Nso Idi Eti Mbụk?

“Eti mbụk . . . emi.”—MATTHEW 24:14.

ANA kpukpru Christian ẹkwọrọ “eti mbụk obio ubọn̄,” ẹnam mme owo ẹfiọk ke Obio Ubọn̄ Abasi ayakara isọn̄ emi ke edinen usụn̄ ke ini iso. Bible etịn̄ aban̄a “eti mbụk” ke nsio nsio usụn̄. Ke uwụtn̄kpọ, ẹtịn̄ ẹban̄a “eti mbụk edinyan̄a” ke Psalm 96:2, ye “eti mbụk Abasi” ke Rome 15:16, ye “eti mbụk emi aban̄ade Jesus Christ” ke Mark 1:1.

Ke nditịn̄ ibio ibio, eti mbụk abuana kpukpru akpanikọ emi Jesus ekekpepde, emi mme mbet esie ẹkewetde. Jesus ọkọdọhọ mme mbet esie mbemiso ọdọkde heaven ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Ntre, utom ata mme Christian idịghe sụk ndikwọrọ mban̄a Obio Ubọn̄ emi, ana mmọ ẹsịn ofụri ukeme n̄ko ẹnam mme mbet.

Didie ke mme ufọkabasi ẹnam emi? Mbon emi mîdiọn̄ọke se Obio Ubọn̄ emi edide ikemeke—ndien ata ediwak owo idiọn̄ọke—ndikpep mbon en̄wen nnennen nnennen se enye edide. Utu ke oro, mmọ ẹsikwọrọ se mme owo ẹmade ndikop, ẹkwọrọ edifen mme idiọkn̄kpọ ye mbuọtidem ke Jesus. Mmọ ẹsinam utom mfọn utọ nte edibọp ufọkibọk ye ufọkn̄wed, ẹnyụn̄ ẹbọp ufọk ẹnọ mme ubuene man ẹkọ mbet. Imọfiọk ke ndinam emi ekeme ndinam mme owo ẹwak ke ufọkabasi, edi emi inamke mme owo ẹdi ata mme Christian emi ẹnamde n̄kpọ Abasi ke ofụri esịt nte Jesus ekekpepde.

Ekpep ukpepn̄kpọ ido ukpono kiet ọkọdọhọ ete: “Iwakke mme ekpep n̄kpọ mban̄a Bible m̀mê mme adaiso ido ukpono emi mîfiọkke ke ana mme Christian ẹkọ mbet ẹnọ Jesus ẹnyụn̄ ẹkpep mme mbet emi ndinam kpukpru se Jesus eketemede. . . . Koro Jesus ama enen̄ede anam emi an̄wan̄a. Nnyịn mîkam idomoke-domo ndinam se Jesus ọkọdọhọde inam. Onyụn̄ ekeme ndidi nnyịn idiọn̄ọke nte ikpanamde ewụhọ emi.”

Ekpere ndidi kpukpru mbon Catholic ke United States emi ẹkenamde ndụn̄ọde ye mmọ ẹnyịme ke ana kpukpru mme Christian ẹkwọrọ eti mbụk. Ndien ekpere ndidi kpukpru mmọ ẹkere ke mfọnn̄kan usụn̄ ndinam emi edi ndidu eti uwem, ndi uwụtn̄kpọ nnọ mbon en̄wen, idịghe nditetịn̄ ke inua. Owo kiet ke otu mmọ ọkọdọhọ ete: “Ukwọrọikọ iwọrọke nditịn̄ ikọ, ọwọrọ owo ndidi Eti Mbụk.” Mme andisio U.S. Catholic magazine emi ẹkenamde ndụn̄ọde emi ẹdọhọ ke “idiọk enyịn̄ emi oburobụt ido idan̄ ye nsọsọn̄ ukpepn̄kpọ ọnọde ufọkabasi” iyakke ediwak mme aka ufọkabasi ẹkeme nditịn̄ se mmọ ẹnịmde nnọ mbon en̄wen.

Bishop Methodist kiet ke ebiet en̄wen ama eseme nte ubahade ye ndutịme okponde ke ufọkabasi mmimọ, nte mmimọ mînyeneke uko ndinam utom mmimọ, inyụn̄ idude uwem nte mbon emi mîkaha ufọkabasi. Enye ama obụp ata mbọm mbọm ete: “Mmanie ẹdi ata mbon oro ẹkwọrọde eti mbụk Obio Ubọn̄?”

Bishop oro ikọbọrọke mbụme emi. Edi ibọrọ mmọdo. Oyokụt ibọrọ mbụme emi ke ibuotikọ oro etienede.

[Se ẹwetde ke ikpọ abisi ke page 6]

Eti mbụk aban̄a Obio Ubọn̄ Abasi ye nte ndibuọt idem ke Jesus Christ ekemede ndinam inyene edinyan̄a