọi spirit ke enyọn̄.” (Ephesus 6:12) Ntre, owo in̄wanake en̄wan enye emi ye “obụk ye iyịp,” edi ẹn̄wana ye “odudu ndiọi spirit.”

Mme Bible oro ẹkabarede idahaemi ẹwụt ke “odudu ndiọi spirit” emi idịghe ndiọi ekikere emi esịnede owo ke esịt, edi ke ẹdi mme okopodudu ndiọi angel. Emi ọwọrọ ke ebịghi Devil ọkọtọn̄ọ ndida mme ọsọn̄ibuot angel emi ẹkekpọn̄de “nnennen ebietidụn̄ mmọ” ke heaven n̄kara ererimbot emi.​—Jude 6.

N̄wed Daniel owụt ke mmọ ẹketọn̄ọ  ndikara ererimbot emi toto ke eset. Ima oro prọfet Daniel akamade nditọete esie emi ẹkenyọn̄de ntan̄mfep ke Babylon ẹdi ke isua 537 M.E.N. ama anam enye ada ofụri urua ita ọbọn̄ akam ke ibuot mmọ. Angel emi Abasi ọkọdọn̄de utom ọnọ prọfet emi ama editịn̄ se ikọbiọn̄ọde imọ ke usụn̄. Enye ọkọdọhọ ete: “Ọbọn̄ obio ukara Persia ama ọbiọn̄ọ mi ke usen edịp ye kiet.”​—Daniel 10:2, 13.

Anie ekedi ‘ọbọn̄ Persia’ emi? Imọdiọn̄ọ ke idịghe Cyrus edidem Persia ke angel emi eketịn̄ aban̄a koro edidem emi akakam ọfọfọn ido ye Daniel ye ikọt esie. Ke adianade do, didie ke owo ekpekeme ndibiọn̄ọ angel ke ofụri urua ita ke ini angel kiet akadade okoneyo kiet kpọt owot mme okopodudu mbonekọn̄ 185,000? (Isaiah 37:36) ‘Ọbọn̄ Persia’ emi ekedi asan̄autom Devil, oro edi, demon emi Devil ọkọnọde odudu ndikara Persia. Angel oro ama ọdọhọ ke imọ iyafiak ikan̄wana ye “ọbọn̄ Persia,” ekem ifiak in̄wana ye demon en̄wen emi akarade Greece, emi ẹkotde “ọbọn̄ Greece.”​—Daniel 10:20.

Nso ke kpukpru emi ẹwụt? Emi owụt ke enyene mbon emi nnyịn mîkwe emi ẹtienede etubom mmọ, Satan kpa Devil, ẹkara ererimbot emi. Edi nso idi uduak mmọ?

Andikara Ererimbot Emi Owụt Owo Emi Imọ Idide

Apostle John etịn̄ ke n̄wed Ediyarade emi edide akpatre n̄wed ke Bible nte Jesus emi edide Michael Etubom mme angel akande Devil ye mme demon esie osion̄o mmọ ọduọn̄ọ mi ke isọn̄. Enye etịn̄ n̄ko ukụt oro esịmde isọn̄ ke ntak emi ete: “Mbọm isọn̄ . . . koro Devil omosụhọde etiene mbufo, enye asan̄a ye akwa iyatesịt, sia enye ọfiọkde ete ini imọ edi ibio.”​—Ediyarade 12:9, 12.

Didie ke Devil owụt ke esịt enen̄ede ayat imọ? Kpa nte ndiọi mbon n̄wo ẹsiyomde ndikara kpukpru se mmọ ẹkemede nnyụn̄ nsobo se mmọ mîkemeke ndikara, Devil ye mme demon esie ẹnen̄ede ẹyom ndisobo isọn̄ emi ye mme andidụn̄. Sia enye ama ọkọfiọk ke ini imọ edi ibio, enyene akpan n̄kpọ kiet ke ererimbot emi, emi Devil amade ndida n̄kara mme owo, oro edi, ikpọ mbubehe ererimbot emi. Enye ada ikpọ mbubehe ererimbot emi anam mme owo ẹma inyene, ndien edu emi iyakke n̄kpọ osụhọ aba ke isọn̄ emi, inyụn̄ iyakke isọn̄ emi edi aba se owo odụn̄de.​—Ediyarade 11:18; 18:11-17.

Tọn̄ọ ẹkebot owo, se ikụtde ke mme ido ukpono ye ukara ẹwụt nte Devil oyomde ukara ke odudu. N̄wed Ediyarade ọdọhọ ke ukara ererimbot emi etie nte idiọk unam emi Devil ọnọde “akwa odudu.” Enye n̄ko owụt ke nte mbon ido ukpono ẹnanade iso o-bụt ẹsịn idem ke mbre ukara onyụn̄ edehe nte usan̄a akpara. (Ediyarade 13:2; 17:1, 2) Kere kpukpru ufịk ye ekọn̄ oro ẹdade uwem ediwak miliọn owo ke ediwak isua emi ẹbede. Ndi odu eke okposụk ọsọn̄de esịt ọdọhọ ke owo owo edi ntak ofụri enyene-ndịk n̄kpọ oro ẹtịbede ke ererimbot emi? Ndi ikam iwụtke ifiọk ndinịm ke ndiọi spirit oro owo mîkwe ẹdịbe ẹdọk ofụri ubi emi?

Bible ayarade enye emi edịbede ọnọ mme andikara ererimbot emi ndausụn̄. Edide mmọ ẹfiọk m̀mê ifiọkke, kpukpru se ikade iso ke ererimbot ẹwụt ke andikara ererimbot emi enen̄ede oyom ndikara kpukpru se enye ekemede nnyụn̄ nsobo se enye mîkemeke ndikara. Edi adan̄a didie ke Devil edisụk ikara mme owo inyụn̄ inọ mmọ ufen?

Ukara Devil Ọmọn̄ Ebebe

Se Christ akanamde ke ini enye okodude ke isọn̄ okowụt ke ibịghike ẹyesobo Devil ye mme demon esie. Ke ini mme mbet Jesus ẹketịn̄de ẹnọ enye nte mmimọ ikebịnde mme demon ision̄o mme  owo ke idem, enye ama ọdọhọ mmọ ete: “Mma n̄kụt Satan otode ke heaven ọduọ nte emịnen̄mịnen̄.” (Luke 10:18) Jesus eketịn̄ emi ye idatesịt ndiwụt nte imọ idikande andikara ererimbot emi ke ini emi imọ idifiakde inyọn̄ heaven ikedi Michael Etubom Mme Angel. (Ediyarade 12:7-9) Edieke etịmde odụn̄ọde mme ntịn̄nnịm ikọ Bible, oyokụt ke ekọn̄ emi eketịbe ke heaven ke 1914 m̀mê esisịt ini ke oro ebede, * ndien ke Jesus ama akan.

Ọtọn̄ọde ke usen emi ẹkesiode Devil ẹduọk ke isọn̄ emi, enye ama ọfiọk ke usen nsobo imọ ibịghike aba. Ndien kpa ye emi “ofụri ererimbot esịnede ke idak odudu” esie, enyene ata ediwak owo emi mîyakke enye otụn mmimọ usụn̄. Bible anam mmọ ẹfiọk utọ owo emi Devil edide ye mme n̄kukan esie. (2 Corinth 2:11) Mmọ ẹsida se Paul eketịn̄de ọnọ ekemmọ mme Christian ẹdọn̄ idem esịt. Paul ọkọdọhọ ete: “Abasi emi ọnọde emem ayanuak Satan ke idak ikpat mbufo ke mîbịghike.” *​—Rome 16:20.

Ukara Devil ọmọn̄ ebebe efep. Ke ini Christ edikarade, ndinen owo ẹyenam isọn̄ emi, kpa ndamban̄a udoriukot Abasi, akabade paradise. Afai, usua, ye idiọkitọn̄ ididụhe aba ke nsinsi. Bible ọdọhọ ke “owo iditịghi aba mme akpa n̄kpọ” emi ẹkebede ẹfep. (Isaiah 65:17) Kere nte uwem edinemde mbon emi mîyakke ndedịbe andikara ererimbot emi akara mmimọ.

[Mme Ikọ Idakisọn̄]

[Se ẹwetde ke ikpọ abisi ke page 9]

Ke ini Christ edikarade, ndinen owo ẹyenam isọn̄ emi akabade paradise