Se Idinọde Uwem Fo Ufọn Idahaemi ye ke Nsinsi

AFO emekeme ndidu uwem emi enyenede ufọn idem idahaemi. Didie? Se idin̄wamde fi edi ndida nti edumbet emi ẹdude ke Ikọ Abasi, kpa Bible, ndu uwem. Ẹyak ise ndusụk edumbet emi.

EDUMBET BIBLE: Edidem Solomon ekewet ete: “Idụhe se ifọnde ye owo ikan ndidia nnyụn̄ n̄n̄wọn̄ nnyụn̄ nnam ukpọn̄ esie okụt se ifọnde ke ọkpọsọn̄ utom esie.”—ECCLESIASTES 2:24.

Abasi okobot nnyịn ndikop inem nti utom. Idem ekpededi n̄kpọ ọsọn̄ didie, afo emekeme ndisụk n̄kop inem uwem edieke esịnde idem anam akpanikọ ke utom fo.

EDUMBET BIBLE: “Inemesịt odu ke ndinọnọ akan ke ndibọbọ.”—UTOM 20:35.

Ediwak owo ẹkụt ke ndida ini ye odudu mmimọ n̄n̄wam mbon oro ẹnyenede mfịna esinem onyụn̄ anam uwem enen̄ede enyene ufọn. Solomon ekewet ete: “Kûtre ndinam eti n̄kpọ nnọ mbon oro ẹyomde un̄wam, ke ini ubọk fo ekemede ndinam.”—Mme N̄ke 3:27.

Da Ralph ke uwụtn̄kpọ. Enye ama etiene n̄wan esie anam utom ukwọrọikọ ofụri ini ke enye ama ọkọkpọn̄ utom. Mmọ ẹsibiat ediwak hour kpukpru ọfiọn̄ ẹkwọrọ ikọ Abasi ẹnyụn̄ ẹkpep mme owo Bible. Ralph ọdọhọ ete:  “Idem esimem nnyịn ke ini isịmde ufọk ke mbubreyo. Idịghe usọn̄ kpọt esinam idem emem nnyịn, edi ndida ofụri odudu nnyịn nnam utom Ete nnyịn eke heaven esitiene anam. Utọ mmemidem emi ọfọn!” Enye ye n̄wan esie ẹnen̄ede ẹkop inem uwem sia mmọ ẹsisụk ẹkere nte ikpan̄wamde mbon en̄wen.

EDUMBET BIBLE: “Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.”—MME N̄KE 17:17.

Esimem utom ndiyọ mfịna ke ini inyenede eke itịn̄de mfịna nnyịn inọ. Francis Bacon, owo akwaifiọk kiet, ekewet ete ke owo emi mînyeneke ata ufan etie nte owo emi osopde ke akai. Ndinyene ata ufan—nnyụn̄ ndedi eti ufan—ekeme ndinam ikeme ndiyọ mfịna, onyụn̄ anam uwem enem.

EDUMBET BIBLE: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.”—MATTHEW 5:3.

Jesus eketịn̄ ata akpan n̄kpọ emi ikpanamde—oro edi, ndifiọk nnyụn̄ nyom se inanade ke “n̄kan̄ eke spirit”—edieke iyomde ndikụt ini emi mme unwọn̄ọ Abasi ẹdisude. Sia nnyịn mîdịghe unam, kpukpru nnyịn imesiyom ndifiọk ntak emi idude uwem. Jehovah Abasi ikpọn̄-ikpọn̄ ekeme ndinam ifiọk emi, ndien enye anam ẹwet emi ke Bible. Kpa nte ima iketetịn̄ ke ibuotikọ emi ekebede, Bible etịn̄ se Abasi aduakde aban̄a isọn̄ emi. Enye etịn̄ n̄ko ntak emi idude uwem, ntak ibọde ufen, ye se Abasi oyomde nnyịn inam. Ndifiọk akpanikọ oro Bible ekpepde mi ekeme ndinam ikop inem uwem inyụn̄ idu uwem emi enyenede ufọn. Mbon emi ẹsisiode ini ẹnịm ẹkpep Bible ẹnyụn̄ ẹnam se mmọ ẹkpepde ẹsikop inem uwem. Didie? Koro emi ẹsinam mmọ ẹnen̄ede ẹkpere Andibot, kpa Jehovah emi edide “Abasi inemesịt”—1 Timothy 1:11.

EDUMBET BIBLE: “Ti Akwa Andibot fi ke ini afo edide akparawa, mbemiso mme usen afanikọn̄ ẹdide, m̀mê mme isua eke afo edidọhọde ete: ‘N̄kwe inem ke esịt.’”—ECCLESIASTES 12:1.

Item emi Edidem Solomon ọkọnọde n̄kparawa emi ẹfrede ke afanikọn̄ ekeme nditịbe ini kiet ekededi, enyene ufọn ọnọ kpukpru nnyịn. Edieke etide Andibot ke se ededi oro anamde, emi ayanam uwem fo enen̄ede enyene ufọn. Kûtiene mbon oro ẹdọhọde “ẹyak nnyịn idia inyụn̄ in̄wọn̄, koro nnyịn iyakpa n̄kpọn̄.” (1 Corinth 15:32) Ecclesiastes  8:12 ọdọhọ ke edieke enịmde Abasi akpa ke kpukpru se anamde, ke n̄kpọ ‘ọyọfọn ye afo.’

N̄kaiferi kiet emi ekerede Wendi okụt nte itien̄wed emi edide akpanikọ. Enye ye ekpri eyeneka esie an̄wan ẹma ẹkpep Spanish ke ini mmọ ẹkedide n̄kaiferi man ẹkeme ndika n̄kọkwọrọ ikọ ke Dominican Republic emi ẹkenen̄erede ẹyom mme ọkwọrọ eti mbụk. Enye ọdọhọ ete: “Ima iyak ediwak n̄kpọ ẹtak nnyịn man ikeme ndika n̄kodu do, ndien uwem ama enem etieti. Idụhe n̄kpọ efen oro n̄kpakanamde ke ọfiọn̄ itiokiet oro, emi ọkpọkọfọnde akan oro! Edidiọn̄ oro ikenyenede okpon akan se ikayakde atak nnyịn.”

Ndisọn̄ọ Nda ye Abasi Anam Uwem Enyene Ufọn

Ndinam ufan ye Jehovah ekeme ndinyene ata akpan ufọn ke uwem fo. Didie? Ke adianade ye ndikanam Adam ye Eve ẹsọn̄ ibuot ye Abasi, se Satan eketịn̄de okowụt ke owo ndomokiet idisọn̄ọke ida ye Abasi ke ini nsọn̄ọn̄kpọ. (Job 1:9-11; 2:4) Afo emekeme ndiwụt ke Satan okosu nsu. Didie? Ana ọsọn̄ọ ada ye Abasi, okop item esie, owụt ke imọfiọk ke Jehovah ikpọn̄-ikpọn̄ enyene unen ndibiere se ifọnde ye se idiọkde.—Ediyarade 4:11.

Iyọyọ ediwak ukụt edieke iyomde ndinam se inende. Ndi ukụt emi ekeme ndinam uwem nnyịn okûnyene ufọn? Nso ke akpanam edieke ata idiọk asua ọdọkde edima ufan m̀mê iman fo edidọk. Ndi ekpekere ke uwem fo inyeneke aba ufọn edieke okụtde ukụt ke ntak emi anamde mme owo ẹfiọk ke asua oro okosu nsu? Imọdiọn̄ọ ke ukpukereke! Edikam inenem fi ndiyọ ukụt oro nnam mme owo ẹdiọn̄ọ ke enye okosu nsu. Ukem ntre ke edi ye ndisọn̄ọ nda ye Abasi. Nnyịn ndisọn̄ọ nda kpa ye ukụt oro ikụtde ke ererimbot ananam esịt Abasi adat.—Mme N̄ke 27:11.

Uwem Oro Enyenede Ufọn ke Nsinsi

Biere ndikpep ofụri se ekekeme mban̄a Abasi ye uduak esie. Jesus Christ ọkọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Mbon emi ẹkade iso ẹnam n̄kpọ Jehovah ẹyedu nsinsi uwem ke Paradise ke isọn̄ emi kpa nte Abasi akaduakde. Ini oro ndien ke uwem emi edinen̄ede enyene ufọn onyụn̄ enem.—Psalm 145:16.

M̀mọ̀n̄ ke ekeme ndikụt ifiọk oro Jesus eketịn̄de aban̄a? Edikụt ke Bible, kpa n̄wed emi ẹkedade spirit Abasi ẹwet. Edieke oyomde ẹn̄wam fi enyene ifiọk emi, mbọk emekeme ndiwet mbon oro ẹsiode magazine emi. Mmọ ẹyekop inemesịt ndidọn̄ owo edin̄wam fi ọfiọk se Bible enen̄erede ekpep.